أنا بعيد على البلاء والبلاء لاحقني

[مشكلتي]

السلام عليكم ورحمة الله
مشكورين قبل كل شيء على طرح هذه المساحة
أنا فتاة في 21كنت مع واحد وخطبني لينا تقريبا 3 سنوات مع بعض وبما أنو إنسان يحب الصراحة والله ماخبيت عليه
ولهذا السبب حكيتلو بلي كنت نعرف واحد كان يقرا في الجامعة وانا كنت في ليسي وكانت بيننا علاقة عابرة يعني ربي لي يشهد لوكان ماجا هذا الصح مانحكيه وفتتها وكلي مكان والو وديما يسقسيني ونحكي نفس الهدرة
المهم اليوم فاجئني وقلي لحقتني هدرة بلي كنتي مع واحد وديما يدك في يدو في نص الجامعة وللعلم انا خطيبي تعرفت عنو في اول سنة لي في الجامعة
قالي لحقتني من وحدة وقاتلو بلي كانت مع واحد وديما مع بعضهم :s
شوكاوني ...ههه..قتلو وش كون هي قلي متحبيش تفهمي
المهم راح ندير تحريات ومبعد تعرفي شكون هي..وللعلم سمعتي باهية في كل مكان وهي قاتلو بلي مش مليحة ونتاع الناس كامل هوووه مالهم الناس والله جاتني نورمال بويسك عمبالي بروحي وش درت انما اتهام كما هذا.؟!؟؟؟ دوخني مزدتش حتى كلمة معاه وقتلو الله يسهل دير لونكات ودز معاهم انت وهي انا متيقنة من روحي مي محبش يقولي وش كون هي هاذي النمامة ...حسبي الله ونعم الوكيل

 

[عاشقة الكرة]

رد: أنا بعيد على البلاء والبلاء لاحقني

السلام عليكم
اختاه هذه الفتاة تريد بك الهلاك والله مالقيت وش نقلك ولا كفاه ننصحك بلاك الاخوة يفيدوك ربي يوفقك ويبعد عليك بنات وولاد الحرام
بالتوفيق

 

[♫الباحثة عن الحظ♫]

رد: أنا بعيد على البلاء والبلاء لاحقني

مرحبا اختي
واش راح اديري عباد ربي يحلو غير يفسدو هاددي يا وحدة تكرهك يا عينها على خطيبك وباغيته
هو تاني عيب عليه كيفاه مين جا خطبك تبالي عارف بلي بنت فاميليا و سقسا عليك ولا راني غالطة
النساء واعرين تخافي تلعب على عقله ردي بالك
بلوس سوق النساء يخليه للنساء اعلاه يروح يسمع للهدرة نورمالمو يحطلها حد
بالتوفيق

 

[Salam Fleur]

رد: أنا بعيد على البلاء والبلاء لاحقني

السلام عليكم

شوفي اختي في الحكاية تاعك خرجت باستنتاجين

الاول : يا اما ماتكونش كاينة حتى طفلة وانما هو لي دارلك هكاك حتى يجربك .....
الاستنتاج الثاني : انه صح كاينة لي حابة تفسد عليك

وفي كلا الاستنتاجين عندي النتيجة واحدة

الراجل لي مايديرش فيا الثقة مستحيل تكون بيناتنا معيشة .... الثقة هي الاساس في بناء العلاقة ....

انت دركة وكلي ربي سبحانه و فوضي امرك ليه .....وعسى أن تكرهوا شيئا وهو خير لكم و عسى أن تحبوا شيئا و هو شر لكم و الله يعلم و انتم لا تعلمون ...... خليه يدير مابالوا بصح لازم تحطي النقاط على الحروف ... وهو لو جا عنده عقل ما يجيش يهدر معاك بالطريقة هاذيك كانه راه يتهم فيك ......

نصيحة اخرى ردي بالك من المحيطين بيك ماتقولي صاحبتي ني بنت خالتي ني بنت عمتي .....

ربي يعينك اختي و يبعد عليك ولاد الحرام​

 

[بنفسج]

رد: أنا بعيد على البلاء والبلاء لاحقني

السلام عليكم
اعجبني كثيرا رد الاخت سلام فلور ونتفق معاها هو نورمالمو واثق فيك وفاخلاقك وخاطبك يعني رح تكوني زوجتو وتحملي اسمو كيفاش علاجال وحدة باينة نيتها بلي الشر يجي ويقلك هاك والله مافهمت هادا لامعادش جابها من عندو كيما قالت اختي سلام وحاب يتاستيك المهم انتي واثقة من روحك راها باينة اللى دارت هاك غايرة منك لو كان جا صح يحبك راه ميتهمكش واللى قاتلو عليك هاك راه مسح بيها الارض ربي يريح بالك ويبعد عليك البلاء
تحياتي لك

 

[Perle Blanche]

