علاش غير الزواج برك ؟

[Hakan]

السلام عليكم :
واش راكم ان شااء الله بخير نتمنى كل مريض ربي يشافيه وكل واحد عندو امنية ربي يحققهالو اللهم آمين
موضوعي جد بسيط لانو فريمون صح يجبلي وحد الغضب لا اراكم الله
في الحياة هذي ربي بعثنا باش نعمرو الارض اكيد والتعمير يكون بالانجاب والانجاب يكون بالزواج
لكن في السنوات الاخيرة وفي الجزائر العزيزة رجع هذا الزواج هم وغم ونمط حياة تنوض الصباح تصيب يماك حطتلك
قهوة حليب ومعاها شويا زواج وليدي راك لحقت للعشرينيات ولازمك تخدم باش تتزوج تشوف في يماك نضرة نتاع غضب ولانو
يماك تهبط راسك وتشرب الحليب وما تاكلش شويا نتاع الزواج هذيك
هيا تقول قبل لا نروح نقرى ندخل للفايسبوك كاشما نشوف هيا تفتح الفايسبوك كاشما تصيب ميساج مليح وكاشما تقرى حاجة مفيدة
هيا حتى تشوف هذيك الصفحات :
زوجتي سر سعادتي ...زوجي اوسم رجل في العالم
زوجي ماخصو والو... زوجتي تعرف طيب المحاجب
وغيرها من صفحات الزواج
تخرج وحاكماتك الخلعة واش نهار اليوم هذا ومن بعد تقول كاشما نتفرج في اليويتوب تدخل لليوتيوب تصيب :
رقية شرعية من اجل تسهيل الزواج
زوج يكتشف خيانة زوجته شاهد الفيديو
الزوجة الصالحة كيفية اختيارها
حبيبتي تزوجت وخلاتني وحداني خخخ
تزيد تقول نخرج نقرى بالاك ننسى شويا تروح للجامعة تشوف في بنات متزيين كيما تزين الزوجة لزوجها وتتفكر الزواج
ياعالم... ياناس.... يااهلي... ياقوم... ياخاوتي... ياربي
علاش في المجتمع الجزائري والامة الاسلامية الزواج هو كل شيء يعني ماكانش كامل اللي يخمم يعيش وحدو
ولا تعيش وحدها مانيش حاب نتزوج كاشمن يسالني
يعني مكانش حاجة يروشارشي عليها البنادم عندنا غير الزواج
عندي في اللمة هذا العام الرابع وقيلا وكل يوم ندخل نفس مواضيع الزواج ساعات كيما مايلقاش العضو باش يموديفي كلمة زواج
ينحي هذوك النقاط ويكتب " الروحة الصالحة " انت تحسبها كاش سياحة ولا بلاصة صالحة مافيهاش العرى هيا وتصيبو يحكي على هذاك الكائن اللي فيه كل شيء مليح مي مكانش وما يبانش في الشارع وما يلبسش فيزو وسروال
نزيدكم شويا يعني مكانش قاع اللي حاب يدير حاجة في حياتو والزواج يخليه روطار شوي
ماعندكش كاش مشاريع حاب ديرهم قبل لا تموت سوى الزواج يعني القرآن كامل والاحاديث كامل نتاع سيد المرسلين عليه الصلاة
والسلام
قاع ما يكتبش عليهم الواحد موضوع ويخيرو غير هذوك الآيات نتاع الزواج
تريح مع بولحية يحكيلك على الزواج
تريح مع ملحد يحكيلك على الزواج
تريح مع شيعي يحكيلك على الزواج
تريح مع روحك تحكيلك على الزواج ههه
يعني مكانش واحد يمضي حياتو يزور غير في الرحم نتاعو ولا يفتح ملجأ ايتام ويتكفل بيهم
ولا يبني جامع ويصلي فيه ويخدم الاسلام
من غير ما يخدمو بالزوااج
اللي يغني يحكي على الزواج اللي يبكي يحكي على الزواج
كرهت كواحد من الشعب التعيس مسألة الزواج
علابالي فيه امور مليحة وحاجة لازم تكون لكن ما نرجعوهاش مبدأ حياة عليه نحياو وعليه نموت كأنوهو وكلمة التوحيد كيف كيف كأنو كلمة التوحيد
ماهيش لا اله الا الله مي لا اله الا الزواج
شويا خاوتي قيلونا من هذي الكلمة والله ساعات كي نشوف سوجي يحكي على الزواج ومع احتراماتي للناس اللي يكتبو هذي المواضيع مي يااخي ويااختي رانا تساتورينا من هاذ المشروع
خلاص احكولنا شويا على مواضيع اخرى ادخلو لا بغى للمنتدى السياسي واحكيو على الانتخابات المهم برك لا للزواج
حتى الواحد رجع يقول
الزواج لا دين له
عيشو حياتكم بنات ورجال والزواج لازم يكون تخمامو من حياتكم كامل عام وااحد
انت كفتاة كي يجي مكتوبك تزوجي وانت يا فتى كي توجد روحك تزوج اما انك منين تبلغ15 سنة وانت تخمم في الزواج هذا اهدار للطاقة الشمسية خخخخ والسلام عليكم ورحمة الله وبركاته ​

