السلام عليكم
والله دايما يبقى السؤال مطروح
صراحة سبق وشفت فيديو من سلسلة خواطر5 وراهي غنية عن التعريف، وكانت حلقة من حلقاتها
يزورو حدائق عامة في اليابان وكانت كل الشوارع معمرة بأطفال عمرهم بين 6 و9 سنوات ويمشيو وحدهم
بدون أولياء ويجيو من مسافات بعيدة للحديقة بلا ما يتأذاو، ولما سألهم مقدم البرنامج وهو محتار كيفاه
جاو وحدهم من مسافات بعيدة استغربوا الاطفال هادوك من سؤالو بانلهم سؤال غريب وعجيب هههه
لأنو الأمن أمر عادي عندهم ويقدر طفل صغير يتجول في الشوارع بكل راحة
على عكسنا حنا اطفالنا يخرج زوج دقائق حتى يخطفوه ويرجع جثة هامدة، هادا اذا رجع اصلا
والحل نظن أولا لازم تطبيق العقاب، يعني إذا انسان خطف براءة واعتدى عليها وقتلها من المفروض
يتم اعدامو مباشرة قدام الجمهور باه لي يحاول يدير المهمة هادي يخاف على حياتو، بالإضافة إلى
وجود شرطة بلباس مدني، يعني لما يعرف الشعب أنو كاين شرطة تدور في المدينة وبلباس مدني كيفها
كيف الشعب رايح كل شخص يجي يدير خطوة يخاف من ظلو، والحاجة الثالثة هي مسؤولية الوالدين
لأنو درك نشوف في مناطق خالية وسط الغابات وفي صباح بكري اطفال صغار عمرهم 5 سنوات
يمشيو وحدهم، يعني وينهم الاولياء؟ ترمي ولدك هكا بكل برود؟؟ ولا الاقل وعيوهم وفهموهم ،
ولكن في النهاية كاين مشكل لو يتحل تتحل كل المشاكل وهو المعريفة والرشوة، لأنو لما تمسك مجرم
وتحب تعاقبو ومن بعد لما يكون عندو معارف يخرج من نهارو ويولي اب الضحية هو المذنب
يعني مادام القانون ماراهوش يتطبق مستحيل تهدأ الأوضاع، والدليل حالات الاختطاف مازالت للاسف
ربي يهدينا ويحمي اولادنا ان شاء الله
شكرا على الموضوع
تقبل مروري
