هالة
:: عضو مُشارك ::
- إنضم
- 27 أوت 2006
- المشاركات
- 101
- نقاط التفاعل
- 207
- النقاط
- 13
السلام عليكم دخلت وانا مترددة هذي المرة خجلانة اولا من الشيئ الي رايحة نقوله فكرت كم من مرة قبل لندخل ياترى نحكي او لا وياترى هل اجد من يفهمني جيدا ويحس بي ام اني ادخل واكتب واخرج فقط مثل مااني كتبت كلامي هذا بورقة ثم حرقتها وتاني فكرت يمكن الي يقرا رسالتي يقول هذي راهي مبالغة او ضعيفة لكن وصلت في النهاية وقلت بكل قوة اكتب واخرج ونخلي رسالتي لعل وعسى يقراها داعية او مثقف او شخص يعرف ربي مليح ويقدملي طريقة لحل لهذي المشكلة المهم اقسم بربي وانا من اول حرف بديت كتب فيه وهو الحزن يعصر قلبي وعيوني تذرف دما ودموعا تحرق خدودي احسها مثل ماء النار يحرقني ويزيد المي وحيرتي مشكلتي يااحبتي في الله اني انا وللاسف سبب حزن امي وسبب تعاستها وسبب مرضها نعم انا اعي مااقول نعم امي كل يوم تنهار وكل يوم تتعب وهي تتناول ادوية الاعصاب والمهدئات وادوية الاكتئاب وبسببي نعم السبب الاول والاخير انا .قبل ليذهب تفكير اي شخص فيكم للبعيد رايحة نحكيلكم الحكاية من البداية الحكاية هي نرجعو للوراء ستة سنوات من ستة سنوات فاتت كنت انا مرتبطة ومتزوجة بالورق وعرسي عن قريب كنا كامل فرحانين وامي فرحانة لدرجة لاتوصف وكانها هي العروس وراكم عارفين قلب الام وحنانها وحبها لاولادها المهم ارتبطت بشخص لاباس بيه وابن عائلة وناجح في حياته وقتها اصلا من البداية مكنتش مفكرة في الزواج لكن شوق امي حتى نتزوج كان قوي جدا لهذا قلت رجل مليح ومناسب وامي حابتني نتزوج نوافق وافقت وكنت عادي مشي فرحانة بزاف ولا مغصوبة تزوجت بعقلي وبقدرة ربي مكملش الزواج وفسخت العقد وطلقت قبل العرس بعشرين يوم لاسباب عديدة لا تعد ولا تحصى لقيتها في هذا الرجل يعني كان لازم نوقف هذا الزواج قبل ليصير حقيقة واكيد نهايته الطلاق مهما طال وللاسف من يوم طلقت وفسخت العقد تعبت امي تعب شديد وحست بزاف على الشيئ الي صارلي لان طبع امي حساسة جدا كانت متاملة تفرح بيا وسعيدة جدا في غمضة عين راح كل شيئ انا تقبلت هذا الامر وقلت نصيب وهذي الي كاتبهالي ربي وفضوت امري لله لكن امي مقدرتش لصدمة بالرغم من ان امي متدينة جدا وتعرف ربي ومن القائمين والمصلين والذاكرين الله كانت تقول ايه نصيب ومكتوب وربي يعوضنا خير لكن قلبها يتعصر بالرغم من اني كنت انا قوية ونتضاهرلها بذلك وفي ليلة من الليالي الشتوية كان عندي عشرة ايام على الطلاق كانت الساعة حوالي الثانية ليلا والجو ممطر وابي كان مسافر بعيد وراقدين وحدنا فقط قامت امي من فراشها وهي تحس احساس منقدرش نوصفولكم تحس بدوخة شديدة لكن يصادف الدوخة ضيقة خاطر ورعشة بالجسم كله معرفتش وش نديرلها ولا كيف نساعدها ولا اي دواء نمدولها بقات تمشي وانا نسندها ونفسها رايحة تتقطع قلت لشكون نعيط بهذا الوقت المتاخر في الليل وشكون يجينا لكن لما اشتذت عليها الحالة اتصلت بخالي على الثانية ونصف ليلا قتله ضروري تجينا امي بحالة اخذناها للمشفى ودارولها حقنة ومحلول لتهدئة الاعصاب ومن يومها وامي بدات تعاني من دوخة لكن من نوع خاص دوخة تحسها دورها وتضيق روحها