التقشف وطريقة الجزايريين في الاحتفال بالمولد النبوي الشريف!

[السلطانة]

السلام عليكم ورحمة الله وبركاته

نهاركم زين كل عام وأنتم بخير
وتحية لجماعة jaime في المواضيع
كان تعرف روحك أخي أو أختي تجامي الموضوع ومتردش مكنلاه تدخل للموضوع أصلا
ولاترد ردود يعييو تاع شكرا وموضوع رائع
فتاني فك عليك :bravo01:فوتني الله يعيشك

بون أناجيت اليوم نحكي على موضوع
لي هو







...........





التقشف لي راه صاري و حكاية المولد النبوي الشريف في دزاير !
أنا هاذو الزوج محبوش يدخلو في راسي
درك نفهمكم

درك وأنا نتفرج على القنوات الجزايرية
وراولنا الجزايريين في الأسواق
لي يفوت عليهم المذيع ويسألو
يقولو ولاتقولو :
الغلاء بزاف مقدرناش نشريو اللحم ولي يقولو جيت تفرجت مع السلعة وراني مروح فارغ
كلهم يرغيو بالبح ويقولو التقشف لي دارتو الدولة أثر علينا !

أيواه حاب يقول بلي الشعب الجزايري فقير
ومعندوش دراهم باه ياكل
ومالا هاذوك لي باتو البارح يفلقو في المحارق
البارح قولولي برك شكون شعب وحد اوخر !!

راه الملايين والملايير تصرفت منلي قرب المولد
والليلة تاعو بعد منحكيوش

أنا مفهمتش شعب يقولك معنديش وولادو يطيشو في الدراهم
وكي سقساهم المذيع :
سيدي أنت تشري لولادك المحارق والألعاب باه يحتفلو
نفس الجواب كل:
أواه أنا منشريش لابني بزاف نشري حاجة صغيرة برك

stop
كذااااااااااااااااااااااااب

تلقاه هو كبير اون بارسون ويلعب ويجري مع الدراري بالمحارق
لي وصلو بيها ل لما يسمونه داعش !
عذرا رسول الله عليك الصلاة والسلام
ماعلّمتنا أن نحتفل في عيد مولدك هكذا
لكن السفهاء منا فعلوا

ومباعد عك يجي يفتيلك يقولك
حرام اتباع الكفار والمسيحيين في احتفالاتهم في عيد السنة والكريسماس
أو أنت راك فتتهم من هيه
درت بدوع ماقالش عليهم ربي ولا النبي
أنت في نظري أكبر مفسد
بتشويهك صورة الاسلام
والتشجيع على تبذير النقود
وأنت وحدك لي تتحاسب عليها

نكتة:
قالهم واحد كون لميتو الدراهم لي فسدتوها هادي كامل وعطيتوهالي كنت تزوجت وشريت دار

نخليكم مع هاذ الفيديو
لي تقدرو تحسبوه حرب في كاش بلاد



تعليقاتكم حول الموضوع

​

​

 

[عاشقة الكرة]

رد: التقشف وطريقة الجزايريين في الاحتفال بالمولد النبوي الشريف!

السلام عليكم ورحمة الله
واللّه غير جبتيها حبيبتي وموضوعك قمة قمة عايشين ماكلين متهنيين وتلقايهم ديما يعيطو للشر ونساو بلي كاين شي ناس مش لاقية خبز تاكلو كثرو هاذ الناس في وقتنا وكثرت الشكاوي ونورمالمو المولد النبوي الشريف نصليو على الرسول عليه أفضل الصلاة وندعيو ربي يجمعنا معاه حنا لالا نشريو باطة محارق ب 50 الف لوكان مديتها لواحد زوالي يدعيلك دعوة قادرة تكون السبة في دخولك الجنة ناس ماتفهمش كمايقلك (بعير يضحك على حدبة صاحبو) يحتفلو بالمولد بطريقة حدث ولاحرج ويحكيو على الغرب ويقولولهم الكريسمس حرام ديجا الاحتفال بيه عندنا كاين ربي يهدينا أجمعين
تقبلي مروري

 

[إلياس]

رد: التقشف وطريقة الجزايريين في الاحتفال بالمولد النبوي الشريف!

ربي يجيب الخير ان شاء الله أين التوعية و سياسة الردع

 

[sosobibicha]

رد: التقشف وطريقة الجزايريين في الاحتفال بالمولد النبوي الشريف!

سلام عليكم موضوع قيم و الله صح كاين تناقض كبير من جهة الجزايريين يقولوا ما عنديش حتا عشا اليوم و تلقاهم يشروا المفرقعات عجب و الله
كي تقولهم علاش تشروهم غاليين يقولك معليش نفرح الاولاد

ربي يجيب الخير ان شاء الله
تقبلوا مروري​

 

[بنفسج]

رد: التقشف وطريقة الجزايريين في الاحتفال بالمولد النبوي الشريف!

