مشكلتي هل افسخ خطوبتي من اجل امي

[مشكلتي]

السلام عليكم


اخوتي انا في امس الحاجة اليكم وراي كل واحد منكم يهمني


انا عمري 28 سنة مخطوبة لشخص محترم حاليا عايشة مع امي واخي وماعندنا غير بعضانا والمشكل هو اخي اللي حاب يخطب وحدة بعيدة علينا في كل شي حنا من بجاية يعني قبايل وهي من ورقلة


فرق شااااسع بينا وبينها سواء من حيث اللغة ولا العادات حقيقة انا معارضة لهاذ الفكرة نهائيا مافهمتش كيفاش يخلي كااامل بنات ولايتو ولا الولايات المجاورة ويروح يجيبلي وحدة من ورقلة تبهديييلة كيفاش نقابلو العائلة والناس خصوصا انو كل شباب العايلة تزوجو قبايليات ماشي من عادتنا نجيبو ولا نمدو بناتنا لبعيد مافهمتش علاش حطنا في موقف كيما هذا


حتي امي مابغاتهاش ومنهار حكالها عليها وهي في حالة قاتلي خايفة تكون بنت حرام وتديه عليا وواش نقول للناس لامود ضركا المرا هي لي تدي الراجل مش الراجل لي يدي لمرا


انا مارانيش عنصرية ولا مغرورة زعما انا قبايلية وهي عربية مش هاذ الشي لوكان ختار مثلا وحدة من بليدة ولا عنابة ولا اي ولاية اخري المهم تكون قريبة نغمض عينيا ونقول ماعليش بصح باش يروح لصحرا ويجيبلي من تما هاذي ماقادراش نتقبلها حتي يما راهي مقهورة ومانقدروش نقولولو هاذ شي خايفين يروح ليها ومانزيدوش نشوفوه وماعندنا غيرهو مكانش اخ اخر والحاجة اللي قلقاتني اكثر هو فرق اللغة يما ما تفهمش العربية اطلاااااقا ماتفهمها ما تهدرها كيفاش رايحة تعيش مع وحدة وماتهدرش معاها ولي زاد دمرلي معنوياتي اكثر اليوم لقيتو دار بحث في الانترنت يحوس علي دار في ولاية ورقلة وانا فهمت بلي راح يتزوج بيها ويعيش تما ويما ماعرفت واش يصراا فيها داتلو عقلو خلاص مازال مادخلت لعندنا ستعمرتنا وبدلاتو علينا


انا عرسي قرب وعقلي مع يما وخصوصا انو راجلي مغترب يعني انا نروح للغربة وهو يروح للصحراوية تاعو ويما تضيع علي هاذي خممت نفسخ الخطوبة يما اهم من كلشي ومن جهة اخري مانيش حابة نخسر خطيبي انا في حيرة

 

[همس الوُرود]

السلام عليكم أختي
وش مكتبو ربي مرحبا بيه علاش ياك العربية تحكي دارجة كيما راكي تحكي أنت عادي
وعلاش تحكموا على فتاة وأنتم متعرفوهاش؟؟ يعني والله تبانلي نورمال كامل علاش تقلقوا فروحكم
المهم تكون فتاة مليحة وطيبة و تحسنوا الظن بيها وربي يجيب الي فيه الخير بإذن الله
بالنسبة لتفكيرك أنا ضدو والله أعلم
وصلي صلاة إستخارة قبل ماتقرري تديري أي حاجة أختي
ربي يعينك إن شاء الله ويهنيكم يا رب
وإن شاء الله تكون الفتاة زوجة أخوك طيبة ومليحة و تغيروا رأيكم وكل شيء يكون مليح بينكم​

 

[لؤلؤة قسنطينة]

