و مشكل البنان (الموز ) خلاص حليناه

[الامين محمد]

اهلا بكم يا شعبي المفره و المفرح على الروايتين
طبعا يا شعبي العزيز بعد ما حلينا مشكل الغاز و التريسيتي
و اصبح سعرهم سعر رمزي
و أصبح شعبي العزيز يخلص الفواتير و ما يديش الصرف
و حلينا مشكل السكن و كل واحد من شعبي ساكن أبارتمو لوحده
و حلينا مشكل القصدير
و طبعا كيما تعرفوا حلينا مشكل الخلصة و أصبح شعبي العزيز
مقلش و يخلص بسهولة مقابل عمل شريف
و بلا ما ننسى اننا حلينا مشكل المدارس و الاكتضاض فيها
و بنينا في كل زنقة مدرسة و سيام و ليسي و في كل دايرة جامعة
و سبيطار فيه أطباء على مستوى عالي من التخصصات و الخدمة في كل دايرة
و نذكركم اننا جعلنا حليب الأطفال مجاني كيما هو حال العلاج و الدراسة
و رفعنا منحة طلاب الجامعات
و درنا خلصة مليحة للشيوخ كبار السن و عمرة لكل واحد بلغ 65 سنة بالتقسيط المريح
و عملنا حد للسرقة و الاجرام و المجرمين و سرقة الأطفال
و شقينا طرق معبدة حتى وصلنا لكل بيت و قرية
و زدنا درنا النقل المدرسي و أصبح اللي ساكن في الخيمة يجي عنده النقل
ياخد ولاده الى الليكول و في المساء يرجع هم حتى عند الخيمة
و اصبح السلع و المصروف يباع بأسعار في متناول الجميع
و استغلينا الطاقة الشمسية و طاقة الرياح
و استثمرنا في الزراعة و الفلاحة و السياحة
و اصبح عندنا مصادر دخل كبيرة بدل البترول

يا شعبي المقلش كان باقي عندنا مشكل واحد
و هو ارتفاع سعر الموز
و راني نعلم فيكم اننا حلينا هاذ المشكل و اقضينا على الوسطاء
و قمنا بتهيأة بواخر لجلبه مباشرة من المصدر ليصل اليكم بثمن بخس
ـ
ـ
ـ
ـ
ـ
ـ
ـ
ـ
يعني كل مشاكلنا حلينالها الا مشكلة الموز كانت باقية و راهي تحلت البارح
شوفوا هاذ المسؤولين اللي طلعوا علينا البارح فرحانين بهته القفزة النوعية
نظن ماهمش عايشين معانا يا مسؤول
انا مشكلتي ماهيش في الموز و ان شاء الله ما تجيبوهش خلاص
و ان شاء الله ما ناكلهش خلاص في حخياتي
يا المسؤول فكر باش تلقالي حل و نلقى خدمة و زوجتي تلقا طبيب مليح و ولدي يقرا مليح
و البطاطا ترجع حبيبة المسكين و الثوم هو لحم الفقراء و العدس و الروز و البيض
و الزيت و السكر و السكن و الطرقات و الفلاحة و السياحة و الأمن

اما الموز فزيده في روحك



الامين محمد
ممكن موضوعي يقبش مشاعر بعض ممن يعيشون في الأحلام
فأعتذر مسبقا منهم ههههههههههههه

 

[ثَسْكُورْثْ نَثْدُوكْلِي]

سلام عليكم خويا محمد ان شاء الله راك بخير وتحسنت شوية صحتك
طهور ان شاء الله

والله موضوعك في الصواب كيما قلت البنان زيدوه لرواحكم زعما يتخباو مور البنان وهاو خلاص حلو كامل المشاكل من جرة تاعو
غاضتني حكاية الثوم متعدد الاستعمالات وكيما نعرفو مايخطيش الاكلات الجزائرية يعني كلشيء تقريبا بالثوم حتى انو نستعملو كدواء للسعال مثلا لاطونسيو وجع الضرسة وغيرهم ودوكا الثوم ارجع كي لعسل الحر
وبلام نزيد نحكي راك ذكرتهم في موضوعك
ربي يجيب الخير هذا مكان والحمد لله لان الرزق بيد ربي سبحانو ومش بيدهم ياو لوكان رحنا في كيلة الزيت
وربي يكون في العون
شكراا ع الموضوع
بالتوفيق لكم
كونوا بخير أجماعة الخير​

 

[أسمااء]

