ربي يخليكم انصحوني

[ام ريتاج 2013]

السلام عليكم و رحمة الله تعالى و بركاته
انا سيدة ابلغ من العمر 25سنة متزوجة و ام لبنت
بصراحة لدي مشكلة و اود طرحها و ارجو المساعدة
في الحقيقة انا مشكلتي مع اهل بيتي وزوجي
في الحقيقة عندي سلفتي ملي رحت عندهم و هي تعايرني و ظال تسمعني في الهدرة و الله عندي تقريب4سنوات زواج وانا على هادي الحال و مشكلتي زوجي ماعلابالوش مانحبش نحيرو ديما نقول ماعليش خليها فيا بصح عت مانحملش و كرهت كلش حياتي كرهتها و ليت ديما الزعاف اللي فيا نرجعو في بنتي و راجلي ديما عاد يقولي تبدلتي بزاف و انا و الله مريضة و القلقة تمتني درت عملية على الكيس و ظرك تاع اللوزتين و انا الان في دارنا عندي15 يوم ملي درت و الله صراحة اصبحت عصبية مع نخمم بلي رايحة نروح لداري نكره روحي و الله كنت من قبل مفعمة بالحياة نحب نخيط و ندير الاشغال اليدوية بصح ظرك نحس روحي مدمرة و كارهة كل شي و الحاجة اللي تغيظني اني كي جيت مانهدرش مع راجي هو صح حنين عليا و يحبني بصح مرات يقيسني بزاف مرات يعتبرني مانيش موحودة و كي نولهو يقولي و الله مانتوله مرات تغيظني روحي مانلقى كيفاه ندير مع العلم سلفتي عمرها38معايا في الدار و مرات كي نقول لعجوزتي عليها تقولي مانقدرش نهدر معاها واعرة بزاف و انا مانكدبش عليك نقبل كلش غير معيشت الذل و الحقرة و التسلط مانقبلش و ظرك راجلي حاب يجيب الدراري و انا تعقدت مانيش حابة نزيد و ديما نكزب بيه و نقولو راني مريضة و قاتلي الطبيبة ماتحمليش ظرك و انا و الله ماشي نيتي نكدب بيه و الله الحياة اللي عايشتها هي اللي رجعتني هكا اسمحولي و الله على بالي عالطة و كي نرقد و الله مانستراح لا في الليل و لاالنهار بصح مالقيت حتى حل افهموني ربي يخليكم و انصحوني و الله ضايقة

كرهت من حياتي حابة نعيش حياتي مع راجلي و بنتي و نجيب الدراري و نفرحو و تتنحالي العقد اللي فيا ربي يعينكم عاونوني

 

[Salam Fleur]

رد: ربي يخليكم انصحوني

السلام عليكم

اهلا سيدتي الكريمة

صعيبة لما تروحي لدار تلقاي فيها اخت الزوج كبيرة و مش مزوجة و انتيا صغيرة و راكي مزوجة و بطفلة ربي يخليهالك ... معاملة اخت زوجك ليك هي من منطلق الغيرة ... كيفاه انتي زوجتي و هي لالا .... و نسات بلي الزواج هذا راه مكتوب ربي سبحانه ....

شوفي اختي اولا عليك بالدعاء لربي سبحانه الدعاء ثم الدعاء في كل صلاة و خصوصا صلاة الفجر و اذا قدرتي تصلي ركعتي قيام اليل ديريها يا اختي راهي كالسحر .... وخممي مع روحك بالاك نتي كاش ماهدرتيلها هدرة عايرتيها بيها او قلتي كلمة جرحتيها بيها و انتي مش قصدك ... حوسي تعامليها بالحسنى و قدري حالتها انه راهي هي نفسيا متعبة خصوصا مع نظرة مجتمعنا ... قربي ليها حوسي تمتصي العصبية تاعها و الله المعاملة الحسنة تجيب نتيجة ..........

بالنسبة لراجلك ..علابالي باه تحملي لازم نفسيا تكوني مستقرة حتى تقوتي حملك بسلام ..و هنا انا يضهرلي لازمك تحكي مع الزوج تاعك لانه هو سندك و كي ماتحكيلوش هو لمن تحكي ...

و نزيد ناكدلك على الصلاة و الدعاء و الصدقة ايضا .....

وان شاء الله الاخوات يزيدوا يفيدوك اكثر

ربي يعينك ان شاء الله

​

 

[ام ريتاج 2013]

