مشكلتي ماذا يجب ان افعل؟؟

[مشكلتي]

السلام عليكم و رحمة الله و بركاته
اولا اشكركم جزيل الشكر على منحنا هكدا فرصة لطرح مشاكلنا
انا شابة من ولاية معسكر غرب الجزائر عمري 29 سنة حبست لقراية من لباك
انا من بيت الحمد لله مخصه والو
مشكلتي في 8 سنوات و انا نحب شخص و وعدني بالزواج و كل مرة يقول اني جاي اني جاي و كل مرة يلقى عدر و انا في هدا الوقت كانوا يجوني لخطابة و منقبلش غير علاجالو و حتى الام نتاعي لاحظت الامر و اخبرتها به
بعد سنة من كل هذا الشي جاني خبر انو حرق للخارج و ملقيتش كيف نتواصل معاه و درك اني فء حيرة شا ندير


نرجو منكم تفهم مشكلتي و اعطائي من النصائحكم لعلي استفاد ان شاء الله
للعلم ربي شاهد انو جامي قابلته و لا و هو اصلا صديق اخي موالف يجي عندنا


سلام

 

[السلطانة]

وعليكم السلام
والله يااختي واش نقولك ضيعتي وقتك معاه السيد اخرتها حرق وخلاك واش بقى فيها !!

ربي يرزقك الزوج الصالح
السيد لي راكي تحكي عليه كي حرق يتزوج بقاورية ويريقل وراقيه ومابقيتي تسمعي عليه والو
جاوبتك منطقيا اختي
انتي راكي تخممي بقلبك .

 

[الورد الأحمر]

السلام عليكم ورحمة الله وبركاته

امممم والله يا اختي ممكن يجرحك كلامي بصح واش مازال تزيدي تخمي فيه! يعني هو حسم الموضوع وخلاص ولا تتوقعي مثلا أنو يعيطلك ويقولك راني حرقت وصابريني نعمل تاويل ونجي نخطبك ! وفرضا عملها يعني شحال رح تزيدي تحرقي من عمرك معاه! سامحيني مانيش مادية مي الوحدة تخمم لبعيد ولي ما عندوش مستقبل من النهار اللول ما تشوفش فيه. الله غالب الوحدة وقت تحب تتزوج مش تروح تطيش روحها للشقاء مبعد تولي تدير في لمشاكل لراجلها وتطلب منو متطلبات ما يقدرش عليها.

درك هذا آسافواغ وينو وبالاك خلاص لا ما وصلش للبلاصة لي حرق ليها كلاه لبحر وانتي مازلتي تخممي فيه وزيد لوكان بالو فيك كان قبل ما يمشي يحكي معاك يخبرك. من اللخر لي يحرق معناها بلا كواغط معناها ما يرجعش على خاطر كون يرجع ما يقدرش يزيد يروح والحرقة مش ديما تصلح هذا اذا صلحلتو.

هذي الغلطة لي تطيح فيها الوحدة تبقى تخمم بقلبها وتسنى في الأكاذيب وتقبلها وفي اللخر يا يتزوج غيرها يا يخليها وهاو هذا حرق بكل. كيما قالت أم ياسمين باه يريقل روحو يتزوج كاش وحدة تم تديرلو لورق هذا اذا قبلت بيه أصلا وتم رح يبدا حياتو وانتي بالاك أو ما جيتيس في بالو كامل.

ربي يفرج عليك وشوفي حياتك وما بقاش نقاش في الموضوع. تلقاي انسان يصلح وطالبك للحلال صلي استخارة واتكلي على ربي واتزوجي انا صراحة واحد هك ما نخسرش عليه دقيقة تخمام.

بالتوفيق.

 

[بشرى ملاك]

سلام
شوفي اختي لي يبغي زواج من النهار الاول يجي يطبطب فالدار ولي يبقى يعطيك اعذار راه يتمسخر بيك سمحيلي بصح راني نحكي الواقع اي واحد يماطل فالخطبة كدااااااااااب وكبير تاني وكلي عليه ربي ولي يجي يخطبك من وهاك تكلي على الله ونسي هاد لبلاعطي والله يعوضك بما خير منه ان شاء الله وتاكدي غادية تنسيه مبعد الزواج ودزيدي تندمي على وقتك لي ضيعتيه معاه

 

[djalilo]