السلام عليكم
والله مالقيت مانقولك ختي، من هنا مارانيش عنصرية بصح كن غير جابها من عنابة وماش من ورقلة واش هاد التناقض
وناس ورقلة واش بيهم؟ ماش عباد؟ ولا ماش من حقهم يتزوجو ولا كيفاه؟ مول الشي قابل وناوي الحلال
ومايدير في حتى حاجة تخالف القانون ولا الدين ونتي تبهديلة ومعرف واش تقول رايح يجيب الطفلة هادي بالحرام
صار نتي جاك واحد مغترب من بلاد خلاف وقارة خلاف بالاك خلاص ورضيتي وقبلتي ونورمال ماكاين والو
وهو لي حب يدي بنت بلادو جاتكم عيب وتهبديلة مع انها في نفس الوطن ونفس القارة طيارة دقيقة ونتي لحقتي
وبنات الحرام ماش غير في ورقلة قادرة القبايلية لي حابة تجيبيها تشرب ليماك لمرار (مع احترامي لكل قبائلي)
بنات الحرام كاينين بارتو ماش غير في ورقلة ختي لعزيزة ولا الطفلة كي ماراضيينش بيها ظهرت بنت حرام؟
كيما قالت ختي عبير الطفلة ماتعرفوها ماوالو هدرتو عليها وقلتو ماش مليحة مع انو كيفها كيفك وكيف اي بنت جزائرية
يعني اعطينا سبب مقنع برك يخليكم ترفضوها تما نجيو معاك وننصحوك، يعني الطفل متبع طريق ربي وطالب الحلال
ماكانش حاجة مخالفة تغضب ربي ولا العبد، وزيد اذا تحتجي بالبعد كيما قتلك رانا في زمن التكنولوجيا دقيقة ونتي لحقتي
وزيد نتي بعد راكي متناقضة في كلماتك ختي لعزيزة من هنا تقولي يحوس على دار وحاب يروح ليها وتديه علينا ومن هنا
كن يحب يسكن معاكم قلتي جايبلهالنا من الصحرا ويما ماتفهمهاش، صار حراقة راحو كلمة اجنبية مايعرفوها وتزوجو
ودارو عايلات نورمال ماكانش مستحيل في الدنيا، يعني من رايي راكم مكبرين الموضوع بلا فايدة الطفل حب يتزوج
باركولو وخليوه يعيش حياتو من الصحرا ولا من الصين يخي هو لي رايح يتزوج وهو لي رايح يعيش معاها
وفي الحلال؟ مالا ربي يسهل وننصحك ماتتدخلوش في حياتو خاطر رايحين تخسروه مالا خليو الامور تمشي كيما راهي
والتقاليد وباقي الامور ماش حاجة معقدة للدرجة هادي يعني تكتسب مع مرور الوقت
ربي يسهل ان شاء الله
تحياتي
​

 

[فيتامين سي]

لي عودة
بصح متزعفيش من تعليقي ..قيد الكتابة ..

 

[بشرى ملاك]

السلام عليكم


اخوتي انا في امس الحاجة اليكم وراي كل واحد منكم يهمني


انا عمري 28 سنة مخطوبة لشخص محترم حاليا عايشة مع امي واخي وماعندنا غير بعضانا والمشكل هو اخي اللي حاب يخطب وحدة بعيدة علينا في كل شي حنا من بجاية يعني قبايل وهي من ورقلة


فرق شااااسع بينا وبينها سواء من حيث اللغة ولا العادات حقيقة انا معارضة لهاذ الفكرة نهائيا مافهمتش كيفاش يخلي كااامل بنات ولايتو ولا الولايات المجاورة ويروح يجيبلي وحدة من ورقلة تبهديييلة كيفاش نقابلو العائلة والناس خصوصا انو كل شباب العايلة تزوجو قبايليات ماشي من عادتنا نجيبو ولا نمدو بناتنا لبعيد مافهمتش علاش حطنا في موقف كيما هذا


حتي امي مابغاتهاش ومنهار حكالها عليها وهي في حالة قاتلي خايفة تكون بنت حرام وتديه عليا وواش نقول للناس لامود ضركا المرا هي لي تدي الراجل مش الراجل لي يدي لمرا


انا مارانيش عنصرية ولا مغرورة زعما انا قبايلية وهي عربية مش هاذ الشي لوكان ختار مثلا وحدة من بليدة ولا عنابة ولا اي ولاية اخري المهم تكون قريبة نغمض عينيا ونقول ماعليش بصح باش يروح لصحرا ويجيبلي من تما هاذي ماقادراش نتقبلها حتي يما راهي مقهورة ومانقدروش نقولولو هاذ شي خايفين يروح ليها ومانزيدوش نشوفوه وماعندنا غيرهو مكانش اخ اخر والحاجة اللي قلقاتني اكثر هو فرق اللغة يما ما تفهمش العربية اطلاااااقا ماتفهمها ما تهدرها كيفاش رايحة تعيش مع وحدة وماتهدرش معاها ولي زاد دمرلي معنوياتي اكثر اليوم لقيتو دار بحث في الانترنت يحوس علي دار في ولاية ورقلة وانا فهمت بلي راح يتزوج بيها ويعيش تما ويما ماعرفت واش يصراا فيها داتلو عقلو خلاص مازال مادخلت لعندنا ستعمرتنا وبدلاتو علينا