رد: ربي يخليكم انصحوني

جزاكي الله خيرا اختي الكريمة
و الله ماوصلتها ماعيرتها تحبي الصراحة انا اصلا نخافها ديما نتجنبها كي تجي تهدر معايا حتى نخلع و نخاف وحدها عقليتها هكا
انا راجلي نخاف من المشاكل العايلة تاعهم بزالت تمشي كيما نقولو حنا بالتقاليد يعني متمسكة كيما نقولو و الله نخاف من المشاكل مالقيت كيفاه ندير ماتقدريش تعيشي مستراحة شغل تحب تسيطر عليا و انا مانقبلش هما مع العلم اني زوجي نخاف منو
زعمة كي نخرج و نشري حاجة لوكان ماتسمعش بيا دير فيا حالة ماتحبنيش نخرج تنحيلي الدراهم و تشري و حدها كيفاه ندير لوكان نخرج و نشري وحدي مع تاع دارنا دير فيا حالة على ماكانش اعيط عليا و انا المشكلة كي عادت سلفتي و كبيرة عليا نحترمها و مانحبش نردلها الهدرة ديما نخلي في قلبي و نوبي نبكي و خلاص انا راهي ضايقة بيا للاخير و الله مرات نخمم نروح و مانوليش اسمحيلي اختي و شكرا للنصيحة بصح الواحد كي ضيق بيه مايلقى حتى حل حاسة البيبان اكل تسكرو في وجهي

 

[مريم.]

رد: ربي يخليكم انصحوني

ادعي الله يزوجها ربي راح يتولاها ​

 

[zohor kfz]

رد: ربي يخليكم انصحوني

ma3andich tajroba bassa7 n9olak 7aja wa7da bark ... matza3fi ro7ki mawalo khaliha tdaz m3ahom 3amliha 3adi w ida choftiha machya tabdaki balhadra dokhli lbitak w khaliha takol ro7a

 

[ام ريتاج 2013]

رد: ربي يخليكم انصحوني

شكرا اخواتي الكريمات جزاكم الله خيرا

 

[ضيوف وسـنغادر]

رد: ربي يخليكم انصحوني

اهلا اختي الكريمة
ربي يفرج همك ان شاء الله يا العزيزة
اختي لازم الصبر واعلابالي صبرتي 4 سنين بصح الجنة صعيبة والفرج طويل باش يجي
اختي انت حاولي تتصلي بربي وتنساي كل مشاكلك وكل همومك ومسؤوليات وكوني قدام ربي عبدة له وفقط استخيريه صلي ادعيه اطلبي دعاوي الوالدين خاوتك ...
زوجك راهو رفيق عمرك اختي وبدايها بالشوية شوية قولو والله ماقصدي نفتحلك الموضوع بصح نظن بلي واش راني ندير فيه يرجع على علاقتنا احنا
وربي ان شاء الله ييسر
سلفتك اقتليها بالبارد والحسنى وعلاه تخافي منها ؟ تضربك ؟ فحلة تضربك ؟ كون مات**** برا ويسمعوا بيها الناس ؟ راكي مرة راجل يا طفلة وريلها هدرتك فايني وريلها شخصيتك....ومن جهة اخرى كي تكونو هاديين اشريلها حاجة فاجئيها بيها من باب الحسنى ماش قصية تخافي منها
وانا نصحك اختي العزيزة ماتخليش مرة كيما هادي تخسرك في راجلك وبنتك ديري اي حاجة تشوفيها تنقد راجلك وبنتك...
واهم حاجة يا اختي الصلة بالله ثم الصلة بالله .....اي راهي مهمة بززززاااااف
واختي ديما شوفي للي من تحتك...اللي ماتزوجتش وراهي تخدم بونيشة عند مرة باباها ومرة خوها..الحمد انت راكي منسوبة لزوجك ورزقك ربي من زينة الحياة
شوفي مع اللي تزوجوا ولقاو رجالتهم واعرين ومات رجالتهم واعرين...انت جاتك في سلفتك برك...ربي نقص شوية
ربي يفرج همك اختي ان شاء الله وماتنسايش ماتضعفيش وماتخافيش وكوني شخصية صلبة ماتجرح ما تنذل قدام الناس...ومع ربي وعبادو وجه واحد ديما بالحسنى
ربي يشفيك ويعافيك ونسيت حاجة حلي عينك تزيدي تدخلي الامورة بنتك فالمواضيع علاه يعني ههههه وهي واش دارتلك...بالعكس يا اختي كي تشوفي معاها نورمالمو تنسيك كل الهموم
الدرية راهم زينة الدنيا وفرحتها ايماجيني لما توفات جدة ويما والحنينة تاعنا//ام امي// خالتي كانت عندها وحد الطفلة في عمرها شهرين برك لما كانت ترضع فيها ترضع فيها شوي وتدور ترضع وتدور بوحد الجاست سبحان الله تقولو يديروا عبد كبير خالتي نسات موت امها خلاص بالرغم من انو راه مازال مادفناهاش وضحكتها بنتها وزهات قلبها
لدا تولهي اختي العزيزة وربي يبارك فيك والحمد لله كي نشوف بنات كيما نتي يحيروا على مصلحة عايلتهم وطريقتهم في التعامل نقول مازال الخير في هاد البلاد
وربي وحدو قادر على كلشي ​

 

[ام ريتاج 2013]

