هذه اول مرة ندخل لهذا الركن ونتكب ماتحشمونيش وتقعدوا تقولوا لا ماشي كيما هكا لازم تكتبي كيما هكا وتقولي الكلمة فولانية وماشي بهذه الطريقة يا أخي فوتوها تفوت صح يعطيكم الصحة خلونا في المفيد ..
اليوم جبت سوجي تاع الاستعدادات الرمضانية الي كل واحد لما يقرب رمضان يبدا بيها ويقول في نفسو انا رمضان هذا واش راح ندير فيه وكيفاش نجوزوا لازمني الماكلة فولانية تكون حاضرة والا نقلب مائدة واحد ماراه فاطر البرنامج هذا لازم نشوفوا ياخي نشوفوا نشوفوا ووقت الفطر والا تفوت كحلة عليكم الخ الخ
لكن واحد الناس انا فاج ؤني هوما جماعة يقلب الليل مع النهار ايه ايه يقلبببببب اللللليللل مع النهار تقول خفاش او مصاص دماء ولا كيما حبيت تسميه سميه ويقولك انا النهار كامل راقد ونوظوني وقت قبل ما يأذن المغرب بشوية للفطر ونكمل من بعد مع التلفاز او الانترنيت حتى للسحور ياأخي حالة فريدة من نوعها انت ..
هذا رمضان شهر كريم شهر العبادة وقيام الليل وقراءة القرآن واكثار من العبادات
ربي يدخلوا عليكم بالصحة اللهم بلغنا رمضان وتقبل منا صالح الأعمال
اليكم الخط
رد: استعدادات رمضانية في القمة ..كل واحد وعلى حسابوا راكم عارفين
لالا ختي اكتبي وخلطي حتى تصفا انا من دعاة التخربيش كيما دوك لي يرمو الالوان على اللوحة حتى تجي لوحة فنية مذهلة
بخصوص موضوعك والله يا ختي تحبي الصراحة سمانة لي فاتت كنت نحكي مع واحد على بنة رمضان بكري نشمو ريحة رمضان على شهور قبل ما يوصل الامهات في البيوت يشرو ويوجدو وناس كامل مستبشرة رمضان جاي نحسو بلي كاين رمضان دوك ناس لي تروح ليه يشكي جاي رمضان اي سخانة اي مش عارف علاه هكدا ربي ورحمتو وكيما صمنا لي قبلو نصومو هدا ربي برك يعطينا الصحة هدا مكان.
ورمضان كي العادة الخدمة ومبعد الرقاد وفي الليل السهرة ما تجي تكمل يلحق السحور هادي هي 30 يوم وديري عليها فوطو كوبي هههه.
ربي يوفقنا لطاعتو ان شاء الله.
رد: استعدادات رمضانية في القمة ..كل واحد وعلى حسابوا راكم عارفين
السلام عليكم
مرحبا بيك ختي لعزيزة في دارنا وفي حينا حي واش راك تهدر ههه
واصلا اكتبي كيما تحبي هادا هو القسم الوحيد لي سهل في الكتابة يعني ماعندوش قوانين صارمة
وواش يجي في بالك تكتبيه مالا خودي راحتك، المهم نوليو للموضوع
المشكل عزيزتي تعرفي وين؟ هو انو الناس تشوف شهر رمضان غول رايح يدخل
يعني تتوصل كاين ناس كي تقولهم بقى اسبوع على رمضان يشنف ويقولك ربي يستر وربي يجعل الخير
واشوا هادا رايح يدير تسونامي؟؟ راهو رمضان يا عباد ربي شهر التوبة والمغفرة وجمع الحسنات ماش شهر الرعب
تلقى لي يشري كبش ويخبيه في الكونجيلاتور تقول رايحة تقوم المجاعة ولاخر يشري الخبز بــ 20 خبزة ويخبي
