السلام عليكم
اعضاء اللّمة الكرام اليوم خلّونا نحكو فموضوع راني نشوف فيه يمشي فالبلاد
ايه موضوع نحكو فيه على الطاطات ايه الطاطات واللّي ما فهمتش او ما فهمش راح نفصلو فالموضوع
خولنا نمنشرو ولكن فالخير كيما تقول هبة الغرض انو نعالجو ظواهر ونمدو راينا فيهم
عام الطاطات
العجب يا جماعة رانا نشوف فيه لو جا التمهبيل على مولات العشرين والثلاثين نقول عادي مولات العشرين ذرية ومولات الثلاثين مازالما شبعتش من رايها..........
ارواحو نحكو على الطاطات الي فاتو الخمسين وحبو يعيشو مراهقة متاخرة..............
العجب نشوف فيه في بعض المناطق مولات خمسين وأكثر لابسة لبسة نتاع مراهقات..........
شعر صفر وسروال جين وهي لو تفوت عليها الريح يديها باقيتلها شخرة وتروح لمولاها..........
لا حجاب لا سترة لا هدرة نتاع وحدة كبيرة..............
والكارثة لو تقادرها وتحترم سنها تاكلك لازم تبينلها دايما انو هي صغيرة.............
زيدو أكثر فئة يحبّو ليجون الصّغار هم فئة ما بعد الخميس والله عيب وعار..............
تلقاو جون فالعشرينات مع وحدة فايتة يماه يجري وراها على جال الدراهم او ميغرية
واش الحسرة اللي راكم فيها يا ليجون نتاعنا.............
بعتو رواحكم للطاطات سبحان الله حرت واش عجبو فيها وكيفاه ما يحشمش وهو حاكم عجوز من يديها ويقولها عمري ويااااااااااااا حوجي يا انا انا نظنها عمرو في اواخرها...........
مرة وأنا فبتيزريا نشوف جون مع وحدة والله شعرها منصول خلاص راهي تتعفن فوق الأرض فرغت خلاص بدات تذوب إيه وأنا نحسب فيها جدّاه
وباينة ميغرية يعني سور موالفة تاكل البيتزا العجايز نتاعنا ما يحبوهاش
حتى نسمع الكلام يا جماعة أنا بكيت بالدمعة والخنونة أنا كيفاه صغيرة وما سمعتش هذاك الغزل
ما خلى حتى كلمة وما قالها جاب خروف وقاعد يجزّر هالكبدة وعالغرنوق وها الدوارة
حرت انا كيفاه زوج دورو نتاع الدنيا يخلوه ييع يروحو على لعجوزة............
ونشوف فيهم يحرقو البحر وينومو فالقاوريات ولو عندها 90 وهنا ما يقبلوش بنت البلاد ولو عندها 20 وقالك ندخلوهم للإسلام يا وليدي أدخل غير للجامع اللي قدام داركم راك مليح.............
عام الطاطات انتشر وماكان لاه نقول القاوريات وبرك حتى هنا كاين فايتين حتى 60 ونورمالمو راهي تمد في حق ربي وتحلم بحجة تلقاها فلاصال ديفات تشطح الواي واي
حواجبها على شعرة و70 كوش نتاع فوندوتا تغطي بها الجلودة اللي يبانو من تمنراست
انا راني حايرة عاشو وقتهم واش يحوّسو فوقتنا اللي حتى حنا مش عايشينو
وقالك مرة وحدة بعثت لشمس الدين تقولو أنا عندي 75 وحابة نتزوج قولولي هذي ضرك واش حابة حفّار قبرها أو واش 75 وتحوّس تتزوج بواحد صغير
ونتوما ليجون فهموني برك ما تحشموش كي تخرجو مع عجايز قد نانّاكم..........
خلّونا من الطّاطا ما نقدرش نسقسيها لأنو باينة روتور داج............
مي أنت اللي جاي للدنيا تروح تبيع روحك على جال إقامة في فرنسا وتعيش هناك تغسل الماعن.........
والنسا هذو اللي كبرو وعاشو وقتهم مش من المفروض قربو للموت أو مازالو يحسابو فيه بعيد مع انو الموت ما يخير لا كبير ولا صغير
الله يهديهم
واش رايكم نتوما فالطاطات؟
واذا شفتو هذو النوعية او سمعتو عليهم خبرونا
ونتوما ليجون واش رايكم فاللي يتبعو فنسا اكبر منهم حتى هنا مش شرط قاورية لانو حتى هنا يتبعو فالي كبار عليهم على جال الدراهم
الموضوع موضوعهم اهدرو براحتكم
آخر تعديل:
