هل ما يطلبه عادي!!

[مشكلتي]

السلام عليكم
الحمد لله حمدا كثيرا مباركا
اخوتي انا ذات 22 عام كنت على علاقة مع شاب دامت 3 سنوات تقدم لاهلي والحمد لله تمت الموافقة تحدثت معه في الهاتف فقال لدي شروط الاول تلبسي الجلباب او كما سماه هو المهم مستور والثاني تتهلاي في الوالدة
فكرة الجلباب مقنعتنيش يعني ما يقدرش يرغمني او ماذا افعل احتاج رايكم ؟؟ احسست انه اصبح يفرض رايه من الان وانا لم اقدم اي شروط مع العلم اني مستورة والحمد لله البس الحجابات ولا البس السروال ابدا
هل يحق لي الرفض!! وكيف تكون اجابتي لاقنع الطرفين انا لست رافضة فكرة الجلباب ولكن فقط غير مقتنعة كي نحب نديرو نديرو على قناعة احسن من انو يكون جلباب نفاق غير مقتنعة بيه​

 

[الحلم الوردي]

رد: هل ما يطلبه عادي!!

السلام عليكي
تم الاعتماد
ان شاء الله يفيدوك الاعضاء
​

 

[Hakan]

رد: هل ما يطلبه عادي!!

هيا مليح روميو يتقدم الى جوليات لطلب يدها
ومن شروطو الجلباب اللي يسوى في السوق 300 الف
وعند ربي ما لا عين رات ولا اذن سمعت
انا من عندي من حقو انو يطلب هذا الشيء لانو يطلب سترة الحبيبة نتاعو
لانو راكي رايحة تكوني مرتو مستقبلا اما السترة يااختي نضن
عندها موازين وحجابات اليوم بيني وبينك ماهيش تلبي السترة الكاملة
ونزيد حاجة الجلباب الوردي والزهري والاقحواني والترابي وغيرهم من الالوان هذو اصلا ماشي
جلابيب نحير في واحد يطلب من الزوجة نتاعو تلبس الجلباب ومن بعد تلبسو لكن مزخرف وملون
وزيد الشيء اللي يقهرني انو تلبس معاه طالون وغيرو من الاحذية المبهرجة
اما في حالتك يااختي نورمالمون تعرفي انو الراجل كي يطلب يد المراة عندو شروطو
اللي تكتب في عقد القران فهمتيني ولا واذا اخللت بهذي لشروط يقدر يطلقك اذا احب هو
اذا فمبا انو راكي في ليتساع فكري عجبوك شروط حبيبك اللهم فمبارك ولعقوبة للذرية الصالحة
ما عجبوكش شروطو يااختي الرجال كاينين وتقدري تزوجي
بالي يشرط عليك تلبسي الشفاف واللي ممكن اصلا ما يهموش واش تلبسي وكفاش تخرجي وهذو الانواع راهم بزااف
لا غيرة على مرتو لا والو الدياثة في الديااثة
اما عن الشطر الاخير نضن ربي ماقالش في القرآن فكرة القناعة
لانو لو نجيو الى فكرة القناعة اصلا شعبنا راهو مسلم بدون قناعة يعني صاب باباه مسلم راهو مسلم ولا راني غالط ختي
المهم ما ندخلش معاك في امور والحل عندك
الزواج مبني على المفاهمة انت ما حبيتيش اللهم فبارك وكل واحد يشوف طريقو رضيتي
بالجلباب وبغيرو من الشروط اللي اصلا مافيهاش مخالفات شرعية ربي يسهلكم الزواج
ولو اني نشوف انو انت وهذا الشاب من ضركي لا علاقة بالزواج الناجح لانو الطفلة اللي تشكي من شريك حياتها
على جال جلباب ممكن تلبسو مرة في الاسبوع هذي ما نضنش رايحة تتفاهم معاه على امور اكبر واوسع
غدوة في ليكوش تتقابضو وفي صبيغة الشومبرة تتقابضو ومش محال اذا تزوجتو
ما تكملوش العام مالا ديري حساباتك ختي ..سلام​

 

[♡كارينا♡]

رد: هل ما يطلبه عادي!!

السلام عليكم اختي
اولا الجلباب والله حاجة مليحة انا وكان نجي نتزوح وقلي راجلي البسي الجلباب عادي والله مليحة كي عاد يطلب حاجات ماهيس خارجة على دينا والسترة مليحة ترتاحي فيه
ثانيا بالنسبة لكلمة يفرض رايه هديك ماعجبتنيش عادي زوجك ويحب يقولك اي حاجة وبالنسبة لهدرتك راهو طلب غير الجلباب
ماشي بزاف حوايج ...
المهم ربي يجيبلك لي فيها الخير ويكون في عونك وان شاء نتمنولكم حياة زوجية سعيييدة

 

[آلاء هبة]

رد: هل ما يطلبه عادي!!

السلام عليكم اختي
اولا نقولك مبروك عليك ربي يسخرلك والحمد كي جا طلبك من باباك بعد 3 سنوات..
الثانية انا في راي الشي لي طلبو السيد عادي جدا بالعكس المفروض تفرحي انو طلب منك شيئ كي هذا اسمو جلباب حاجة تستسحق تفتخري بيها ماشي تسالي تقولي اذا طلب هذا عادي ولا لا
واسمحيلي نروح لنقطة اخرى قلتي يفرض رايه واش حبيتي تقصدي بيها ياو السيد راه راجل وزوجك اذا صح القول مادام جا لباباك سي نورمال يحددلك شروط اهو كذا وكذا وانتي طلب جلباب يعني سترة يعني شيئ يقربك ويحببك لربي اكتر درتي علامات استفهام ؟؟
يا ختي هدا زواج واساسه التفاهم ثم التفاهم ثم التفاهم ماتكبريش الموضوع واخطيك من الهدرة هادي نتاع راه يفرض في رايو السيد حبك طلبك في الحلال وحب السترة ليك انتي الاولى
اسمحيلي ادا طولت عليك ربي يجيبلك لي فيها الخير ويرشدك لي فيه خير ليك وليه .سلام

 

[حكاية قمر]

رد: هل ما يطلبه عادي!!

السلام عليكم
عادي اختي من حقه وهذا ما هو والو بالعكس راه باغيلك العفة
الله يكملك ع خير

 

[لؤلؤة قسنطينة]

رد: هل ما يطلبه عادي!!

