ما فهمتش اذا قلة احترام ولا قلة تربية ارواحوا وفاهموني

[@R@ZIK]

واش راكم ناس اللمة ان شاء الله تكونو كامل لاباس
انا راني مقلقة بززاف وعايوني البنات هاذو من تخمامهم
هذي المرة الثالثة لي تصرالي
قلت اليوم ما تفراش ونروح نفرغ قلبي شوية

هذه الظاهرة صراتلي قدام المكتب وين نخدم قدام البيرو كاين الورد مغروس والياسمين الله الله يعني بلاصة متهليين فيها بزاف
تجي واحدة طالعة من لGار باه تركب في كووس وتروح للجامعة رافدة في يدها jus rouiba صباح على 8 كي لحقت عند الباب تاع البيرو رمات الباطة الفارغة
وانا كنت مع المدير رايحين نفتحو البيرو شفت فيها قلتها واش هادا هنا تحطيها قاتلي مالقيتش بوبال باه نرميها قتلها معليش ارفديها وكي تلقاي بوبال ارميها شافت فيا وقاتلي مكاش وين نرميها وهذا كامل والمدير واقف قدامي ويشوف فيها انا حشمت وهي ما حشمتش
من بعد كي شافني ريقي نشف وانا نفهم فيها قالها انت تقراي قاتلو وي قالها ايا ارفدي زبلك وطيري منا تخيلوا واش دارت رفدتها ومشات متر واحد وعودت ارماتها استعجبت حبيت نخرج من حوايجي هذي التالية تاع اليوم.

وقبلها يومين واحدة تأكل في باتيسري كي وصلت عند البيرو رمات نصها وتاني كنت داخلة شفت فيها وقتلها عيب عليك راكي كبيرة وحتى اذا رميتي ما ترميش نعمة اتخيلو واش تقول
صبح لله واحد يصبح على ... تقول انا لي رميت ماشي هي حسيت روحي انا لي غلطت في حقها

نكمل الثالثة ولا علاه ديجا راني نغلي من الداخل
بصح نكملها تموتو بالضحك

الشيخ لي كاريين عليه البيرو كل صبح ينقي ويتهلى في الورد ويكنس عند الباب جات واحدة وواحد فايتين
واش دارو الجان نحى وردة ومدها للبنت وشافو الشيخ وكان رافد المكنسة رفدها وخبطو بيها هذاك الجان بدون احترام جبد المكنسة وقالو لوكان ما جيتش كبير تشوف
في هذيك الدقيقة خرجنا كامل من البيرو قتلو ما تحشمش هذا راه قد باباك واش حبيت تضربو وديجا عندو الحق انت كيفاش تنزع الوردة قالي لقيتها في الطريق
والشيخ بدا يجري موراهم بالمكنسة وصلهم حتى الكوس تاع الجامعة والناس كامل تشوف وتضحك
ياخي عالم ياخي
الوقت لي وصلنا ليه بنات ماشاء الله وتشوفهم يديرو هكا صوالح يرمو فضلاتهم في اي مكان
خلي حاجتك في الصاك وكي تلقاي وين ترميها ارميها
انا ساعات نرجع الحاجة معايا حتى للدار ونحطها سواء وسخ ولا اكل معجبنيش وما نقدرش نرميه وين جات

ان شا الله ما نكونش كثرت عليكم
هكذا فرغت شويا الزعاف لي كان فيا
دمتم بود واحترام
وبلاكم كاش شيخ يجري موراكم
ههههههههه
تحياتي

​

 

[Skor m@k]

رد: ما فهمتش اذا قلة احترام ولا قلة تربية ارواحوا وفاهموني

السلام عليكم
مشكلة كبيرة البلاد كامل توسخت
ديري pوبال عند الباب تاعكم هناك تتهناي خخخخ
لي عودة مع اكمال الرد​

 

[أميرة تقرت]

رد: ما فهمتش اذا قلة احترام ولا قلة تربية ارواحوا وفاهموني

هههههه الله غالب كاين ناس ماشي متربيين في ديارهم المهم انت درتي الي عليك
و المرة الجاية انتي تاني اجري من وراهم بالمكنسة خخخ

 

[عاشقة لندن]

رد: ما فهمتش اذا قلة احترام ولا قلة تربية ارواحوا وفاهموني

ههههههه والله غببر الاخيرة دحكتيني بيها
ايي وي هاد صوالح ولاااه يصروا بزاااف مي انا نقول التربية من الصغر
رااحت فيييها لبلاد

 

[مريم.]