 

[ضآحكة مستبشرة]

السلام عليكم حكيم
ههههه شفت الموضوع جيت نجري علبالي راهو غير القصف هههه
نقرا الموضوع و مبعد نرد عليك ههههه

 

[لؤلؤة قسنطينة]

السلام عليكم
اعتذر على التأخير في الاعتماد
والله كن ماش لاباج بلوكات وعاودت دخلت ماكنت نفيق .. آسفة
نكمل برك الردود تاوعي ونجي نثرثر في هاد الموضوع لي مطبوخ على نار هادية هههه
لي عودة ان شاء الله​

 

[حكاية قمر]

السلام عليكم
كشفت لعناون قلت خويا حكيم غادي يبدا يمنشر وبااينة افار تاع غلاء المهور ولا تشبهلها مي نت راك في واد اخر
عندك بروبلام مع شوية تاع الزواج هاذي هي سنة الحياة الزواج ماهوش كلشي مي هو من اسباب استمرار الحياة وهو نصف الدين وعندو اهداف اكيد والمؤكد تعرفها
مي شعبنا فاهم زواج بمنظور اخر لمرا تشوف فيها اووونفاا تزوجت مانيش بايرة وراجل والله ماعلابلي كيف يشوفه ^^
أم العريس تشوف فيه جبت لولدي لمرا لي تخليه يستعقل ويدير الدار وام العروس تقول تهنيت من هم بنتي تزوجت كما كاع بنات الناس
وموالين لي صال وباقي المحلات يشوفوه لربح السريع وباقي النسا يشوفوه لجماعة ولقصرة واهم شيء يشوفو فلانة وفلتانة شا عندها وشامعندهاش وكي ولات والرجال ماعلاباليش كي يشوفوه ههه
راك تشوف شوية تاع الزواج هاذي شا تعني بعيدا عن معناها الحقيقي
الله يرزقك الزوجة الصالحة ^^

 

[ضآحكة مستبشرة]

السلام عليكم مرة أخرى خويا لعزيز
اولا بارك الله فيك خيي و جزاك الله خيرا
اقسم بالله بالثلاث غير واش قلت غير صح
و الزواج ولا هو الماكلة هو الشراب هو الحياة هو الموت تنوض بيه ترقد عليه
انا وحدة من الناس عايشة غير في وسط الغاشي لي يحكو عالزواج يخليوك تتوسوس و تكره جد نهار لي عرفت فيه هذا الموضوع
ولاو النسا كي يتلايمو في الدار الهدرة عالزواج نريح مع شوية بنات تصيبهم يحكيو على المارياج و لي تخليك تفقد الامل من انك تحقق احلامك هي الزواج
يرجعوك تخمم غير باش تزوج موليتش نلقا واحد ينصحك على قرايتك و تحقيق أحلامك تصيب غير لي يقولك اتزوجي تنستري علاششششش راني مفضوحة في دار ابي
غير كيما قاتلي صاحبتي جبتلك عريس الله يبارك قتلها روحي خير ما نبدا نخلط في الهدرة
خلاص انصحوني حفزووني على قرايتي بزاف كرهولنا الزواج قبل ما نعيشوه

ولي تعييك كثر أنهم كي يحكو عالزواج يحكو غير على السلبيات ميحكيوش كامل عالايجابيات عالاقل اذا خممنا فيه نخمو و حنا مرتاحين


الزواج هو موضوع الساعة و الزمن
الزواج مسؤولية زوج او زوجة ذراري طياب عجوز و عائلة مهام و دخلات و خرجات و يلزم قفازة ماشي غير ليلة و طبق
خلووووونا يرحم والديكم


انا حاليا عن نفسي رغم كل التوسويس لي رآه من حولي عالزواج خاصة كي نشوف صحباتي نخطبو راني نخمم غير في قرايتي و لازم نحقق حلمي و احلامي

نخليو الزواج لوقتو و كلشي بالمكتوب رانا نحكو برك خاطرش بتسهيل من الله متعرفش كامل روحك كيفاش تقبل و تزوج
و الزواج يبقى هو نصف الدين و سنة و فرض على كل انسان توفرت فيه الشروط
و ربي يهني كل واحد

و سبيسيال ديديكاس لوحد الانسان هو يعرف روحو اذا جاز منا خخخخخخخ

و صحيت خويا موضوع بزاف مهم لازم نوقفوا عليه​

 

[Hakan]

