زوجي المشكله

[مشكلتي]

لم اعد اعلم كيف اتعامل معه......
السلام عليكم انا متزوجه منذ 8 اشهر....وقد كن اعرف زوجي منذ ان اتخطبنا وقد طالت مده الخطبه 5 سنوات .....في تلك الفتره على حد علمي تعارفنا جيدا ....الى انه الان اصبح متغيرا.....لايهم.....المشكل انني اسكن مع عاىلته.ايضا لاباس انا قبلت بهذا ولكن اصبحت عندما اخطط لفعل شى تتدخل بي امه واخواته واخوته وحتى زوجات اخوته ....وهو مايقول والو يقلي برك اصنتي لهم وكانني متزوجه بيهم...والله القنطه تحكمني و نبات نبكي ....نحس كاني معندي حتى قيمه....وكي نحب نفرض روحي يهددي بالضرب....مره زوجه اخوه جات من دارها وتصرفت معايا بسوء والله شاهد انا متحملتش وطرت فيها بالهدره...قاتلي استناي مايجي....وهي راحت حرشت يماه وكي جا هدرت وقاتلو مرتك ماشي مربيه وفيها وفيها.....وهو محوسش يسقسيني راح يامن فيهم وبدا يبخص فيا ..سبقتني الدمعه ....وقالي تزيدي تعاوديها نطلقك....يضال يهدد فيا بالطلاق
يا خوتي قولولي واش ندير ....انا والله كرهت ومرات نخمم نقولي ايه طلقني وريح

 

[محمد إبن الصحراء]

رد: زوجي المشكله

ياناس قولولي وراهي كرامة المرأة

مشكلتك مشكلتين
* لولا عندك مشكل مع زوجك بحد داته
* ثاني عندك مشكل مع عائلة زوجك

خلينا نبداو بلولا :up:
- كي جا باش يخطبك اسكو داركم شرطو عليه لهنا

أما مشكلتك ثانية هديك لغز
- أسكو نتي وافقتي تسكني مع دارهم (نعم ) ............ يفرض عليك تحمل العواقب

شفنا في هدا المنتدى موضوع خاص بالمشاكل لي توقع بين الزوجة وأخوات زوجها
ولبعض عطى رايو.... ننصحك تبحثي على الموضوع تلقاي فيه حلول مفصلة .

أنا مزال راني حاير , بنت تقول لخطيبها نسكن مع داركم مكانش مشكل (ماشاء الله على التواضع )
وبعد الزواج تقع الحرب النسائية ( ياله تواضعي درك )
ماهوش عيب المرأة تفرض على لي يخطبها يديرلها دار وحدها . صبحان الله وراهي الكرامة . ناس ماتستفادش من تجارب الاخرين
( صح كاين نسا ساكنين مع عائلات أزواجهم بالهنا والعافية ) ..... ولكن البقية ربي يجيب الخير

:-r:-r:-r:-r:-r:-r:-r:-r:-r:-r:-r:-r:-r:-r:-r:-r:-r:-r:-r:-r:-r:-r:-r:-r
الملخص
تاصلي بلافامي نتاعك لوضع حد للمشكل ونساي الطلاق

بالتوفيق​

 

[Hakan]

رد: زوجي المشكله

وعليكم السلام 8 اشهر نورمالمون يااختي الكريمة راكي عرسة ماراكيش في المشاكل هذي
لكن صراحة نحكي على شيء شفتو وهو السكنة نتاع الغاشي كامل يعني تسكني من والدين زوجك وزيد مع زوجات اخوة زوجك مشكل كبير
لانو فيه حسد وغلظة خااصة اذا زوجك راهو تزوج بيك بدون ما يرضاو عليه والديه ومن هنا تبدأ الشرارة
انا ننصحك تلتزمي الصمت اسكتي على قد ما تقدري لانو والله ثلاثا غير ربي سبحانو رايح يرجعهم تحت رجليك واحد واحد ابتداءا من زوجك الى اهل زووجك وننصحك ما تحكيش وما تصحبيش اي زوجة من زوجات اخوة زوجك وبعدي عليهم خدمتك اخدميها واطلعي للشمبرة نتاعك اللي تحب تحكي معااك قلها راني تعبانة راني مريضة او راني نتفرج وخطيك منهم
وريحة تشوفي النتيجة ربي يهنيك ختي​