السلام عليكم
اولا ختي لعزيزة ربي يوفقك وربي يسهلك وتوصلي تديري دار وتتستري في دارك وتجيبي ذرية صالحة ان شاء الله
اما لو نوليو للموضوع والله اول ماقريت العنوان وبديت نقرا في المشكلة قلت هادا اكيد طلب منها طلب خطير رايحة ندخل نقابض بعد هههه ساع لقيتها سلامات والحمد لله
شوفي ختي لعزيزة نتكلم معاك كأخت لأختها واي كلمة راهي في صلاحك، شوفي ختي الدنيا ماولاتش تعجب رانا في زمن يا لطيف واش تتوقعي من زمن ولا الاب فيه يعتدي
على بنتو والاخ يعتدي على ختو غير من الفتن لي صايرة والمرأة ختي لعزيزة اي حاجة فيها تلفت النظر ضحكتها تلفت النظر وابتسامتها تلفت النظر ومشيتها تلفت النظر
وخاصة في وقتنا ولات الفتن بنسبة اكبر وولات المراة معسوسة على كل صغيرة وكبيرة على هادي لازم المرأة تتجنب الشبهات وتحاول تصون نفسها قد ماتقدر درك علابالي
تقوليلي لابسة حجابات ومستورة وعلابالي بهاد الشي خاطر لباسي نفس لباسك واشوا ختي لعزيزة نكون صريحين مع بعض ونتكلمو كأخت مع اختها صح الحجابات هادو
مستورين وكلشي ولكن فيهم حوايج يلفتو النظر مثلا القفايل لي فيهم تلقاي وحايد مزينينهم بالدونتال لما تمشي ساعات يلصق فيك يعني مقارنة ببنات اليوم الحمد لله راهو
مستور وطويل ومافيهش سراول وماش الوانو صاخبة بصح لو تدققي فيه مليييح تلقاي كاين اخطاء فيه ولو بنسبة 3 بالمئة وزيد ختي لعزيزة راكي رايحة تبني اسرة ورايحة
تولي ام مستقبلا وتربي اجيال راهي امامك مسؤولية ضخمة وكلما تكبر المسؤولية المرأة يكبار عقلها وتخمم بوعي وتخمم في سترة اكبر ماش كيما نتي في دار باباك كيما تكوني متزوجة
لما تروحي لحفلة تلبسي صباط طالو حاشاك بصح لما تجي تتسلقي الجبل وفيه صخور وطريق واعرة لازمك حذاء اكثر خشونة وصلابة باه يتحلم قساوة الطريق هكاك
تاني المرأة لازم كلما تكبر المسؤولية توجدلها المرأة اللوازم تاعها (مع انو الجلباب مليح للمتزوجة وغير المتزوجة) واشوا نقولو بالاك وحدة ماش متزوجة مازالت تشوف مع روحها
بصح نتي لقيتي راجل لي حابتو وحابك وناويك للحلال علاواه تحوسي كتر من هكا؟ درك ماراكيش تولي هازة شرف باباك برك تولي هازة شرف باباك وزوجك وولدك راهي
مسؤولية ضخمة وماش قاعدة نقولك نتي ماش مستروة ولا حاشا واشوا ماكانش قد ما المرأة المتزوجة او حتى ماش متزوجة تستر روحها كتر وزيد بخصوص امر الاقتناع
الحجاب مافيهش اقتناع حبيبتي خاطر السترة تقربك لربي اكتر ويحبك ربي كتر وهل حب الله ولا التقرب منو لازمو اقتناع؟؟ بالعكس غاليتي وزيدي راكي قلتي حابة الجلباب
واشوا حابة نديرو من راسي وهاهو ربي بعتلك اشارة خاطر حنا النساء يقدر يوسوسلنا الشيطان بزيادة على الرجل اتفكري برك نهار جيتي ديري الحجاب ماكانش الشيطان
يقولك لازم تقتانعي مليح وكيفاه تغطي شعرك وووو وكي درتيه ولات تبانلك حاجة عادية ومن بعد كي حبيتي تحسني من حجابك يقولك واش رايح يلبسلك الطويل وكلشي
وكي تديريه تولي تجيك عادي ودرك تاني كيف كيف وكي تديريه مارايح ينقصلك والو ياك الاهم راجلك يشوفك بلا خيمار وفي اجمل حلتك مالا واش يقلقك لما تلبسيه
شوفي غاليتي الحاجة لي ترفضي تلبيها للرجل لي يكون فيها ضرر ليك وأذية مادام طلب منك حاجة مافيهاش اذى ليك ولا لوالديك معناها ماش طلب مستحيل وبالعكس رجال
اليوم راهم يرغمو نساهم ينحيو الخيمار بعد الزواج باه يعرضوهم قدام صحابهم كي السلعة وهادا حابك ليه وحدو ويحبك صح وناويلك الخير مالا اتوكلي على ربي سبحانو
الدنيا واللبسة والعدلة اي ماتدومش او مايدوم غير الصح انوي في قلبك ديريه وربي رايح يسهلك كل خطوة
بالتوفيق ان شاء الله
​

 

[نجيب]

رد: هل ما يطلبه عادي!!

