قال " gاد " تعالى

[♡كارينا♡]

اليوم لخاطر طحت وتخبشت قلت والله نرووح لسبيطار عندي مدة مارحتش مع اني نكرهو المهم كما مالفين وين يقعدوا يستناو يخي تلقاوو النسا يقصرو يحكو على كلشي ...
وحنا قاعدين جات وحد لمسكينة وبدات تحكي في قصتها وامبعدا قاتلنا ادا هدا شي حرام ولا حلال ..وانا ماحبيتش نخلطهالها قتلها روحي تسقسي اهل العلم ..بعدي هدرت وحدة علبالكم واش قالتلها ...قاتلها قال"gاد"تعالى .....انا تشليت "gاد"تعالى وصلت لهاد الدرجة ايه تحلبي ياختي بصح ماشي انت مسلمة عربية تقولي لربي"gاد"تعالى هديك تقولها وحدة امريكية ماتعرفش العربية ماشي دايرة كاميو مكياج وتقولي "gاد"تعالى المهم انا كي خرجت من الصدمة قتلها ياختي وشنو قال"gاد"تعالى قاتلي (وي تاني ماسنجير اوف بيس قال.....)الله الله ماسنجير اوف بيس ياو مانحلفش وراس بابا ماتعرف لاماسنجير ولا gاد تعالى ....انا صدمت وقالي الطبيب لازمك تروحي عند طبيب نفسي لمدة شهر هههه
المهم وحنا قاعدين صونا تليفون تاع هديك لمسكينة لي تسقسي وتحوس على فتوى مدتهولي قاتلي يا بنتي هاك تشوفي اقراي فتحت الميساج نلقاه مكتوب عربي فرنسي (eshrili bashmak nwali nasaik bih )انا دخت يماها لمسكينة امية ماتعرفش تقرأ وهي تكتبلها عربي فرنسي تاع معناتو متحلبة ولا وشنو ايه عادي تكتبي عربي فرنسي نورمال ماكان حتى مشكل بصح ماشي لدرجة تلجق بيك على جال وباش تباني نيفو ومتحلبة تكتبي ليماك لي اساسا ماتعرفش تقرأ بالفروونسي ....
نشفى مليح واحد نهار عرفة قاعدين سقسى واحد شكون صايم قالو واحد I am نصوم توجور عرفة هاد الجملة كيفاش كونها الله اعلم
ايه اهدر عربي فرونسي اونgلي ماكاش مشكل مادا بينا نولو نهدروا بزاف لغات بصح تخلطلها جديمها وتقولي قال gاد تعالى هادي غير اخطيني منها خليك في العربي خيير
وهدا ماكان

 

[لؤلؤة قسنطينة]

السلام عليكم
يا لطيف واشوا هادا؟
مساء النور ساع الهدرة راحتلي هههه ان شاء الله احوالك بخير اختي كارينا؟
واش بيه الشعب هادا هبل ولا مريض كليا ولا عندو مرض التفرنس والتنجلز ههههه
ماش عيب واحد يتعلم لغة أجنبية ولا حتى 10 لغات اجنبية بصح كل حاجة وفي محلها وكل لغة في بلاصتها
نتا عربي وساكن بين لعرب اتكلم عربية نهار تروح للخارج اتكلم بلغتهم هادي بغض النظر عن كلام الله سبحانه وتعالى
إذا الاجانب أول ما يدخلو الاسلام يزربو يتعلمو اللغة العربية مع أنهم من حقهم يقراو القرآن بلغتهم وهكاك مساكن
يتعكلو في اللغة العربية ويقاومو ويقراو القرآن باللغة الأم تاعو، واذا كان يتكلم باللغة الاجنبية كي يلحق لكلمة "الله" يقولها بالعربية
الله نورمال مع انو اجنبي ومن حقو يتكلم بلغتو، وحنا جينا نتطورو عميناها خلاص
ربي يهديهم برك هادا ما نقول هادا جهل صراحة
شكرا على الموضوع غاليتي
تحياتي​