لا أدري هل يسمح لي أن ادلي برأيي هنا أم حشرت بنفسي حيث لا ينبغي
عموما أختنا
المشكلة تكمن في البداية الخاطئة أو غير المرتبة وفق خطواتها اللازمة
كان ينبغي الوضوح في كل شيء من البداية
وكان عليك أن تكوني أكثر احتياطا في ان تفتحي أبواب قلبك حتى تتأكدي
لكن الرجوع الى الوراء في المشكلة لا يحلها نريد اﻵن ان نتقدم لعلنا ندرك امورا قبل أن تفوت !
مهما كان هذا الطرف يستحقك كان عليه أن يجتهد في ان يعلمك بكل خطواته
وبما أنه أهملك .. فقلبك أغلى وأعلى من أن يمنح لمن يهمله في البداية
ارجو أن تكوني شجاعة وتسيطري على هذا القلب وتحولي نبضه الى من يستحقه ويجتهد من أجله
عليك بطي الصفحة
ثم استعيني بالله وبالدعاء وبالالحاح على الله ان يغير حال قلبك
فقلوب العباد بين اصبعين من أصابع الرحمان يقلبها كيف يشاء
ثم افتحي مشروعا جديدا ولا تستسلمي للاوهام فقطار العمر يغتنم الغفلة ويغادرنا
كوني اقوى كوني اكثر ادراكا
وتذكري دائما أن الدنيا لا سعادة مطلقة فيها بل هي فقط وسيلة للسعادة الابدية في جنة الفردوس
اجمعي بين قلبك وعقلك وعمرك وظروف مجتمعك ستجدين حلا مناسبا ينسيك ما لم يكتبه الله لك

اسأل الله أن يسعدك من حيث لا تشعرين
وفقك الله

 

[siaci]

ربي يبدلو برجل صلح ويهنيكم وانشاء الله الصبر مفتاح الفرج

 

[بقايا إنسان]

سلام الله عليكم وبعد:بفعله هذا قد حرق 8سنوات من عمرك,فهل تنتظرين أن يحرق لك العمر كله؟
وكأنك مصدقتي لقيتي ذكر وليس رجل فالذي خلقه حي لا يموت وقد خلق أفضل منه
شوفي مصلحتك اختنا الكريمة وراجعي حساباتك واقبلي بأي رجل يخاف الله فيك
سلام

 

[حكاية قمر]

السلام عليكم
8 سنين ضيعتيها من عمرك ع جاله بزااف اختي
تبانلي كحرق وخلاك هاذ لجاست تحرقو من قلبك انسايه وعيشي حياتك نورمال
واخطينا من هدرت ما نقدرش ننساه وغيرو ياك مانيش باغيا نهدر ع 8 سنين باسكو بزاف عليك
الخيرة فيما اختار الله ماغاديش نلومك ع لي فات لانو فات
مي نلومك ع ضروك اذا راكي من نيتك تبغيه نقولك هذا هبال
حبيبتي
عادي كل شي مكتوب وهاذ لعفسة لي دارها تبينلك بلي ماهوش مسؤول تهنيتي منه ايماجيني كان تزوجتيه وكاش نهار حطك في داركم مع وليداتك وحرق!!
واحد كيفه يديرها
29 سنة مازالك صغيرة و الزواج نصيب ما عندو علاقة بالسن و لا اي حاجة
خلاصة قولي أختي هو راح ونتي تهنيتي منو
انسايه وعيشي حياتك لي خلقه خلق أفضل منه​

 

[{مُدَلَّلَتُهُ}]

السلام عليكم

شا نقول لأختي .. 8 سنين راحت من عمرك في الباطل مالا ماكان لاه تزيدي تضيعي منه أكثر

29 سنة هاذاك هو الوقت الي تبني فيه دار و تجيبي ذراري تربيهم مادامك صغيرة

الي فات فات ما تضليش تتفكري فيه خممي بعقلك ضروك و خليك من قلبك . . ربي يسرلك أختي و يفتح عليك أبواب الخير

 

[Hakan]

نورمال الخطاب اللي يجيك المرة الجاية اقبلي بيه وعيشي في سعادة
ولا تصدقي كذبة الحب رانا في 2017 ها ختي وراكي كبرت ماشاء الله
خالتي راهي في عمرك عندها زوج بنات وطفل ديري حساباتك خيتي هذي دنيا
واللي حرق صعيب باش يرجع يعني اذا رجع بالخف يرجعلك وانت عمرك 35 سنة
ربي يوفقك راكي كبيرة ماشي في العمر وانما الوعي​

 

[ربى86]

اختي لي ضيعتتيه من عمرك بزاف ...شوفي حياتك كيما هو شاف الحرقة و مسمعش بيك ....ربي يرزقك الزوج الصالح ليسعدك

 

[فتاة حساسة]

والله مينداك نحير كيفاش تخممو .صار 8 سنين ونتي تصابري فيه وكل مرة يديرلك سبة ماخليتهش وكي راح معولا راح تظيدي تسنايه ؟/
اسنايه اختي اسنايه راح يجيك كي يولي عمرك 40 سنة .وتعيشي معاه مليح
.بركاي ما ضيعي عمر من حياتك .ونصيحة مني ماكان لاحب لا سيدي عمار .الحب او ورا الزواج .
بعدنا على ربي وديننا ومبعد ولينا نحيرو في حياتنا وعلاش راها تتقلب .ربي يجبلك زوج صالح ان شاء الله
سلام

 

[AKLOU]

انا اشاترك الراي

 

[aljentel]

هو تركك ولم يأبه لك ولا لثمان عجاف عشتيهم بأمل ...
فما الذي تنتظريه بعد ...
شوفي حياتك ولاتربطيها بحياة من خرج ولم يعد ..