السلام عليكم
كشفت لعناون قلت خويا حكيم غادي يبدا يمنشر وبااينة افار تاع غلاء المهور ولا تشبهلها مي نت راك في واد اخر
عندك بروبلام مع شوية تاع الزواج هاذي هي سنة الحياة الزواج ماهوش كلشي مي هو من اسباب استمرار الحياة وهو نصف الدين وعندو اهداف اكيد والمؤكد تعرفها
مي شعبنا فاهم زواج بمنظور اخر لمرا تشوف فيها اووونفاا تزوجت مانيش بايرة وراجل والله ماعلابلي كيف يشوفه ^^
أم العريس تشوف فيه جبت لولدي لمرا لي تخليه يستعقل ويدير الدار وام العروس تقول تهنيت من هم بنتي تزوجت كما كاع بنات الناس
وموالين لي صال وباقي المحلات يشوفوه لربح السريع وباقي النسا يشوفوه لجماعة ولقصرة واهم شيء يشوفو فلانة وفلتانة شا عندها وشامعندهاش وكي ولات والرجال ماعلاباليش كي يشوفوه ههه
راك تشوف شوية تاع الزواج هاذي شا تعني بعيدا عن معناها الحقيقي
الله يرزقك الزوجة الصالحة ^^

هلا بيك خيتو قمروشة ان شااء الله بخير
والله لا قلبي تعمر قلت نحكي لناس اللمة
يعني كل واحد يحكي على الزواج حتى في كل بلاصة زواج
السبيطار يحكيو على الزواج في النقل زواج في الريستو زواج
في كل بلاصة زواج حتى انو رجع حلم الطفولة طفيل صغير في عمرو عامين تقلو يماه وقتاه نزوج بني هههه يعقدوه من صغرو
يعني حكيت على الزواج لانو وبكل صراحة سبب في فشل الكثير من الناس
يعني كاين اللي يحبس قرايتو ويشتغل بالعمل البسيط غي على جال زواج
تروح تحكي لواحد تقلو مثلا خيرت تخصص طبيب
يقلك مي انت مريض تخير طبيب سبع سنين وقتاه تحكم بوست ووقتاه تتزوج
يعني والله ناس راهي تضحي باحلامها يمتعتها في سبب هذا الزواج
كاين اللي مش حتى يخدملو ياي غي يخمم فيه برك تروحلو كل الاشياء الاخرى
علابالنا واقع صعيب مي شويا برك ما ديرولناش لابريسيون يعني انا واحد من الناس قطعتها هذي فكرة الزواج من راسي
اللي يحكيلي عليه نسبو نورمال ماعنديش مشكل ياخويا اذا انت تشوف في حياتك كامل زواج انا خويا راني نشوف في حياتي
حاجة مهمة لازم نعيش كل وقت ووقتو ماشي في 18 سنة تحكلني مسولية الزواج وتحب تحطولي في راسي
كي يلحق الوقت وتشوف ظروفي من بعد احكي على الزواج
ربي يهنيك ختي ويكملك ان شااء الله بالزوج الصالح خخخخ​

 

[Hakan]

السلام عليكم مرة أخرى خويا لعزيز
اولا بارك الله فيك خيي و جزاك الله خيرا
اقسم بالله بالثلاث غير واش قلت غير صح
و الزواج ولا هو الماكلة هو الشراب هو الحياة هو الموت تنوض بيه ترقد عليه
انا وحدة من الناس عايشة غير في وسط الغاشي لي يحكو عالزواج يخليوك تتوسوس و تكره جد نهار لي عرفت فيه هذا الموضوع
ولاو النسا كي يتلايمو في الدار الهدرة عالزواج نريح مع شوية بنات تصيبهم يحكيو على المارياج و لي تخليك تفقد الامل من انك تحقق احلامك هي الزواج
يرجعوك تخمم غير باش تزوج موليتش نلقا واحد ينصحك على قرايتك و تحقيق أحلامك تصيب غير لي يقولك اتزوجي تنستري علاششششش راني مفضوحة في دار ابي
غير كيما قاتلي صاحبتي جبتلك عريس الله يبارك قتلها روحي خير ما نبدا نخلط في الهدرة
خلاص انصحوني حفزووني على قرايتي بزاف كرهولنا الزواج قبل ما نعيشوه

ولي تعييك كثر أنهم كي يحكو عالزواج يحكو غير على السلبيات ميحكيوش كامل عالايجابيات عالاقل اذا خممنا فيه نخمو و حنا مرتاحين


الزواج هو موضوع الساعة و الزمن
الزواج مسؤولية زوج او زوجة ذراري طياب عجوز و عائلة مهام و دخلات و خرجات و يلزم قفازة ماشي غير ليلة و طبق
خلووووونا يرحم والديكم


انا حاليا عن نفسي رغم كل التوسويس لي رآه من حولي عالزواج خاصة كي نشوف صحباتي نخطبو راني نخمم غير في قرايتي و لازم نحقق حلمي و احلامي

