المُتَزَوِجَــــــة تُفيْد وَ المخْطُوبَـة تَسْتفيْـد { الضيفَـة 1 أم منـــــير }

[ضآحكة مستبشرة]

السلام عليكم و رحمة الله تعالى و بركاته



أهلا وسهلا بكن عضوات اللمة الجزائرية نرحب بكن من جديد في ركن تجهيز العروس ولوازمها


نعود إليكن من جديد موضوع مع فكرة جديدة
قصد النهوض بالقسم و اخراجه من الركود الى النشاط
و كذا قصد استفادة المخطوبة خاصة و العازبة عامة من المتزوجآت

نلتَقــــــي معكم هذه الامسية و لمدة أسبوع كــــــامل مع ضيفتي و ضيفتـــكم الخالة @أم منيــــــر
و هي ضيفة عزيزة علينا جميعا و هي بمثابة الام لنا و هي عضوة نشيطة و مميزة لها مكانتها و قدرها في المنتدى
تفضلوا اليوم و لمدة اسبوع كامل بالاسئلة و الاستفسارات و ستجيب عليكم جميعا ان شاء الله
كما ستفيدنا بخبرتها الطويلة و تشاركنا تجاربها و تحدياتها البطولية لاستمرار الزوآج

اتمنى لكم قضاء وقت ممتع مع هذه الضيفة العزيزة و المميزة​

فكرة الموضوع :
​

في كل أسبوع نستضيف احدى العضوات المتزوجات و نضعها تحت المجهر
و على المخطوبات و حتى العازبات و المتزوجات تقديم الاسئلة و كل استفساراتهن حول الزواج و فترة الخطوبة و كل ما يخص العروس
و على الضيفة الاجابة على الاسئلة و تقديم نصائح و تدابير للمخطوبات
و مشاركتهن تجاربها و تقديم كذلك برنامج جيد لسير الحياة الزوجية بدون مشاكل
و كيفية التخلص من المشاكل في حالة وجودها​

مع تمنياتي أن تلقى هذه الفكرة تفاعل و الهدف هو أن نستفيد لكي نفيـد

​

 

[دعاء الجنات]

مرحبا وأهلا سهلا ب@أم منير ،،،أنا هي ملاك التراب باه تعرفيني المهم أيا وجدي روحك للأسئلة.

 

[دعاء الجنات]

(1)أنت كمتزوجة حابة نعرف واش هي الأمور لي لازمت تتجنبها الزوجة مع زوجها /سواءا أقوال أو أفعال وهاذ الأمور لي تهدم العلاقة الزوجية باه نتجنبوه

 

[Oum Loukmane]

السلام عليكم
فكره مليحة بنتي
هكذا يستفادوا بناتنا من تجربة الأخوات المتزوجات
سؤال لأختي أم منير
كيف تعالج أم منير اَي مشكل يواجهها مع زوجها أوأهل هل تواجهين أم تتغاضين عنه ؟

 

[ضآحكة مستبشرة]

مساء الخير يا جماعة
اتمنى ان تستفدن من خبرة الخالة ام منير

خالتي @أم منيــــــر اتمنى ان تحضري الى هنا

في امان الله

 

[Malika Tlm]

السلام عليكم
فكرة هايلة بزاف
ايا اختي ام منير ادخلي وجدي راسك للاسئلة
تحياتي

 

[sanaya]

مساء الخير جماعة راني فالمتابعة

 

[أم منيــــــر]

السلام عليكم
في البداية اعتذر منكم حبيباتي
غاليتي اسماء و الله كنت مشغولة بزاااف و هادا وين لقيت الوقت​

 

[أم منيــــــر]

مرحبا وأهلا سهلا ب@أم منير ،،،أنا هي ملاك التراب باه تعرفيني المهم أيا وجدي روحك للأسئلة.

مرحبا بيك ملاك وين هاذ الغيبة
راني واجدة

 

[أم منيــــــر]

(1)أنت كمتزوجة حابة نعرف واش هي الأمور لي لازمت تتجنبها الزوجة مع زوجها /سواءا أقوال أو أفعال وهاذ الأمور لي تهدم العلاقة الزوجية باه نتجنبوه

اولا الرجل ما يحبش الاسئلة لي بلا طعمة كما يقولو السوريين مثلا
وين كنت ...مع من كنت....وين راك رايح و مع من رايح تتلاقى .... يعني ان الرجل يعتبر هاد الامور من خصوصياتو و ما يقبلش لمرا تدخل فيهم
مثلا يكون زعفان و عصبي و يزقي و يعيط و في هاديك القترة يقول اي شي
هنا لازم لمرا تتهدن و تتحكم في اعصابها حتى يتكالما تقعد معاه و تناقشو و توريرو الاخطاء نتاعو و تتحاور معاه في هدوء
لاخاطر اذا بقا هو يعيط و لمرا تعيط ما تفراش و يسمعو الجيران و الاهل و المشكلة تكبر و تزيد
اذا كان عايش مع الاهل نتاعو بلاكي تهدريلو فيهم لاخاطر هاد الشي يصغرك في نظرو
نتمنى نكون جاوبتك كما يلزم طبعا بحكم التجربة نتاعي

