غاضتني عمري واستحقرت روحي

[Hakan]

السلام عليكم
صباح الخير واش راكم لاباس المهم كي يتعمر القلب كاين اللمة اسمك والموتدباس وادخل قسم فرغ واش كاين في قلبك
ياسيدي ريحت هذو اليومين وقعدت نتفكر في مشواري اللماوي والناس اللي تعرفنا عليهم اللي حبونا واكيد كاين اللي ما يحبناش او نقولو ما يعرفناش مليح
ياسيدي الويكاند ياك يروح صاحبي ونقعد في الشمبرة وبالاك احسن فترة ليا نريح وحدي خاصة في الليل ياسيدي ليلة السبت ريحت مع روحي وبما انو ما دخلتش للمة لبعض الظروف
تفكرت الناس اللي هنا المهم وانا نتفكر دخلت وحد الفكرة في راسي او بعض الصور وردود بعض الاعضاء اللي كانت مليئة بالثقة تفكرت كي يقولولي الخاوة انت فور انت انسان مليح
ربي يحفظك وين ماكنت الله يخليك عاونتني ونصائحك قيمة تفكرت هذيك الطفلة اللي قلتلها مكانش لاكونفيونص في الفايسبوك تفكرت هذاك السيد اللي قتلو كي توجد روحك تقدر تحب
تفكرت هذيك اللي قلتلها يماك راهي تحبك وردي بالك تعصيها تفكرت هذيك اللي جاتني تبكي معليه خويا تعاوني وقلتلها بصدر رحب راني هنا ختي نسمعلك وحكاتلي قصتها من اول للاخر
تفكرت كيفاش كنت وكيفاش وليت لكن مانيش راني رايح نحبس هنا عاودت قارنت هذيك النصائح لحياتي الواقعية وكيفاش راني غالط في حوايج بزااف
كيفاش راني نحكي مع طفلة في الفايسبوك نتاعي وكيفاش منين ذاك نعيط على امي وتفكرت كيفاش ساعات ننسى نو ننصح روحي نهار نسمع غناية ولا نتفرج فيلم مع انو نعرف انو في زوج حراام وكيفاش ننصح الناس ما يسمعوش وما يتفرجوش وقعدت نقول ياه ياحكيم ماشي هكاك تمشي الامور وعلاش راك دير في عمرك هاك حوايج ماراكش قادر ديرهم علاش ساعات تدخل في قلبك وتحس روح انسان صافي مي انت ماراكش صافي لا مع روحك لا مع نااسك يعرفوك ناس في هذا العالم مثال للانسان الصالح مي في بعض الاشياء
راك خاطيها طول وعرض انا نتفكر والدموع يطيحو استحقرت روحي استصغرت روحي قريب عيطت في هذيك الشمبرا وحدي
غاضتني كيفاش انو الانسان ساعات يتفكر الناس وينسى روحو ينسى انو يفتش في روحو على مشااكل مالغري كل يوم نشوفو في هذيك المرايا مي جامي شفنا في المرايا نتاع رواحنا
وننصحو رواحنا النااس هذو اللي يعرفوك يشوفو وجهك مع الصباح منور ويقولولك ياوجه الخير وانت الخير ماراكش دايرو في روحك
تنصح الناس يصلو وساعات الواحد يصلي العصر مع الظهر والمغرب مع العشاء تنصح الناس ما يحكوش مع بنات الناس وتلقى روحك مزبل بحجة انك تنصح فيهم
علاش ساعات الواحد يكذب على روحو ويكذب عليه شيطانو
قعدت مع روحي شحال راني نكونيكتي في النهار وقعدت نحسب ياه راهي عمري راحت في لاكونيكسيون وشحال ضيعت من وقتي
صح الواحد ممكن راهو يرفد من الناس هنا لكن جامي تقول راني راافد اذا صح ما قضيت وقتك مع كتاب او تسمع محاضرة لكاش دكتور
والحمد لله الحاجة اللي نقولها لخاوتي هنا ممكن راكم تشوفو فيا بالاك انسان مليح او بالاحرى ما يرتكبش بزااف اخطاء لكن للصراحة
الواحد راهو غلط بزااف ونستعرفو بالغلطات نتاوعنا هكاك باش اذا كتب المكتوب ويتلاقى الواحد بخاوتو ويكتشفو عيوبو ما يقولوش
راهو كذب علينا راني نكتب في هذا الموضوع والشيطان يقلي ياو علاش تفضح في روحك واستر روحك لالا خليني نفرغ لخاوتي بالاك دعوة خير من القلب تخليني نتحسن شويا
وزيد نصيحة لروحي وليكم جامي يخدعكم الشيطان ويقلكم راكم خير من ناس لانو الانسان دايما لازم يحوس على الاحسن والشيطان يحب يخليك في السيء
دعواتكم خاوتي سلام ..​