ولاخر يخبي القارص قريب يدير جنان غير باه يوجد الشاربات في رمضان وواحد الجهل يعني ربي يهديهم برك
اما عن نفسي، حنا من المفروض في قسنطينة تلقايهم لازم النهارا لاول يطيبو اللحم الحلو (طاجين العين) وجاري
وبوراك وسلاطة باه تجي الطابلة متولة كيما نقولو، وزيد كاين لي يشري اواني جدد سواءا تاع الطين ولا نورمال
الميناج مانهدروش عليه او باين، وزيدلها الفريك يتوجد من قبل وخلي العديد من العادات القسنطينية، لكن
حنا في دارنا مانديروش كامل هاد الامور ماش معناها ماراناش قسنطينيين حرين بالعكس رانا ولاد بلاد
ونعرفو لهاد الامور ولهاد التحضيرات، بصح العادات ماش قرآن نمشيو عليه كاين امور والله زيادة برك
يعني المرأة معروفة بلي يدها ماتحكمهاش طول العام على لماعن والاواني منين تخرج تشري وزيديلها
كل رمضان تشري، ماتجي تكمل عامين تحل حانوت تاع الاواني ههه والله ساعات تبذير برك
زيد الاكل تلقى لازم 10 اطباق على الطابلة ولا ماتحلاش، حنا والله يا ختي فطورنا كاس حليب خضر مع تمر
وشوي جاري وخلاصن ساعات نديرو بوراك مع الجاري وساعات لالا ونورمال ونشبعو والحمد لله
واللحم الحلو والديا مراض بالسكر وحتى ولو نديروه بالسكر تاعهم سبيسيال مايقدروش عليها مالا علاه علينا الحالة هادي،
وماعندناش تاع نشريو بشهر من قبل رمضان والله بيوم من قبل وساعات في صبيحة رمضان بابا يروح
يقضي وعادي يقولنا ناكلو واش مكتبلنا ربي ويشري ونورمال خلاص غير لفريك لي نوجدوه قبل برك
خاطر نحتاجوه لرمضان كامل على الجاري، بصح الباقي والله عادي، انا نقولك ختي والله العظيم
قبل مايدخل رمضان ندير برنامج لحفظ القرآن وبرنامج لتفسير الايات ولا برنامج لحفظ الاحاديث
وبرنامج لختم القرآن لأكثر من مرة و2 و3 ونتحدى نفسي في الصلاة ، يعني نوجد برنامج يقربني
لربي ونستغل بيهم هاد الفرصة وين الحسنات مضاعفة والشياطين مربوطة ماش نستغلها في الاكل
وفي شكليات ما عندها حتى معنى، خاطر والله تشربي كاس ماء ونتي شبعتي وربي يعطيك القدرة من عندو
ماش الماكلة لي تقويك ولاا لرقاد لي يقويك
شكرا حبيبتي على الموضوع اني علابالي خلطتها في الرد ههههه
تحياتي
رد: استعدادات رمضانية في القمة ..كل واحد وعلى حسابوا راكم عارفين
و الله يا ختي هذا واش رانا نشوفوا هادو العوام
خاصة بالنسبة للشباب تلقايه يحبس الخدمة في شهر رمضان يبات مكونكتي و لا برى مع صحابو حتى وقت السحور
و يديها نهار كامل و هو راقد حتى وقت الآذان
ولات ظاهرة بزاف شايعة عندنا
و يديرو السبة بالسخانة و العطش والمورال هاااابط و يخاف يدير كاش مشاكل مع الناس .,و , و....