انا عرسي قرب وعقلي مع يما وخصوصا انو راجلي مغترب يعني انا نروح للغربة وهو يروح للصحراوية تاعو ويما تضيع علي هاذي خممت نفسخ الخطوبة يما اهم من كلشي ومن جهة اخري مانيش حابة نخسر خطيبي انا في حيرة

والله عيب لي راكي تقولي فيه وانت عضو في اللمة الجزائرية فهمي كلمة اللمة الجزائرية ادا راكي مقتانعة بفكرة اللمة مايكونش هدا تخمامك باسكو اللمة تعني قاع الجزائريين..
الجزائر من الشرق للغرب ومن الشمال للجنوب قاع خاوة وقاع كيف كيف مكانش فراق كيفاه تقولي تبهديلة يدي خوك من ورقلة علاه مالها ورقلة ناس الصحرا احسن ناس وعشارين وقبل كلش مسلمة وبنت بلادك وبلاك راكم خايفين منها وتخرج لماماك احسن منكم (لي تخاف منه هو لي تروحله)
فيما يخص خوك كل ماتعاندوه هو يبعد ماشي هي تديه ومكانش راجل تديه مرا راجل يروح وين يلقى راحته غير بشوية تقبلو الفكرة وتعرفو عليها احسن وكسبو خوك من خلالها هي دخلوها للعايلة تاعكم خير من فكرة خوك يروح ويخليكم وخليكم من هدرة الناس لوكان دجيبوها من مكة الناس تهدر تهدر "ارضاء الناس غاية لا تدرك"...

 

[بشرى ملاك]

من المعلوم في الشريعة الإسلامية أنّ النّاس جميعًا سواسية كأسنان المشط؛ لأنّهم من أب واحد وأم واحدة، وإنّما يفضل الفاضل منهم بتقوى الله وحده، كما قال تعالى: {إِنَّ أَكْرَمَكُمْ عِندَ اللَّهِ أَتْقَاكُمْ} [سورة الحجرات: من الآية 13]، وفي الحديث: «لا فضل لعربي على أعجمي ولا لعجمي على عربي ولا لأحمر على أسود ولا أسود على أحمر إلاّ بالتقوى» [رواه أحمد].

النّاس لآدم وآدم من تراب، ولهذا من المقرر في الشرع تكافؤ النّاس وتساويهم في أنسابهم، ولهذا عمل الصدر الأول من هذه الأمة بقاعدة تكافؤ النّاس في أنسابهم، وفي الحديث: «يا بني بياضة أنْكِحُوا أبا هندٍ وأنْكِحُوا إليه» [رواه أبو داود وصحّحه ابن حجر].

وأبو هند كان حجّامًا وبنوا بياضة أسرةٍ من أسر الأنصار وهم أزديّون من أشرف العرب، وقد تزوج بلال بن رباح أخت عبد الرحمن بن عوف، وتزوج أسامة بن زيد فاطمة بنت قيس القرشية، ولكن لما بَعُد النّاس عن الشرع وتعلَّقوا بأنسابهم القبلية وانتماءاتهم الأسرية رفض الكثير منهم هذا المبدأ، ووصل الحال إلى الإنكار والاستنكاف حتى إن من يقدم على التزوج من غير طبقته قد يخاطر بنفسه خاصة في المناطق القبلية والعشائر والبوادي، فإذا وصل الحال إلى الإنسان بأن يصبح في خطر من تزوجه من غير طبقته بحيث يتعرض للتهديد أو الضرر أو الإساءة إلى أسرته بالاستهزاء والسخرية والسب والأذى فإنّ درء المفاسد مقدَّم على جلب المصالح، وقد عرفنا قضايا لما اكتشف فيها البعض نسب الآخر وقد سبق أنّ صاهره هدّده بالقتل حتى أفتاه بعض العلماء بفراق زوجته، حيث أوشك أن ينشب بين الأسرتين قتال، والشرع لا يأمر بالمخاطرة إلى درجة أن تذهب النفس أو يسفك الدم، أيعيش الإنسان مرعوبًا مهددًا لا يأمن على أسرته ونفسه من أجل تطبيق بعض أفراد الشريعة، ورأيي أن تعم في النّاس ثقافة المساواة والتكافؤ، ويبيّن لهم رأي الإسلام عن طريق العلماء والدعاة ووسائل الإعلام والتعليم، ويُحارب التمييز العنصري في المدارس والجامعات والخطب والندوات والمؤلفات، وينقل النّاس تدريجيًا إلى وعي راشد حتى يصبح لديهم العلم الكافي بهذه المسألة، حينها يصبح الأمر طبيعيًا أن يتزوج الإنسان من غير طبقته في المجتمع المسلم، وقد حصل هذا في بعض الدول الإسلامية.
نحن أيّها النّاس سواسية من أب وأم، كلنا ذو دم أحمر وليس فينا من له دم أزرق، فأبيضنا وأحمرنا وأسودنا يعودون إلى مادة الطين الأولى التي خُلق منها آدم أبو البشر ولا تفاضل بيننا إلاّ بتحقيق تقوى الله بالعلم النافع والعمل الصالح ولي قصيدة:

ولا تحسب الأنساب تنجيك من لظى *** ولو كنتَ من قيسٍ وعبد مدانِ
أبو لهب في النّار وهو ابن هاشــم *** وسلمانُ في الفردوس من خرسانِ

منقــــــــــــــول​

 

[Skor m@k]

السلام عليكم
صح بلاك كلامنا ضرك تزعفي منو خاطرش حتى أنا راني مع كلام الأعضاء لي قبلي
أنت قلت ماشي عنصرية ولا جهوية واش تسميها هذي
أنا نظن بنات الجنوب أحسن من بنات الشمال فلعقالة والظرافة وهذي كامل علبانا بيها
أنت أول حاجة نقولهالك هي وعلاه يماك ماتقبلهاش خاطرش ماتفهملهاش
أنا عندي من فاميلتي تزوجو قبايل مع عرب ونورمال ولعروسة تعلمت لقبايلية
وولات في عام تهدرها مليح وماصرا حتى مشكل تاع لغة
أول حاجة أنت مراكيش تشوفي لسعادت خوك
راكي تشوفي الناس واش يهدرو عليكم وهذي راكي تعتابريها حاجة أهم من سعادة خووك
ثاني حاجة روحي سقسي خوك وين راه حاب يسكن وهذي ماشكيتش يكون راح يسكن في الصحراء ويخلي يماه وحدها
أهدري معاه ويفهمك على مشاريعو وتقدري تقنعيه يسكن مع يماه
ثالث حاجة كيما أنت راكي متعلقة بخطيبك لي راح يديك للخارج حتى هو تعلق بيها
واش راح نقولك أتفاهمي مع خوك وشوفو مستقبلو ماشي تشوفو هدرت الناس
وبما أنك قلت ماعندك حتى مشكل مع بعضاكم كيفاه يقدر يروح ويخلي يماه وحدها
هذي ماتدخلش فالبال تهمتوه في باطل أهدرو معاه ممبعد أحكمو عليه
وهذي تاع الجهوية غير أخطيكم منها هي لي خلاتنا ديما متخلفين ونعسو بعضانا البعض
وبنات الجنوب والله ماتندمو عليهم نصيحة مني ليكم ​

 

[فيتامين سي]

جيت
قبل منحكو في المشكلة و حلها نروحو نتخيلو شويا
تخيلي :X3: الادوار تقلب
انت هي و هي انت
و تجي اخت الخطيب او الانسان لي حب يخطبك تقولك منيش حاباتك انت قبايلية او علاش يديك نتيا و يخلي العربيات تغيضك !؟ او تقولك بنت حرام (تفكرت حداري تقولي لاي وحدة بنت حرام حرام حرام هذي الهدرة حتى ولو انسان معندهش اب و ام __مجهول النسب __ متقوليلهش هكدا الانسان ميخيرش اهله و حياته على هذي عمرك متسبي الانسان بيهم )
المهم نرجع للموضوع
نحط روحي في بلاصتك
خويا يجيب قبايلية يجيب وحدة من تيارت او ادرار من معسكر او من اي ولاية متأكدة الطيبون للطيبات ادا خويا مليح يلقى المرة مليحة و ادا ماشي مليح يلقا مرا ماشي مليحة
اللغة حنونة بشويا مع التعايش تتعلمها مرت خوك و ماماك و برجعو يفهمو على بعضاهم فقط نبعدو الافكار السيئة
نمدلك ابسط مثال كاين بزاف بنات تزوجو في ولايات و بلدان ميفهموهمش و تشوفيهم درك تقولي زايدين نتم و خوك ادا حبها يتعلمو مع بعضاهم علاش لا .؟؟ و درك مرجعتش تعلم اللغة صعب