نخليو الزواج لوقتو و كلشي بالمكتوب رانا نحكو برك خاطرش بتسهيل من الله متعرفش كامل روحك كيفاش تقبل و تزوج
و الزواج يبقى هو نصف الدين و سنة و فرض على كل انسان توفرت فيه الشروط
و ربي يهني كل واحد

و سبيسيال ديديكاس لوحد الانسان هو يعرف روحو اذا جاز منا خخخخخخخ

و صحيت خويا موضوع بزاف مهم لازم نوقفوا عليه​

هيه ياي لوكان غي يخمو في الزواج في عامو ياي من صغرك غي تسميك يماك باسمك في الدفتر الصحي نتاع لوبيتال
حتى تبدا تخمملك على الزواج بنتي ما نعرف لا تكبر وتتزوج بطبيب ولا بيلوط
بنتي من صغرها فايقة وعينيها يقولو بلي رايحة تتزوج
يعني مكانش جماعة تريح فيها تحكيلك شويا على الآخرة ولا تحكيلك شويا على واش راهو صاري في العالم
غير اللي يحكيلي على الزوجة الصالحة والطفلة الشابة
وهذاك راهو يحكي في التيليفون باسكو خطب وقيو قيو قيو
وكرهنا من جد السوجي احكيولنا شويا على موضوع آخر على هدف مليح في الحياة
يعني مقلنش سيبريميو هذا الموضوع مي ما تخليوهش هو الصلاة نتاعنا تذكروه خمس مرات في اليوم
هااا خلاص كرهنا شكرا ختي وبارك الله فيك وربي ينجحك ويرزقك ما تتمناي ​

 

[ريحـان]

خويا حكيم وقيلا رح يصب الثلج في اللمة
ههه لخاطر اني هنا هههه
بصح ياخويا هذ سوجي فغيمو حكمني في لعظام هه
رانا نرقدو بزواج ونوضو بزواج
حتى وقيلا رح نبدو نتعشو ونفطرو الزواج
صح انو هو نصف الدين و مجال للفرحة و ..
بصح هذ الشعب خلاه يكون كيما شرب الماء
تقعد مع العايلة تسمع لي تقلك
"ايه قولونا ياالبنات شكون ترفد المشعل مور فلانة " ايه هي تزوجت واحنا لازم نرفدو المشعل
وتكمل كي تقول اليمات ا طفلة بنت خالتك في عمرك راهو عندها 3 صغار يعني لازم دير ستوب لخاطر كلما تزيد يما رح تزيد ههه
ايه وكي تقول نحب نكمل قرايتي يقلولك كي تكملي قرايتك وقتها رح يبدو يتزوجو لي اصغر منك وعمرك مش رح يكون على اللائحة المطلوبة هه
وش نديرو خويا حكيم هذي سنة الحياة
وهذي كونترا على هذاك الشعب
شكون احنا احنا لي مرضتونا بزواج ههه


اسمحولي اذا كاش ماهدرنا بالعربية
احسنو عون اول رد في واش راك تهدر هه
وقيلا هذ اليامات رح نتعلم التقرعيج مليح
سلام​

 

[Hakan]

خويا حكيم وقيلا رح يصب الثلج في اللمة
ههه لخاطر اني هنا هههه
بصح ياخويا هذ سوجي فغيمو حكمني في لعظام هه
رانا نرقدو بزواج ونوضو بزواج
حتى وقيلا رح نبدو نتعشو ونفطرو الزواج
صح انو هو نصف الدين و مجال للفرحة و ..
بصح هذ الشعب خلاه يكون كيما شرب الماء
تقعد مع العايلة تسمع لي تقلك
"ايه قولونا ياالبنات شكون ترفد المشعل مور فلانة " ايه هي تزوجت واحنا لازم نرفدو المشعل
وتكمل كي تقول اليمات ا طفلة بنت خالتك في عمرك راهو عندها 3 صغار يعني لازم دير ستوب لخاطر كلما تزيد يما رح تزيد ههه
ايه وكي تقول نحب نكمل قرايتي يقلولك كي تكملي قرايتك وقتها رح يبدو يتزوجو لي اصغر منك وعمرك مش رح يكون على اللائحة المطلوبة هه
وش نديرو خويا حكيم هذي سنة الحياة
وهذي كونترا على هذاك الشعب
شكون احنا احنا لي مرضتونا بزواج ههه


اسمحولي اذا كاش ماهدرنا بالعربية
احسنو عون اول رد في واش راك تهدر هه
وقيلا هذ اليامات رح نتعلم التقرعيج مليح
سلام​