 

[ثَسْكُورْثْ نَثْدُوكْلِي]

رد: غاضتني عمري واستحقرت روحي

سلام عليكم خويا حكيم

والله كلامك جعلني نراجع حساباتي بزاااف بزاااف

وتقدر تقول انك حطيت يدك في الجرح ..

أكيد مكانش انسان كاامل غير ربي سبحانو..

واكيد كلنا ماناش معصومين من ارتكاب الأخطآء ...

وبالطبع خير الخطآئين التوآبين ..

ربي يغفرلنا ويسرلنا أمورنا أجمعين

ربي يخفف عليك اخويا

وربي يفرج عليك وعلينا كااامل

وربي يهدينا للخير

ويثبتنا ع الطريق الصحيح

بالتوفيق لك

وبارك الله فيك لأنك درت الثقة في ناس اللمة و اتقاسمت معانا همومك اللي تجعلنا نستفيق نحن أيضا من غفلتنا ...

كن بخير

يا مقلب القلوب ثبت قلوبنا على دينك






​

 

[شمس الاصيل2]

رد: غاضتني عمري واستحقرت روحي

السلام يدي راني مريضة منها مي ماقدرتش مانردش كلامك اثر فيا عندك الحق الانسان دايمان يحاسب روحو

 

[zohor kfz]

رد: غاضتني عمري واستحقرت روحي

saleeeem
fi bali 7akim nrodlak elnassi7a li nsa7thali nta
matadghatch 3la nafsak bzf w ayak t3adam eldanb w ra7mat rabi was3a w matansach 7adit elrassol sala allaho 3Alayhi wa salam fi ma3nah ano elsalat tam7i kol eldonob li darajat ano ja2 3ando chakhs w 9alo dkholt 3la 7adi9a biha sor w ra2ayt 2imra2A w fa3alt ma3Aha kol chay2 ... sa9sah elrasol salla allaho 3alayhi wasalam hal salayt ma3ana ??? rad elrajol wa 9al na3am rad 3lih rasol ellah w 9alo ... 9ad ghafar ellaho lak
7Akim khali ti9Atak brabi w bnafsak kbira w rabi m3ak

 

[ليليا مرام]

رد: غاضتني عمري واستحقرت روحي

السلام عليكم
انا نهينك ونقولك انت انسان ماشاء الله هذا الموضوع وانا ما نعرفكش يعرفوك هنا قبلي يخليني نقولك قلبك طاهر ويكفي انك حسيت هاكا ونقولك ماراكش وحدك كامل نقولو هاكا ومش عي تنصح غيرك ولو الحاجة هذيك انت متمني ديرلها لروحك شعال من مرة ننصح صاحباتي ما تحبوش وما ديروش وانا نحب كنت ننصح البنات ما يضيعوش وقتهم فالفايس وانا عندي فايس هذا ما يعنيش انو راني غلاط او نكذب على الناس لالا ممكن ما نحبهمش يديرو كيما انا النصيحة تخرج منك تلقائيا وعلاه لو تبعثلي مراهقة وتدي رايي راح نقولها حبي راجل محال راح نقولها خلي قرايتك وتبعي الفايس محال نقولهالها نقبلها على روحي لانو انا ممكن كبيرة ونعرف نتصرف مي هي لو ننصحها راح ندي ذنوبها
خويا حكيم ما تحملش روحك ذنب دير فبالك اللي جات ليك تبكي وطلبت نصيحتك لقاتك اهل لهذا وراهي لو ريحت وما دارتش حاجة فروحها او دارت قرار يضيع حياتها راهي نصيحتك رجعتها وشوف هذي عند ربي شعال
انا نقولك خليك معانا وعندك نصيحة ما تبخلش بيها وموضوع يفيد غيرك ما تشحش بيه وانت بشر تغلط وتصحح اخطائك والله يهدينا ويهديك
نحييك ونقولك ماشاء الله عليك ويسلم الام اللي رباتك