رد: ما فهمتش اذا قلة احترام ولا قلة تربية ارواحوا وفاهموني

موضوع مليح وعندك الحق وكل حاجة تعكس شخصية الانسان وتربيته لوكان جا الانسان مؤدب ونقي ومتربي في بيته مراحش يقدر يغير هده الطبيعة ​

 

[نجيب]

رد: ما فهمتش اذا قلة احترام ولا قلة تربية ارواحوا وفاهموني

هدا ناتج على سوء التربية

لوكان تربات في دارهم على النظافة لوكان مارهيش تدير هد الصوالح

هكدا راها تبين للناس بلي في دارهم مكانش نظافة

وين تروح تلقي هد الصوالح في اي مكان كاين لي متربي و كاين لي مش متربي .

في اغلب المدن راه موجود بوبال معلق في كل انارة لاكن الناس متشوفش مليح

و لا ترباو على هد الشي .

في بعض المرات منلقاش وين نرمي صوالح بصح تلقايهم فالسيارة حتى نتفكرهم كي نرجع و لا نتفكرهم كي نروح نغسلها

المهم لوكان حتى ننساهم راهم في سيارتي .

ربي يجيب الخير و ان شاء الله كل واحد يتحمل مسؤوليتو لخطرش الناس كي يشوفوك يحكموا عليك يا يقولوا

هدا انسان نظيف يا يقولوا عليك بلي هدا انسان وسخ و عايش فالوسخ يعني افعالك هي من تحكم عليك.

رزيقة بارك الله فيك اختي على الموضوع و ان شاء الله كل واحد يتحمل المسؤولية نتاعو​

 

[saho souhila]

رد: ما فهمتش اذا قلة احترام ولا قلة تربية ارواحوا وفاهموني

وي ختي عندك الصح ديجا واش الفرق بينا و بين الدول المتقدمة هم يحاسبو كل واحد يرمي شيء و احيانا يدفعوه غرامة مالية اما حنا عندنا نورمال يتمشو و يرمو و حتى واحد ميهدر و لا يتكلم


واش نقولوا
الله يهدينا و يهديهم برک

 

[@R@ZIK]

رد: ما فهمتش اذا قلة احترام ولا قلة تربية ارواحوا وفاهموني

السلام عليكم
مشكلة كبيرة البلاد كامل توسخت
ديري pوبال عند الباب تاعكم هناك تتهناي خخخخ
لي عودة مع اكمال الرد​

شكرا على الاعتماد
راني خايفة اذا درتها يرجع قدام البيرو الكارثة
شكرا خويا مالك في انتظار عودتك
تحياتي​

 

[@R@ZIK]

رد: ما فهمتش اذا قلة احترام ولا قلة تربية ارواحوا وفاهموني

هههههه الله غالب كاين ناس ماشي متربيين في ديارهم المهم انت درتي الي عليك
و المرة الجاية انتي تاني اجري من وراهم بالمكنسة خخخ

شكرا لمرورك أختي
لازم ل واحد يكون عندو وعي وما يرميش البوبال وين جات
ربي يجيب الخير
تحياتي​

 

[@R@ZIK]

رد: ما فهمتش اذا قلة احترام ولا قلة تربية ارواحوا وفاهموني

ههههههه والله غببر الاخيرة دحكتيني بيها
ايي وي هاد صوالح ولاااه يصروا بزاااف مي انا نقول التربية من الصغر
رااحت فيييها لبلاد