ههه المشعل كي شغل الشعلة نتاع الاولمبياد
والزواج كي شغل مخلوفي وحاب الميداي دور ههه
واش ديري ختي حنا نحكيو برك من اجل انو الناس تغير شويا في عقلياتها ومفاهميمها للحياة الزواج نقطة في الحياة ماهوش كراس الحياة
عندو وقت محدد تخمملو فيه اما باقي حياتك فهي مسخرة لله عز وجل في كثير من المجالات
يعني اهدار الطقات في البحث عن شريك الحياة وزيد اهدار الطاقة في كسب رضاه وزيد اهدار الطاقة في تكاليف الزواج وغيرها تخلي الانسان ممكن يضيع اغلى
سن في حياتو وهو سن العشرينيات
غير بالتخمام كاين اللي حياتو كامل غي يخمم على الزواج وضرك راهو باير ههه سلام ​

 

[الصحافية الساخرة]

السلام عليكم
مسا الزواج ياو اللي يقلق انهم حفظوا كلمة "الزواج نصف الدين" منعرف شحال تتكرر فالنهار كتر على الاذان ههههه ياو كاين خلاف الصيام ووصانا بيه الرسول عليه الصلاة والسلام
مالا واش اللي يحفظ كلمة يتفلسف , تركب فالبيس الهدرة على الزواج وفالسبيطار ويهدروا على الزوااااج , الغنا ولا على الزواج"زوجوني اواي واي بغيت نديها اماما " ابابا راسي حتى الزواج
وغزى الكُتاب تهز كتاب تلقى الهدرة على الزواج بزاااف واش توحموا على الزواج يبانلي ولالهم مرض والمشكل كي يتزوجوا يولوا يغنوا ابابا شيبنا ههههه
معندهمش واش يخمموا فيه من غير الزواج مثلا وزيد علاه يخلوا الصيف باش يتزوجوا فيه اوووو تسما وقت السخانة والبحر تقتلونا بالدربوكة والفريك فالشتا خير الدعوة اموا تحيا
من السبات هههه
موضوعك خلاني نهدر ونشطني بلا فيثامين ههههه
مشكور

 

[Salah eddin]

السلام عليكم
و الله يا خويا امين ق الزواج هذا راهم ردوه زقوق
الواحد من صغرو و يفكر
يا بن عمي راني لسع عندي 20 و راها خدمتلي في قضية الزواج ذا
خاصة مع الدار ...ضروك و الله هذاك النهار برك نسمع بعض الافراد في دارنا يهدرو قالوا نخطبو لفلان لي هو انا
و كذا و كذا
ياااااو مزال ...يااااو
يابن عمي و الله تحير في بلاد الزواج فيها قضية راي عام
بصح الله غالب
اذا كان الزواج هذا الناس صعبوه ...بالسيف يولي زقوق
كن الناس تسهل الزواج ...و الله ما نزيدو نسمعو بمواضيع تاع زوجتي العزيزة و كذا
المهم
الله يجيب الخير برك
بارك الله فيك خويا حكيم ​

 

[همس الوُرود]

السلام عليكم ورحمة الله وبركاته
ياااه نظن بلي هذا الموضوع يمعني عليا
وأنا أول مرة حكيت على العروس علاش يعني

ها صح تعيا ياو مين تروح يحكوا غير على هذا الموضوع .. ومين تروح الموضوع فلانة تزوجت فلانة خطبت فلانة تطلقت فلانة بايرة هبلونا .. حتى وقت ليكونترول يولو يقولو نروحو نتزوجو

صح الزواج سنة الحياة وفيه خير كبير و فضل عظيم ولكن الناس كثرت كثرت أحكو على الجعلولة و شوية ماكلة أحكو على الرقاد أحكو عاى الستر أحكو على النكت الدراسة مشاريع .. الدين أحكو ومبعد مرة عاى مرة أحكو على الزواج..
تالمو ولاو يتمسخرو والطفلة الي تتلاقايها تقولك مخطوبة عدنا مانمنوش
مؤخرا برك وحدة تقرا معايا تخطبت الناس كامل تباركلها وأنا ماهدىتش كامل فالموضوع خليتهم يهدروا ورحت
حسبتهم يتمسخروا

زدنا قعدنا نقراو فلونفي قعدت ورايا وهاااااا تحكي على خطيبها وكيفاش وبلي يعيطولو بإسم فيه السين و هي جاها إيم تع دراري حولت السين إلى صاد بش يبان كبير
وتحكي وتحكي وأنا في عوض نتبع مع الأستاذة قاعدة نخمم زعما هادي صح خطبوها أوااه أكيد تتمسخر

بالسيف دورت ليها قلتلها نتي صح تخطبتي

يا بن عمي كوارث كوارث .. حتى اليوم كنا نتغداو جات جاية قالو هاااي جات المخطوبة هوما عيطولها وهي مش مقيمتهم كامل أيا قلتلهم خلونا منها حتى ويلا جات تهبلنا بخطيبها:p