رد: أنا بعيد على البلاء والبلاء لاحقني

السلام عليكم
الماضي يبقى حاجة تخصنا و مش من حق اي واحد يعرفهاا عليناا
نتيا كنتي مع اللول متحكيش فيه خلاص كي سقساك كنت تجاوبني بلي كل واحد فينا عندو حاجة تخصوو
هو علاه يربش و يحوس ويسقسي واش الغاية من هاذ الحاجة
انا في بالي مكان حتى واحد خبروو غير هو لي راه حاب يدير قصة خلاص
و الا كاين صح لي خبرو ناس ذركا متحبلكش الخير الغيرة أـقل حاجة تديرلك ألف مشكل
ايه المرة الجاية كي يحكي معاك قوليلو الناس قبل متخطب تسقسي مش بعد متخطب و تبقاا تخرب فلي خاطيهاا
قادرة تفوتي الحكاية اليوم و غدوا مي صدقيني رايحة تبقى ديما بيناتكم على المدى البعيد
مي حاولي نتياا كي يحكيلك فيها متسمعيهش يعني اسمعي منا و طيشي مناا بلاك هو من روحوو يولي يركح شوية
الله يتتم بينكم فالخير و يجمع بينكم يا رب
​

 

[rycerz]

رد: أنا بعيد على البلاء والبلاء لاحقني

اللهم أصلح أمورنا و اهدنا يا أرحم الراحمين.
​

 

[ضيوف وسـنغادر]

رد: أنا بعيد على البلاء والبلاء لاحقني

ربي يهدي من ارادت الفساد بينكما
انت متيقنة بروحك ...حاولي تقنعيه...وادا ماحبش اسما ماش ثايق فيك
وواحد مايثيقش فيك واش بقا ؟
ان شاء الله ربي يفرج كربكم وادا ريتي صح بلي عزيز عليك ومازلازموش يروح حاولي تحكميه وتقنعيه...وهدا ما يدل الا على قلقه وحبه لك
لكن ادا كان مصر ....قوليلو السلام​

 

[قوية بربي]

رد: أنا بعيد على البلاء والبلاء لاحقني

الناس لا ترمي من الشجر إلا المثمر بخصوص البلاء لاحقك
الموضوع بسيط
كما ذكروا الأعضاء قبلي
الماضي ماضي وخطيبك لا يحق له أن يحاسبك على شيء مضى وانتهى
انت مسئولة أمامه عما يحدث بعد الخطوبة وما سيحدث بعد الزواج
هذا مبدأ يجب أن يكون واضح لديه
ثرثرة البنات الفارغات كثيرة ومن المخطأ أن يترك أذنه مفتوحة للجميع


وفقك الله و يسر أموركما
هذه المشكلات غالباً ملح الخطوبة
تمر وتنتهي أمام التفاهم والصبر والتجاوز وأهم شي الثقة
​

 

[¬Đỉaмơŋđ ✿]

رد: أنا بعيد على البلاء والبلاء لاحقني

وعليكم السلام ورحمة الله تعالى وبركاته

الثقة أسآس نجآح وإستمرآر أي علآقة مهمآ كآنت.. 3 سنين ونتومآ مخطوبين تزعزعت ثقتو فيك بمجرد سمآع كلآم نسوآن ؟؟
المفروض الرجآل يترفعو عن حكآيآت القيل والقآل تآع النسآء،تولهي منهآ هآد الطفلة مآرآهيش نآوية على خير..ربي يكفيكِ شرهآ وبلآهآ
نتمنآو يكون الخلآف هذآ سحآبة صيف عآبرة وإن شاء الله تتوضح أموركم ..
ربي سبحآنو يعرف نيتك وهذآ يكفيكِ،الله يبعد عليك شر الحسد والحآسدين
​

 

[Hakan]

رد: أنا بعيد على البلاء والبلاء لاحقني

والله لا عقلية الدراري هاذي انا شخصيا راني حاير في جدهاا
الله يباارك خطبك فب الحلال وانت كي البهلولة زعما رمنسية وصرااحة وما علاباليش بالخرطي لاخر
بكل فخر قلتيلو كنت نمشي مع وااحد وهو ثانيك كي الرااجل يسقسي على الزوجة نتااعو
وكيفااش كانت علاقاتها منين كانت في الثانوية
ويسقسي فيها وااش كان يجيبلك وواش كان يقلك اسكو كان متهلي فيك
وانت الله يباارك تجاوبي فيه بكل صرااحة كانو
الراجل راحت منو الرجولة والطفلة راحت منها الحشمة
ختي نقلك كلمة انت ولا غيرك من النااس اللي يلعبوها مخطوبين ويلعبوها متزوجين
ويحكيو على المااضي نتاع كل وااحد
والله غير راكم مرضى نفسياا بكل ما تحمله الكلمة من معنى
لانو الراجل اللي ما يغيرش نهار تقلو زوجتو بلي كنت نمشي مع وااحد
والمراة اللي تقلل الحيااء نتاعها وتجاوب على هذا السؤال انا شخصيا نقلهم روحو ديرو اعادة تأهيل
للانفس نتاعكم

وزيد الحااجة اللي دوختني انت الله يباارك قلتيلو دز معاهم وكانو هذا خطيبك صحبتك اللي تحكي معاها ماهوش رااجل
وهو هذا الرااجل كي البهلول يروح يجيب حكايات النسواان ويحكيهم ووجهو صحيح يقول لحبيبتو وزوجتو راهم قالولي عليك