نتمنالك ربي يكملك بالخير

اختي الكلمة لي معجبتني في مشكلة هي

حاسة روحي يفرض علي روحو و انا نديرو بقناعة يعني نحب نديرو نديرو نحب منديروش منديروش

و قلت ايضا من حقي نرفض ندير الجباب

اليك الجواب اختي

انت من حقك ترفي الجباب و هو من حقه يرفضك انت كزوجة

الرجل على حق فرض عليك الجباب في فترة الخطوبة يعني احسن ما يتزوج بيك و من بعد يفرضو عليك

و تقولي متفهمناش هكا .

انا نقولك انت لي حابة تفرضي روحك عليه قبل ما يزوج بيك

انت من حقك ترفي طلباته و هو من حقو يرفضك انت كزوجة

نتمنى ربي يكمل بالخير و تفكري مليح قبل ما تديري اي قرار .

​

 

[عاشقة الإحسان]

رد: هل ما يطلبه عادي!!

السلام عليكم

الإخوة اللي مروا قبلي كفوا و فوا

لا أرى أي حرج أو عيب أو صعوبة في طلب خطيبك ، من حقو أنو يفرض عليك هذا الشيء و من واجبك تنقادي ، ياختي هذا راه ناوي لحلال و راه يحب لك الخير كي خاف عليك

بالعكس لازم تشدي فيه بزوج يدين و زيدي بسنيك بلاك يروح من بين يديك ، هذا الغيور عليك و اللي يفكر بآخرتك و يحمل هم دينك ، في زمن ربما قل فيه هذا النوع من الرجال

 

[بقايا إنسان]

رد: هل ما يطلبه عادي!!

لثمنكي الباهض عنده طلب منك التحجب عن أعين الناس ولو كان ثمنكي عنده زهيد لزفكي عارية متبرجة بين الخلائق بالاناشيد
أما كلمة قناعة فهي الكلمة التي تتوارى بها كل مرتابة في دينها
أين المضرة في لبس الجلباب؟؟
نصيحتي ليك اختي الكريمة أعيني خطيبكي على طاعة الله وإن توليتي فقد تصبح 3سنوات قضيتها معه بغيرشرع الله كسبع سنوات عجاف في زمن يوسف الصديق
سيبحث عن غيرك ويرتاب الناس في امرك

 

[❤️كلي أمل❤️]

رد: هل ما يطلبه عادي!!

اختي الفاضلة واش فيها اذا طلب منك ديري جلباب
انا ولله حابا ندير جلباب وستار لانو دوك رانا لابسين
الحجاب ومسلكناش من الذئاب
انا من رأيي المهم تكوني لباس معاه خاصة اذا كان رجل
بمعنى الكلمة يحب انت ويخاف عليك
ماتضيعيهش من يدك وتعطيه لأخرى تلبيلو طلاباتو

 

[koko DZ]

رد: هل ما يطلبه عادي!!

هو لانو يحبك قالك البسي الجلباب
ليبعد عنكي اعين الناس

 

[باتنية و نص]

رد: هل ما يطلبه عادي!!

سلام عليكم
كيف حالك اختي
الفكرة مش فكرة جلباب وفقط
وانما هل انتي مقتنعة بهذا الشاب كشخص ؟! اخلاقو دينو تربيتو . هل فعلا هي نتيجة طلبه هذا منك ؟ او ربما تدخلت اطراف اخرى ودفعته ليطلب منك هكذا طلب
انا هكذا حالات نسميها ديما .. Le bonheur conditionné
هو شرط عليك شرط..وانت طبعا لك حق الرفض او القبول ..وزيد علاه خلا هاذ الوقت كامل بش قالك هاذ الشي.كان قادر في فترة تعارفكما يقولك على طريقة تفكيرو وكيفاش حايب تكون شريكة حياتو
اذا رضا بهاذ الشي اللهم بارك .مرضاش ليست نهاية العالم
وكلشي يجي بالقناعة ..واذا رفضتي هذا لا يعني انك انسانة سيئة
ومنظنش رح يتخلا عليك لهكذا سبب
وانت ايضا اذا شفتي انو انسان لا يعوض. اعتبري هذي اول تضحية منك له ولن تندمي بالمقابل لانك سترتي روحك و السترة مليحة
ربي يهنيك
تحياتي

 

[لاريمان]

رد: هل ما يطلبه عادي!!