حاجة وحدخرا يا اختي الناس ميدخلوش معانا للقبر يعني كلامهم ميزيد مينقص خليهم يهدرو منا للعام الجاي و من بعد !؟
فقط خمو شويا و وقفو مع خوكم انا ولو اخي نقوله ادا بنت اهلها طيبين نوقف معاه لاخر دقيقة المهم بعيش هاني خلونا نعيشو بلا الخوف من الناس بلا منقولو ناس يضحكو ناس ناس ناس
ربي يسخرلك و يسخرله و بفرح ماماكم بيكم
معاك عربية ...تقبلي مروري غاليتي

 

[Soumia hadj mohammed]

لا حول ولا قوة الا بالله
يا اختي يك البنت هذي منذ ان بدات مشكلتك حيالها لم ارك الا وتتكلمين عنها بانها بعيدة ، متتكلمش كيفنا ، عاداتهم مش كيفنا ، والخالة والدتك قالت : خايفة تكون بنت حرام ؟؟؟؟ لم الظن السيء دون معرفة اصلها ؟؟؟
يا اختي ارجعي خممي بعقلك شويا ، راكم تحكمو على البنت بلا ما تعرفوها ، يعني لو كنتي تعرفيها وبانت لك اخلاقها سيئة هنا واه نقلك راكي فمشكلة
لكن الاسباب االي وضعتيها كلها تصب في وعاء انكم لا ترضونها لمقرها وعاداتهم ولغتها ، وكأنك رأيتي فيها ما يخالف الذي أوصى به خاتم الانبياء سيدنا محمد صلّ الله عليه وسلم ،،،
فاظفر بذات الدين تربت يداك
....
وفقكم الله
مبارك عليك الزفاف سلفاً ، ربي يتمم على خير

نسيت قاع العنوان
يعني حابة تفسخي الخطبة تعك على جال خطوبة اخيك ؟؟؟
اختي استهدي بالرحمن
لا يؤمن احدكم حتى يحب لاخيه ما يحب لنفسه

 

[GI Joe]

laala lalaa ya l okht chahdi w staghefri
koun djiti thebi wahed men adrar w thani ghr howa 3and mamah w habatou yedi wahda griba lihol w nafss la langue w kolech, tgouli kifeeeh wech biha w maha9hech w khtou la dakhlet alors là capable ted3i 3liha w tkhafih yetbel 3lik w tgouli 3leh rahol ydirou hakda raha netsahfedh biha ki mama 2 mais fi bent ness nn hia l ghalt1 w hia li d1tou?? wechi had l 3a9lia deja khouk la 3aynou mamak tkoun bien yaw hna wala f wergl1 ydirha fog rasso kima raat telga makanch menha tedih mra 3liha mahma kan placcet l om whadha

w ma3a ihtiramati matekedhbich 3la rohek fiha chwia rassisme had l affaire,, rani na9ra f bejaia w cheft que ness alger w annaba w blida wa wa wa normal mais ta3 sahra chwia bark l lel bougiotes commes si hadouk na9ssin culture wala ma3labalich alors que non rana kamel kifkiiiiif mich logha wala lebssa ta3na li tbedel tekhmamna w bladna w dinna!!
pr ce qui est 3la zwadjek nti,, kouni mra m3a radjlek w diri nya w mart khok dir kifek nchallah

 

[السلطانة]

وعليكم السلام ورحمة الله وبركاته
اسمحيلي مي انتي ماكش نورمال
درك خوك حب هاذي الطفلة تساليه ؟؟
يحبها يعشقها يموت عليها حابها تكون حلالو انتي واش قلقك ؟؟خايفة من الناس يضحكو عليكم
انتي راح تتزوجي لراجل وتروحي للغربة اسكو خوك ادخل فيك وقالك متديهش؟او اعلاه تتغربي وتخرجي من بلاد القبايل ولا بلاد القور مليحة متطورة والجنوب الجزايري يعتبر تخلف !
مي اسمحيلي هاذا قرار شخصي خوك حب هاذ الطفلة خليوه يعيش حياتو
قبايلية اسمحيلي زعم انتي واش !!!
وتشوفي في روحك على بنت الجنوب اسمحيلي الناس كامل سواسية
وكلامك تاع بلاك تكون بنت حرام عيب عليك تتهمي الطفلة وانتي متعرفيهاش
الوقت اتطور وتبدل وانتي مازالك في لقبايل ميتزوجوش البراني ! على اساس القبايل واش مثلا الربي
يخي عباد كيما العيباد كل
مع العلم انا قبايلية واتزوجت خارج ولايتي وراجلي نايلي
وراني عايشة لاباس بيا مي اسمحيلي راكي غالطة مية في المية خلي خوك يعيش حياتو مع لي بغى ومتحكميش على غيرك قبل ماتعرفي وزيد ياريت تفهمي امك انو هاذا قرار خوك ومكنلاه توقف في وجهو برك وتدمرلو سعادتو
والسلام.