السلام عليكم
موضوع رائع اختي ساندي بوركت
عندك الحق يقول معنديش باه ناكل ومبعد تلقايه شاري قالمفرقعات الغالية عجب
شعب يحب يشكي من كل شي لكن كي تنفحلو ميقيم والو
تحياتي لك اختي
سلام

 

[w@l!d]

رد: التقشف وطريقة الجزايريين في الاحتفال بالمولد النبوي الشريف!

السلام عليكم...
يعطيك الصحة والله غير جبتيها سواسوا..
انا لظروف خاصة مقدرتش نحتفل بالمولد النبوي الشريف
معا دارنا الله غالب بصح على حساب واش راني نشوف
فاليوتيوب وحتى برا يحبس عقلك نورمال
مابقاش مولد نبوي ولا حرب محارق دخلو فيها الداعش
ها يزيدو ناطو والجماعة ملهيه ويديروها حرب وخلاص
كي لكبار كي لصغار كي شغل مولاش عندهم عقل
والله غير دراهم كبار نحرقو هاد اليمات
اييه ببريكي ولا زلاميت تاع الف فرنك
حرقت ملاير بففف
الله يهدينا واش نقولو ..
...
سلام.... ​

 

[الحلم الوردي]

رد: التقشف وطريقة الجزايريين في الاحتفال بالمولد النبوي الشريف!

وعليكي السـلآم والرحمة
صح هذي صح تلقايهم يعطو غير بالشر ومكاش ومكاش
وفي وقت الاحتفالات تلقايهم
مع الاحتفالات سيغتو المحارق
لوكان جاو يصرفو هذوك على حوايج ماعندهم حتى معنى غير يخسرو في دراهمهم
هذوك الدراهم يشروهم حوايج اخرين
ماشي غير يخسرو ومن بعد يقولو ما عندناش
ويزيدو يقولو التقشف
يعطيك الصحة اختي ســآندي
وبــآرك الله فيكي
​

 

[آمِيْرَتُه]

رد: التقشف وطريقة الجزايريين في الاحتفال بالمولد النبوي الشريف!

السلام عليكم
و الله تحيري كي يقولك منشروش منديروش و هذوك شكون طاحو من كوكب آخر
العام لي فات دايرين حصة وحدة قاتلهم خسرت قريب 3 ملايين على ولادي المفرقعات مش كون راحت دارت بيهم صدقة لدار العجزة و لا الأيتام شراتهم شكيل قاتلها باش نزوخ برك و ميقولولش مشحاحة و منبعد يقولك مناش لاحقين و هذوك لي في السوق تلقيه معمر القفة خيالك
شعب مش قنعان و كي يبغي يدرق يولي يطلق لgناين
و تحية لصحاب الجامات ربي يحفظكم ههه

 

[Malika Tlm]

رد: التقشف وطريقة الجزايريين في الاحتفال بالمولد النبوي الشريف!

السلام عليكم
والله يا ختي جبتيها فالصواب
واش هدي حاله تروحي وسط السوق تسمعيهم يشكيو
البطاطا غالية الطماطم ورانا فالتقشف وكلام بزاف يجيبوه
ونهار المولد تلقايهم هوما الاوائل يشريو ويلا قلتي واش هدا
غير تبدير ياويلك تحصلي معاهم وزيد يتباهاو انا شريت لوليدي
الحاجة الغاليه وانا وانا وانا لا حول ولا قوة الا بالله
وين راكم رايحين ياناس المولد ماشي بالمفرقعات
ربي يهدينا لطريق الخير
ربي يجازيك حبيبة​

 

[Hamasaki]

رد: التقشف وطريقة الجزايريين في الاحتفال بالمولد النبوي الشريف!

والله غير عندكم حق نهار ربي وناس تشكي ونبعد يخرجو بتنوبيلات لماركة وخلرجات خرى خلوها لربي برك ربي يبارك فيك اختي هدا هو الشعب الجزائري

 

[yyoucef]

رد: التقشف وطريقة الجزايريين في الاحتفال بالمولد النبوي الشريف!

انت مافهمتي والو
انا فهمت كل شي فهمت علاه الشعب ديما يشكي ويبكي
خطرش شعب يبذر وياكل بعينيه كل شي بعينيه
ايلاكلا ياكل بعينيه رفد برك ويلا يلبس بعينيه واش شاف في تيلي يلبس ويلا فرح يفرح بعينيه واش دارو لهيه يدير مايحوسش يخمم ويلا زعف حتى زعاف ويزعف بعينيه كيما وهو صرا في البرلمان حتى شافهم لهيك
باختصار شعب يحب التقليد ويموت في التقليد
اعطي لو الدراهم برك يدير كيما يديرو ولا كتر

 

[الزهرة الحمراء]

رد: التقشف وطريقة الجزايريين في الاحتفال بالمولد النبوي الشريف!