السلام عليكم
والله يا اختي لااراها مشكلة تحتارين وتحتاج تفكير ومساعدة
مع احترامي الكبير لك لكن اختي ماطلبه من حقه ان يرى هو زوجته وليس ليراها غيره
واين المشكلة في ارتداء الجلباب مادمت زوجته
اعيني زوجك على طاعة رب العباد
ربي يوفقك ويتمم بخير​

 

[أميرة العفاف]

رد: هل ما يطلبه عادي!!

السلام عليكم

اولا اختي الغالية اهنئك واقول لك الف مبروووك ربي يكملك بالخير ان شاء الله.

ثانيا هذه ليست بمشكلة يحتار فيها المرءفي ايجاد الحل .

فطبيعي ان يشرط الخطيب على خطيبته والتي ستكون زوجة له مستقبلا ان شاء الله

وشرط خطيبك نعم الشرط شرط عليك الستر والعفاف محظوظة انت اخيتي هو يريد مصلحتك يريدك ان تكوني اجمل زهرة في

البستان لا يتنعم بالرؤية اليها الا هو عكس باقي الزهور التي ذبلت يراها كل من هب وذب فسقطت بعض اوراقها وداست بالاقدام

تحت التراب غاليتي اقدر موقفك ربما لانك لم تفكري بارتداء الجلباب يوما ولكن تخيلي لو انه طلب العكس هناك من الفتيات من

طلب منها خطيبوها نزع الحجاب فقبلت شرطه .

فما بالك انت طلب منك الستر والعفاف ولا تقبلين .

ان قلت ان من حقك الرفض فمن حقه هو رفضك كزوجة .

جيد انه شرطه عليك قبل الزواج فلو شرطه عليك بعد

الزواج لكنت ستقولين انه يفرض رايه ولكن بما انه شرطه بعد فهذا من حقه .

فكري جيدا وان شاء الله تتوصلي للقرار الصائب .

ربي يهنيك .

 

[حيلتي في حسن نيتي]

رد: هل ما يطلبه عادي!!

يا أختي انا لا ارى مانع انك ماديريش الحجاب او الجلباب
ماتنسايش اختي ماشي خطيبك اول واحد فرض عليك الجلباب حتى ماديريهش
الحجاب راه فرض من عند الله قبل ما يفرضه عليك خطيبك و إذا ماكيش مقتنعة ديري حجاب ماتقتانعيش ثاني بالزواج
الله يهديك اختي حمدي ربي لقيتي رجل يقولك تحجبي و يغار عليك لاننا في زمن الدياثة كثرو الرجال اللي مايغاروش على اهلهم
خمي مليح الجلباب ماهوش السبب في رفض الزواج
واش عرفك من بعد لوكان ترفضي هذا الزوج بسبب الجلباب و يعاقبك ربي بعدم الزواج من بعد ( بعيد الشر)
صلي صلاة استخارة و دعي ربي يكون الزوج اللي يعينك في طاعة الله
و ربي يبارك في زواجك ان شاء الله ​

 

[همس الوُرود]

رد: هل ما يطلبه عادي!!

