السلام عليكم حبيبتي الغالية جيهان
ان شاء الله أحوالك بخير؟
نظن غاليتي موضوعك لازم يتعكس، لازم نقولو لماذا المتحجبة تغار من المتبرجة؟ ربما تستغربي من هاد السؤال وهادا خاطر ماوضحتيش ، قلتي محجبة وسكتي وفي وقتنا ولات المحجبة نفسها نصنفوها مع المتبرجة،
والمعروف لما انسان يغار من إنسان يقلدو باه يكون نسخة عليه ويحصل على نفس الاهتمام لي يحصل عليه
الشخص الآخر وهادا واش راهو صاير مع بناتنا المحجبات اليوم، لو كانت كل بنت محجبة تحترم حجابها
وتحترم السترة لي عطاهالها ربي كن ماتروحش تفسد صورة الحجاب بملابس فاتنة وألوان زاهية وعلاقات عابرة
وهادا غيرة من البنت المتبرجة، لما نقول هنا البنت المحجبة نقول صاحبة الحجاب العصري ، لأنو لي تحترم حجابها ماتغير من حتى وحدة هدفها في الحياة رضا الله والوالدين فقط، ولكن لي ضعيفة رايحة تغريها مشاهد الحرام
لي تشوفها في المتبرجات تولي تغير وتبع باه تولي كيفهم وتاخد لقب المحجبة ولكن بطريقة متبرجة
على كل حال نروح لأسئلتك :
س1 - لماذا الفتاة المتبرجه تتدخل في شؤون الفتاة المتحجبة ؟
راني هنا ماش باه ندافع على المتبرجة، ولكن المتبرجة عندها أمور اخرى في الحياة تجري وراها على هادي
مانظنش تتفرغ للمتحجبة، إلا اذا كان التدخل من أجل السخرية
لأنو فتاة متبرجة عندها صديقها أو تلبس ملابس فاتنة وتتلقى اعجابات الشباب يعني في بالها راهي عايشة حلاوة الدنيا
ماش رايحة تنتبه لحوايج خلاف نظن.
س2 - هل ترى أن الفتاة المحجبة أفضل منها عند الشباب وإختلاف نظرتهم للفتاة المتبرجه والمتحجبه ؟
لا أظن ذلك، اصلا الفتاة المحجبة أو الملتزمة ماعندهاش علاقة مع الشباب عندها علاقة واحدة هي الزواج
لذلك نلقاو المتبرجة تلقى راحتها في هاد المجال، الا إذا كنتِ تقصدي المحجبة لي هي نفسها متبرجة
والفرق بينها وبين المتبرجة طرف قماش فوق الراس هنا نقولك بالاك تشكلها تهديد
س3 - لماذا الفتاة المتبرجة الجميلة تغار من المتحجبة الجميلة ؟
لاكان فيزوج رزقهم ربي بالجمال علاه يغيرو من بعض ^^ غير لاكان واحدة جميلة بالماكياج والثانية جمال
طبيعي هههه
س4 - لماذا الفتاة المتبرجة تكون عرضة للغزل من قبل الشباب وينظر الشباب للمتبرجه نظره دونيه ؟
هنا نوافقك، لأنو حبة الحلوة لي ماش مغطية بغلاف يدور عليها الذباب على عكس المغطية.