بلعقل برك والله كرهنا صح موضوع واحد في العالم يحكوا عليه

ها حابة تتزوجي تزوجي أحكي شوي على الموضوع وخلاص علاش تحصلي فيه

شكرا على ااموضوووع​

 

[الصحافية الساخرة]

ها حابة تتزوجي تزوجي أحكي شوي على الموضوع وخلاص علاش تحصلي فيه

هههههههههههههههههه قتلتيني
والله لصقة تخطبوا ويخبطوك

 

[ثَسْكُورْثْ نَثْدُوكْلِي]

سلام عليكم خوينا حكيم كيراكم ..؟ والله لطليت على قلبي من قبيلا برك قلت وشبيهم الناس يحكيو غير على الزواج الزواج ​

ههه أخاااه أخاه حتى هنا في اللمة غير مواضيع الزواج ​

هاو قصف على البايرات العنوسة وووو هاو على رايكم في الزواج عبر الانترنت هاو وش رايكم اذا تخلي زوجك يدخل للفيس ​

و....و ​

خخخ لدرجة انو كي قدمت استقالتي هنا في اللمة قالولي وش صارة وقيلا تخطبتي ​

شنو هاد شو دخل الخطوبة في اللمة ​

و تدخل للفيس او تتلاقى بأصدقاءك ​

وش كش جديد ..؟ كش خطابة يعني لهذه الدرجة الجديد فقط في الخطابة والزواج والاشياء الاخرى مايتسماوش بالجديد ​

هاو عيطتلي صاحبتي الو الو صافا وي صافا الحمد لله وش صارة كش جديد ..؟​

وي حنونة كاين قصيت شعري ​

اوووه ماتقوليشتزوجتي مدوك دراكم خلاص ,,,شكون هذا وين ,,,؟ومنين ووش يخدم تعرفيه من قبل ,,يسكن في حومتكم ,,عربي ,,قبايلي ,,بولحية و ,, (أسكتي يعطيك ضرسة )​

اصبري يامصيبة قصيت شعري بويسك عندي عام وهو مشدود كي الطوماطيشة وقريب خرج منو الدود قلت نقصو قبل مايتدود صافا هكا ​

​

اوووه عمبالي مدووك ايا صافا نتونسو ​

​

​

تبااا والله بزااااف تعويقة ومرgوووها كامل


/////////////////////////////////

يووووه وأخيراا راح يطلع الرد هذا خخخ ملي كتبتو من قبييييييلا مابغاش يطلع حدث عطل في البيسي ومزية ماراحش وش كتبت
خخ كنت نعصر في روحي باه نخرج لكلام بالدارجة كيما قالها هذاك تع "ميــgريا في دوارنا " "أأأأه خليتينييي نعصر في روحيااااه وانت تعرفي لعربياااا"
....
أيا أشكرني على الرد وعلى المرور أحكيماااا

​

 

[الصحافية الساخرة]

سلام عليكم خوينا حكيم كيراكم ..؟ والله لطليت على قلبي من قبيلا برك قلت وشبيهم الناس يحكيو غير على الزواج الزواج ​

ههه أخاااه أخاه حتى هنا في اللمة غير مواضيع الزواج ​

هاو قصف على البايرات العنوسة وووو هاو على رايكم في الزواج عبر الانترنت هاو وش رايكم اذا تخلي زوجك يدخل للفيس ​

و....و ​

خخخ لدرجة انو كي قدمت استقالتي هنا في اللمة قالولي وش صارة وقيلا تخطبتي ​

شنو هاد شو دخل الخطوبة في اللمة ​

و تدخل للفيس او تتلاقى بأصدقاءك ​

وش كش جديد ..؟ كش خطابة يعني لهذه الدرجة الجديد فقط في الخطابة والزواج والاشياء الاخرى مايتسماوش بالجديد ​

هاو عيطتلي صاحبتي الو الو صافا وي صافا الحمد لله وش صارة كش جديد ..؟​

وي حنونة كاين قصيت شعري ​

اوووه ماتقوليشتزوجتي مدوك دراكم خلاص ,,,شكون هذا وين ,,,؟ومنين ووش يخدم تعرفيه من قبل ,,يسكن في حومتكم ,,عربي ,,قبايلي ,,بولحية و ,, (أسكتي يعطيك ضرسة )​

اصبري يامصيبة قصيت شعري بويسك عندي عام وهو مشدود كي الطوماطيشة وقريب خرج منو الدود قلت نقصو قبل مايتدود صافا هكا ​

​

اوووه عمبالي مدووك ايا صافا نتونسو ​

​

​

تبااا والله بزااااف تعويقة ومرgوووها كامل


/////////////////////////////////

يووووه وأخيراا راح يطلع الرد هذا خخخ ملي كتبتو من قبييييييلا مابغاش يطلع حدث عطل في البيسي ومزية ماراحش وش كتبت
خخ كنت نعصر في روحي باه نخرج لكلام بالدارجة كيما قالها هذاك تع "ميــgريا في دوارنا " "أأأأه خليتينييي نعصر في روحيااااه وانت تعرفي لعربياااا"
....
أيا أشكرني على الرد وعلى المرور أحكيماااا