في حين انو شهر العبادة و قيام الليل و قراءة القرآن
شهر لي لازم نشمروا فيه و نعطيو كل واش عندنا من خشوع و استغفار و صدقات و مساعدات
كاين ما شاء الله جمعيات راهي ناشطة في رمضان
اطعام عابري السبيل و الفقراء و المعوزين
حبذا لوكان شبابنا تكون عندهم هاذي الهمة
رد: استعدادات رمضانية في القمة ..كل واحد وعلى حسابوا راكم عارفين
السلام عليكم
والله يا اختي رمضان وحدو ما فهمتش علاش يقلبلنا ليلنا نهار بلا نحسو
ونبقاو سهرانين فيه سير تو من بدا في الصيف تقلب ليلنا تاع الصح
بصح النهار يبقى عندي نهار ما عنديش تاع نفوتو راقدة ديجا نخدم
والخدمة تبدا على التسعة في رمضان اونفان مازال ما قالوش على
التوقيت تاع رمضان وبعدها الوحدة ترجع للدار كاشما تعاون ما
يكونش عندها حتى وقت تحط راسها فيه بالاك النهار ليل عند الرجال
أما الإناث والو تلقاهم من لي ينوضو وهوما حيين حتى للسحور بالاك
يرقدو شوية ساعات برك من بعد السحور حتى وقت الخدمة وإذا الوحدة
مش خدامة ولا ويكاند منين داك تنوض لشغل الدار يعني رقاد والو وربي
يقدرنا ان شاء الله ويبلغنا رمضان بصحة وعافية ويتقبل منا
رد: استعدادات رمضانية في القمة ..كل واحد وعلى حسابوا راكم عارفين
السلام انا نعرف واحد في رمضان يدي كونجي ويدير مطرح في الكوزينة علاه باه يراقب مرتو مرتو مسكينة تنوض على6 و يدير حالا وهو يعس فيها وما يتحركش من هداك المطرح الا للضروره
رد: استعدادات رمضانية في القمة ..كل واحد وعلى حسابوا راكم عارفين
السلام عليكم اهلا وسهلا
لالا كيبتك هي هي احكي عادي والله اختي صح
شوفي ما نغطوش الشمس بالغربال ونلعبوها متقين غير فرمضان وهي تلحق 27 ترجع ريمة لعادتها لقديمة لالا
رمضان شهر العبادة وربي فتح ابواب الجنة والرحمة للناس الكل معناها فرصة للعبد لما يغلط لما كل شي يتقرب مني ربي اكثر ويرجعلو مي يكمل مس يقطع ويرجع يعرف ربي فرمضان
شوفي نمدلك برنامجي بكل صراحة نوض صباح راكي عارفة شغل الدار قولي حد الظهر معناها نريح شوي ومرات نرقد لما نقدر الطياب يمى ما تخدمش فرمضان تحب هي طيب انا نوض كاش ما نعاونها ومارانش بزاف انا وهي والحمد لله اللي كاين نطيبون اختك ما تتشرطش ما عنديش الماكلة الفلانية والعلانية
انا عندي فريت وشربة بزاف عليا خيرك يا ربي وبعدو عندي اولاد الصغار كل عام نحفهم القرآن يجوني بعد العصر نبقا معاهم حوالي ساعة او شي ونوض لامور راكي عارفة بوراك وغيرو نفضي روحي اخر ساعة نقرا قرآن وكاش ما نحفظ ثاني لانو الوقت هذاك نركز ونوض نوجد الطابلة او كاش قاطو للسهرة او يجونا ضياف ذاك النهار
المهم بعد الافطار وقت للصلاة والقرآن وانا شوفي ما نقدرش نروح لتراويح لانو مريضة نصلي فالدار
نقرا شوي قرآن ندخل ننشط فالمنتديات واخر الليل كلو حتى لصحور نقرا القرآن ونحفظ ونرقد اخر ساعة هذا برنامجي كل رمضان اللهم لو كنت مريضة نبدل امور شوي
انا ضد الانسان يلعبها وينافق غير فرمضان شكرا
رد: استعدادات رمضانية في القمة ..كل واحد وعلى حسابوا راكم عارفين
السلام عليكم قضية التحضير لرمضان الزائفة التي هي في ذهنيات المجتمع نتاعنا هذي
خاطية مليار سنة ضوئية واكره العباد عندي اللي يخممو في الماكلة برك
يعني الناس دير في توقيت وبرنامج باش يقرى قرآن ويقوم ويصلي
وحنا يدير برنامج للماكلة في حياتي هذي او في رمضان ما نستعرفش طول بالماكلة هذي ناكل اللي جات
المهم نفطر ويتقبل ربي سبحانو والصح في عدد الختمات او في الاعمال بينك وبين ربي سبحانو
رانا في وحد المجتمع كارثة ونورمال ايه نقلبو الليل والنهار مي في الاعمال الصالحة ماشي في الدومين ومشاهدة المسلسلات ..
