هل ما يفعله صائب

[مشكلتي]

السلام عليكم

اولا مشكلتي ليست بالكبيرة باش متخلعوش :d

انا فتاة طيلة مسيرتي الدراسية من المتفوقات والحمد لله

السنة هادي عندي باك ومشكلتي هي انو ابي ماهوش مخليني نقرا بحرية

مثلا عاطيني ساعات محددة في اليوم نقراها غيرهاا ممنوع نفتح كتاب

لانو يقول بلي نضغط على روحي لكن مانيش نضغط نقرا عادي :s
وانا هاك خايفة الدروس تتراكم عليا باسكو بزاف
اضافة انو يوم الجمعة لي هوا اليوم الوحيد لي فالاسبوع لي منقراش فيه فالمدرسة وليكور

مانعني اني نحل فيه كتاب وقالي خليه راحة حاولت نحكي معاه ونفهمو بلي ماهوش عام راحة
مي والو

اعلابالي يدير هاك من خوفو عليا لكن انا متاكدة بلي مانيش نضغط على روحو بيسك عاطية لنفسي اوقات فراغ

انصحوني كيفاش نفهمو
والا لي راه يقلي فيه صح و انا الغالطة

جزاكم الله خيرا
​

 

[بقايا إنسان]

رد: هل ما يفعله صائب

عليكم السلام ورحمة الله وبركاته وبعد:جربي بنتي متراجعيش أسبوع بحالو وبينيلو انك متراجعيش وشوفي رد فعلو
هل يطلب منك تراجعي أم لا؟
اذا لامك حسسيه انك غير مهتمة .هنا ربما يخاف ويأكد عليك من أجل مصلحتك
واذا مالامكش لوميه انتي وحسسيه انو محبلكش تنجحي
سلام

 

[لاريمان]

رد: هل ما يفعله صائب

السلام عليكم
الصراحة والدك راهو يبالغ في خوفو عليك
لكن هذا الطريقة تنجحي فيها اذا كانت عندك قدرة استعاب كبيرة في القسم
لكن اذا كانت قراتك متوسطة وانت طالبة علمية مثلا ارى ان الوقت المخصص للمراجعة رايح يكون قليل
بالبرنامج الي حطولك باباك رايحة يكون مردوك محدود
بالنسبة للوالد حاول تفهميه انو السنة هادي راهي غير والوقت اصلا ماكانش مع التحضير والواجبات
وان شاء الله يتفهم ويخليك على راحتك
ملاحظة ماتضغطيش على روحك من ذرك راهو مازال الحال
بالتوفيق

 

[(الصياد)]

رد: هل ما يفعله صائب

مرحبا

اباك يفكر بطريقة سليمة وحكيمة

اذا كنت لاتشعرين بالضغط .. وفرحانة بالقراءة والمراجعة

في راي ان تتمسك بهذا
وانا واثق بان اباك سيستسلم للامر الواقع

اتمنى لك النجاح والتفوق
بارك الله فيك

 

[لؤلؤة قسنطينة]

رد: هل ما يفعله صائب

السلام عليكم
شوفي ختي لعزيزة اول شي ربي يوفقك في قرايتك وان شاء الله تنجحي وتدي الباك
شوفي درك هو الباك صح يحتاج تركيز من الاول ويحتاج متابعة ولكن ماش لدرجة تضغطي على روحك
يعني رانا في اكتوبر برك راكم عندكم تقريبا شهر من لي دخلتو تقراو مازال الحال وزيد راكي ديري في ليكور
يعني عندك دروس خاصة تساعدك على تتبع الدراسة بسهولة، بالنسبة لمواد الحفظ حطيهم على جنب ساع
ونروحو لمواد الفهم هادوك راجعي واش درتو في ليكور وعاودي حلي التمارين في السوايع لي يقررهملك باباك
وفي نفس الوقت حاولي تبعي مع الدروس في القسم وكي ماتقرايش ساعة وتبقاي في لاكلاس حاولي تريفيزي
وهنا نقصد بالمراجعة هي تعاودي التمارين تاع القسم وتاع ليكور ماش حاجة كبيرة، خاطر الفترة هادي تحتاج تركيز اكتر من لي تحتاج
جهد وحفظ وتخلطي كامل الامور في بعضاها، اما فيما يخص باباك مادامو يتعامل معاك ببرنامج امشيلو على القوسطو
ديريلو حتى نتي برنامج، اخدمي برنامج يساعدك يوم الجمعة ونعتيهولو وبينيلو واكديلو على وقت الراحة لي مديتيه لروحك
وقوليلو هادا برنامج اولي برك نجربو لمدة اسبوع واذا ماعجبنيش مانكملش بيه قوليلو ماش حابة نضغط على روحي
واشوا ندير مراجعة برك باه نشفى خاطر التمارين واعرين ولازم يتراجعو في وقتهم وكلما تديري برنامج نعتيهولو كلي
تشاوريه باه مايحسش بلي راكي تقراي من ورا ظهرو ولا ترهقي في نفسك
وهادو هوما الاباء يخافو علينا ديما ربي يخليلك الاب ان شاء الله ويحفظهولك
واذا راكي خايفة ماتلحقيش نقولك ارتاحي راكي في اول الطريق تنظيم بسيط برك وتخلصي قبل الوقت
خاصة الحفظ، من بعد كي تطلعي للجامعة لا كتب ربي يعيطك يومين كاقصى مدة تحفظي فيها جبل تاع اوراق
كاين حتى لي يمدلك كتاب وتقدري تنظمي روحك ونورمال مانقولكش 100 بالمئة تخلصيه ولكن تقدري تجمعي
المعلومات الكافية فمابالك نتي بمدة طويلة؟ مالا ماتخافي ماوالو سايسي باباك وشاوريه واغتنمي اوقات المراجعة
لي يمدهالك في مواد مهمة ولي صعبة الفهم وربي ينجحك ان شاء الله كتري الدعوات انو ربي يوفقك ورايح يسهلك كل شي صدقيني
بالتوفيق ان شاء الله

​

 

[ليليا مرام]

رد: هل ما يفعله صائب

السلام عليكم
اييه لالة باباها يخاف عليها وهي تتقلش انا راني سور باباك شافك قاتلة روحك من بداية السنة باباك راه عارف واش يدير راه خايف عليك وراه يعرف واش يدير لانو انت لما تضغطي على روحك من اول السنة راح تمرضي فالاخير روحي بالشوي ما تنخلعيش من الباك من الاول معليش لما يدخل الفصل الثاني احكي معاه وفهميه مازال الحال عليك حتى تحكمي على روحك وعليه اعطي وقت لروحك ولباباك راه خوفو في محلو
الله ينجحك

 

[wissam 47]

رد: هل ما يفعله صائب

ما عندي ما نزيد الاعضاء كفو ووفوا بارك الله فيهم
وانتي نصيحتي ليك انك ما تضغطيش على رووحك بزااااف على خاطر راه مزااااال الحال
سلام
​

 

[Salah eddin]

رد: هل ما يفعله صائب

السلام عليكم
ياودي الباك هذا خالعكم
اقراو عادي كيما باق السنوات
و كي تبقى 3 سمانات على الباك زيرو شوي السنتورة
هه
نصيحة من جرب
و
السلام
​