 

[Hakan]

رد: غاضتني عمري واستحقرت روحي

الله يجازيكم خاوتي على ردودكم الجميلة
في الحقيقة الانسان مهما بلغ لازم يجي النهار اللي يحتاج يحكي فيه
ويفرغ قلبو لخاوتو وناسو والله ساعات الواحد يريح يخمم
ويقول انا عندي خاوتي هنا ويعرفوني من خلال واش راني نكتب ممكن يكون صح وممكن يكون غالط لكن الحاجة اللي لازم
ما يغفلش عليها الانسان انو احيانا لازم يعيش لروحو ويحاسب روحو على كل صغيرة وكبيرة
تفكرت كلام لوحد الاخت قاتلي فيه انت كيفاش تنشر مواضيع دينية وتنصح الناس وانت راكي مخالف لهذا الشي في المدونة
نتاعك مي صرااحة هذا شيء حقيقي لانو كانت تقصد انو راجع نفسك قبل لا يديك الموت غدوا تريح مع ربي سبحانو يقلك
علاش نصحت فلان وخليت روحك علاش خليت الشيطان يلعب بيك لحد انو مشاكل الناس كامل تقدر تعطي
رايك فيها في حين انو نهار تريح مع روحك ما تقدرش تقول علاه راني ندير في هذاك الخطأ حتى انو الواحد ممكن يتخذها سبب
باش يزكي نفسو وهي ياحصراه بعيدة بزااف بزااف على انو تكون نفس مليحة ربي يهنيكم خاوتي وجزيتم كل الخير ..​

 

[فيتامين سي]

رد: غاضتني عمري واستحقرت روحي

احيييييييييييييييييييييييييييييك


لي عودة

 

[Skor m@k]

رد: غاضتني عمري واستحقرت روحي

السلام عليكم
واش اخويا حكيم لي ميعرفكش تقول راك تريب فلجوامع
صح انا على هذيك لي منبغيش ننصح كاش واحد
لازم الواحد يبدا يصلح نفسو ممبعد يروح ينهي الآخرين
مي هذا ميخليكش تشوف واحد حاصل اوو متعاونوش كل واحد على قدر المستطاع
الواحد ولوكان يبدا يهدر ويفرغ على واش في قلبو
يولي واحد ما يهدر معايا هههههه نولي ندخل تخرجو كامل من اللمة
الواحد يخليها في ستر ربي لازم ميهدر على ذنوبو
يخاف الواحد يكون من الناس المجاهرون بالمعاصي لي ميغفرلهمش ربي
ان شاء الله منكونوش منهم
وعلى هذا لو تسحب الموضوع تاعك
لأنو في الحديث
عن ابي هريرة رضي الله عنه قال:سمعت رسول الله صلى الله عليه و سلم يقول:كل امتي معافى الا المجاهرين .
وان من المجانة ان يعمل الرجل بالليل .ثم يصبح وقد ستره الله فيقول:يا فلان عملت البارحة كذا و كذا.وقد بات ربه يستره ربه و يصبح يكشف ستر الله عنه
(متفق عليه)

 

[لؤلؤة قسنطينة]

