ساعدوني

[الاحلام الوردية]

السلام عليكم ورحمة الله وبركاته
انا حابة نفرغ قلبي وانشاء الله نلقى النصيحة عندكم
انا فتاة عمري 25 سنة
انا الحمد لله من عائلة متدينة وقارية
والخطاب قريب كل يوم يجيو للدار بصح انا نرفضهم بدون سبب
لاني عندما يتقدم لي واحد ضيق روحي وما نرتاحش كي نرفضه نرتاح وكي تفوت مدة نندم وتحكمني كأبة اخرى
لدرجة كي نتفكر الاشخاص الدين تقدمو لي نحير كيفاش رفضتهم اغلبيتهم متخلقين وقاريين ولاباس بيهم كامل حاجة في الدولة
قبل شهر تقدملي واحد قاري ولاباس بيه دارنا عجبهم وانا كي العادة مارتاحتش بصح قررت نعفس على قلبي ونقبل باش نرضي والدي وقبلت

لكني ماقدرتش كل يوم نبكي
وتجيني آلاف الافكار السوداء ونقول نبطل
مسكين مرة جاء يعيطلي في التلفون ماقدرتش نريبوندي عليه وليت نبكي
وكل مايجبدولي الهدرة علبه تضيق روحي
هو باغيني وكان حاط عينه علي من قبل
الايام لي فاتو دارتلي ماما شوي رقية في الماء
رتاحت شوي وليت نتقبل في الفكرة شوي شوي
بصح اليوم قالتلي ماما بلي جهزي روحك
في العطلة للربيع يجيو يلبسو الخاتم من تم رجعتلي الضيقة وتبدلت حوالي والله انا نكتب والدمعة على خدي مع اني قبل مانقبل استخرت بزاف يوم نرتاح ويوم تضيق روحي اكتر
انا خايفة نبطل ونندم كيما ندمت علي قبلو
وايضا هو ناس ملاح ومربي والناس الكل تشكر فيه وعلابالي مانلقاش لي كيفه وانا خايفة نظلمه وخايفة على مشاعره
لكن انا كرهت وما لقيتش روحي
بحيث اني ضعفت ونقصت بزاف في المزان من التخمام
وعدت مانكلش ودائما ساكتة
وارجو المساعدة وشكرا

 

[بنت الـ25]

رد: ساعدوني

السلام عليكم أختي الكريمة أحلام وردية
أولا عسى الله أن يجعل حياتك وردية كأحلامك

شوفي اختي العزيزة ، موضوع الزواج قرار مصيري علابيها اي فتاة ترتبك ويضيق صدرها كي يتقدملها الخطاب خصوصا لو كان ما عندهاش بهم معرفة سابقة
تصيبك رهبة وخوف من المجهول ... ولكن نقولك انو الخيار في تقرير مصيرك يرجع ليك أولا وأخيرا طبعا بعد موافقة الأهل
نصيحتي ليك استمري فهاد الخطبة مع الاستخارة اليومية ، واصلي الاستخارة كل يوم لحتى ربي يشرحلك صدرك لهاد الخطيب، وحاولي تكون فترة الخطبة طويلة نسبيا وما تستعجليش العقد المدني حتى تحسي بالارتياح التام
صدقيني نهار لي يجي يلبسلك الخهاتم والزغاريت والناس الكل ملمومة على جالك رايحة تتنحالك هاد الغمة
أنا صراحة نتمنالك تكملي حياتك مع هاد الرجل لأنو حسب الصفات اللي ذكرتيها عليه انو متدين وخلوق وناس ملاح وووو يعني اي وحدة تتمناه ما طيريهش من يدك
لأنو كيما علابالنا انو الراجل اللي يخاف ربي رايح يتقي الله في المراة وما يظلمهاش ويعرف حقها عليه
وتاني انتي لازمك تعامليه بنفس معاملتو ليك ، وهي انك تكوني وفية ليه حياتك بأكملها لكان وافقتي عليه طبعا

نتمنى ربي يهديك للقرار الصائب وما توسويش روحك بانك مسحورة أو شيء من هذا
ربما راكي محسودة لصفاتك اللي ذكرتيها ولذلك حصني نفسك بالأذكار والأدعية وقراءة المعوذتين وآية الكرسي

‏والسلام عليك ورحمة الله وبركاته.​

 

[Hakan]

رد: ساعدوني

السلام عليكم اختي :
هي وساوس شيطانية لغير فهو يريد ان يحزن الذين ءامنوا انت خيرتي انسان طيب خلوق متدين واكيد بعد ما تتعرفي عليه اكثر رايحة تلقاي الراحة نتاعك مشكلتك خوفك من المجهول واللي بدل ما تكتاشفيه تبقاي بعيدة عليه اختي الكريمة حاجة لازم تعرفيها انو الزواج لازملوا تعارف يعني السيد خطبك حاولي تتقربي منو وتعرفي عليه وتسقسيه وخليه هو تاني يدخل حياتك ماشي اصلا انت بعيدة عليه وقاعدة تبكي وحدك مادامو خطيبك كلميه
وان شااء الله رايحة تفرحي تحتاجي برك شويا ثقة في النفس ومادام الرجل سكن المراة اذا خليلو فرصة باش يمسح هاذوك الدموع اللي راهم يطيحو من عينك بدون سبب انت يااختي مسؤولة على واش يصراالك لانو اولا واخيرا انت خايفة فقط وعندك زيادة خوف ولازم تنحيها حاولي تكلمي خطيبك يوم زوج ثلاث وان شااء الله ترجعي وتقولي الحمد لله راني تعرفت على مخلوق من الفضاء خخخخ
ايا ختي ربي يهنيك وامسحي هاذيك الدموع اللي على خديك ما تستاهلش باسكو اولا واخيرا انت ماراكي خاسرة والو
ان سان متربي وخلوق اكيد رايح يساعفك لاقصى حد برك انت خليلو فرصة باش يكتشف الاشياء اللي تحزنك ويعوضك بها
لانو انت ناقصة امان وهذا الامان رايحة تلقايه عند زوجك المستقبلي اذن خليلو فرصة وراني نعاود ونقول شويا كوراج برك
باسكو لوكان قلتيلي انسان ماش مليح بالاك لكن انسان متربي اكيد رايح يفرحك واذا ما فرحكش ماهوش رايح ياذيك ربي يهنيك ان شااء الله وفي الربيع سمعينا عليك اخبار مليحة
اسمك احلام وردية هذا دليل على الرقة نتاعك وانو في قلبك عندك مملكة وردية خايفة عليها من الجفاف لكن خلي هذا الراجل يسقيها
ورايحة تتعطر هاذيك الورود راني بديت نشعر خخخ سلام ..​

 

[ديسق]

رد: ساعدوني

وعليكم السلام ورحمة الله وبركاته

في الغالب لما الواحد يشتكي من شيء ما إلا وأنه كاين سبب، وفيه حالة من الناس إلي يواجهو مشكلة وهم في حد ذاتهم
مش عارفين السبب مثل حالتك، إلا أنو في غالب الأمور البرمجة (السلبية) إلي حملناها من الماضي ربما قبل 15 سنة
ربما قبل 10 سنوات ربما في الشهر الماضي،.. ونقصد هنا أنه فيه أمور العقل نتاعنا يخزنها ويبني عليها مواقف، مثلا
واحد لما كان عمرو 11 سنة مر بموقف ممكن شافو لشخص آخر مثلا هو يخون زوجته وتأثر بتلك القصة، وممكن مثلا
كاشي واحد يحكيلو عن المشاكل بين الكنة والحماة ويبني عليها مواقف سلبية،.. هاذي الأمور قادرة تكون مرت عليها
عقود من الزمن وعقلنا اللاواعي سجلها وبالتالي لما نصادفو أي موقف العقل اللاواعي يعطي إشارة عدم ارتياح لشيء
ما تأثرنا به في الماضي.

ممكن بعض نم الأسئلة تقدري تعرفي السبب نتاع المشكلة بالنسبة ليك:

واش تعنيلك كلمة (الزوج)؟
واش تعنيلك كلمتي: الكنة والحماة؟
واش تعنيلك كلمة الحمل وانجاب الاطفال؟
واش تعنيلك كلمة العيش بعيدا عن الوالدين؟
واش تعنيلك كلمة (الخطبة)؟
واش تعنيلك كلمة (العرس)؟

وغيرها من الاسئلة الي عندها علاقة بالحياة الزوجية تقدري تطرحيها على نفسك
وتجاوبي عليها بينك وبين نفسك، واذا كان فيه سؤال اجابتك عليك اجابة سلبية
مثلا كاين نساء لما نطرحو عليهن السؤل التالي: واش تعنيلك كلمة (الزوج)؟
تجيب مباشرة (الخيانة، الضرب، القسوة، الكتمان، الاسرار،..) فهذا يعني أنهن
عندهن برمجة سلبية خلاتهم يعيشوا الألم والحزن،... ولازم ينسفوا هذيك الافكار

وعندك نقطة ممكن راح تتأثر عليك أكثر في حياتك (الحالية) وإلي هي الندم
ولازم نامنو بحاجة أنو الشيء إلي فات مات واذا حيينا الأمر في عقلنا وبقينا
نعيشوه فمش راح نجنيو منو غير الحسرة والضيق،...

الله يفرج عليك أخت الكريمة ولا تنسي الدعاء لله عز وجل، واحسني الظن به

دمت بخير

سيف



​

 

[فيتامين سي]

رد: ساعدوني

اه يا ربي فكرتيني بروحي ...ننصحك بالرقية ......انا عارفة السبب هو العين و الحسد كي يجبدولي موضوع هكدا خاطري يتزير و نخاف ممكن من المستقبل او معلاباليش مي انا لي بهلولة نبدا نرقي و نحبس اف جبتها لروحي
حسيت بيك حنونة احسن حل تقومي الليل و تستغفري بزاف حتى و يكون سحر يروح والله و عين تروح دايما دعي ربي ..رانا في مجتمع ميخافش من ربي و داك نهار لي تنسي اذكار تنحكمي و تعيشي في الم على هذي درك عارفة شخص مليح متفرطيش فيه و رقي روحك استخيري ربي يفرج عليك و علينا كامل كامل و يبعد علينا ولاد الحرام...متيأسيش ادا فيه خير تكملي شر ربي يبعدو و يرزقك بانسان يخاف ربي

 

[zohor kfz]

رد: ساعدوني

madamki stakharti rabi matkhafich
ida kan fih kach 7aja mkhabya w matwalamkich akiiiiid ghadi tankachif 9bal elzwaj w tabtlo kolach w ida makan walo w maykon ghir elkhir nchallah bachwaya bachwaya ghadi t7obih w tarta7ilo
rabi ywafa9ki nchallah

 

[خفيفة الروح]

رد: ساعدوني

ننصحك بالرقية ختيتة