دروس فن المكياج . ملف شامل . طرق المكياج .

[خفيفة الروح]

السلام عليكم والرحمة ...​

اليوم درسنا راح يكون شامل بالشرح وبالصور والمعلومات...
بعض الدروس راح تكون بالفوتوشوب لاني ماقدر اصورها شخصيا لانها راح تكون على كامل الويه وبعضها راح يكون من تصويري​

مابسميه درس بنسميه ملف شامل لكل المعلومات لكل مبتدئه وتحب تظهر بأحلى طله واجمل مكياج وفي العديد من الاساسيات الي يغفل عنها العديد من البنات والي اهيا تكون جدا ضرورية عند وضع المكياج​

وانا عن نفسي راح اقدم كل المعلومات الي عندي من دون ماخبي عنكم شي​

المهم خل نبتدي ..​

الدرس الاول : تجهيز البشرة قبل وضع المكياج ​

علشان كلنا نحصل على مكياج متميز ومتكامل ويظهر لنا ساطع وحيوي السر الاول هو (صحة البشرة)
كثر مانقدر نحاول نحافظ على نظافة بشرتنا من اثار التلوث اليومية واثار الارهاق وحب الشباب ألخ..​

1. لازم نسوي اقنعه للبشرة مرتين اسبوعيا
2. تقشير البشرة عن طريق الجنتل بيلينغ ​

والحين قبل مانحط اي نقطة من المكياج على ويهنا لازم نسوي هلنقاط​

1. تغسلين ويهج بصابونتج للويه
2. تحطين المرطب على ويهج وتخلين البشرة تتشربه على الاقل لمدة 3 دقائق​

3. تاخذين قطعة كلينكس وتسوينها على شكل مربع وتنشفين فيها بشرتج عن المرطب الزايد الي على ويهج​

​

الدرس الثاني : ( وضع الاساسيات)​

الادوات الي نحتاجها ولازم تتوافر عندنا علشان نحصل على بشرة مثاليه ​

البيس

​

الكونسييلر ​

والافضل انه يكون عندج لونين واحد مثل لون بشرتج والثاني غامج بلون دارك براون لتحديد ملامح الويه

​

الفاونديشين​

​

والبودرة السائبة هي افضل شي مع الفاونديشين ,, لان البودرة المضغوطة مخصوص للاستخدام بدون فاونديشين ولكن مافي اي مشكلة اذا استخدمتيها مع الفاونديشين بس بتطلع عندج الطبقة الي على الويه وايد سميكة ماتنفع للصبح او الطلعات اليومية

الخطوات الأولى : الصور راح توضح لنا البشرة قبل وضع البيس وبعد وضعه

اول شي وضع البيس

وانا افضل البيس الي بلون الزهر لان يعطي اشراااقه جدا جميلة للوجه وليس لتفتيح اللون !

والحين الي راح نسويه
1. نوضع الكونسيلر على العيووون وندمجه
2. نوضع كريم الاساس الي اهوا الفاونديشين على كامل الويه وهاااذي النتايج

ثالث اهم خطوه واهيا تحديد الويه وهيا من اهم النقاط الي تترك اثر جمالي بتقسيم ملامح الويه

وراح نشوف الحين التطبيق بالصور

مكياج ينفع للصباح ,, حضرت الدرس لان راح يتكامل مع موضوعي ,, واهوا ينفع للصباح والطلعات العاديه في نفس الوقت

اول شي راح نشوف الادوات الي انا استخدمتها في الدرس


مجموعة الاساسيات
1. البيس
2. الكونسيلر
3. الفاونديشين
4. البودرة السائبة

الوان ظلال العيون
والالوووان الي انا استخدمتها في الدرس محدده

1. كحل العيون
1. الماسكرا
3. معجون رسم الحواجب

ماعليكم من الي بباقي الصورة

واخر الشي استخدمت

1. مرطب شفايف من لابيلو
2. قلوس
3. بلاشر الخدود

والحين نبتدي الدرس:

بعد ما نحط البيس

راح نوضع الكونسيلر على العيون ونوزع كريم الاساس على البشرة والبودرة السائبة

حطيت لون وردي زهري فاتح جدا على الجفن المتحرك

وبعدها حطيت لون بيج على عظمة الحاجب مثل مانتو شايفين

وبعدها حطيت لون بني على نحاسي على الجفن الثابت

ندمج الالوان بالفرشاة مثل ماهو موضع عندي بالصور
نحرك الفرشاة بطريقة التمويه يمين ويسار علشان تندمج الالوان مع بعضها

​

 

[RoseBonbon]

رد: دروس فن المكياج . ملف شامل . طرق المكياج .

عجبتني الهجة الخليجية ههههه

شكرا على النقل

 

[الورد الأحمر]

رد: دروس فن المكياج . ملف شامل . طرق المكياج .

السلام عليكم ورحمة الله وبركاته
شكرا اختي على المعلومات حول فن المكياج لكن كنت نفضل لو عملتي ترجمة للكلام بلهجتنا أو على الأقل بالعربية الفصحى وعملتي عليه إضافات حتى يكون بتصرف ويطرح بطريقة مغايرة للموضوع الأصلي ... عموما يعطيك الصحة .