راهي بدات أسئلني يا حباباتي

[دعاء الجنات]

-صباح لخير حباباتي كيما وعدتوني سابقا رايحين تعاونوني بنصائحكم القيمة ...
أولا تخيلو روحت نطل على جهازي....صح عندي بزااااااف ماطليتش عليه حتى نسيت واش عندي
المهم واش لقيت:-o...حوايج الشتا أي قش تاع الشتا ماراني مخبية والو....كشغل راني رايحا للصحرا...وانا في سطيف الباردة
المهم من فضلكن
قولولي واش لازم ندي معايا في حوايج الشتا بالتفصيل وأقل حاجة ...أي روب أو الفيزوات شحال من حاجة لازم نديها في جهازي وزيدو قولولي حوايج وحد أخرين لازم نديهوم....باه نوجد روحي نشريهوم...
ان شاء الله مانكونش طولت عليكوم...وراني نستنا جوابكم شكراااا

 

[{مُدَلَّلَتُهُ}]

رد: راهي بدات أسئلني يا حباباتي

السلام عليكم و رحمة الله و بركاته

أهلا أختي ربي يهنيك ان شا الله و بزيان السعد !

أنا ما نعرف شا يدو في الجهاز . . مازال الحال عليا خخخخ

بصح نقولك على حساب واش سمعت . . ما تكثريش الحوايج لأنه كل عام تخرج موديل جديد و فصالة جديدة !

كاين شي صوالح تديهم و مبعد تندمي عليهم خاطر تروح لامود تاعهم قبل لاا تشبعيهم

كاين هاذ الموضوع اضربي عليه طلة

قائمة المشتريات للعرائس

و ان شا الله يعاونوك البنات


​

 

[السلطانة]

رد: راهي بدات أسئلني يا حباباتي

اصبري عليا اختي نكمل لغذى ومواعينو ونرجع ليك ههه

 

[دعاء الجنات]

رد: راهي بدات أسئلني يا حباباتي

-شكرا ختيتو..lovely smile....عقبال ليك ان شاء الله

 

[دعاء الجنات]

رد: راهي بدات أسئلني يا حباباتي

اصبري عليا اختي نكمل لغذى ومواعينو ونرجع ليك ههه

ههههههه والله ظحكتيني .... بصحتك راني في الانتظار:d

 

[iman-dz4ever]

رد: راهي بدات أسئلني يا حباباتي

صباح الخير يا احلى عروس
وربي يسهلك ختي راها الفوضى نتاع تجهيز العروس تأثر على العروس نفسيا و حتى بشرتها تتعب
املا نوصيك اتكلي على ربي و متتقلقيش راها تسهل ان شاء الله
وكيما قاتلك الاخت لالالالازم كي تولي تجهزي اشري غير الاساسيات الي تبقا معاك مدة طويل
و متروحش لامود نتاعها و ثاني اي عروس لازم تدير في حسابها ان يمكن ان شاء الله يحصل
الحمل في الاشهر الاولى وتبقى لبستها غير في الخزانة
انت اشري الحوايج الاساسية برك ومن بعد الزواج راه تخرج ستايلات جديدة و الزعييييييم
راه يشريهملك
نوصيك على البيجامات الشتوية الي تصيبيها من اربع قطع
راها صفقة مليحة
كيما هاذو

و متكثريش منهم بزاف غير زوج بركة
وثاني ديري البيجامات ساتان نتاع العرايس
راهم ثاني يجو نتاع اربع قطع يهنوك وديري الالوان الاساسية غوز والابيض

وراني نروح و نرجعلك بالجديد سلام ملوكتي الغالية
​

 

[الزهرة الحمراء]

رد: راهي بدات أسئلني يا حباباتي

السلام عليكم أختي
اولا ربي يهنيك ويدوم العشرة بيناتكم
ثانيا نحي كامل هاديك القلقة عليك والتوتر على خاطر كل شيء يفوت
ودرك يجوا عرايسنا لي عندهم الخبرة اكثر ووجدوا من قبل للجهاز تاعهم يفيدوك
وراني فالمتابعة في حوايج خلاف
​

