رد: هل صار الفايس بووك لعبة بيد نساءنا وبناتنا !
السلام عليكم
واسعد الله اوقاتكِ أختي الغالية
والله حطيتي يدك على الجرح يا اختي
الناس جهلت وبناتنا راحو فيها، اذا حابة تستخدمي الفايس بوك وتستنفعي بيه
معليش واحد مامنعك، لأنو كاين صفحات صراحة والله نعمة، في رمضان الماضي
شاركت مع اخوات عبر الفايس بوك في صفحة لحفظ القرآن وحفظنا سورة يوسف وكانت الاخت
صاحبة الصفحة هي لي تراقب الحفظ تاعنا كل يوم، يعني ماشاء الله والله فخر و اعتزاز
وكاين بعض المجموعات والصفحات الاخرى لي هدفها الفساد واللعب بأعراض الناس،
الصباح برك قاعدة نحكي مع وحدة من البنات لي يقراو معايا وعلى الصفحات لي يتابعوها عبر
الفايس بوك، صدقيني تكوديت وتشوكيت وصرالي اختلال، مافهمتش اذا انا معقدة ولا هوما
يعني صفحات يحشم الراجل يدخلها، والمشكل يتناقلو الصور بيناتهم سواءا ذكور ولا اناث وجايتهم عادية
بالاضافة لصفحات spotted لي هدرت عليهم اخت هنا في اللمة من قبل، تدخلي تبقاي بلا راس
لدرجة وصلت بالبنات الوقاحة يجيو ويتكلمو على شاب عجبهم وتزيد تقولو اذا راك مهتم بين روحك؟؟
يعني توصلت وحدة تكتب على رجل متزوج وتقولو راك عجبتني واخطيك من مرتك ارواح لعندي نتهلا فيك؟؟؟؟؟
هادو عباد درك؟؟ فتحو صفحات للفساد وتشجيع الرذيلة والفسق، وبناتنا غير يتبعو، يفضحو في رواحهم في
المجموعات ونساو بلي كاين شباب يدخلو باسماء بنات ويتفرجو على كلشي ،حاطين رواحهم في ديارهم
والله عيب صح، حتى ولاو نساء متزوجات يخدعو رجالهم ويدردشو طول الليل مع الاجانب وتوصلو يديرو معاهم
لقاءات في الخفاء، يعني ربي يهدينا برك، انا مانكدبش عليك ندور في الفايس بوك ونهتم بوضع منشورات
لكن بعدت على المجموعات من النفاق لي فيها، وبصراحة من نهار لي وليت للمة نقصت دخولي للفايس بوك
اللمة ارقى وأجمل من اي موقع، خاطر لقيت فيها الافادة على عكس باقي المواقع
نقولو ربي يستر علينا وعلى بناتنا ويحفظنا من كل سوء يارب
بارك الله فيك
تقبلي مروري