رد: غاضتني عمري واستحقرت روحي

السلام عليكم
والله يا خويا حكيم نكذب عليك لو نقولك نتا الوحيد لي تفكر في هاد التفكير
نفس الشي يصرالي حتى انا، كل ليلة نبقى بيني وبين روحي نجبد الماضي ونجبد الحاضر وتوصل حتى للبكاء وتوصل حتى وين نبقى
ساهرة للساعة 2 و3 بعد منتصف الليل بلا نوم، ونشعر بنفس شعورك نقول في نفسي نبان للناس راني انسانة مليحة ورائعة بصح
حتى انا عندي اخطاء وذنوب وغلطات، ننصح البقية ونسيت باه ننصح روحي أنا الأولى، نحس روحي بعيدة بزاااف على الطريق
الصحيح، وآخر مرة شفت موضوع الأخت زهور الشوق وفرحها بإرتداء الحجاب الشرعي صدقني استصغرت روحي خلاااص وشحال
قاستني هاديك الكلمة لما قاتلي الاخت حطيتك من كلامك ومواضيعك مدايرة حجاب شرعي زعزعتني هاديك الكلمة، على هادي
باه مانطولش عليك خويا نقولك حاجة؟ ماكانش منها تاع تفضح في روحك ولا بالعكس الضمير الحي هو لي يخليك تعاتب نفسك
وعاتب نفسك نورمال اصلا ماكانش فينا لي ماغلطش، علاه في بالك الناس لي عايشة في الدنيا كاملة كيفها كيف الملائكة؟؟ مايغلطوش
ومايكدبوش وماينافقوش وماعندهمش ذنوب؟؟ كامل غلطنا وكامل ارتكبنا ذنوب وكامل فينا عيوب، لي مافيهش عيوب هي الملائكة، وحنا
ماراناش ملائكة وماراناش شياطين رانا بشر نغلطو ونجيبوها في الصواب وهي رايحة، المهم نفيقو لغلطتنا ونبكيو لما نحسو بذنبنا، لأنو ربي
سبحانو يحب الدموع هاديك تاع الانسان التائب وتاع الانسان النادم، وانا نقولك حاجة النصائح لي قدمتها ماش معناها نتا تغلط
وتحاسب في الناس بالعكس معناها راك حاب الناس هادوك مايغلطوش نفس غلطتك وبالاك كي تفرجها عليهم وتساعدهم يكونلك باب
يتفتحلك في الآخرة ان شاء الله، مالا خويا كل ماتلقى فرصة باه تعاتب نفسك عاتبها واذا حاب تبكي ابكي واذا حاب تشكي اشكي وين
تكون ظلمة وماكاين حتى عبد تحس ربي قرييييب خلاص كلي مابيناتكمش سقف ومابيناتكمش سماء تحس كلماتك توصلو ويسمعلك تما
اشكيلو بهمك وقولو ياربي راني نغلط وعلابالي بغلطتي وكن ماتفتحش علي وماترحمنيش برحمتك مانشوفش الطريق الصحيح، مالا يا خويا
انا نعرفك فحل وانسان واعي وانسان مثقف وانسان تخاف من ربي والدليل الضمير الحي لي فيه والدموع لي قادر تنزلها على ذنوبك بينما
ناس خلاف تنزلها على التمسخير على هادي ابدا بداية جديدة ماش شرط من نهارك تولي امام، بالعكس نتا مالف تسمع الغنا؟؟ حبسو اسبوع
مثلا ولا عود اسمع غناية برك في الاسبوع، انا عندي مدة طويلة ربما من سنوات حبست سمع الغناء وعندي غير الاناشيد بصح ساعات تضعف
نفسي نسمع غناية ولا زوج، يعني واحد مامعصوم عن الخطأ، المهم التوبة وكيما قتلك علابالي تقدر تتغلب على نفسك، مادامك تصلي
وحاكم طريق ربي ونادم راك تلحق للأحسن ان شاء الله
وبالعكس اذا حنا مافهمناكش شكون يفهمك؟ واذا حنا قلنا الانسان هادا عكس ماكنا ماتوقعين مالا شكون يصدقك؟
رانا كيف كيف خويا كل واحد عندو ذنوب يدعي المولى يغفرهالو اليوم قبل غدوة وهادا هو الانسان ضعيف المهم المثابرة وخلاص
ربي يوفقك خويا ويقربك للخير وتوصل لواش حاب ان شاء الله واكيد معرفتك ونصائح لي قدمتهالي انا شخصيا بلا مانذكر باقي الناس رايحة تكون ليك شفيعة يوما ما ^^
(راني درتلك جرنان ههه)
تحياتي
​