 

[أم منيــــــر]

السلام عليكم

سؤال لأختي أم منير
كيف تعالج أم منير اَي مشكل يواجهها مع زوجها أوأهل هل تواجهين أم تتغاضين عنه ؟

اهلا بيك اختي ام لقمان
على حسب المشكل
يعني اذا كان مشكل كبير وعندو عواقب ماشي مليحة لازم نعالجو بالحوار و التفاهم ووضع النقاط على الحروف
نقعد انا و زوجي و نحكيو في المشكل و نحلو كامل الجوانب و نخرجو بالحل
و اذا كان مشكل تافه ما نحبسش عندو نتغاضى عليه على خاطر مرت عليا مشاكل تافهة و كنت انا نكبرها و نلق روحي دخلت في مشكل كبير و عويص
و بعد سنين التجارب رجعت نفوتهم باش نربح راحتي
و مع الاهل كيف كيف
ربي يهنيك

 

[أم منيــــــر]

السلام عليكم
فكرة هايلة بزاف
ايا اختي ام منير ادخلي وجدي راسك للاسئلة
تحياتي

راني هنا ما كانش مشكل
سلام

 

[{مُدَلَّلَتُهُ}]

السلآم عليكم

أهلا خالة أم منير نورتي القعدة الزينة بوجودك الحلو

خالة أم منير إذا بغات تنصح عروسة جديدة شا رح تقوللها ؟

أهم حاجة تخلي العلاقة الزوجية ناجحة شا هي ؟

يقولو أن المرأة هي الي تخلي العلاقة تنجح أو تفشل هل هذا صحيح ؟

"أول سنة من الزواج هي أصعب سنة" شاهوما انصائح الي تقدر تعطيهملنا الخالة أم منير لتجاوز هذه الصعوبات ؟

رح نهبلك بالأسئلة مادامني قاعدة اتحمليني برك ​

 

[دعاء الجنات]

2-حابة نعرف كيفاه تخبي الزوجة غيرتها علاخاطر أنا نغير بزاف ههه ونخاف تفضحني الغيرة!

 

[السلطانة]

وعليكم السلام ورحمة الله وبركاته

أهلا وسهلا بيك خالتي نورتي القعدة

واش رايك في الحماة لي تكون عاقلة بزاف الشي لي يخليها متحكمش بالعدل بين اولادها يعني تخلي واحد يظلم واحد وهي تسكت ؟
واش رايك في زواج الاقارب ؟
هل تشوفي انو العروس لي تحشم بزاف يروح حقها في بيت العايلة او العكس ترين ان مقولة مول النية يربح في الاخير ؟

 

[ضآحكة مستبشرة]

السلام عليكم خالتو
مرحبــــــــا بيك
نورتي القعـــــــــــــدة

سؤالي ليــــــــــك : كيفاش تقدر توفق المرأة العاملة بين العمل و مسؤليات البيت ؟؟
و شكون في رأيك خير المرأة العاملة ولا الماكثة في البيت ؟؟​

 

[أم منيــــــر]

السلآم عليكم
و عليكم السلام حبيبة
أهلا خالة أم منير نورتي القعدة الزينة بوجودك الحلو
اهلا بيك الله ينورك و يحليك

خالة أم منير إذا بغات تنصح عروسة جديدة شا رح تقوللها ؟
نقولها ما تفرطيش في المظهر نتاعك تهلاي في روحك
يكونك لسانك حلو
تكوني مؤدبة في التعامل نتاعك مع الزوج و الاهل نتاعو و تحترمي نفسك و تحترمي زوجك
تكوني مربصة كما نقولو ثقيلة ما تكونيش متسرعة
و ربي يهني كل وحدة

أهم حاجة تخلي العلاقة الزوجية ناجحة شا هي ؟
التفاهم و الحوار و ما فيها والو اذا كانت بعض التنازلات من الطرفين
و ما لازمش يكون وجود للكبرياء لانو هو لي يحطم العلاقة الزوجية ​

يقولو أن المرأة هي الي تخلي العلاقة تنجح أو تفشل هل هذا صحيح ؟
ماشي صح بزاف نسا ضاعت حياتهم الزوجية بسبب انانية الرجل و الكبرياء و الخيانة

"أول سنة من الزواج هي أصعب سنة" شاهوما انصائح الي تقدر تعطيهملنا الخالة أم منير لتجاوز هذه الصعوبات ؟
اول شي لازم المرا تكتشف الرجل في اول سنة
يعني تعرف نقاط ضعفو و نقاط قوتو
و لازم تسمع ليه كي يكون يهدر و لو كان منفعل تسكت و من بعد تحلل و تناقش الموضوع معاه
لاخاطر بزاف نسا طلقو في العام لول لاخاطر ما عرفوش الرجل مليح
كاين رجال يعيطو و يتعصبو بسرعة بصح يرجعو بالخف و قلبهم بيض
و اذا ما عرفتيش هاد الطبع في زوجك تبقاي كل مرة هو يعيط و انت تعيطي و الضغط يزيد و يكون النفجار و تتعفن العلاقة لا قدر الله
رح نهبلك بالأسئلة مادامني قاعدة اتحمليني برك ​