تبا لهكذا كاليتي يوجعو القلب نتاع الصح



نحكي على روحي وهذي قااعدة ديتها في حياتي الوااحد صح ممكن يحب طفلة وبجنون لكن نهار يخطب بنت النااس الحب نتاعو
يرميه في الزباالة اما راجل يمشي مع بنات النااس ومن بعد يحكي لزوجتو بلي كانت عندو حبيبتو هذي قلة رجولة وقلة مرووءة

والمراة اللي عشقت رااجل في صغرها وشكون اللي ما تعشقش ماذا بيه نهار تتزوج ترمي الحثالة نتاع الحب في لابوبال
وتعيش مع الرااجل اللي خيرها في الحلال


المااضي دارو ربي سبحانو بااش نستروه ماشي باه نفتاخرو بيه ونحكو عليه باسم الرمنسية ونصفي روحي والصرااحة ومجموعة الخرطي هاذيك


ربي يهنيك ختي ....




ملاحظة :

راني ما عطيتش حلول لانو اصلا ماكانش مشكل ....​

 

[نقاء الورد]

رد: أنا بعيد على البلاء والبلاء لاحقني

مرحبا اختي
سمحيلي نقلك بلي راكي غالطه لانو مهما كان راجلك او خطيبك متفهم احنا كمجتمع شرقي فينا الغيرة الزايدة تروحي تقوليلو كنت مع واحد وتفسريلو في لحكاية؟؟؟وراكي قلتي قصة عابرة ومدرتي فيها والو صح من ماضيك بصح ماضي منسي خاطر بديتي حياة جديدة معاه
انا وحدة من الناس لوكان يقلي خطيبي مثلا بلي كان مع طفلة وحبو بعضاهم وتفرقو هنا تشعل فيا النار سمحيلي .......صح متفهمة ومراحش نبينلو بصح راح تبقى تلعبلي في الراس ومتدخليش ها الشي في الثقه مهما كنت نوثق فيه راح تكون غيرتي اكبببببببر
تاني حاجة هو مهوش منطق لي حكى بيه خاطر يوثق فيك يكلمك بطريقة اخرى درك راكي خطيبتو وراح تكوني زوجتو وتحت سقف واحد كيفاه يجي يقلك حكولي عليك وو ووو مهيش قااع عقلية هادي
اعرفي كيفاه تتصرفي وخليك قوية مدامك واثقة من نفسك
الله يهدي وربي يصلح حالكم

تقبلي مروري​

 

[*amina*]

رد: أنا بعيد على البلاء والبلاء لاحقني

انتي دخلتيلو الشك في راسو حتى راه يدير هكدا انتي شكون قلك احكيلو هدا امر كان خاص بيك انتي قبل متعرفيه وبعدما عرفتيه كان المفروض بيك تمسحي الماضي من راسك خلاص وتبداي علاقتك معاه بنية صافية
انا مش راح نلومو لانو مهما كان راجل راح نلومك انتي هي السبب في هدا المشكل ربما نكون قاسية نوعا ما عليك بصح ملازمش الماضي نبقاو متعلقين بيه تكون لحظات وين لازم ننساوه ونبداو الحاضر ونمشو للمستقبل
ربي يبعد عليك البلا اختي

 

[همس الوُرود]

رد: أنا بعيد على البلاء والبلاء لاحقني

السلآم عليكم~

إيه ربي يكون فالعون..​

 

[iman-dz4ever]

رد: أنا بعيد على البلاء والبلاء لاحقني

ربي يبعد عليك شر الناس اختي
​

 

[بقايا إنسان]

رد: أنا بعيد على البلاء والبلاء لاحقني

سلام الله عليكم ورحمة الله وبركاته وبعد:اختنا الكريمة أنتي قلتلي في كلامك انك كنت مخطوبة لواحد وهذا راه في الماضي يعني في الوقت الحالي واش هي وضعيتك بالنسبة ليه؟؟؟
حاجة تانية وهي:أنت فتحتي كتاب اعترافك لهذا الخطيب أما غيرك فخاذ في التفاصيل وان زاد من عندو فهذا لاينفي انك كنتي مع حد قبل هذا يعني انت لازم تتحملي واش قال غيرك فيك وإن افترى عليك خاطر انت من اعطاه الفرصة
حاجة اخرى والي هي لازم يتحاسب عليها خطيبك وهي: من اين جاب لنفسو شرعية حتى يكلم وحدة ما تربطو بها حتى صلة شرعية؟ممكن لو يشفوهم الناس مع بعض يقولو فيهم كلام كبير ويتقال عليها هي انها كانت مع واحد وهو مع وحدة اخرى
لوتعملو برايي عجلو بالزواج راه الناس شبعت فيكم تفراج

 

[دعاء الجنات]

رد: أنا بعيد على البلاء والبلاء لاحقني

اذا يحب "صح" محال يسمع كلام الناس بلا مايشوف بعينيه + واش من حق يعطيه يتكلم مع فتاة اخرى غيرك ويصدقها ويكذبك انت؟
في هذا الخطيب خلل هو لي يعرفو ماشي حنا