ان شاء الله دايما ضحكتك منورة
ومن بعد يقولك بلادنا معفونة
ياخي حالة
شكرا لمرورك الطيب
تحياتي​

 

[@R@ZIK]

رد: ما فهمتش اذا قلة احترام ولا قلة تربية ارواحوا وفاهموني

موضوع مليح وعندك الحق وكل حاجة تعكس شخصية الانسان وتربيته لوكان جا الانسان مؤدب ونقي ومتربي في بيته مراحش يقدر يغير هده الطبيعة ​

أهلا مريم منورة
عندك الحق صح حسب شخصية الانسان وتربيته
شكرا لمرورك
تحياتي
​

 

[بنفسج]

رد: ما فهمتش اذا قلة احترام ولا قلة تربية ارواحوا وفاهموني

السلام عليكم
يعطيك الصحة ختي رزيقة على الموضوع
هادو لعباد راهم كثرو ولله ميحشمو تصرفاتهم هادي لا دلت تدل على قلة تحضر وتربية
ربي يهدي برك
تحياتي ليك حنونة
سلام:regards01:

 

[الحلوة أمينة]

رد: ما فهمتش اذا قلة احترام ولا قلة تربية ارواحوا وفاهموني

السلــــآـــ م عليـــ،ــكم
موضوع هايل طليتيلي على قلبي يعطيك الصحة
ياأختي كل واحد وتربيتو ... لاكان هيا تربات على هاد العقلية يجي واش يجي ماينحيهالهاش
وهاد الظاهرة كاينة في النساء بزاف .. يتظاهرو بالنظافة والاناقة ومبعد ترمي في الطريق
وكي يولي المكان ملوث يوليو يشكيو ومكانش النظافة والبلدية
ابداء النظافة من روحك ياوسمك على ربي يهدينا
شكرا على الموضوع تحياتي :love01:​

 

[nada arayhan]

رد: ما فهمتش اذا قلة احترام ولا قلة تربية ارواحوا وفاهموني

الله يهدي جميع خلقه

 

[لؤلؤة قسنطينة]

رد: ما فهمتش اذا قلة احترام ولا قلة تربية ارواحوا وفاهموني

السلام عليكم حبيبتي رزيقة ان شاء الله راكي لاباس؟
بارك الله فيك ختي على الموضوع القيم ولي هو النظافة في مجتمعاتنا
وانا لدرجة موضوع النظافة هادا هبلني درت عليه موضوع من قبل في هاد القسم وكان في شكل سلسلة توعوية
المهم ،والله يا ختي تحيري صح اذا هادو ناس واعيين، يعني رانا داخلين على 2016 والناس مازالت جايحة
والنظافة يا اختي هي تربية قبل كل شي، خاطر اول مادخلنا للمدرسة تعلمنا " النظافة من الإيمان "
يعني علمونا بلي النظافة راهي مرتبطة بالإيمان وبالدين الإسلامي، لكن غير نخرجو من المدرسة ونرجعو للدار
نشوفو مشهد لكيس القمامة نازل من أعلى الشرفات حتى يلحق للأرض وتسيح كامل الاوساخ هكاك،
يعني الصورة لي تعلمناها مالقيناش عليها تطبيق من الواقع، لما الأب نفسو يقول لولدو ابزق على الارض وارمي على الارض كيفاه تحبي الطفل يخرج مربي ويتعلم النظافة،
مثلا عند اليابانيين النظافة عندهم مسؤولية، لدرجة
السيارات لي تهز الاوساخ تتنظف كل صباح والباب تاعها يتقفل باه المواطن مايتضررش النظر تاعو من مشهد
الاوساخ، الطلبة في المدارس كل اسبوع ينظفو اقسامهم بنفسهم، يعني هادا كامل باه يزرعو فيهم معنى النظافة
في الحياة اليومية، بصح حنا يتعلم في المدرسة وكي يخرج يجي يرمي حاجة يقولو باباه ارمي على الارض،
وفي الاخير يريكلاميو على عامل النظافة ويقولك ماراهوش يدير في خدمتو، لالا يزيد يدخل لدياركم ويربيكم خير
نهار تتعلمو تلمو اوساخكم تما احكيو على عامل النظافة، وانا يا اختي كيما قلتي، حاجتي نجيبها معايا في الصاك
حتى نلحق للدار نرميها، لدرجة التيكي تاع البيس ونخبيه مانحبش نرميه على الارض، بصح مع هاد العباد واش
تهدري؟ نقولو ربي يهديهم برك
شكرا غاليتي على الموضوع القيم
تحياتي
​