راني هنا ما كانش مشكل بالاكي برك انت تهبلي معايا ​

 

[أم منيــــــر]

وعليكم السلام ورحمة الله وبركاته

أهلا وسهلا بيك خالتي نورتي القعدة
الله ينورك و يفرحك بياسمين

واش رايك في الحماة لي تكون عاقلة بزاف الشي لي يخليها متحكمش بالعدل بين اولادها يعني تخلي واحد يظلم واحد وهي تسكت ؟
هذا الشي حرام لازم تكون عادلة و تنصف الطرفين
عاقلة ماشي سبة لي تخليها تتفرج على ولادها و هي تسكت على الحق و الساكت عن الحق شيطان اخرص
حتى و لو كانت عاقلة كما قلت تحكم كل واحد وحدو و تهدر معاه و تحكم لي ظالم و تقولو راك ظلمت خوك
ياخي ولدها و هي جابتو و هي لي لازم تهدر و تصحح الغلط لاخاطر السكوت نتاعها هو لي يزيد الكره بين الاخوة

واش رايك في زواج الاقارب ؟
انا متزوجة من ابن عمي عايشة معاه مليح و ما خصني حتى خير و لله الحمد
و كاين لي تزوجو مع الاقارب عاناو الامرين انا نعرف وحدة تزوجت ولد خالتها و يماها ماتت
باش تكون الخالة الصدر الحنون ليها هي لي شربتها المر و شافتها مغبونة مع وليدها و ما حركتش ساكن
النهاية كانت انو البنت طلقت بعد ما جابت طفلة و درك راها عايشة في دار باباها
يعني ما نقولكش ضد و ما نقولكش مع
كل وحدة و ظروفها
هل تشوفي انو العروس لي تحشم بزاف يروح حقها في بيت العايلة او العكس ترين ان مقولة مول النية يربح في الاخير ؟
شوفي يا حبيبتي ام ياسمين هي صح مول النية يربح بصح هاد النية ما لازمش تكبر حتى تولي غباء
لازم الوحدة تكون قافزة و تكون منتبهة و لازم تجيب حقها بالعقل لاخاطر كاين شي عباد كي يشوفو وحدة تحشم ياكلوها و كي يشوفو وحدة قافزة يضربولها الف حساب
اذا كانت هاد العايلة تخاف ربي تحترم الحشمة نتاع هاد لعروسة و تعطيها حقها في كل شي
و اذا كان العكس رايحين يستغلو حشمتها و طيبة قلبها و ياكلو حقها نوووورمال

ربي يهنيك

 

[أم منيــــــر]

السلام عليكم خالتو
اهلا بيك غاليتي اسماء
مرحبــــــــا بيك
ترحب بيك الجنة
نورتي القعـــــــــــــدة
الله ينورك

سؤالي ليــــــــــك : كيفاش تقدر توفق المرأة العاملة بين العمل و مسؤليات البيت ؟؟
انا ما نعملش برا على هاديك ما نقدرش نعطيك جواب من عندي
بصح كاين بزاف نسا من العايلة تخدم و كلهم يشكيو من ضيق الوقت و من ثقل المسؤولية
و خاصة اذا كانو فيها ذراري و اذا ما كانتش مساعدة من الزوج و من الاهل ما رايحاش تقدر توفق بين العمل برا و لداخل
مستحيل توفق بيناتهم
و شكون في رأيك خير المرأة العاملة ولا الماكثة في البيت ؟؟
في هاد الوقت مليح لمرا تخدم باش تساعد الزوج نتاعها في مصاريف البيت مع المعيشة لي راها غالية و تخفف عليه شويا من الضغط
بصح الضريبة غالية
و اذا كان الزوج كافي و مدخولو وفير انا نقولها علاش تعيي روحها بالخدمة برا
بيتها وولادها و زوجها اولى بهاداك الوقت لي يروحلها برا
​

يعطيك الصحة اسماء​

 

[أم منيــــــر]

2-حابة نعرف كيفاه تخبي الزوجة غيرتها علاخاطر أنا نغير بزاف ههه ونخاف تفضحني الغيرة!

شوفي بما انك غيورة بزاف ما رايحاش تقدري تخبي غيرتك
واش نقولك اذا فضحاتك غيرتك رايح زوجك المستقبلي يستغل الفرصة و يهبلك
عندك برك ديريلو كما جميل و هناء لي قتلتها الغيرة حتى رجعت تلبسو من حوايج البالة برك باش لبنات ما يشوفوش فيه
لالا لازم تتهدني وما توريش للرجل نقطة الضعف هادي لاخاطر يستغلها لصالحو و اذا كان نية يبق يعاني معاك كما دار ما يسلك
ربي معاك و معاه ههه