ما طقتش لفراق سعده =بقلمي=

[medcherif03]

أتمنى أن تنال اعجابكم هذه الخاطرة الشعرية
فيها القليل بمعنى الكثير و السلام





ماطقتش لفراق سعده وين روح \\**// بعد الولف ضياق بري ما نرتاح

قلبي عنك دايما باكي مجروح \\**// شوفة فيك آعارمي تبري لجراح

خلاني بعدك على فراشي مستوح\\**//غرامك نشبني و ارماني بارماح
املكني عنتير وحشك شد الروح\\**// ضرك ماجاشي برا يتعالج يتلاح

أخليتي وكرك وبقى لحمام ينوح \\**//أهرم من بعدك عاد يشف وطاح
نتفقد في مرسمك انجي و نروح \\**//بعد العز اتهان سكناتو لرواح

الا كنت وردة و عطرك يفوح\\**//انايا ليك الغيث في شاو التلقاح
الا كنت شمعة وضوك يلوح\\**//انايا لقمر من فوقك وضاح

عذّابت قلبي ليك أنت مسموح \\**// ماحسبتش قلبك يا سعده سفّاح
سمّاطت عيشي عنك غير إنوح \\**// طيفك قدامي كل امسا وصباح

انت زينك عند اهلك ممدوح\\**//و انايا قلبي على زينك صداح
انايا كيشفتو من داخل مفضوح\\**//مادام الصغر حتى الزين وراح

اتفرق نجعك فالصحرا مسروح\\**//مفلاه الحلفة وادرين و لشياح
انعاهد ولفي ابسرك ما نبوح\\**//نمشي و نخليه ورايا يتلاح

نبكي ونّوح كيما نوّح نوح \\**// و قلبك قاسي كل ليلة يقساح
ضنيتو قلبك من الرحمة ممسوح\\**//ماعادش يحن صد آلهيه وراح

ما ننسى ليام نكتبها في اللوح\\**//يا سعده موحال نمحي ذي للواح
ماك مخوض فيه لهماجة وملوح\\**//ومايا صافي من الرمل وضاح

انت سوقك كان حاكم لي مربوح\\**//و اليوم اتبدل ما فيهش لرباح
انا في حجرك كي الطير المذبوح\\**//صيادو مندس من ضرباتو طاح

من حبك ياعارمي راني مريوح\\**//لا لوم عليا يا مسبوغة للماح
ماطقتش لفراق سعده وين نروح\\**//بعد الولف ضياق بري ما نرتاح

بقلمي medcherif03

قاموس الكلمات

ماطقتش- لا أقدر و لا أستطيع
بري- وطني أو وكري
مستوح- ملقى على الفراش
نشبني- يوخز بالرمح
عنتير- جبار
عاد يشف و طاح- رجع في حالة يرثى لها ثم سقط
في شاو- من أول
ضرك ماجاشي برا- مرضك لم يأتي في الخارج
ماحسبتش- لاأدري
نجعك- قطيع من الابل
مسروح- مرعي
مفلاه- مرعاه
ادرين-نوع من الكلأ يشبه الحلفة
لشياح- جمع شيح نبات عطر الرائحة
لهماجة و ملوح- طعمه هامج و مالح
مندس- غير طاهر
مريوح-مبلي بغرامك
​

 

[miss victoria]

رد: ما طقتش لفراق سعده =بقلمي=

اجمل خاطرة قريتها