انطلاق حملة رمضان أطهر ، أخف ، أجمل

[nina2tessy]

سلام عليييييييييكم

​

ايوااااه بعد السلام​

يبدا الكلام :p:p:p​

جا الوقت لي نبداو فيه​

لقيتكم ما شاء الله هكا عندكم الهمة حاجة تشجع​

و رح نبداو بأهم حاجة​

رمضان أطهر​

انعم اييه​

الفنيانات لي ينوضوا منفخين كي المطلوعة خلاااص مابقاش ​

جا وقت الجد​

نبداو بصلاة الفجر​

علاه صلاة الفجر يا نينا ؟​

لأن فيها بركة ​

و بيها رح يطوال نهار تاعنا دونك يولي عندنا وقت أكثر باه نهتمو بالجمال تاعنا ​

و طاقة أكثر باه نحيو الشحمة من المناطق الجهوية و البنايات الفوضوية ​

راني وليت الهبرة الله الله​

كون جاو يقدرو ياكلوني يعقبو بيا رمضان خخخخخ​

المهم نبداو بصلاة الفجر كيما قلت ​

ولي عندها دين غير تصوموا ​

الفجر راهو على 4.25 بتوقيت عنابة​

هاو ليكم هاد الموقع شوفو فيه الولاية لي تحبو​

مواقيت الصلاة في الجزائر | مواقيت الصلاة​

هاد الموقع استفيدوا منو راهو مليح بزاف​

و في كل صلاة يأذن​

ولي عندها بورتابل ( سمارت فون )​

كاين وحد التطبيق اسموا NEVER MISS FAJR​

يعني عمرك ما ضيعي الفجر :Love::Love:​

علابالي يا الادراة التطبيقات عندها قسم وحدها​

بصح لازم نستعملوا هاد التطبيق ​

المهم هاد التطبيق كيفاه يخدم ؟​

ينوضك بسيف عليك :X3::X3:​

الا انتي قبيحة هو سامط​

و السامط يغلب القبيح ​

المهم تحمليه عادي و تختاري الا تحبي ينوضك قبل مع ولا بعد الفجر​

و تختاري كيفاه ينوضك​

هنا نجو للمسقي ​

كاين shake يعني لازم تنفضي البورتابل 10 مرات ​

سينون والله ما يسكت​

ولا TRIVIA​

تجاوبي على أسئلة​

ندير عليه موضوع ولا فيديو خير​

الا درتي وحدة من هادو وعاودتي رقدتي​

​

خلاص راكي رحتي فيهاااااا​

غدا نبداو ؟​

روابط التحميل​

لي عندها android تسمى google play​

Never Miss Fajr – Applications Android sur Google Play​

ومن itunes​

Never Miss Fajr on the App Store​

أيا سلام البنات :Love::Love::Love::Love:​

تهلاو في التعليقات هههههههه :kiss:​

 

[nina2tessy]

تقراو و تروحو
صحيتو دوك نزعف

 

[Cristal BR]

بارك الله فيك و جزاك خيرا خيتو

 

[السلطانة]

وعليكم السلام روحمة الله وبركاته
اه اه يانينا البنات راهم من ورا النت الثقيلة ديجا انتي من عنابة تهلايلنا في الكابل جارتي العزيزة
قولهم يزربولنا شوي بيه
يعطيك الصحة صح صلاة الفجر لازم علينا نتغلبو على انفسنا ونوضولها يعطيك الصحة على لابليكاسيون راح نحملها
أول خطوة صلاة الفجر
ننتظر الخطوة الثانية

/////
@بشرى ملاك
@بشرى خير
@Twinkle Stars
@Djaouida
@دعاء الجنات
@الورد الأحمر
@الحلم الوردي
@حكيك
@Lovely ღ smile
@أم منيــــــر
@المتفآئلة
@الشآعرة الفرنسية
@لاريمان
@الصحافية الساخرة
@sanaya
@ميلينا
@عبير الغرام
@نعمات
@رضا الرحمان غايتي
@لؤلؤة قسنطينة
@Soumia hadj mohammed
@فيتامين سي
@Malika Tlm

 

[nina2tessy]

شكرا لكم حبيباتي
ان شاء الله الخطوة الجاية رح نعدلو الوزن تاعنا
يعني نمرو للطاقة الجسدية بعد ما مدنا للجسم تاعنا طاقة روحية

 

[ضآحكة مستبشرة]

السلام عليكم و رحمة الله
شكرا لك اختي بارك الله فيك على الموضوع الرائع
جعله الله في ميزان حسناتك
ان شاء الله جميع البنات يستفيدوا من نصائحك
جزاك الله خيرا

 

[cosette]

السلام عليك
الحمد الله من جهـة الصلاة
ننتظر الخطوة الثانية
تعقيب بسيط لو سمحتي
ممكن تقولي مثل ماقلتيه للبنات المراهقات ذوي 13سنة فما فوق
فهُن بالغات ,,لذلك يتوجب عليهن الصلآة
شكرا لك اختي ننتظر الخطوات الموالية بإذن الله
@Soumia hadj mohammed
​

 

[Soumia hadj mohammed]

سلام عليكم
اهلا بك اختي مجددا
الحمد لله مع الصلاة تع الفجر راني حكمتها
بارك الله فيك

 

[زاد الرحيل]

احسنت الطرح خاصة الصلاة ثم الصلاة و المنبه هو الوسيلة الوحيدة التي توقظ انا شخصيا استعملته و الحمد لله نستيقظ اما الصيام فهو وسيلة اخرى للتأديب لكن هناك من يصوم وعند الافطار ياكل قيمة ثلاثة ايام في ليلة واحدة كيف سينقص في الميزان
شكرا لموضوعك و شكرا للأخت @أم ياسمينdz على الإشارة إلي للمشاركة