عالجت وشافت جميع الاطباء لكن بدون فائدة عالجت بالاعشاب وبالرقية وفي كل مكان لكن بدون فائدة لمدة سنتين وهي تجري لكن تريح شوي وتعاود ترجع وكامل الاطبة يقولوها بسبب قلق وتوتر كبير حتى تعالجت عند طبيب نفسي وقاللها عندك حساسية مفرطة هي الي تعباتك بعد سنتين لقات امي طبيب مختص بالامراض العقلية والعصبية والنفسية راحت تعالجت عندو تخيلو قاللها بعد راديو في راسها انها تعرضت لصدمة قوية اثرت على اعصابها وراسها خلات الراس يفرز بعض الحوايج تخليك تحسي بالدوخة واثرت على اعصابك بفضل ربي عالجها وريحت عندو لكن تعالجت وهي تاكل في دواه طول العمر ريحت الحمد لله ورجعت كيف قبل وقلنا معليش راهي تاكل في دواه وتابع فيه شوي شوي بالطول يبقى ينقصلها حتى ترتاح طول المهم الان صار فات على الطلاق ستة سنوات وبهذي الفترة تقدملي كثير من العرسان لكن مكتبليش نصيب مع اي شخص اما نلقى فيه عيوب صعب نفوتها او لو نلقاه مناسب يجي وميرجعش او حتى كاين ناس قالو رانا جايين وهوما متحمسين وبشدة لكن ميوصلوش صرات هذي كم من مرة بل والف مرة او يجيني شخص نكون انا مشي موافقة بيه لكن يلزق ويصر عليا زادت امي تقلقت من هذا الموضوع وصارت تخمم بزاف على زواجي لدرجة منقدر نوصفهالكم تعبت بززززززاف صحيح انا مقدرة حالة امي وحبها ليا وحابة تفرح بي لكن انا مابيدي حيلة تنسى خالص الموضوع وبسرعة ترجع نشوفها بعيونها كل متشوفني ونسمعها تشكي لخالاتي وتقلهم علاه بنتي صرالها هاك عارفة مكتوب لكن راني تعبت حابة فقط نعرف بنتي وش يخصها يخي مثقفة وجميلة وبنت ناس وصغيرة وفيها كل الصفات الي يتمناها اي رجل علاه مشي مسقمتلها وتبقى تشوف في قريباتي الاقل مني تزوجو وانجبو وتشوف طليقي الي خطب بعدي مرتين وفي الاخير تزوج طفلة بنت ناس وجاب معاها ولد وراهو سعيد وصلت امي المسكينة لدرجة كبيرة من الحزن والالم والله راني نحكيلكم ونبكي غايضتني امي مشي انا انا عارفة انو الي خلقني ميضيعنيش والمشكل لو يحكي اي شخص مع امي تعطيه درس في القدر والنصيب ورحمة ربي وتسمع بزاف العلماء ومثقفة بزاف في الجانب الديني وتظل تدعي في ربي وسبحتها في ايدها وتقلي مرات انو الدنيا هذي مشي شرط الزواج المهم تقوة ربي وتقلي كلام انا نحير فيه لكن غير تسمع وحدة من قريباتي او جيرانا تتالم وتقلي حابة نفرح حتى انا وتبقى تقلي خايفة نموت ومنشوفكش عروسة هذي الي متمنيتها من الدنيا وتقلي مرات نكون راقدة نحس شخص يكلمني وينوضني من اعماق النوم ويقلي راكي راقدة وجايك النوم وبنتك كي لغزالة ومشي مزوجة وراقدة عندك تقلي كي نشوفك تمشي قدامي نقول بنتي وينه العيب فيها ونبقى نفكر وش ندير حتى نفرح بيها بعدها ندعي ربي وفجاة تبقى عيني تدمع وحدها وكل مطيحلي دمعة نقول ربي مسني الضر وانت ارحم الراحمين صدقوني من حالة امي هذي راهي في هم وغم كبير وحزن شديد حتى تنفخت رقبتي وقاتلي الطبيبة راكي مغيوضة بزاف وريحي روحك ليجوك لقواتر وعطاتني حتى تحاليلهم والحمد لله خرجت لباس لكن انا حاسة حاجة خانقتني اكثر من لقواتر ودايرتلي غصة هي الم امي والله والله لو جاء الزواج يتشرى بالمال نشريه من اجل امي انا صاحبة الامر ومشي حاسة لاهية