رد: استعدادات رمضانية في القمة ..كل واحد وعلى حسابوا راكم عارفين
السلام عليكم ورحمة الله وبركاته
أنا نشوف بلي كل واحد يتعامل مع رمضان على حساب إيمانو برك لي عندو إيمان قوي تلقاه متحلف في رمضان باه يختم شحال من مرة وباه يسارع إلى مغفرة من الله ورحمة .
ولي عندو إيمانو عادي ومأمن بربي بصح ضارب الدنيا بكودبيي هذا تلقاه موجد برنامج واستعدادات من النوع لي راكي تحكي عليهم .
ربي يوصلنا برك لرمضان ونصوموه بالصحة وربي يقدرنا عليه وكل واحد باستعداداتو لرمضان راه يخدم لروحو ولا يفوت على روحو فرص من ذهب وواحد ما ضامن يلحق لرمضان ولي يلحق ليه ما يضمنش يزيد يلحق على رمضان الجاي .
رد: استعدادات رمضانية في القمة ..كل واحد وعلى حسابوا راكم عارفين
السلام عليكم
من ناحيتي منكدبش عليك ما عنديش برامج بزاف يعني كلش باين
من ناحية الاكل ما نخمموش فيه اصلا ههه يعني في نهارو يتخمم عليه ماشي قبل بشهر ولا يامات ومنعرف
وفالنهار نقرا ما تيسر من القران ونزيد فليل والصلاة
عندي نختم زوج مرات فيوم 15 الختمه الاولى ويوم 27 الختمه الثانيه
ومن جهة انا وحده من الخفافيش الرمضانيه هه
نقرا قران فليل ونصلي ومن بعد نروح ندور فاللمة ونكملها لحتى بعد السحور هه
الله غالب منقدرش نرقد بكري خاطر نتخلط
بصح ما نفوتش نهار راقده كما قلتي ههه يعني نوض عادي
صحيتي خيتي ومرحبا بيك فالقسم هدا واكتبي كما تجيك وكما تحبي
ربي يدخلو علينا وعليكم بالصحة والهنا
رد: استعدادات رمضانية في القمة ..كل واحد وعلى حسابوا راكم عارفين
شهر رمضان شهر الرحمة والغفران يجب علي العباد ان يجعلوا شهر رمضان كأي شهر من الشهور لأن العبادة ليست في شهر رمضان فقط بل موجودة في كل الشهور وفعل الخيرات في سائر الشهور اللهم بلغنا رمضان و أرحمنا برحمتك الوسعة
رد: استعدادات رمضانية في القمة ..كل واحد وعلى حسابوا راكم عارفين
السلام عليكم شكرا لردود الطيبة التي اثرت الموضوع انا من ناحيتي برنامجي لشهر رمضان هو هو مايتبدلش يبدا بعد صلاة الفجر معناه بعد السحور بالمناسبة معاين السحور هاذوك مركييين كونطرا معايا كل شهر رمضان هاذوك تاوعي انا
من بعد ما نرقد شوية ونوض مع الثامنة تاع الصباح تخمال الدار وتنظيف شوية حكايات من بعد حتى يلحق الظهر وقت الصلاة انا هذاك وقتي لقراءة القرآن الورد اليومي للشهر الفضيل ونزيد نصلي نافلة ومن بعد يا انا يا امي في الفطور ونتناوبوا عليه كاش ما يصرا فيه باش ما ينطبق المثل صايم وفطر على بصلة .. من بعد كي يأذن الآذان نكونوا ديجا توجدت المائدة الي هي ثاني سنيت معاها كونطرا كيما المواعين تاع السحور هاذوا تاعي انا خخخخخ ... الصلاة المغرب بعد الفطور تجي فترة صلاة التراويح انا نبقى فترة سهرانة من صلاة العشاء لصلاة قيام الليل نام شوية برك قبل السحور وهكذا ..