 

[Salam Fleur]

رد: ما فهمتش اذا قلة احترام ولا قلة تربية ارواحوا وفاهموني

السلام عليكم

و اخيرا وصلت ليك هههه لقيت روحي نجري باه نوصل دوخت

بون بالنسبة للموضوع

طبعا سوء تربية

هذا و لا هاذي تدير هكا في دارهم مستحيل ...الا اذا دارهم راهي زبالة بعد تم ماعندك ماتلوم

و الله يا اختي تشوفي حديقة الحيوانات عندنا تهربي خصوصا في الصيف ...تخيلي ياكلوا و يخليوا خماجهم تم و يروحوا

اووو بعدا و لو تقولوا يقولك ياك راه كاين لي ينظف

و في الطريق اسكتي برك حدث و لا حرج و الجامعة هاذيك كارثة بعد .... زعمة قاريين ووين يقعدوا يرجعوها زبالة و ينوضوا و النشوة انه لو تروح بلاصة و تلقى فيها خماج تقولك ياخاه المعفونين هاذون و نسات روحها

علابالك مرة الفوج تاعنا نشفى عليها كنا نساو قدام ديبارتومون باه يعطونا النتائج تاع الامتحانات و كانت عندنا بلاصة نقعدوا فيها لما رحنا ليها لقيناها الله لا يشوفك لي بوات تاع لاكريم (كنا في الصيف) الجورنان جماعة ماندولين ... ولينا جبنا ساشيات من الحوانات لي في الجامعة و درنا حملة نظافة ... الغاشي حاير فينا واشنوا هذا ... هذا اولا واجبنا و ثانيا كيفاه نقعد انا في بلاصة خامجة ؟؟؟

و حكاية الورد ...صرات مرة في الجامعة بعد .... كاين بلاكة مكتوبة ممنوع المساس بالنباتات .... لانه كاين طلبة شفتهم بعيني مسكينة شجرة ريشوها كي الجاجة ...المهم جات واحدة ... البلاكة تقرا فيها و هي راحت لوحد الوردة و نحاتها .... كي قلنالها احنا يا الاخت البلاكة ماراكيش تقراي فيها ؟؟؟ قالتنا و علاه الوردة نبتة

اواه حيوان .....

علابالي طولت هدرت بزاااف بصح و الله سلوك غير حضاري و يدل على لي يديروا انه صح ناقص تربية

شكرا اختي رزيقة على موضوعك الرائع

تحياتي​

 

[Skor m@k]

رد: ما فهمتش اذا قلة احترام ولا قلة تربية ارواحوا وفاهموني

السلام عليكم
هذي النضافة تمشي مع التربية اوو طبيعة الشخص
الى كان الواحد مربي ونضيف في نفسو وملابسو اوو تاني نضيف في عقلو
ميعطيهش الخاطر باش يرمي الوسح في الطريق
كان قادر ولا قادرا تخبيها في ساكها ولا في ساشي اوو كي تلقى مزبلة ترميها هناك
كاين بلايص وين تلقاها نضيفة حتى تحشم ترمي فيها ورقة ولا كاش حاجا بصح تلقى وين ترمي
الناس معندهمش توعية للنضافة أرمي برك المهم ماشي في داري

شكرا على الموضوع ختي
سلام​

 

[الزهرة الحمراء]