 

[Hakan]

الملاحظة الاولية :
مشكلتك كتبت في سطرين
مشكلة اخيك كتبت في عدة اسطر ..

يعني دوختيني نتاع الصح لغتك العربية سليمة مئة في المئة يعني راكي بالاك تحكي العربية خير من هذي الورقلية يعني اين هو مشكل اللغة
وانت قلتي ما نحكوش معاها يعني نورمال اولا يااختي كان الاجدر تسقسيو على الطفلة لانو الاسباب نتاعكم اللي راكم رافضين على جالها الطفلة
مازال اصلا ما تحققتوش منها :
-اولا انت حكيتي على الاخلاق وانتوما ما سقسيتوش على الاخلاق نتاعها
-ثانيا قلت تديه علينا وهل شرطت عليكم يسكن عندها
-ثالثا اللغة يعني مع احتراماتي للهجة الامازيغية عمي خدم في تيزي وزو عامين راهو يحكي خيرمن القبايل ..
يعني تعلم اللغة ساهل خاصة في المعاشرة
انت برك مدايرة وساوس
المهم انا مارانيش رايح نعقب على المقدمة نتاعك لكن لفت انتباهي انو انت مستصغرة بزااف بناس الصحراء وناس ورقلة
ووهذي نقلك راكي غالطة
اما فسخ خطوبتك يعني انت فضلت انو ترتبطي مع مغترب عايش في بلاد اجنبية
في حين ما فضلتيش خوك يتزوج ببنت بلادو ويعيش في بلادو
على الاقل هو غدوا كي يتقلق 7 سوايع يكون في بجاية بيسك رانا ماشيين في الطريق ونعرفوها مليح
وهاكي الدليل :
بجاية — ورقلة‎, المسافة بين المدن (كم، ميل), اتجاهات القيادة, طريق
وانت باش تجي من بلاد الغربة للجزائر لازم ديري دمونود نتاع رحلة والخرطي هذاك نتاع اجراءات السفر
يعني كي يتوحش هو يماه يلحق ليها قبلك يعني بركاكم من المثالية نتاع المسافة والتحجج ببعد المسافة لانو راني نشوف
انو المشكلة في الموضوع هي مشكلة انانية فقط ومشكلة اخرى هي العصبية القومية يعني خافين من العايلة نتاعكم
يزعفو عليكم اذا ديتو من بنات الاخرين في حين ما خفتوش انو خوك يزعف منكم لما يجيب وحدها يحبها هو المهم
ان شااء الله اللي فيها خير يقدمها ربي وانا ضني انو اذا تزوج خوك بهذي المراة
الام نتاعك مستقبلا كي تعرضيها باش تجي لعندك تقلك ما نجيش راهي نافحتلي مع الكنة نتاعي ههه امالا ديري حسابات لا تروحلك البلاصة نتاع يمااك ههه
بيسك النساء نتاع الصحراء ذكيات وما يدوموندوش سكنات وحدهم وما يرميوش العجوز نتاعهم كيما صاري في بعض الولايات لا داعي للتحديد سلام​

 

[باتنية و نص]

سلام عليكم

بدلاتو عليكم؟! حكمتو على الطفلة بلا متعرفوها

يعني نقولهالك بكل صراحة ...الشاوية ولقبايل عقلية 000 فيما يخص هذا الموضوع
وكي نقول الشاوية نقصد منطقتي. لكن الظاهر حنايا ارحم منكم..حنا مشكلتنا الوحيدة هي منحبوش يمدو الطفلة للبراني

لكن بالنسبة للرجال راهم جايبين من سوق اهراس ولقبايل وبسكرة..وراهم عايشين لاباس بيهم

انا من خلال وش قريت مشكلتك مشي فالبعد وانما مع ورقلة بالذات

وشي هي عنابة ووشي هي ورقلة يخي في زوج مشي نفس عاداتكم وتقاليدكم ..ولا لعنانبة يهدرو لقبايلية؟

وامك يقدر يزورها في اي وقت.ولا يقدر يديها معاه
بما انو ابنها الوحيد المفروض البلاصة لي يروحلها تروح معاه

انا نقول متستبقوش الاحداث
سقسو على الطفلة واهلها ..واذا كانت سمعة طيبة خليو الطفل يختار شريكة حياتو

مشي تروحو تزوجولو وحدة من عندكم بحجة العادات و التقاليد ..اومبعد لا قدر الله يصراو مشاكل وتظلمو بنت الناس معاكم

متغركمش المظاهر...