 

[فيتامين سي]

لي فات نسيه ..محيه من عقلك و ربي يرزقك الزوج الصالح
درك واش نقولك لي يجي وريله باب الدار و يهدرو هدرة رجال ديراكت بلا خرطي تاع احبك .....لي يحبك يجيبك لداره
انسااااااااايه حنونة و خمي في المستقبل

 

[عاشقة الكرة]

السلام عليكم
اختاه ماذا بعد سبب مشاكلنا هو القلب ردنا اغبياء لدرجة كبيرة
شوفي حياتك اختي فمن تركك بدون سابق انذار وبدون حتى ان يخبرك فهذا مجرد عثرة ...اختاري سبيل الحلال وربي يرزقك و يوفقك

 

[Amira28]

السلام عليكم و رحمة الله و بركاته
اولا اشكركم جزيل الشكر على منحنا هكدا فرصة لطرح مشاكلنا
انا شابة من ولاية معسكر غرب الجزائر عمري 29 سنة حبست لقراية من لباك
انا من بيت الحمد لله مخصه والو
مشكلتي في 8 سنوات و انا نحب شخص و وعدني بالزواج و كل مرة يقول اني جاي اني جاي و كل مرة يلقى عدر و انا في هدا الوقت كانوا يجوني لخطابة و منقبلش غير علاجالو و حتى الام نتاعي لاحظت الامر و اخبرتها به
بعد سنة من كل هذا الشي جاني خبر انو حرق للخارج و ملقيتش كيف نتواصل معاه و درك اني فء حيرة شا ندير


نرجو منكم تفهم مشكلتي و اعطائي من النصائحكم لعلي استفاد ان شاء الله
للعلم ربي شاهد انو جامي قابلته و لا و هو اصلا صديق اخي موالف يجي عندنا


سلام

 

[أم أُنٌَيسة]

السلام عليكم و رحمة الله تعالى و بركاته
رايي من راي الاخوة
اللي يجيك ديري استخارة ادا فيه خير ربي يكمل ادا لا راح يبعد عليك و حتى هدا السيد المدكور ديري عليه استخارة ادا ماراهش خير ليك راح يبعدو ربي من دهنك
و الله ولي التوفيق
تحياتي احترامي و تقديري​

 

[البحر الهادي]

رب ييسر أمرك
إذا جاءك من ترضين دينه تزوجي به
رب يرزقك زوجا صالحا

 

[نضال ابن فوزي]

إلى كل فتاة تقرأ هذه المشاركة، إياك والعلاقات عاطفية قبل الزواج، فو الله قلبي يؤلمني لما أسمع عن فتاة هكذا تخدع ويتلاعب بها، واناا عندي أخت اصغر مني، دائما أنصحها واحذرها من العلاقات ومن الشباب والتحدث معهم، وأعطيها رسائل نافعة كي تقرأها.

يا فتاة أنا شاب وأفهم الشباب، والله وإن عسلوا الكلام ووعدوك بالزواج، فهم كذبة، شهوتهم تتأجج، فيبحثون عن الفتاة الساذجة لقضاء وطرهم، وإن كان قضاء الوطر بالحديث والمفاكهة والمغازلة.

وكما قال رسول: (ولا يحملنكم استبطاء الرزق على أن تطلبوه بمعصية الله، فإن ما عند الله لا ينال إلا بطاعته. ) صححه الألباني،

وإن أنت عصيت الله، وخنت أباك وأخاك واهلك في شرفهم وعرضهم، وأدخلت نفسك في وحل المعاصي فأبشري بعقوبة الله في الدنيا قبل الآخرة، كما حصل لأختنا -نسألل الله أن يفرج عنها- أرادت من العلاقة أن تضمن زوجا، فلا تزوجها ذلك الماكر الخبيث، ولا هي قبلت الرجال الشرفاء الذين دخلوا البيوت من أبوابها.

وأنصحكن أن تقرؤا رسالة صغيرة الحجم عظيمة النفع في هذا الباب، رسالة من أب إلى البنات المسلمات، خاطبهن في رسالته كأنه يخاطب وينصح بناته، رسالة "يا بنتي" للأديب علي الطنطاوي رحمه الله:
http://ia800209.us.archive.org/18/items/waq41727/41727.pdf

وإلى الاخت صاحبت السؤال، توبي إلى الله، فالمصيبة التي حصلت إنما هي بسبب المعصية، واعلمي أنك إن غيرت حالك من حالة يبغضها الله إلى حالة يحبها الله، غير الله حالك مما تكرهين إلى ما تحبين
واقرئي إن شئت قول الله : (إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ)
​