 

[لؤلؤة قسنطينة]

رد: زوجي المشكله

السلام عليكم
ربي يفرج عليك ختي لعزيزة
اولا مالازمش تقولي لو طلبت داري وحدي وكن وكن خاطر مادام ربي جابك في نصهم راهي لحكمة منو مالا ماتلوميش
روحك وتقولي كن خطيتهم راني خطيت المشاكل خاطر نعرف وحدة ساكنة بدارها وحدها وهي في ولاية وعايلة راجلها
في ولاية اتخيلي يماه كل يوم تقريبا تحكم البيس وتجيهم دير فيها لي مايتندارش وزيد كي يخرج ولدها تبهدلها وكي يجي
تقولو مرتك ضربتني ودارتلي تديرلهم المشاكل وتروح يومين وتزيد تولي دارت فيهم رايها ودرك المشكل ختي لعزيزة ماش
في زوجات سلافك ولا في اخوات زوجك راهو المشكل في زوجك بعد خاطر لما يكون زوج معوج تولي كل المشاكل مضاعفة
وكي يكون هو مليح معاك حتى ولو تعيشي وسط النار تحسيها جنة مالا اول شخص لازم تكسبيه هو راجلك حاولي
تتقربي ليه وتهدري معاه بلا ماتسبي عايلتو باه تكسبيه اولا ومن بعد كي يقرب ليك ويبدا يسمعلك تقدري تجبديلو على المشاكل
المهم روحي معاه بلعقل وصدقيني ماش نتي الوحيدة لي عايشة هكا بنات اليوم نصهم باه مانقولش كامل لي كانو يعرفو
ازواجهم ب 5 و4 سنين نهار تزوجو 6 اشهر لقاوه تغير 180 درجة خاطر كاين فيها امورات مانقولهاش باه مانقلقكش
ونعرف وحدة صدقيني تعرف راجلها من قبل و متفاهمين ونهار تزوجو صدقيني اسبوع وبالاك اقل في شهر العسل بعد
ماخلالها ومابقالها وقالها نطلقك اصلا كاره منها، المهم لا علينا ختي لعزيزة حاولي تكسبي زوجك خاطر هو الورقة الرابحة
واذا كانت فرصة تخرجي عليهم وتسكني وحدك روحي اما اذا بقا في عوايدو ويضربك ونتي مظلومة هادا ماكانش معاه معيشة
ونقولك حاجة ماش باه نخربلك حياتك ولا بصح بالاكي تخافي من مصطلح مطلقة مارانيش نحرض فيك ونشجعك على الطلاق
ولكن الورقة الرابحة تاع الرجل لي يحطم بيها مرتو هيا لطلاق مالا ماتخافيش منها خاطر ساعات المرأة لي تعيش وسط جحيم
واول لي ضدها زوجها واش من حياة هادي؟؟ راهي مرة كتر على الطلاق على كل حال ماتزربيش روحك وخلي هادا
آآآآآخر حل نتي حاولي تتقربي من راجلك وكتري الدعاء وادعي ربي يصلحهولك واصبري او ربي يفرج من عندو سبحانو
ماتدريش بالاك مستقبلا يجيو ولاد يتبدل ولا وزيدي تبعي نصائح الاخوة واذا ماكاين حتى امل الطريق اي باينة
ربي يوفقك وربي يهنيك وربي يصلحلك زوجك ان شاء الله
الصبر برك ختي عزيزة

​

 

[همس الوُرود]

رد: زوجي المشكله

السلام عليكم

نصيحتي لك أن تصبري أختي الكريمة وأن تزيدي صبرا على صبرك..

وحاولي أن تحسني لوالدي زوجك كثيرا كثيرا ومهما فعلا يجب أن تصبري

ربي يفرج عليك ويهنيكم يا رب​

 

[land_surveyor]

رد: زوجي المشكله

يا اخـــتاه اصبري كاين ربي لي فوق نساء خاوتو ويماه ولفرج حتما يجي يجي حنا ثاني يحكولنا امهاتنا كيفاش كانو يعانيو في بدايه ومشاكل

مشكل بنات هذا لوقت ميصبروش بشويا برك كلش يتحل سيرتو كي يبداو يجيو لولاد وبالنسبه لراجلك اي حاجا يقلك نطلقك كاين بزاااف هذا صنف
واكثريه لي تلقاي عندهم اندفاعيه في تصرف ديما تلقاي قلبو حنين

 

[ليليا مرام]

رد: زوجي المشكله

السلام عليكم اختي
اولا انا ما نكذب ما نزوق الهدرة ولا نقولك اصبري الصراحة راحة لانو لو ظليتي ساكتة هكذا راح يديرو فيك الباطل
شوفي لو يماه نقولك مرا كبيرة وملا تعانديهاش لو خوتاتو معليش كامل البنات هكذا ولو عشت مع خوتاتك ماراحش تتفاهمو وتتحملي يجي نهار يديرو ديارهم ويبقى غير العيب اما توصل نسا خاوتو يحكمو فيك ويزيدو يهدوك بيه لانو عارفينو يسمعلهم غير ليهم ويزيد هو يدور عليك ويحشمك قدامهم اواه هذي كبيرة ما راهش دايرلك قيمة نهائيا وانت اهلك وين راهم وعلاه راكي ساكتة كل زواج فالاول فيه مشاكل لكن مشاكل بينك وبينو مش مع الناس وتسكتيلهم انا نقولك شوفي ما تخافي لا من تهديدو لا من والو يا اختي حطي اهلك فالصورة لو مرة رحت زعفت وحطيتي النقاط على الحروف هناك اما يسقم روحو اما يا اختي ربي يسهلو يروح لنسا خاوتو يخيرولو مرا تقبل يتحكمو فيها نقولك الصح انا مع الدوا مر بصح يداوي فالاول ضربة وحدة تفرا راجلك لو ضرك ما يفيقش لروحو انو غالط الاكيد راح يبقى يعفس عليك قدامهم
انا من رايي حطي اهلك فالصورة ديريلهم حدود حب او كره كيفاه هذا راجل مرت خوه تحرشو على مرتو زعمى انت تروحو تحرشي راجلها عليها وهل راجلها يقبلها منك محال امالا حطيلهم حدود هذي كرامتك بما انو زوجك ربي يسامحو ما حافظش عليها كاين اهلك
ربي يهديه يجيبو بنات الناس يمرمدوهم لو على خوتاتهم يحرقو الدنيا

 

[سندريلا]

رد: زوجي المشكله

يا اختي انا نعاني من مشكلتك و اكثر منها ربي يصبرنا وخلاص

 

[angegardienretour]