صايى والفنا بلا بنان معدنا منديرو بيه
انا هادو ليام رانى غنحوس على الثوم ومالقيتوش
راك جيت على الجرح كيما يقول المصرى كلش كوم والسكن كوم ثانى

 

[sanaya]

الله يعطيك الخير
راني نقول واش من مشاكل تحلوا
مي تحيا جبتها بطابع فكاهي و قصفتهم قصفا مفاجئا
هاذا اللي راح ديراكت يحل مشكل غلاء الموز لأنو المشاكل اللي قلتهم ڨاع مهوش يعاني منهم
بعاني من مشكل الموز برك
يعني هو حل المشكل لروحو
ولاعبها حلوا لأجل الشعب
وكان نورمالموا يقول:
ياأيها الشعب عققت قفزة نوعية في حياتي (وليس حياتكم)
وهي أنني سأتمكن من شراء الموز بسهولة
(وليس تتمكنون)
لأنو راه يخدم على روحو
وبالتسمية راه يخدم لأجل الشعب
ربي يهديهم وخلاص سايي رايحين للهاوية ومافايقين على رواحهم

 

[mohamedfathi]

.... لا اجد ما اقول آسف

 

[الامين محمد]

سلام عليكم خويا محمد ان شاء الله راك بخير وتحسنت شوية صحتك
طهور ان شاء الله

والله موضوعك في الصواب كيما قلت البنان زيدوه لرواحكم زعما يتخباو مور البنان وهاو خلاص حلو كامل المشاكل من جرة تاعو
غاضتني حكاية الثوم متعدد الاستعمالات وكيما نعرفو مايخطيش الاكلات الجزائرية يعني كلشيء تقريبا بالثوم حتى انو نستعملو كدواء للسعال مثلا لاطونسيو وجع الضرسة وغيرهم ودوكا الثوم ارجع كي لعسل الحر
وبلام نزيد نحكي راك ذكرتهم في موضوعك
ربي يجيب الخير هذا مكان والحمد لله لان الرزق بيد ربي سبحانو ومش بيدهم ياو لوكان رحنا في كيلة الزيت
وربي يكون في العون
شكراا ع الموضوع
بالتوفيق لكم
كونوا بخير أجماعة الخير​

ههههههههههه شفت الثوم مسكيسن حبيب الغلابا هههههههه
اليوم راه برلماني و اصبح ما تقدرش حتى تتصور معاه
اييييه يا سيادة الثوم هههههههههههههه
اما البطاطة اصبحت عروسة و اللي يوصلها راه عنده حظ كبير
هههههههههههه

شكرا على طيب المرور

 

[الامين محمد]

صايى والفنا بلا بنان معدنا منديرو بيه
انا هادو ليام رانى غنحوس على الثوم ومالقيتوش
راك جيت على الجرح كيما يقول المصرى كلش كوم والسكن كوم ثانى

هههههههههههه شفتي سيدتي
الثوم راه حاجة كبيرة ندوروها جومبو و اخلاص
و معاه حريرة من الاعشاب البرية حتى تسلك الحالة

 

[الامين محمد]

الله يعطيك الخير
راني نقول واش من مشاكل تحلوا
مي تحيا جبتها بطابع فكاهي و قصفتهم قصفا مفاجئا
هاذا اللي راح ديراكت يحل مشكل غلاء الموز لأنو المشاكل اللي قلتهم ڨاع مهوش يعاني منهم
بعاني من مشكل الموز برك
يعني هو حل المشكل لروحو
ولاعبها حلوا لأجل الشعب
وكان نورمالموا يقول:
ياأيها الشعب عققت قفزة نوعية في حياتي (وليس حياتكم)
وهي أنني سأتمكن من شراء الموز بسهولة
(وليس تتمكنون)
لأنو راه يخدم على روحو
وبالتسمية راه يخدم لأجل الشعب
ربي يهديهم وخلاص سايي رايحين للهاوية ومافايقين على رواحهم

و الله شر البلية ما يضحك
يعني كل المشاكل تحلت و كانت باقية مشكلة البنان فقط
و الله ماني فاهم وين راهم عايشين معانا و لا مع ناس آخرين

شكرا سيدتي على كرم المرور

 

[الامين محمد]

.... لا اجد ما اقول آسف

خير الكلام قل و دل
و في عز الكلام لا نجد الكلام
شكرا أخي محمد على المرور

 

[mohamedfathi]

العفو
شكرا لك انت على الطرح القيم

 

[sanaya]