​

ههههههههههههههههههههههههههههههههه يااا مجنوونة

 

[Skor m@k]

السلام عليكم
خلاص يا خويا حكيم نديرو حملة # لا للزواج ولا نطق إسمه
واش يا خويا راهم يمعنيولك واقيل هههه
حنا مشكلتنا مكاش عليمن نهدرو
نروحو للسياسة ونمشرو فيها هاك تعرفنا حبيتهم يرفدونا بقبزة زر هههه
ولا نهدرو على البالون لي يطلعلك لاطونسيو والسكر وكل المشاكل
ولا نهدرو على الخضر والفواكه فالسوق هههه الله غالب يجو يشويوك لوكان تهدر عليهم
ديجا الواحد كي تقولو يماه أشي كاش حاجة يتخبا سامة باش يظهر مرة اخرى هههه
نهدرو على الخدمة الواحد مديقوتي كامل منها ويزيد يجي يهدر عليها ماجياش
الحل الوحيد لي نقدرولو نهدرو على الزواج ( الهدرة برك عليه هههه)
نجو نمنشرو في الناس لي متزوجين ولا لي مخطوبين ولا لعراس
معليش خلاص ضرك نداء الى كل الوحدات ههه
لي يكتب على #الزواج لايعتمد موضوعو وعندو خصم النقاط هههه​

 

[sosobibicha]

السلام عليكم
فكرتني في وحد الفيديو نتاع باك يقول ان هذا البكالوريا اصبح ياكل معك ، يشرب معك اصبح شغلك الشاغل دوك لازم يقولو ان هذا الزواج اصبح ياكل معك يشرب معك شغلك الشاغل ههه صح هو سنة الحياة مي كل حاجة في وقتها مليحة مش النهار كامل و لا العام كامل و حنا نحكو عليه كيما قلت مكانش لي عندو هدف في حياتو ناس ختمت قرآن طلعت للقمر و هوما مازالو يدورو في نفس الموضوع مي نتا مازال مشفت جماعة النسا في الاعراس خاصة جماعة ختشيبي ياو يمرضو تمنشير فلانةتزوجت و فلان تزوج تبالي فارغين شغل
المهم ربي يهدينا و يهديهم ان شاء الله
يعطيك الصحة على الموضوع
في امان الله ​

 

[لاريمان]

كيما قال الاخ سكور اعملوا شعار لا للزواج
انا تبانلي هي قضية عقليات وطبيعة كل اسرة حابة تفرح بوليدها
بصح الوقت تبدل واصبح الشاب هو الي يقرر ماشي الاسرة الي تخطب وتبدلت بزاف عقلية انو يفرضو رايهم
انا كتبت على الزواج لكن من منظور اخر وليس حملة
سلام

 

[لؤلؤة قسنطينة]