رد: زوجي المشكله

كثيرة هي المشكلات القائمة بين الزوجة وأهل زوجها ، ولحل أي مشكلة ينبغي النظر في أسبابها قبل كل شيء :
1. فقد تكون هذه الأسباب راجعة لطبيعة أهل الزوج ، فبعض الناس صار الشر طبعاً لهم ، يكبِّرون الصغير ، ويعظمون التافه الحقير ، وهؤلاء ليس المشكلات فقط بينهم وبين زوجة ابنهم ، بل هي عامة تشمل الناس جميعاً ، وحل هذه المعضلة يحتاج لجهود مضنية ، بتعليمهم الخطأ من الصواب ، والخير من الشر ، وتربيتهم على الإيمان والطاعة ، وفي هذه الحال يجب على الزوج الذي يعلم هذا من طبيعة أهله أن لا يلتفت لكلامهم في زوجته ، ولا يقيم له وزناً ، وأن يساهم في إصلاح حال أهله ، ودعوتهم للخير ، وأن يخفف على زوجته إذا وقع عليها ظلم من أهله .
2. وقد يكون سبب المشكلات بين الطرفين : الغيرة التي تدب في قلوب أهل الزوج ، وذلك عندما يرون تعلق ابنهم بزوجته ، وتدليلها لها ، وحلُّ هذه المشكلة يكون بتعويضهم بدلال زائد ، ورعاية خاصة ، وكثرة هدايا ، مع عدم إظهار تعلق الزوج بزوجته أمامهم ، ومع إعطاء الزوج اهتماماً لهم ، وكثرة الدعاء بأن يزيل الله الغيرة من قلوبهم .
3. وقد يكون سبب تلك المشكلات : ما يراه أهل الزوج على الزوجة من تقصير مع ابنهم ، أو مع أولادها ، أو في بيتها ، أو ما تبديه لهم من تصرفات شائنة ، وعدم احترام لوالدتهم ، وغير ذلك مما هو موجود فعلاً – وليس افتراء – عند كثير من الزوجات ، وهذا هو الجانب الإيجابي من تلك المشكلات ! لأن به تعرف الزوجة ما عندها من تقصير ، وتفريط ، فتصلح الخطأ ، وتجبر الخلل ، وتكمل النقص ، ولا يمكن لزوجة أن تدعي الكمال في تصرفاتها ، وأخلاقها ، وهذا أيسر الأسباب لتلك المشكلات ؛ لأن الحل سهل ويسير على الزوجة ، وهو إصلاح نفسها ، وإصلاح ما بينها وبين أهل زوجها ، بحسن التصرف ، وإعطاء كل ذي حق حقَّه من التقدير ، وبذلك تصلح ما فسد من الأمور ، وتكسب قلب زوجها لجانبها .
ثانياً:
الذي نراه أنه على الزوجة أن تطيع زوجها إن أمرها أن لا تخبر أحداً بما يجري بينها وبين أهله ، وهذا القرار من الزوج فيه مصلحة عظيمة تفوق مصلحة تنفيس الزوجة عن نفسها ، فمثل هذه الأمور إذا ظهرت وانتشرت : شارك كل واحد برأي ، أو اخترع مكيدة ، أو ساهم برأي منكوس لحل تلك المشكلات ، وهنا يتسع الخرق على الراقع ، وتكثر تلك المشكلات ، وتتعدد أسبابها ، وقد يشق ، أو يصعب بعده حلها .
وشكوى الزوجة لأحد من العقلاء جائز ، ولا يدخل في الغيبة المحرمة –وفي الوقت نفسه للزوج أن يمنعها من هذا المباح إن كان يرى مصلحة شرعية من المنع .
ثالثاً:
يحتاج التعامل مع زوجك وأهله لحكمة بالغة منكِ ، وأنتِ – إن شاء الله – تستطيعين التعامل مع ذلك ،1. تجاهل ما تسمعينه من أهل زوجك مما تعرفين أنه بقصد الاستفزاز ، وأنه محض افتراء .
2. أن تصلحي شأنك ، وبيتك ، وأولادك ، وما تسمعينه منهم مما هو عندك فعلاً : فلا بدَّ من إصلاحه ، والقيام عليه حق القيام .
3. حاولي التودد لأهله بحسن الأسلوب ، ورقة الكلمات ، وجميل التصرفات ، وتفقديهم بين الحين والآخر بهدية تليق بهم ، أو بطعام تصنعينه لهم ، أو بحلوى تخصينهم بها ، ومعروف أن للهدايا شأناً بالغاً في تقريب القلوب ، وإشاعة المحبة والمودة بين طرفيها .
4. أحسني لزوجك بعدم ذِكر ما يجري من أهله لأحدٍ من الناس ، واجعلي ثقته فيك عالية ، ولا تجعليه يسمع منك أو يرى ما يكره .
5. ومع كل ذلك : فإن هذا لا يعني السكوت الكلِّي عن الطعون والافتراءات التي توجه لك ، لكننا ننصحك برد ذلك إلى زوجك ، وتحميله مسئولية إصلاح الأمور ، وإعطاء كل ذي حقَّه ، وأظهري له حسن تربية أهلك لك .
6. وأخيراً : لا بأس أن تقترحي على زوجك الانتقال من السكن القريب من أهله ، وليس واجباً عليه أن يستجيب ، فحقك إنما هو في سكن مستقل ، وأنت تتمتعين به ، لكن من الحكمة والمصلحة أن يبتعد الزوج عن سكن أهله إن كان يعلم عدم التوافق بينهم وبين زوجته ، ولعلَّ ذلك البُعد أن يساهم في تقوية الروابط بين الأطراف جميعها ، وأن يزيل من القلوب تلك الإحن ، وذلك الحقد .
واستعيني بالله ربك بالدعاء ، مع القيام بما أوجب عليك من الطاعات ، ونسأل الله تعالى أن يوفقكم لما فيه رضاه ، وأن يجمع بينكم جميعاً على خير .
والله أعلم