لكن هنا نوضحو لما نقولو متبرجة، لأنو بكري متبرجة كانت لي بلا حجاب. درك المتبرجة راهي لي بالحجاب
وبلا حجاب، لأنو لما تشوفي وحدة بدون حجاب ولبستها مستورة وناقصة غير خمار على الراس، ووحدة محجبة
لابسة فيزو وتريكو فيه زوج ميليمتر تما تعرفي التبرج كيفاه مداير. لكن على العموم اي وحدة ماتمشيش
على اللبسة المستورة لي قال عليها الاسلام رايحة تتعرض لمضايقات الشباب لأنو هي لي خلات نفسها
عرضة بملابسها غير المحتشمة
س5 - لماذا تحاول الفتاة المتبرجة أن تبرر موقفها من الحجاب وأنه الآن عصر التقدم والتحضر ويحق لها إبراز جمالها للغير , وتبحث عن أدلة وأقوال من أجل تبرير موقفها, هل لأن المجتمع ينظر لها نظره دونيه أم ماذا ؟
وهنا يطرح السؤال، الإسلام نفسو مادابيه المرأة تبرز جمالها وتكون جميلة ولكن ... مع المحارم فقط ومع زوجها،
الحجاب ماداروش ربي باه تخبي جمالك ، دارو باه يحميلك هاداك الجمال من الأعين الشيطانية ،و خلاه محفوظ لشخص واحد لي يستحق هاداك الجمال، وهادا اصلا اذا كان لي يلبسو فيه جمال، لأنو لما نشوف هاديك الملابس وهاداك التهريج على وجوهم انا طفلة نعاف ونحب نتقيا حاشاك ، يعني يا ريت لو كان هادا جمال
س6 - بما أن الفتاة المتبرجه تجد نفسها أفضل من الفتاة المتحجبة , لماذا تريد من الفتاة المتحجبه أن تتبرج مثلها , وتتهم الفتاة المتحجبة بالمتخلفة ؟
الفتاة المتبرجة تتهم الملتزمة بالتخلف لأنو كيما قلتي من قبل في بالها بلي البنت عندها جمال والملتزمة مخبية هاد
الجمال وماش قاعدة تستفاد بيه على هادي تعتبرها متخلفة وغبية، وتطلب منها تتبرج زعما بحكم النصيحة
زعما تبينلها جمال المرأة كيفاه يكون، وهاد الحالة تكون لما وحدة متبرجة حابة تفسد على وحدة ملتزمة
س7 - لماذا الفتاة المتبرجه يتأخر زواجها وربما تتزوج في الثلاثينات من عمرها , وحججها أنها موظفة وتبحث عن مستقبلها وهي تعلم جيداً بأنها قد عنست ولم يأتها بعد عريس بل أتها حبيب او صديق؟
لالا حبيبتي ماش شرط، اصلا درك العكس لدرجة نقصو الرجال الصالحين ولا لي يجي يتزوج يحوس
على وحدة متبرجة وعلى وحدة يتفاخر بيها قدام صحابو، وهنا بلا ماندير تعميم خاطر مازالو ولاد وبنات الحلال
وهنا نقول الطيبون للطيبات والخبيثون للخبيثات، لما واحد خبيث يجي يتزوج مايبعتلو ربي غير خبيثة
والصالح ولي تقي يبعتلو ربي الصالحة والتقية، على هادي مانظنش عندها علاقة بالعمل ولا السن
كلشي يرجع للمكتوب
س8 - لماذا الفتاة المتحجبة والملتزمة الخلوقة المتدينة تتزوج بكراً وتحظى بالعديد من المتقدمين لطلب يدها ؟
هنا مافهمتش السؤال مليح، لكن نأكد على اجابتي السابقة، قادرة تلقاي مئات الخطاب على المتبرجة لكن كامل ماش صالحين
س9 - أخيراً لماذا المجتمع يرى الفتاة المتحجبة وتحظى بالإعجاب أفضل من الفتاة المتبرجه ؟
هنا مانقولوش المجتمع، لأنو لما تلقاي وحدة مخطوبة لابسة لبسة شبه عارية ومدايرة عدة اصدقاء رجال
تما تحيري شكون لي خاطبها وكيفاه خيرها وعجبتو؟ تما تستنتجي بلي ماشي كل المجتمع هكا،
على هادي نصحح سؤالك ونقول الإنسان الصالح ولا نصف المجتمع الصالح هو لي يشوف بلي
الملتزمة تستحق الاعجاب، اما الجماعة لي تحتفل بدخول سنة جديدة وتديها ليلة شطيح ورديح
هادو ماشكيتش تعجبهم الملتزمة لي تقعد في الدار وخاطيها هاد الامورات
شكرا غاليتي على الموضوع واعتذر على الاطالة
ان شاء الله تكون اجابتي في المستوى
وربي يستر بناتنا وخواتاتنا
تقبلي مروري
