اخشى ان يتكرر سيناريو هذه السنة العام المقبل

[assile]

سلام ان طالبة في السنة اولى ثانوي وانتقلت لثانية والحمدلله انا فتاة محجبة ومن اسرة محافظة ومشهود عليا باخلاقي الحسنة واجتهادي في الدراسة وجامي دار بيا كاش واحد لكن هذا العام الاساتذة هبلوني وين ما نمشي في ليسي نلقاهم يتبعوفيا بعينيهم ويراقبوا في تصرفاتي هذا شي يحرني بزاف ويقلقني خصوصا وحد الزوج اساتذة كيما نقولو خرجينهالي فاسفاس برا ي الطريق يحبس السيارة ويقعد يشوف فيا ويضحك يراقب من الطروفيزور واحد فيهم شيخ تاع سبور هواللي محيرني كثر من لخرين يتبعني داخل الساحة ديما مورايا كي نكون رايحة للقسم كي يشونية جايزة حذا شاشرة يضربها بتشنيفة ويخزرفيا ويضحك وخطرات كي يكون مع كاش واحد ونبان فجاة يبدا يتعقن وتتلفلو الهدرة وكي نكون ندير فالسبور يراقب مع من راني واقفة و صحبتي لانتيم تقرا عندو مسعفهابزاف مع انو هو واعر يخليها تجي لعندي وتهدرمعايا على عكس الاخريات ومرة لقى دفتر الشعر تاعي عندها بدا غير ياكدلها على اسم ولقبي وباف عفايس دارهملي مثلا خطرة استاذي عيطلو باش يشوف القفز الطويل لواحد جا وقف بجنبي ساعدوني اين الحل ووعلاش راهم يعملو فيا هكدا شكرا لكم ز:regards01:

 

[بنت الـ25]

رد: اخشى ان يتكرر سيناريو هذه السنة العام المقبل

تم الاعتماد

​

 

[لؤلؤة قسنطينة]

رد: اخشى ان يتكرر سيناريو هذه السنة العام المقبل

السلام عليكم اختي وصح رمضانك
شوفي اختي نبداو من آخر المشكلة طول ورايحة نقولك طيشي عليك
درك المشكل ماش كي راهم يتبعو فيك المشكل كي راكي نتي مدايرتلهم حساب
خاطر في مجتمعنا ماعادش كاين احترام، ماعادش كاينة حرمة الاستاذ وحرمة الجار وحرمة العائلة
يعني تروحي تقراي تلقاي الاستاذ يتبلى تخرجي من الدار تلقاي الجار يتبلى في العائلة تلقاي لي يتبلى
بصح نتي ماتعطيهمش قيمة، لأنو لو الانسان يتبلاك ويحب يتقرب ليك ويشوفك تأثرتي بالوضع رايح
يزيد في التقرب تاعو بصح كن يشوفك درتيلو حد من اول مرة يحبس كيما راه، درك نتي اتجاهلي الامر
استاذ يشوف معاك ولا حنين معاك ولا حتى معرف واش ماتبعيش هاد الامورات خاطر راهي مارايحة وتتلاقاي
بيها في الجامعة لا كتب ربي وفي الخدمة لما تخرجي للحياة المهنية ولاكان عادت كل لقطة تسببلك مشكل وديري عليها
ماراكيش رايحة تعيشي لاباس، مالا ختي لعزيزة نتي الهدف تاعك كي تروحي لليسي هو تقراي وتنجحي وديري صورة
مليحة عليك وتخلي ذكرى طيبة عليك في هاد لمدرسة وهاد الامورات ماعندها حتى معنى طيشي عليك وعيشي حياتك
نورمال خاطر كن تبقاي تعسي في لي دار ومادارش تمرضي روحك وتعطيهم فرصة يزيدو يتقربو كتر
وربي يسهلك ان شاء الله ويوفقك وصح فطورك عزيزتي
تحياتي
​

 

[أمين 27]

رد: اخشى ان يتكرر سيناريو هذه السنة العام المقبل

خذي العبرة من غيرك ... الفضائح راها بزاف يا اختاه ,,, كانت لي تجارب كثيرة فالثاوية و الله و الاخطر كانو اساتذة الرياضة
المهم النتي حددي الهدف التاعك من الدهاب لليسي و قراي و حطي راسك و اجتنبي الشبهات ما تعطيهمش اي فرصة
لان الخطر الاكبر هو المجتمع تاعنا حتى اذا ماشي غلطة تاعك فمجتمعنا لا يرحم للأسف
و الله يجيب الخير

 

[GI Joe]

رد: اخشى ان يتكرر سيناريو هذه السنة العام المقبل

3andna des profs hakda f la fac alr la chef de departement netwesswess nroh nssa9ssih 3la hadja men hadouk les gestes
hada yek may9arikech mm pas leh thawssi 3lih, matfakhrih ma wallou,, 3ichi hyatek w a9ray mlih; mnin ma tekebri mnin ma tzidi tchoufi ness hakda, lazem tkouni forte de personnalité
​

 

[مشتاقة الى الله]

رد: اخشى ان يتكرر سيناريو هذه السنة العام المقبل

اين اساتذة كيما راكي تقولي ربي يجيب لي فيه الخير

 

[فيتامين سي]

رد: اخشى ان يتكرر سيناريو هذه السنة العام المقبل

مديريهمش في حسابك يقيييلوك
هو بلاك شافك او حسبك مهتمة مي نتي ديريه غير موجود نهار زوج يكره + اصلا عباد هكدا كل يوم يجرو مور وحدة
المهم ديريهم غير مرئيين تريحي

 

[assile]

رد: اخشى ان يتكرر سيناريو هذه السنة العام المقبل

شكرا لكم انا اصلا معروفة بلي ما نطلعها فحتى واحد ومانهتم باي شخص لانو قلبي بارد من هاد الناحية وانا كي نوجد واحد يشوف فيا نشنف ونعمل روحي ماشفتوش

 

[dhikra]

رد: اخشى ان يتكرر سيناريو هذه السنة العام المقبل

نحن في زمن لا يرحم انصحك التمسك في شخصيتك

 

[imaneBBA]

رد: اخشى ان يتكرر سيناريو هذه السنة العام المقبل

مديريهمش في بالك انت خليكي واثقة في نفسك واخلاقك واهتمي بدراستك أحسن

​

 

[بقايا إنسان]

رد: اخشى ان يتكرر سيناريو هذه السنة العام المقبل

أذا وصل الامر للأساتذة في مثل هذا النكرة فمن الافضل نوقفوبناتنا عن الدراسة او نوضعو حد لهذه الذئاب الشرسة
ديري براي اختك لؤلؤة قسنطينة أضنها صاحبة رأي وخبرة
ربي يحفظك بنتي من غدر كل ماكر