 

[aljentel]

أين هي مشكلتك ؟!!
لاارى اي مشكله انتي مخطوبه وزواجك قريب وشقيقك خاطب وربي يوفقه والزواج قسمه ونصيب ...
قالت من ورقله وخايفه لانها من ولاية ورقله والله عشنا وشفنا ..! قليلا من الحياء لو سمحتي ..!

 

[Djaouida]

سلام عليكم
بون ختي هادي مراهبش مشكلة كبيرة نعرف شعال من وحدة قبايلية و متزوجة مع واحد عربي وعايشين وهانين نورمال هو ختار هادي بيسك يحبها ورضا بيها ختي راكي تقولي عنا غير هو تقدري تخسري خوك علا جال دي لهدرة؟ هو كلش راه مكتوب عند ربي يلا ربي كاتبهاله راح يديها ونورمال انا بنسبة ليا نتوما راكم تكبرو فل موضوع باطل اهم شئ هو اخلاق وناس ورقلة مشاللله عليهم نتي راكي خايفة من هدرة تاع ناسكم ونسيتي راحة ولهنا تاع خوك وين راهي وراني متاكدة لوكان صرا معاك هاد شي لوكان مخممتيش هاك.

 

[{مُدَلَّلَتُهُ}]

لوكان جابها من عنابة ولا العاصمة معليش وورقلة لا علاه تع عناابة والعاصمة يهدرواا القبايلية -_- هاذي غي كيما راكيش عنصرية

و لوكان جابها من الغربة تاني معليش بصح ورقلة بعيدة بزاف -_-

و كي عادت من ورقلة وليتي خايفة لا راهي بنت حرام و تديه بصح لوكان جات من تيزي ولا بجاية رااكي ضامنتها انت بلي ما تديهش -_-

موضوعك غلالي الدم في راسي أكتفي بعدم التعقيب خير ​

 

[زاد الرحيل]

اه يا غالية حلال عليك و حرام على اخوك بلاك هذاك مكتوبه اعلاه تتحيروا و صراحة القبائىل يحبوا يديو من عندهم فقط و جبايلية ايضا يكرهوا الغريبة كره اعمى و يديروا لها الف سبة
قولي لامك تخلي ابنها يختار بنفسه و حذاري تضلمها لانها غريبة بلاك تكون احسن مليون مرة
اما حكاية تدية فقولي لها كاينة حاجة اكبر تدي بلا استاذان يعني تدعي ربي يحفظه فقط و انت كملي زواجك كاين ربي و رحمته واسعة

 

[♫الباحثة عن الحظ♫]