للأسف عايشين معانا ولكن بمستوى معيشي مختلف
وماهومش حابين يشوفو غير رواحهم
فكرتني بواحد الراجل راح لجامع تاع الأكابر إتسما ميصلوش فيه غير صحاب دراهم
واش دار اشرا مزدا كاملة تاع الدلاع
وهداك الوقت الدلاع مزالو فال وغالي
وبدا يصدقو بعد الصلاة على المصلين
وهما أصلا ناس عندهم ومش محتاجين
وهذا دليل أنو هذ النوع من الناس عايشين معانا مصح ميشوفو غير رواحهم ولا الناس اللي من الطبقة تاعهم زعما عندهم الدوفيز كما هما
ياعجبا يصدق يروح للجامع اللي يصلي فيه غير صحاب الدراهم
علاه ميروحش لحي شعبي ولا جامع بسيط
هههه
كما هاذ اللي نسا ڨاع المشاكل تاع الشعب و خمم غير فالبنان
ربي يهديهم ونشالله يارب تتبدل هاذ الحال

 

[حلم كبير]

السلام عليكم و رحمه الله تعالى وبركاته

اخي الكريم موضوعك حزين في قالب فكاهي ساخر. بارك الله فيك

المسؤولين يحبو يديرو للشعب حاجة تلهيهم على الاهم ،كيما البنان غلاو فيه بالذما باه يديرو بيه بلبلة ،ومن بعد يقلك رانا قائمين بيها حلينا المشكل .
ويموهو على الاهم اللي هو غلاء كل الاسعار جملة وتفصيل.
وحتى الماء ماكانش كون كل بيت عندو تراب قدامو يستغلو ويزرع الضروريات برك . كيما بصلة وثوم وكسبر ....الخ
المشكل الماء كون واحد ما يفخر المرشي نتاع الهم ،خاصة المناطق الداخلية والجافة.
لا حول و لا قوة الا بالله العلي العظيم
أخي موضوعك هادف يعطيك الصحة
تقبل مروري مع فائق الاحترام والتقدير
حلم كبير

 

[Malika Tlm]

السلام عليكم اخي محمد
الله يعطيك الخير والهنا
البانان ههههههه نقولك حاجة انا منحبوووووووش
كيما قلت يشوفوا حوايج وحدخرين ضروريين للشعب اما البانان زيادة
الله يهديهم يتمسخروا علينا
حسبنا الله ونعم الوكيل
مشكور اخي
تحياتي لك

 

[الامين محمد]

لي عودة للرد على مروركم الكريم

 

[زاد الرحيل]

السلام عليكم ..
موضوع البنان هو موضوع العامة ، يظهر لي الدولة نتاع فئة معينة ماهيش تهدر معانا اصلا .. راهي تهدر مع فئتها ، و تعتذر لهم و تقول : اسمحولي درت لكم مشكل الايام هاذو مخليتكمش تطيشوا البنان اللي كنت تحسبوه بطاطا .. نعتذر منكم مرة اخرى ، ماكانش على بالي بلي الازمة لحقتكم ، كيعاد كنا مدايرينها لهاذوك اللي يسموهم ....... ال .. ال .. الشعب ، لقيناهم مايعرفوهش و ماهمش عايشين له كيعاد ما والفوهش على هاذيك لازم نزربوا نصلحوا الحالة
كلش كلش غير فئتنا لازم ماتتقاسش مادامت الجزائر واقفة .. تعيش .. تعيش الجزائر اللي عندها زوج فئات ، فئة لازم تتعذب و فئة ما يقيسهاش العذاب

 

[الصحافية الساخرة]

ياااهوووو قفزت جيت هنا لقيت المووز قلت بلاك رجع للجزائر بعد ان هجرنا حابة نذوقه قبل ما نموت يا خويا انا كي نقصف هذو المسؤولين منيش غالطة ام شيبونا جاهلين حليب الشكاير قطعوه ويااا بهدلو بينا سمعوا بينا العالم حتى اللي كانو جايين يزورو الجزاير بطلوا خافوا يموتو بالشر هنا هههههه
وكيفاه متديرليش اشارة فالموضوع هذا يااو تعرفني نثرثر على المخلوقات هذي بزااف يااا ربي فرج علينا قالك انتخب يا مواطن تولي تاكل البنان كل يوم باااطل هااا اسكت علينا ها حنا مشكلتنا دوك مثومة ثووم يا فقاقيير مرشح روحك للرئاسيات شوف الثوم تنتخب عليك انا رحت ندير وصفة وفيها الثوم يا عجبا فالنهار هذاك قالولي فالسوق اييه يا طفلة الثوم خلالاص ولات كي العسل الحرة اه ثوم حاارة اخطوونا يا الدولةلحقتوا حتى الثوم غليتوها خاصكم تبيعونا حنا وتعمروا قفتكم
متزيدش تطرح مواضيع هكذا ياو راك تحرك فيا الغضب اللي للذاخل