 

[دعاء الجنات]

رد: غاضتني عمري واستحقرت روحي

...وعليكم السلام
صدقني اخي حكيم حنا رانا في زمان "صعيب" وساهل غير ليحب ربي يسهلو
لوكان كامل نوضو لصلاة الفجر وندعو ربي يسهل لنا في هاذ اليوم ونتقربو منو لوكان ربي راح يهدينا ويبين لينا الخير من الشر ... حتى الأنبياء عليهم السلام كانو يقولو " وماتوفيقي إلا بالله " وحنا نحسبو رواحنا موفقين وقادرين نبعدو على الشر.....
زيادة انا وحدة من الناس دايمة الصراع مع نفسي علاجال ترك المعاصي خاصة نحن النسا القيل والقال وشحال من خطرة نحلف على روحي ونعاود نولي ....بصح عرفت اخيرا الحل هو طلب التوفيق من الله والتوكل عليه ثم الأخذ بالاسباب
مثال .. راك تتحدثت مع فتاة في الفايس بوك او وسيلة اخرى هذه فتاة تقدر تجرك للمعصية بصح غدوة تتبرأ منك وتقول انو انت السبب وانت لي غويتها "الأخلاء يومئذ بعضهم لبعض عدو إلا المتقون" صحابك لي يجروك اليوم للمعصية غدوة راح يكونو اكبر اعداء ، وانا نفضل انو الإنسان يستغنى عن الفايس بوك اذا ماكانش شي ضروري لأنو مفسدة اخلاقية كبيرة ، وشكرا على الصراحة وشكرا كيما فرغت قلبك​

 

[Hakan]

رد: غاضتني عمري واستحقرت روحي

السلام عليكم
واش اخويا حكيم لي ميعرفكش تقول راك تريب فلجوامع
صح انا على هذيك لي منبغيش ننصح كاش واحد
لازم الواحد يبدا يصلح نفسو ممبعد يروح ينهي الآخرين
مي هذا ميخليكش تشوف واحد حاصل اوو متعاونوش كل واحد على قدر المستطاع
الواحد ولوكان يبدا يهدر ويفرغ على واش في قلبو
يولي واحد ما يهدر معايا هههههه نولي ندخل تخرجو كامل من اللمة
الواحد يخليها في ستر ربي لازم ميهدر على ذنوبو
يخاف الواحد يكون من الناس المجاهرون بالمعاصي لي ميغفرلهمش ربي
ان شاء الله منكونوش منهم
وعلى هذا لو تسحب الموضوع تاعك
لأنو في الحديث
عن ابي هريرة رضي الله عنه قال:سمعت رسول الله صلى الله عليه و سلم يقول:كل امتي معافى الا المجاهرين .
وان من المجانة ان يعمل الرجل بالليل .ثم يصبح وقد ستره الله فيقول:يا فلان عملت البارحة كذا و كذا.وقد بات ربه يستره ربه و يصبح يكشف ستر الله عنه
(متفق عليه)

اهلا بيك خويا مالك وشكرا على ردك لانو حاب نرد على كامل الاعضاء لكن ردك اعجبني وزيد فيه حكمة كبيرة
وزيد حاجة ذكرتها انت صراحة ما انتبهتلهاش هي الانسان يجاهر بالمعصية
ممكن قلت في شبر شطر الموضوع انو ممكن ندير حاجة معينة لكن ما قلتش انو نديرها لا عارف بلي خطأ وعلابالي الجهر
بالمعصية معصية اخرى لكن الواحد كي يتعمر قلبو من روحو لازم يفرغ قبل لا يترتق
وهذي هي وزيد موضوعي في حد ذاتو نصيحة لخاوتي انو الواحد ما ينساش روحو من العتاب
جزيت خير الجزاء ربي يهنيك خويا
وشكرا لكل الاعضاء اللي ردو فقط دعواتكم القلبية لينا بالتوفيق والرشاد والهداية ..​