 

[iman-dz4ever]

رد: راهي بدات أسئلني يا حباباتي

و القنادر نتاع القطيفة الي كنت دايرة منهم امليح و اذا لالا
غير شمري على ذوك الايدي والبسي صباطك و الي اقرب خياطة
واستغلي راه مش موسم اعراس راكي تصيبي الي تخيطلك
ديري ثاني غير زوج ولا ثلاثة واحدة تكون ثقيلة نتاع الناس الي يجوك للدار
و وحدة عادية نتاع الدار و انتي وذوقك

و راهم اشكال وانواع يهبلو وكاين الي يتباعو واجدين
​

 

[iman-dz4ever]

رد: راهي بدات أسئلني يا حباباتي

و الفيزوات هاذوك الي ادي على قدر الامكان راهم يبقاولك طووووووووول
ادي من العادين و المشبحين و راهم ينفعوك مع برد سطيف العالي
راهم يتلبسو بكذا ستيل شوفي هاذو عجبوني

​

 

[iman-dz4ever]

رد: راهي بدات أسئلني يا حباباتي

والشالات نتاع الكروشي و الصوف ثاني راهم في الحوانت بكل الاشكال و الالوان
ينفعوك في دارك ولا كي تخرجي برا

​

 

[دعاء الجنات]

رد: راهي بدات أسئلني يا حباباتي

-إيمااااان مرسي بزاااف والله صح ان شاء الله نبدا بيهوم شابين بزاااف وزبي يخليك لينا كامل
-الوردة الحمراء والله يا حبيبتي القلقة فيها فيها لأنو عرسي ماشي باين قادر على ست اشهر وقادر على عام يعني الراجل عندو أمور يكملهم ومن بعد يعرس مباشرة قال لي والله مادخلني في قشك....
شكراااا لكن على الإهتمام

 

[iman-dz4ever]

رد: راهي بدات أسئلني يا حباباتي

وتقاشر ثاني ادي منهم من كل الاشكال راه كاين الي يتباعو مجموعات تصيبي فيهم اربعة تقاشر من نفس النوع بصح الوان مختلفة

والبنتوفات راه كان وحد الاشكال كييييييييييييييييييييييييييوت

​

 

[iman-dz4ever]

رد: راهي بدات أسئلني يا حباباتي

لا كر على واجب ملوكة واذا موقفوش خواتاتك اللمويات معاك ويناه الي يوقف معاك
وراني حاسة بيك ختي الغالية انا اكثر منك في حكاية العرس الي مهوش باين نهارو ويكتاه
ربي يفرجها ان شاء الله واذا زدت تفكرت حاجة راني نجي

​

 

[iman-dz4ever]

رد: راهي بدات أسئلني يا حباباتي

 

[دعاء الجنات]

رد: راهي بدات أسئلني يا حباباتي

واو....:thumb_up02::thumb_up02:
-والله صح ماكانش حاجة تقلق كيما يكون العرس ماراهش باين معنتها طووووول هاذي المدة نبقاو على أعصابنا
...ربي يجيب الخير ان شاء الله
-كي تتفكري اي حاجة راني هنا في الانتظار

 

[السلطانة]

رد: راهي بدات أسئلني يا حباباتي

وعليكم السلام
أولا أختي نقولك متقلقيش روحك
مرحلة تحضير الجهاز ماهي غير مرحلة وتفوت
الصح بعد العرس والحياة الزوجية :d
بالنسبة للملابس الشتوية
ادي تاع الدار وادي تاع لي تقابلي بيهم الضياف وتروحي بيهم للطرق
يعني تقدري تقولي تستعمليهم مدة عام برك ومباعد الراجل راه ميخليكش هاكاك يولي هو يصرف عليك ويشريلك واش تحبي
مالا متكثريش وادي قد ماتستعملي برك