السلاااام عليكم
بعدو بعدو راني جيت راهو كاين عبد يقيسلي في موضوعي المفضل هههه
المهم مرحبا بيا عندكم، اصلا كاين واحد الاكتشاف هكا كي جيت نرد على الرد تاعك في موضوعي بلوكات لاباج وكي عاودت دخلت للقسم
اكتشفت موضوعك زعما ماش موضوعك بعت اشارة للرد تاعك في موضوعي باه نكتاشفو المهم لا داعي للتصفيق هههه
بصراحة موضوع الزواج لدرجة ولا على كل لسان جيت نرد على ختي "حكاية القمر" ونقولها قلبي يخبط ساع كتبت قلبي يخطب حتى قلبي عداوه هههه
المهم ندخلو في الموضوع، في وقتنا الحالي في اليوم تمر عليك كلمة زواج 4259872 مرة في اليوم ماكانش غير هاد الموضوع ولدرجة ولا حديث الساعة ولينا نحكيو عليه
هنا في اللمة، المهم كيما قلتها تنوض الصباح فرحان عندك أمل في هاد الحياة السعيدة يطبطب الباب تجي وحدة من العائلة علاواه تحكي؟ على الزواج
ورحت للعرس تاع فلانة وتزوجت ودارت وطاطاطا وبطاطا وديت بنتي تما شطحت بقات تشوف معاها واحد العجوزة واقيلا مكتوبها راهو جاي (هيه راهو في الطريق يدير في ليسونس)
المهم تشعل التلفاز تتفرج تلقى غير المسلسلات وكامل زواج زواج زواج الافلام الهندية والتركية الراعي الرسمي لأفكار الزواج، تكره تبدل تلقى قناة الطبخ تقول نشوف الماكلة تلقى لي تقدم تقول
"هادا طبق خصيصا للمتزوجات الجدد"، تبا تهرب تروح تشعل النت تخربش شوي تدخل للفايس بوك مع تدخل تقول بسم الله تحكمني وحدة تقرا معايا "واش راكي لاباس"
كاش جديد؟ يا بنت الناس البارح فليل وانا معاك ماكاين والو افيشاولنا زوج موديلات برك تقولي كاش زواج كاش خطبة؟ نعم بين البارح واليوم تزوجت وجبت 4 ولاد
والكبير فيهم رايحة نزوجو اليوم راكي معروضة، درك يعني هادا سؤال يا عباد ربي؟؟ في 8 ولا 9 ولا 10 ساعات نتزوج؟ ولا نتخطب؟، تكون في وسط امتحان تخرج مدمر نفسيا الصفر
يدير باي باي من بعيد تلقى البنات يدعيو جماعي تقول استنا ندعي معاهم كاشما نقطة ولا زوج ملاح تلقاهم يدعيو "ربي يزوجنا كامل ان شاء الله ونتهناو من الجامعة" اضربوني
بحجرة للراس الله يستركم، حتى المجموعات على الفايس بوك لي زعما سبيسيال تاع المطالعة جهلوني كل مرة تجي معدي تلقى وحدة "تزوجيه يقرأ ويشتري لكِ كتبا ويخاف على عينيكِ
من البي دي آف" ولا راجل كاتب" تزوجها تقرأ وستكون اجمل نساء الكون والخرطي هاداك" انا نقول نسكت ومن بعد واحد الدودة في قلبي تاكلني نولي نقولهم المجموعة مجموعة
مطالعة وتبادل الكتب ماش تاع الزواج وتانيا تزوجيه مسؤول ومتربي ووووو ماش يقرأ وهكاك النافع ربي نفس المنشور يتعاود 1200 مرة في اليوم تبا ولا لي يحب يجمع جامات بزاف
يحطلهم دعاء تاع الزواج ولا المنشورات اعرفي زوجك من شهر ميلادك اعرفي شخصية زوجك من شهر ميلادك اعرفي واش تقول حماتك عليك من شهر ميلادك تباااااا
لدرجة ولا الزواج حاجة كبيرة تولي لي تتخطب كي تجي تتكلم معاك تحكي هكا

تحكي بيديها قريب تدخلك الخاتم في عينك لدرجة الزواج ولا حاجة كبيرة
المهم في اللخر الزواج ماش حاجة ماش مليحة اكيد هو نصف الدين وماكانش مرأة ماتحلمش بدار وزوج وولاد ونفس الشي بالنسبة للرجل مادابيه يروح من العمل يلقى زوجة وولاد يستناو فيه
بصح ماش يبقى هدف وحيد في الحياة، يعني نقرا ونخدم ونطيع والديا ونطيع ربي سبحانو واذا جاني الزواج كسبت حاجة اضافية مليحة اذا ماجاش على الاقل مانكونش خسرت
كلشي وانا نحوس عليها، المهم حنا نتمناو كل طفلة تتستر في دار راجلها وكل شاب يتزوج ويدير عايلة، في االخير تفكرت حاجة قبل مدة قاعدة نحكي مع 4 بنات يقراو معايا
وهوما كل يوم زواج زواج غير انا نتكلم على القراية مالا كنت قلقانة النهار هاداك ومعرف كيفاه نطقت وقلت "ناس راحت تخدم وناس تزوجت وحنا مازلنا في الجامعة حاصلين"
تشوكاو في ربعة وحدة طاحلها الصاك من الشوك ههههه قاتلي مريم راكي مليحة؟ أول مرة نسمعك تحكي على الزواج يسما مادام نتي نطقتي معاناه الحالة صح ماتعجبش ههههه
ربي يهدينا برك، وشكرا على الموضوع واكتر مقطع قتلني ضحك حتى ولات ختي تشوف فيا هو هادا هههههه
​

تزيد تقول نخرج نقرى بالاك ننسى شويا تروح للجامعة تشوف في بنات متزيين كيما تزين الزوجة لزوجها وتتفكر الزواج
ياعالم... ياناس.... يااهلي... ياقوم... ياخاوتي... ياربي

درتلك رد طويل وعريض ماتجي تكملو يوليو ولادك يقراو فيه معاك هههه (المهم دخلت الزواج من كلمة الاطفال )
تحيــــــــاتي​

 

[لؤلؤة قسنطينة]

تفكرت حاجة تضحك هههه
كانت عندي صديقتي قرات معايا من الليسي
كانت كي تعطس ونقولها يرحمك الله تقولي يهديك ويصلح بالك ويرزقك الزوج الصالح
نشوف معاها نقولها معليش تعطسي مرة اخرى ههههه
المهم صديقتي عطست حتى شبعت ودعاتلي ومابانش خبر على الزوج الصالح هادا
غير نضحك
هيا بزاف عليكم ههه
تحياتي
​