 

[أم لينة]

رد: غاضتني عمري واستحقرت روحي

و الله رانا كامل كيفك ..
نفسنا الامارة بالسوء رانا في جهاد كبير معاها ..
لي نطلبوه انو ربي يسدد خطانا و ينورلنا طريقنا و يهدينا .
​

 

[فعل الخير غايتي]

رد: غاضتني عمري واستحقرت روحي

في هذا الوقت بالذات
كنت رايحة ندير حاجة كنت رح نندم عليها طول حياتها
لكن ربي بعثني لهاد الموضوع نقراه باش نتراجع في قراري
موضوعك و ردود الاعضاء خلاتني كي كل مرة ننوي ندير حاجة ماشي زوينة و تجي حاجة لي تخرجني منها
و الله كامل نحسو بالذنب تجاه انفسنا و شحال من مرة نبات سهرانة نخمم في الحوايج لي درتهم و مزال نديرهم
انا ننصح صحباتي ميحكوش مع الاولاد و ميصاحبوش و ميضيفوش الذكور في الفيس بوك
و ميختالطوش و ميكونوش صحبة سئية
لكن انا زعما درت هاد الشيء مع نفسي و الله نبات نبكي على صاحبتي لي راهي تضيع في عمرها غارقة في الحرام
الحمد لله يا حكيم ربما احنا نقدموا رسالة للاخرين نبينولهم بلي الشيء لي راهم يدروا فيه غالط
لانو احنا مرينا بيه قبلهم و كانت نهايته ندم × ندم
ربي يثبتنا اخي
متكسرش راسك و اكيد مزال قلبك فيه الخير و الا كيفاش حسيت بالذب
هادي هي النفس اللوامة تذنب ثم تتوب
​

 

[تـريـــاق المحـبـة]

رد: غاضتني عمري واستحقرت روحي

سلام عليكم خويا حكيم كلامك اثر فيا بزاف
انا ثاني فيا هذا الفوت لكن تعلمت مع الوقت .... انني ننصح الناس كيما كنت في الاول ما تغيرش طبعي لكن اضفت حاجة انني طبقت قاعدة - تنهى عن خلق وتاتي مثله - صرت اواجه بها نفسي .... انا ايضا لا احب مشاهدة الاغاني والافلام ... وانا حاليا في مرحلة محاربة النفس عن سماع الاغاني لانها في رايي ليس لها اي فائدة واصبحت تملأ بالموسيقى المزعجة
شكراا لك لموضوعك الرائع .. واصل اجتهادك​

 

["viola"]

رد: غاضتني عمري واستحقرت روحي

السلام عليكم

و الله ما نحب نرد على هكذا مواضيع مي نقول حاجة برك

خويا واحد ماهو مثالي و الكمال لله ..

الحمدلله الواحد مداام ضميرو حي و مدامو يستعرف بالغلطات تاوعو معناها راه فالطريق الصحيح بإذن الله

صح ساعات الشيطان يغرك و لا نفسك تغلبك ودير حاجة كيما قلت تتفرج فيلم و لا تسمع غنية

بصح هاذو اختبارات و ابتلاءات من ربي سبحانو خطرة

تطيح فالشبكة و تقول معليش خطرة خطرة تطيح و تستغفر و المرة الاخرى تترفع أصلا ..

اما انك تنصح راك تدي أجر و دعوة الخير بلاك الواحد يرجع للطريق الصحيح

راني منعرفش نهدر مي فرغت قلبي ^^ ..صحيت خويا حكيم ..

وربي يهدينا قبل ما يدينا برك

ربي يسهللك خيي ​