بالنسبة لملابس الدار :
3 بيجامات يكفيو
تدوري بيهم في الدار مع الصباح
يكون تاع شتاء ملاح
ولقنادر لي تستقبلي بيهم الضياف ولا تروحي بيهم ليهم
خيطيهم خير يجيوك اقل تكلفة من المشريين
كان عادت ظروفك تسمح
ديري 6 ملاح باهيين
تاع قطيفة
ديري وحدة مثلا تاع طرز تكون باهية
تمشي بيها لطريق
ولوخرين هام كاين لي مودال باهيين تقدري تخيري وتدي للخياطة تخيطلك

اشري الملابس الداخلية صح تحتاجيهم
كثري
ولي نويزات مننصحكش تكثري منهم
خطراكش تستعمليهم شوي ومباعد يتخباو
وتعودي مرات برك تستعمليهم ماش طول

اشري السراويل مع ليبستي تحتاجيهم
تدوري بيهم في لاشومبر تاعك
ديري مثلا 4

ليفيزو تاع الشتاء ديري 4
تلبسيهم تحت القش
وليgان وهادوك الصوالح تاني
ديري 4 ولا 3

ادي تاني لي بابوش باه تدوري بيهم في الدار
ديري 2

مثلا لون اكحل ولون خلاف كلار يتلبس مع لبستك كاملة
ابيض يخرجلك مع كلش

مادامك عروسة خيري الالوان الفاتحة
غوز بلوسيال باج والابيض تاني

اشري لي بيستي لي تلبسيهم تحت ليبياجاما
تحتاجيهم
ولا لي بودي هادوك المشهورين
لي يجيبو بالالوان
كان عادت دارك باردة تلبسيهم من تحت

وللقنادر
تقدري تشريلهم منتحت
هادوك الدخلات لاقلاش ماما
تلبسيهم من تحت
خلي 2 للطرق و2 للدار

ديري تاني قنادر للشتاء تاع الدار

باه تلبسيهم كي تنحي البيجاما

شوفي ديمودال تاع دار ملاح

يااما اشريهم ولاخيطيهم

زيدي ادي مساسك الشعر

كيما لون بيجاماتك وقنادرك
اشري ليبوندانا
وسيرتات
باه تبدلي بيهم وفراشات تاع الشعر

ومتنسايش لي بان فان

والريحيات لي تدوري بيهم كي يعود البرد
وبليغة للتسياق


نتمنى نكون فدتك وربي يهنيك
​

 

[iman-dz4ever]

رد: راهي بدات أسئلني يا حباباتي

سلالالالالالالالام راني رجعتلك
متنسايش البوديات نتاع الشتاء بصح متكثريش منهم راه العام جاي يخرج الجديد
ادي غير الاالوان الاساسية منهم الرمادي و الاسود والابيض
كيما هادو

والجيبوات ثاني الالوان الي متروحش والي تقدري تنسقيهم مع شحال من نوع نتاع بوديات

​

 

[iman-dz4ever]

رد: راهي بدات أسئلني يا حباباتي

ومتنسايش ملاك راه الربيع قريييييييييب
وان شاء الله عرسك يكون في الصيف يعني ادي ثاني من صوالح الربيع
جيبوات وبوديات نتاع الفولار راهم لامود روعة اختاري الالوان الي تحبيهم نتي
وينفعوك في خرجات و سهرات نتاع لافامي

وثاني قنادر الدار نتاع الربيع اشري ولا خيطي راه عندك الاختيار

​

 

[iman-dz4ever]

رد: راهي بدات أسئلني يا حباباتي

ونسيت الاسدال نتاع الصلاة

ومنعرفش اذا انتم كيما حنا في الجلفة تمد العروس في الصبحية
قطع قماش لاهل العريس و هدايا نتاع خمارات وقماش
هذوك ثاني اشريهم اتهناي منهم

و الاكسيسوارات ثاني اشري منهم كل مرة حاجة

​

 

[iman-dz4ever]

رد: راهي بدات أسئلني يا حباباتي

وثاني عندي فكرة اشري السرافيت و اذا راكي غير قاعدة
طبقيهم نتاع العرس و ديريهم في كرتون و خليهم نهار العرس تلقايهم واجدين

​