رد: ما فهمتش اذا قلة احترام ولا قلة تربية ارواحوا وفاهموني

السلام عليكم اختي
يعطيك الصحة على الموضوع
وماتقلقيش برك لا كاش مايطرطقلك كاش عرق ونتوخدوا فيك على جالهم هههه
شوفي يا اختي هي كل شي راجع للتربية
يعني الواحد كي يكون مربي وماشاء الله محال يدير التصرفات هادوك وكي يكون العكس اتوقعي منو كل شي
تلقاي الشعب هو لي يوسخ مبعدة يولي يشكي من الاوساخ ويقولك البلدية ماهيش دير خدمتها مبصح اسمحلي دير انت خدمتك باه هي دير خدمتها دركا الحكومة ماهيش رايحا دير لكل واحد عساس وتعسوا
ربي يهدينا ويصلح احوالنا
بارك الله فيك اختي
ودمتي في رعاية الله وحفظه​

 

[آمِيْرَتُه]

رد: ما فهمتش اذا قلة احترام ولا قلة تربية ارواحوا وفاهموني

السلام عليك
بلعقل عليك معندك مديري
كاين هذو العفسات بزاف داك نهار راكبين أيا وحدة تاكل في ميلكا كي كملتها حلت التاقة و رمات خزرت فيها وحد الخزرة بغيت نقيسها هي معها مجاياش نقيسو نص الوسخ لازم نلحقو النص لاخر مع خوه هههه شعب يعيف عليها بلادنا تلقيها هي شابة فيها مناظر روعة بصح الوسخ داير حالة الكل من الشعب تلقي حاشاك الزبل مرمي قدام المدارس في الطريق في الحدائق كارثة نتاع الصح
عن نفسي كيما قلتي كي منلقاش وين نرمي ملا نرجعه معايا حتى لدار حتى ولد خويا سكنتله هذي العقلية في مخه خطرة كنا نحوسو و معنا ولاد الجيران كلاو و رماو الوسخ في الارض جاهم رفدوه قبل متشوفكم امينة ليوم تقتلكم و بدا يلم فيه ههه لازم من الصغر العبد يتعلم
هذي هي كيما قالك الآخ الحل الوحيد أنك ديري قدام البيرو حاجة يرمو فيها و خلاص يا لوكان كرطونة صغيرة

 

[@R@ZIK]

رد: ما فهمتش اذا قلة احترام ولا قلة تربية ارواحوا وفاهموني

هدا ناتج على سوء التربية

لوكان تربات في دارهم على النظافة لوكان مارهيش تدير هد الصوالح

هكدا راها تبين للناس بلي في دارهم مكانش نظافة

وين تروح تلقي هد الصوالح في اي مكان كاين لي متربي و كاين لي مش متربي .

في اغلب المدن راه موجود بوبال معلق في كل انارة لاكن الناس متشوفش مليح

و لا ترباو على هد الشي .

في بعض المرات منلقاش وين نرمي صوالح بصح تلقايهم فالسيارة حتى نتفكرهم كي نرجع و لا نتفكرهم كي نروح نغسلها

المهم لوكان حتى ننساهم راهم في سيارتي .

ربي يجيب الخير و ان شاء الله كل واحد يتحمل مسؤوليتو لخطرش الناس كي يشوفوك يحكموا عليك يا يقولوا

هدا انسان نظيف يا يقولوا عليك بلي هدا انسان وسخ و عايش فالوسخ يعني افعالك هي من تحكم عليك.

رزيقة بارك الله فيك اختي على الموضوع و ان شاء الله كل واحد يتحمل المسؤولية نتاعو​

أهلا خويا نجيب هذي غيبة
ان شاء الله لاباس
عندك الحق هذا كامل من سوء التربية والمشكل دارهلهم بوبال وميستعرفوش بيها
وهذا كام من البيئة لي راهم عايشين فيها لازم الاهل يعلمو ولادهم من الصغر الحاجة لي مليحة والحاجة لي ماشي مليحة
ربي يجيب الخير
شكرا نجيب نورت الموضوع
​