بنجاحاتي نسات امي كل نجاحاتي الي حققتها بل الادهى والامر انها تقلي راني فخورة بيك وبلحظة تقلي لو تكملك بالزواج وتخوفني بكلمة اني نموت ومنشوفكش :cray02: والله راني نظل نبكي ونبات نبكي لاجل امي معرفتش وش نديرها نجي نفكرها بربي والنصيب هي تفكرني نقول لخالتي تكلمها هي تعطيها درس لكن قاتلهم شيئ بداخلي مرر طعم الدنيا كاملة بعيني ومشي مخليني متهنية بحاجة حتى نفرح ببنتي ونشوفها عروسة ومدية راجل صالح وقتها نرقد مرتاحة ونفرح اصبح حالة الحزن والكرب والتعاسة بوجهها نحاول نفرحها تفرح ومن ثم ترجع لنفس الاسطوانة قولولي انا دوكا وش ندير اكثر من كوني شادة بربي وندعي ونقوم في الليل وندعي وش ندير .قتلها امي شوفيني بفضل ربي وبفضل تربيتك جامي درت علاقة محرمة او مشيت بطريق يغضب ربي او تكلمت بالتليفون او حاجة من هذي الامور بفضل ربي نبات مرقدة حذايا السبحة وكتاب القران قاتلي ايه عارفة ومتاكدة لهذا غايضني الحال اكثر ونشوف لبنات الي مشي ملاح متهنيين نقوللها ياامي ارجووكي تعبتيني وتعبتي نفسك انسايني خلاص كرهت جد الزواج والله صدقوني هذا الزواج مليته وكرهت كره شديد لان بسببه امي مرضت وحزنت حملتني مسؤولية حزنها ومرضها وكل منشوفها متالمة نتالم الف مرة بدالها والله راني محطمة داخليا على امي وحالها انا راضية وامي مسكينة معرفت وش نديرلها مرات نقول نتزوج من اجل امي وخلاص ايا كان وحتى ونكون مشي حابة قاتلي لالا لازم تتزوجي وانتي فارحة شكون قالك نفرح كي تكوني مشي حابة قتلها ياامي الزواج على قناعة صعب ولازمه صبر والله حاسة نفسي كبرت خمسين سنة على نفسي حتى مرات تخاصمني غير وحدها وتقلي لو كان وافقتي بفلان وش يخصه ووش رايك بفلان كون يتقدملك وووو قتلها امي رايحة تهبلي ونهبل معاك ارحميني وارحمي نفسك ربي مقدرش قاتلي يقدر باذن الله وبعد فترة ترجع عادي وتكون هي الي تنصحني لكن غير تسمع او تشوف او يكلمها واحد على الزواج ترجع حالتها.نتمنى يقرا رسالتي شيخ او شخص يفهم الحالة جيدا ويساعدني راني خلاص مقدرتش راني نتقطع كل لحظة هل هذا ابتلاء او بلاء او ماذا صحيح نسيت مقتلكم لقيت سبب عطلان زواجي تعطيل ورقيت ورقيت مرات عديدة ونفس الشيئ هل انا ضحية حسد وعين وضحية سحر او ماذا خايفة فقط الى كاش ميصرى لامي شيئ اكثر ملي فيها ونكون انا السبب ومنسمحش لنفسي ابدا والمشكل انو المجتمع ميرحمش ومرحموش امي وديما يسالوها واش الوردة نتاعك مزال زعمة يسموني الوردة لاني جميلة وامي تناديني وردتي ذبلوها ويبقاو يقولولها اجري على بنتك صحة كيفاه تجري عليا اوووف كرهت هذا المجتمع نتمنى تقرؤو رسالتي باحساس وتفهمو الموضوع مليح وتقدمولي الحل الانسب لانو الي يهمني الان صحة امي فوق كل شيئ حتى مرة قال خالي اختي سبب مرضها بنتها وكي تتزوج تريح .طولت عليكم اسمحولي لكن صعب نحكي هذا الشيئ لشخص نعرفه حكيته هنا واملي نلقى شيخ عالم يسمع حكايتي ويساعدني اونتمنى من الادراة لو يقدرو من فضلهم ويجازيهم ربي خير يعرضو رسالتي هذي على شيخ ويقدملي الحل ارجوكم امي تعبانة ومعرفتش كيف نساعدها وستنجدت بيكم وربي يجازيكم خير ادعولي وادعو لامي وربي يعوضكم بالجنة.سلام