 

[الامين محمد]

للأسف عايشين معانا ولكن بمستوى معيشي مختلف
وماهومش حابين يشوفو غير رواحهم
فكرتني بواحد الراجل راح لجامع تاع الأكابر إتسما ميصلوش فيه غير صحاب دراهم
واش دار اشرا مزدا كاملة تاع الدلاع
وهداك الوقت الدلاع مزالو فال وغالي
وبدا يصدقو بعد الصلاة على المصلين
وهما أصلا ناس عندهم ومش محتاجين
وهذا دليل أنو هذ النوع من الناس عايشين معانا مصح ميشوفو غير رواحهم ولا الناس اللي من الطبقة تاعهم زعما عندهم الدوفيز كما هما
ياعجبا يصدق يروح للجامع اللي يصلي فيه غير صحاب الدراهم
علاه ميروحش لحي شعبي ولا جامع بسيط
هههه
كما هاذ اللي نسا ڨاع المشاكل تاع الشعب و خمم غير فالبنان
ربي يهديهم ونشالله يارب تتبدل هاذ الحال

هههههههههههههههه يعني الصدقة للمرفهين
هاذي جديدة فعلا ناس عايشة معانا لكن ماهمش منا

تحياتي أختي

 

[الامين محمد]

السلام عليكم و رحمه الله تعالى وبركاته

اخي الكريم موضوعك حزين في قالب فكاهي ساخر. بارك الله فيك

المسؤولين يحبو يديرو للشعب حاجة تلهيهم على الاهم ،كيما البنان غلاو فيه بالذما باه يديرو بيه بلبلة ،ومن بعد يقلك رانا قائمين بيها حلينا المشكل .
ويموهو على الاهم اللي هو غلاء كل الاسعار جملة وتفصيل.
وحتى الماء ماكانش كون كل بيت عندو تراب قدامو يستغلو ويزرع الضروريات برك . كيما بصلة وثوم وكسبر ....الخ
المشكل الماء كون واحد ما يفخر المرشي نتاع الهم ،خاصة المناطق الداخلية والجافة.
لا حول و لا قوة الا بالله العلي العظيم
أخي موضوعك هادف يعطيك الصحة
تقبل مروري مع فائق الاحترام والتقدير
حلم كبير

أهلا و سهلا
اثراؤوك للموضوع أسعدني
تحياتي

 

[الامين محمد]

السلام عليكم اخي محمد
الله يعطيك الخير والهنا
البانان ههههههه نقولك حاجة انا منحبوووووووش
كيما قلت يشوفوا حوايج وحدخرين ضروريين للشعب اما البانان زيادة
الله يهديهم يتمسخروا علينا
حسبنا الله ونعم الوكيل
مشكور اخي
تحياتي لك

و الله صح تمسخير
حنا حاصلين في الخبز و هو يحكي على البنان
لا اله الا الله

شكرا أختي مليكة على المرور الراقي كالعادة

 

[الامين محمد]

السلام عليكم ..
موضوع البنان هو موضوع العامة ، يظهر لي الدولة نتاع فئة معينة ماهيش تهدر معانا اصلا .. راهي تهدر مع فئتها ، و تعتذر لهم و تقول : اسمحولي درت لكم مشكل الايام هاذو مخليتكمش تطيشوا البنان اللي كنت تحسبوه بطاطا .. نعتذر منكم مرة اخرى ، ماكانش على بالي بلي الازمة لحقتكم ، كيعاد كنا مدايرينها لهاذوك اللي يسموهم ....... ال .. ال .. الشعب ، لقيناهم مايعرفوهش و ماهمش عايشين له كيعاد ما والفوهش على هاذيك لازم نزربوا نصلحوا الحالة
كلش كلش غير فئتنا لازم ماتتقاسش مادامت الجزائر واقفة .. تعيش .. تعيش الجزائر اللي عندها زوج فئات ، فئة لازم تتعذب و فئة ما يقيسهاش العذاب

فعلا هو راه يحكي على فئة
و ماهوش يحكي معانا نحن مجرد خدم و زاد رانا مضيقين عليهم
كاش نهار يرهجونا و يتهناو منا