رد: ربي يخليكم انصحوني

شكرا اختاه و جزاكي الله كل الخير
و الله كيما ندير مانقدرش صراحة تعقدت بزاف و الله بكل صراحة كيما درت مالقيتش روحي امنيتي في الحياة اني نرجع كيما كنت كم قبل كنت متفاءلة كنت نحب نعيش كي نوض الصباح نفكر كيفاه نقضي نهاري نقصمو بين شغل الدار و هواياتي الخياطة مولعة بيها نحب الكروشي و الخياطة ندير بيها العجب و ظرك و الله العظيم نفسي و كرهتها عت مانحب نير والو تعقدت كرهت كلش مرات نحب نخيط و كي نجي نقدم مانقدرش و الله المرار اللي عقبتو كرهني في كلش و الله كيما مانقدرش ندير حتى حاجة نولي نبكي و خلاص على الاقل نرتاح شوية بصح البكاء ديما ماشي حل
اسمحيلي اختاه بصح و الله حابة نرتاح امنيتي نوض الصباح و نلقى روحي مستراحة نتحرك براحتي نتحرك بلاما نخاف
و الله اللي فوتو و اللي عايشتو واحد ماعاشو

 

[ام ريتاج 2013]

رد: ربي يخليكم انصحوني

حابة نرتاح برك نعيش هانية و نستراح و الله عييت
حابة تتنحالي العقد و همومي تنزاح
حابة كي نتحرك في الدار نكون مستراحة و مانخافش
حابة كي نخرج نكسي روحي ولا بنتي نشري براحتي بلاما نخمم كي نروح للدار واش يستناني من التشناف و العياط
حابة كي نسخف على حاجة نطببها براحتي
حابة نتهنى برك و علاه ياخواتاتي يخي ماطلبتش المستحيل
حابة نهار نعيش بلا خوف و بلا حقرة
ماعليش و الله نطيب و نخدم عليها ماتشنفش عليا برك و الله عييت
اسمحولي يخي ماطلبتش المستحيل

 

[ام ريتاج 2013]

رد: ربي يخليكم انصحوني

علاه ياخاوتي و الله كي نسخف على القاطو ماتخلينيش ندير و الله نستناها حتى تخرج من الدار و نشري الحوايج و ندير و الله مرات نشري و ناكل بالتخبية نخاف
وعلاه يعني و الله تعبانة بالبزاف و ظرك راني نخمم كي نروح لداري كيفاش ندير

 

[ام ريتاج 2013]

رد: ربي يخليكم انصحوني

اسمحولي كثرت عليكم بصح و الله معمرة بالبزاف

 

[Salam Fleur]

رد: ربي يخليكم انصحوني

لالا اختي ما كترتي علينا ما والوا راكي اختنا فرغي قلبك كيما تحبي

شوفي انتي خطوتك الاولى انك تقربي لربي سبحانه هو اقدر منا كامل ..فهو القادر على كل شيء ... لكن اخلصي النية و ربي ما فيه غير الخير

ثانيا ديري شخصية لروحك لازمك تدافعي على نفسك و على بنتك و على بيتك يا اختي و كيما تكونيش انتي الحارس على بيتك شكون يكون

و ايضا لازم تحكي لزوجك ... لازم تقعدي معاه و تفرغي قلبك ليه ...حتى الحساسية تاعك هاذيك من جهته سببها واش راكي تعاني و نفسيتك المتعبة ....

ماتقوليش تقفلوا البيبان في وجهي ... راه الشيطان لي يرسملك الشي هذا ..... اتعوذي من الشيطان و تقربي من ربي و الله غير ترتاحي كي تصلي و في سجودك تحكيلوا همك و تبكي و الله ترتاحي .....

ربي يعينك ​

 

[houcine2306]

رد: ربي يخليكم انصحوني

ربي يفرجها عليك نشاله

 

[Mariamariana]

رد: ربي يخليكم انصحوني

شوفي اختي ننصحك بوحد الدعاء والله عن تجربة مني
شوفي اختي تبعي نصائح نتاع الأخوات راهم كفاو بلا
منعاودش نفس الهدرة لازم تكوني شجاعة وتتحدايها
وخمي علی صحتك وربي يشفيك إن شاء الله تعالى.
أما بالنسبة للدعاء شوفي ديما كي تكوني رايحا
تهدري معاها ولا تقعدي ولا تنعتيلها حاجة.....المهم
الدعاء هذا متنحيهش من قلبك دائما قوليه سواء معاها و
لا مع راجلك أو أي إنسان .
اللهم إني أسألك خيرها وخير ما منها وأعوذ بك من شرها
وشر ما منها. وابقاي تكري فيه و ضك تشوفي
هذيك الراحة وانتي معاها وربي يفرج علی كل
مهموم هذى هي الدنيا يا اختي ثاني لازم الصبر

 

[حكاية عطر]

رد: ربي يخليكم انصحوني

ربي يفرج عليك اختي ويهدي سلفتك

 

[SOFIANE BOUKHALFA]

رد: ربي يخليكم انصحوني

اختي اشكرك على صبرك وعدم اخبارك لزوجك
لكن اذا كان زوجك ميسور الحال من الناحية المادية عليك اخباره ليوفر لك بيتا تعيشين فيه بسعادة انت واهلك لان العيش بدون سعادة ضياع للوقت
واذا كان مغلوب الحال فحاولي ان تتجاهليها قدر المستطاع وتحلي بالصبر والدعاء حتى يفرج الله عنك