السلام عليكم غاليتي ساندي
يعطيك الصحة على الموضوع
وعجبتني المقدمة تاعك خخخ صراحة انا تاني نعاني منها هاذيك الظاهرة الغريبة
المهم بلا تبلبيل نرجعو للموضوع
الشعب الجزائري يعرف التقشف غير فالمارشي كي يشوف حاجة غالية ينوض يندب ويقولك التقشف ماخرجش علينا والحالة غلات وماقدرناش قول والله يعني فالقضيان جاك التقشف مبصح فالمحارق يولي جيبك جيب سلال اون بيغصون وتولي دير كونكور فالحومة على شكون لي يشري اكبر كمية من المحارق وشكون يطرطق كثر
وكي تحكي معاه مثلا يقولك والله الإحتفال بالمولد النبوي بدعة وكي تقوليلو وانت علاه تشري لمحارق وتحتفل بيه يقولك والله لالا نفرحو لوليدات بيهم برك تآكل راسك
لوكان هادوك الدراهم راح زكاهم لوكان راهو احتفل احسن احتفال بالمولد النبوي
ربي يهدينا ويصلح احوالنا رانا من سيء لأسوء
بارك الله فيك على الموضوع
دمتي في رعاية الله وحفظه ​

 

[كرافسة]

رد: التقشف وطريقة الجزايريين في الاحتفال بالمولد النبوي الشريف!

انا لله وانا اليه راجعون ... ربي استرنا فوق الارض وتحت الارض ويوم العرض عليك يا رب العالمين .. امين
... عجز لساني عن التعليق اختي الكريمة ... وانت كفيتي و وفيتي .. بوركتي

 

[لؤلؤة قسنطينة]

رد: التقشف وطريقة الجزايريين في الاحتفال بالمولد النبوي الشريف!

السلام عليكم
والله يا ساندي جبتيها سوا سوا وموضوع في وقتو مع اني متأخرة شوي
يعني الشعب تاعنا كي تسمعلو تحس طرف خبز مايسعاهش باه يتعشا
بصح تروح للاعراس تلقاهم كامل مذهبين والنساء يبدلو في القش غير تاع 6 ملاين و5
تروح للسيارات تلقاهم عندهم السيارات المخيرة وكل دار فيها 4 و5 سيارات ومن بعد يقولك رانا في حالة
تروح للبسة كيف كيف للماكلة كيف كيف للتحواس كيف كيف واللخرة خلاص حكاية المحارق
اصلا بلا حكاية بدعة والله يتحاسبو على هاد الدراهم لي راهي تتحرق ، كيما قالها احد الإخوة قبلي
ببريكي تاع ألف فرنك تحرق الملايين، وانا قبل اسبوع تلاقيت مع ولاد خالاتي ونشوف فيهم كي يشريو
في المحارق سقسيتهم على اسماءهم، هادي شيطانة ههههه وهادي مرgازرة هههه قتلهم زيدو صحن وخبز ونتوما تعشيتو
وزيد يقولولي مازالت داعش ماشريناهاش، قتلهم واش فيها داعش هادي، قالولي كي تنفجر صوتها يدوي الدنيا
وكي سقسيتهم قداه شراو هاد المحارق كامل تعرفي شوكاوني، يعني مجموعة صغيرة من المحارق سومتهم فاتت
500 ألف و 600 ألف وقادرة تلحق للمليون وزوج ملاين ، يعني أولا خسارة وتانيا الخطر لي تشكلو
على لولاد الصغار، خاطر كي شفت الفيديو لي حطيتيه خلعت ، يعني ورا الميكرو وخفت يدخلو عليا هههههه فمابالك
طفل عمرو 6 و7 سنين يلعب بقنابل كيما هادي، واصلا ليلة المولد خليها لربي تقول الارهاب هجم علينا ههههه
تكون قاعد في رحمة ربي حتى تلقى روحك سوطيت من الخلعة
ربي يهديهم برك ويهدينا هادا مانقولو، وربي يهدي هاد الاولياء لي يرميو دراهمهم على الطاقة
كن لبسة لوالدهم ماتغيضش بصح حوايج كيما هكا والله تبذير وحرام عليهم
شكرا ساندي على الموضوع المميز
تقبلي مروري​

 

[شمس الاصيل2]

رد: التقشف وطريقة الجزايريين في الاحتفال بالمولد النبوي الشريف!

شعب دايمن يضبح بصح الواقع حاجة اخرى الحمد الله ينساوها برك عندي سؤال واش الفايدة من طح طح راسي وجعني منها ما يحترموا كبير ولا مريض