السلام عليكم ورحمة الله وبركاته
بسم الله الرحمن الرحيم
الحمد لله رب العالمين، وصلى الله و سلم وبارك على نبينا محمد، وعلى آله و صحبه وأزواجه وذريته أجمعين، والتابعين لهم باحسان إلى يوم الدين.
أما بعد :
فهذا ملخص إنتقيته من كتاب (حجاب المرأة المسلمة) للشيخ المحدث العلامة محمد ناصر الدين الألباني رحمه الله، تنبيها على شروط الحجاب لما نراه من تبرج وسفور بين أخواتنا المسلمات، فاخترت منهج بيان الشرط بدليله خشية الإطالة وإصابة القارئ بالملل، فأقول وبالله أستعين:
شروط الحجاب
الشرط الأول- إستيعاب جميع البدن إلا مااستثني.
دليله-قول الله تعالى(ياأيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفورا رحيما )
الشرط الثاني-أن لا يكون زينة في نفسه.
دليله-من الكتاب قول الله جل جلاله(ولا يبدين زينتهن)
ومن السنة قوله صلى الله عليه وسلم(ثلاثة لا تسأل عنهم-يعني لأنهم من الهالكين-رجل فارق الجماعة وعصى إمامه ومات عاصيا.وأمة أو عبد ابق فمات، وإمرأة غاب عنها زوجها قد كفاها مؤونة الدنيا فتبرجت بعده.فلا تسأل عنهم)أخرجه الحاكم وأحمد وصححه الألباني
الشرط الثالث-أن يكون صفيقا لا يشف.
دليله-قوله صلى الله عليه وسلم(يكون في اخر أمتي نساء كاسيات عاريات على رؤوسهن كأنسمة البخت ، إلعنوهن فانهن ملعونات)زاد في حديث اخر(لايدخلن الجنة ولا يجدن ريحها، وإن ريحها لتوجد من مسيرة كذاوكذا )قال إبن عبد البر(أراد صلى الله عليه وسلم النساء اللواتي يلبسن من الثياب الشئ الخفيف الذي يصف ولا يستر فهن كاسيات بالاسم عاريات في الحقيقة)
الشرط الرابع-أن يكون فضفاضا غير ضيق.
دليله.قال أسامة ابن زيد'كساني رسول الله صلى الله عليه وسلم قبطية كثيفة مما أهداها له دحية الكلبي.فكسوتها إمرأتي.فقال.(مرها فلتجعل تحتها غلالة.فاني أخاف أن تصف حجم عظامها) حسنه الألباني
الشرط الخامس-أن لا يكون مبخرا مطيبا.
دليله-عن أبي موسى الأشعري قال. قال رسول الله صلى الله عليه وسلم(أيما امرأة إستعطرت فمرت على قوم على قوم ليجدوا منها ريحها فهي زانية)
وعن زينب الثقفية أن النبي صلى الله عليه وسلم قال(إذا خرجت إحداكن إلى المسجد فلا تقربن طيبا)
الشرط السادس-أن لا يشبه لباس الرجل.
دليله-عن أبي هريرة قال(لعن رسول الله صلى الله عليه وسلم الرجل يلبس لبسة المرأة ، و المرأة تلبس لبسة الرجل)
وعن ابن عباس قال ( لعن النبي صلى الله عليه وسلم المخنثين من الرجال والمترجلات من النساء، وقال أخرجوهم من بيوتكم، قال فأخرج النبي صلى الله عليه وسلم فلانا وأخرج عمر فلانا)
وفي لفظ(لعن رسول الله صلى الله عليه وسلم المتشبهين من الرجال بالنساء، و المتشبهات من النساء بالرجال)
الشرط السابع-أن لا يشبه لباس الكافرات.
دليله(قاعدة عدم التشبه بالكفار وعندها أدلة كثيرة من الكتاب والسنة)
الشرط الثامن-أن لا يكون لباس شهرة.
دليله-حديث ابن عمر رضي الله عنه قال' قال رسول الله صلى الله عليه وسلم(من لبس ثوب شهرة في الدنيا ألبسه الله ثوب مذلة يوم القيامة ثم ألهب فيه النار) أخرجه أبو داود وابن ماجة وحسنه المنذري كما في الترغيب
تم بحمد الله هذا المختصر وسبحانك اللهم وبحمدك ، أشهد أن لا اله إلا أنت، أستغفرك وأتوب إليك.
مزيود
إختصره أبو عبيد ياسين ابن الميلود مزيود الجزائري سامحه الله
ليلة الأحد 13 شعبان 1431 من الهجرة النبوية

هذا هو الرابط​

ملخص حجاب المرأة المسلمة - منتديات التصفية و التربية السلفية
​

أظن أني أجبتك أختي

في رعاية الله​