مساء الخير عليكم واش حوالكم مع القطب الشمالي والجنوبي
لي زارونا السنة ان شاء الله مازال ع الأقل فيكم عرق ينبض
عندي زمان وأنا من الخدمة للدار مالا ما يصراوش معايا مواقف
من يومين خرجت مع صاحبتي نبدلو جو وندورو كي العادة
المهم تغذينا كي العادة وقررنا نحرقو الكالوريز لي كسبناهم
حكمتا الطريق وبدينا نحكيو هذي فلانة هذا فلان
من حكاية لحكاية دخلنا في السياسة هذي سوريا هذي تونس
ولحقنا لمصر وبديت أنا نعبر عن شعوري ما تقولوش عنصرية
المهم أنا فرغت واش كاين في قلبي في الطريق وختمت كلامي
قلت "هزارش" هذي الكلمة ناس الشرق يفهموها
والجماعة لي ما فهمتهاش نقوللكم راهي تشبه لكمة جمع كافي Kavi
يا خوتي وأنا نطقتها ومدريت فيمن طحت حتى خفت
نلقى الجون لي كان ماشي قبلي مع صاحبو خزر فيا
قالي عليمن تحكي؛ قلتي علينا هزارش ! وأنا دخلت في دوامة
بقيت نشوف مع جنابي قلت منين طاح عليا لموسوس هذا
الكافي Kavi
وبقى في سين وجيم وولات صاحبتي ترد عليه حتى فهم
بلي ما نحكوش عليه !! بسيف تنحاتلو الفكرة هذي
حيرني الشعب لموسوس هذا وقريب كملت عليا بضربة
في سبة المصري
يعني الواحد للدرجة هذي ما عندوش ثقة في نفسو !
زيد ما راهش وحدو في الطريق يحكي مع صاحبو
كامل الناس راهي ماشية وتحكي ومش ضروري إذا
سمعت كلمة من حكايات الناس لي حدايا نقول أي عليا
بعد لي عندو ثقة في نفسو مش يسمع كلمة شاردة في الهواء
يقول راهي عليا ويولي يحاسب في الناس عليها !!
بعد زوج يحكو بيناتهم والثالث علاه يدخل روحو في حكاياتهم !!
ولا درك لازم نحكو ونبررو للشعب واش نحكو تاني !!
وهذي الحالة تصرا بزاف حتى بين لبنات تحكي مع وحدة
تنطقلك الثانية من حيث لا تحتسب تقولك أو سمعت واش قلتو عليا
درك واش ذنب الناس إذا كان عندك مرض السَّفه وكل كلمة تسمعها
تعتبرها ليك !!!
افطن افطن يا مواطن افطن
باقي نقول والله ماكانش كيما الإنسان يكون واثق في نفسو
وحتى لو لكلام عليه يطنش وبدل ما يقلق بلكلام لي تقال عليه
يخلي لي قالوه يقلقو على خاطر ما تجاوبش لكلامهم
بركاونا من التوسويس رهجتونا ياو
ملاحظة: الكاليتي هذي كاينة مام في المنتدى مرات تدير رد
يجيك واحد ما تعرفوش حتى وما فقتش بلي راه مسجل
يقولك تقصدني !!
أخلايا أنا مازال ما فقتش بلي سجلت
وديجا نقصدك !!! ربي يهديك
هيا بزافكم روحو درك طولتيو عندي
:p