سلام عليكم
والله يا اختي شفت موضوعك مقدرتش نفوت بلا ما نعلق
الحاجات الي حيروني في كلامك وقلقوني هو من جهة تقولي مراكيش عنصرية و من جهة يا يما على تبهدايل
علاه تبهديلة جايبين مهبولة من زنقة ياك طفلة بنت ناس بنت فاميليا راح تخطبوها على سنة الله و رسوله
بلوس تقول بنت حرام علاه بنت حرام انتم راح تخبطو بلا ما تسقسو عليها ولا عائلتها
بلوس خوك وش يكون امير و لا ملك باه تقولي بنات ورقلة مش بنات ياو الحاير و المليح موجود في كل بلاك
هو طلب لحلال و طفله عاجباته انا مش فاهمتك انت خايفة على يماك تخلوها وحدها ولا خايفة على تبهديلة من يجيب من ولاية اخرى
ولا مشكلة ان كفلة من صحراء جاتك بيزار قلتي معليش عنابة لاو بليدة مفهمتش من جهة قلتي متمدوش للبراني و متجيبوش من برا
لكن انا نعرف لقبايل عادي يزوجو بناتهم عندنا في عايلة جايبين قبائليات والفو الهدرة و تعلموها و طفلة متعرفش لغة تعاشركم تتعلم من عاشر قوما 40 يوما اصبح منهم
يماك يقدر يديها خوك معاه و لا يجيب لعروسة تعيش معاكم وين مشكل
انت تتزوجي و تروحي لدارك و هو يجيب مرته علاه قاتله منحتاجش يماك ولا منسحقهاش
علاه تحكمو على الناس من مجرد افكار تافهة تعودنا عليها
هي تاني عايلتها تخاف من راجل هذا و تقول بنتي رايحة بعيد
اما نقولك حاجة الخوف فيها فيها من الجهتين للكن الانسان يتحكم عليه من تربيته واخلاقه مش من ولايته
قادرة تدوها قبايلية توريلكم الويل يا اختي استغفري ربي هادي ولية لوكان تشوف كلامك تتجرح
نقولك من الاخير اخت انت مشكلتك الكبيرة مش يماك مشكلتك ان راح تجيبو من اصحراء راهي تبالك تبهديلة علاه الله اعلم السبب
ربي يجيب الخير و لحلال ربي يسهلو يا اختي الانسان يفرحله مش يندب عليه
نظن عندك عقدة ان لقبايل خير من لعرب
خطيبك معنده حتى ذنب و خوك الا باغي يتزوج و طفلة بنت ناس علاه تفسدوها عليه ويماك متخافيش راح ممكن تكون هي الي تحطها في عينيها اكثر من بنتها
ربي يجيب الخير

 

[ليليا مرام]

السلام عليكم ختي
اسمحيلي نقولك هدرة ولو زعفتي نورمال
شوفي اول شي هدرتك على بنات الصحرا هكذا ما عجبتنيش اطلاقا واشبيهم اختي نعم التربية بنات مأصلات وتربية ودين وعاقلات نعرف بزاف بنات من ورقلة روعة فكل شي وزيدي قادرين تدوها قبايلية ودير فيكم رايها كيفاه تقولي انا مش عنصرية اواه اسمحيلي لازم قبايلية وزيد من عنابة. من بليدة نورمال مي صحراويه لالا وتبهديلة باه نقابلو الناس علاه ورقلة هذي ملهى ليلي اسمحيلي كلامك كبير بزاف هاجمتو بنت التاس قبل ما تدخل عندكم وعلاه هاجمتيها بلاما تعرفي حتى نيتها وبلاك خوك اللي هو صاحب القرار بلاك ظلمتيها وخافي ريي فبنت الناس
والله يا اختي ما تعرفيش الخير وين بنت الصحرا والا بنت الغرب خوك مقتنع بيها وعلاه واقفين فطريقو كاين داوهم من لافامي ودلرو فيهم العجب
وانتي علاه تحبسي خطبتك خوك يتزوج يدير دارو وانتي ديري دارك ولو تتزوجي هنا مش فالغربة وين راه الراجل اللي يخليك كل يوم عند يماك هذي ماكانش منها عارفين امك ما تسمحيش فيها مي اكيد كاين حل
انا واش نقولك الله يهدي وبلاك بنت الناس مليحة وظلمتوها اسمحيلي كلمتي نقولها ماراناش فوقت قبايلي يدي قبايلية والغربي يدي غربية مكتوب ربي كي يقول كلمتو ما توقفي فيها لا انتي ولا اي واحد لو الطفلة هذي يكتب ربي لخوك تكون مرتو وام اولادو ما ديرو والو
موفقة

 

[Mademoiselle carbone]

السلام عليكم
واش بيك طحتي على بنات بلادي
انا وحدة من ورقلة و فحلة و نص
باش نهنيك يخي
بناتنا لي راكي تحكي عليهم بنات الصحرا جامي سرقو الراجل و داوه
بالعكس ميتشرفوش بالراجل لي يتبع مرتو و يخلي يماه الا اذا كانت هي الواعرة و مش مستقبلتها هنا بنتنا دير لي عليها باش ترضيها
ارتقوا شوية
مزال كاين حاجة اسمها بنات الصحرا و بنات التل ؟؟؟؟؟؟؟؟؟؟
يخي رانا قاع مسلمين يخي رانا قاع خيات في الاسلام
علاه دمرو رواحكم و دمرو في وليدكم
نقولك حاجة :
كي تزوجي بولد الصرا تعرفي على شكون كنتي تهدي ختي
تعرفي بلي كنتي تهدري على اشرف النساء
قلقتيني
سلام