 

[nina2tessy]

كل شيء له حل باذن الله

 

[بشرى ملاك]

سلام عليكن
الحقيقة كنت نوض للفجر وصدقوني بدون منبه كي يجي وقت الفجر نسمع الاذان ونوض ويفوت نهاري مانحكيلكمش لكن للاسف من نهار بدات كرشي تكبر تقلت ومارانيش نوض راني عياااااااااااانة بسيف راني نوض ونتمشى الله يغفرلي

 

[آمِيْرَتُه]

السلام عليك
جزاك الله خيرا
نسأل الله أن يبلغنا رمضان ونحن في صحة جيدة
معا من أجل كسب الآجر ، من أجل رمضان أطهر

 

[Malika Tlm]

السلام عليكم
شكرا اختي موضوع شباب وبزاف
ربي يبلغنا يارب ويثبتنا
مشكورة

 

[Malika Tlm]

السلام عليكم
شكرا اختي موضوع شباب وبزاف
ربي يبلغنا يارب ويثبتنا
مشكورة

 

[cosette]

السلام عليكم
سامحك الله اختي @بشرى ملاك
لا تسهي عن صلاتك حفظك الله
سلام عليك​

 

[Djaouida]

سلام عليكم ختيتو
واه صلاة لفجر يليق نصليها والله راني ندابز في روحي علا خاطرها
بيسك كل ما نريقل رفاي نطفيه ونرقد راني في مدة هاك لازم ندير بوسيبل تاعي باه نبطل دي طبيعة

 

[بشرى ملاك]

السلام عليكم
سامحك الله اختي @بشرى ملاك
لا تسهي عن صلاتك حفظك الله
سلام عليك​

امين، راني نصلي غير واش مانضش للفجر في وقته راه متعبني الحمل بزاف

 

[nina2tessy]

لسلام عليكم ورحمة الله تعالى و بركاته
هذي مواضيع ننشر فيها كل ليلة في المجموعة تع الفايس NINATY FAM على مبادئ على السمنة من الالف الى الياء
موضوع الليلة ان شاء الله رح يكون على القولون العصبي و علاقتو مع السمنة و الحلول لي لازمة ليه
منقدرش نحطلكم رابط المجموعة الله غالب الادارة قالت ممنوع
القاولي حل
.............
السلام عليكم و رحمة الله تعالى و بركاته
معاكم الدكتوغة احم احم نينا ههههه ‍‍
المهم كيما تفاهمنا موضوع الأول نفهمو فيه الوزن
كي تطلعي للميزان راح يبانلك رقم
يبدا من 50 و يا دلالي الا فات 80 متفراش
المهم دبدوبات
جيبي ورقة وقلم و سجلي
و افهمي الجسم تاعك مليييييححح باه تعرفي تتعاملي معاه
و مش أي واحد يكلحك
الوزن تاعك هاداك هو عبارة عن مجموعة أوزان
يعني
الوزن = وزن العظم + وزن العضلات + وزن السوائل ️+ وزن الدهون
يعني الوزن الزائد ميعبرش على الدهون فقط
قادر واحد يكون وزنو 80 كغ لكن الجسم تاعو كامل عضلات
و لا كيما يقولو وحدة عظمها خشين ، يعني العظم عندها هو لي يبينها سمينة و هي مشها سمينة
تفاهمنا فيها النقطة هادي ؟
نكمل ؟
شوية تفاعل و جيبو صحاباتكم الدبدوبات

......
السلام عليكم
نكملو حبيباتي
وين وصلنا
هاه ، بلي مش رقم زايد في الميزان معنتها زيادة تع دهون
بصح هادا مش معناه تمدو لرواحيكم les excuses نو نو نو
صح نتأكد من المشكل ، هو ولا لا
وش المصدر تاعو ، مبعد نفوتو للحل أوك ؟
هيا
كي عرفنا المعادلة تاعنا من واه مكونة ، خدمولي المخيخ تاعكم شوي ، الا زاد الوزن يعني واحد من هادوك راهو زاد والا نقص يعني واحد من هادوك راهو نقص
نقطة مهمممممة جداااااا ركزوا معايا
رح نخلي العظم و نهدر غير على الثلاثة الأخرين
نحكموا متال تع وحدة زادت في الوزن
يعني عندها ثلاث احتمالات ،
يا خلاتها بالماكلة و الرقاد و بيع البلاد و زادت شحمة
يا زاد حجم السوائل و هنا ممكن كاين مرض سواء في الكلية و الكبد des oedemes
ولا زيادة في العضلات ....كيفاه عضلات ، البنات لي يبداو رجيم و يبداو رياضة
متلحظوش تزيدو في الوزن اليامات الاولى قبل ما تبداو تنقصو ...ايييه صح صح ... خاطر العضلات تبدا تزيد و كي تبدا تخدم لتم باه يبداحرق الدهون
يعني مش تنقزي زوز مرات و تجري زوز خطوات و كي تلقاي روحك زدتي تقولي لاااا سبور مايوالمنييش
مكانش منها (خليولي نقطة هادي دوك نرجلعها )
.......
لسلام عليكم و رحمة الله تعالى و بركاته
وصلنا البارح و حكينا على الوزن وش معنتها
و خذيت مثال زيادة ،ليوم باذن الله ناخذ النقصان
اصبرريييي متقوليش انا زايدة وش دخلني
لااااا لازم نفهمو مليح
دوك البنات
وحدة الوزن تاعها زايد ....دارت ريجيم
و بدات تنقص
هل ؟ يا هن درا كيما تقول خميسة هههه
الدهون لي نزلت
كيما تفاهمنا .....مش متأكدين قادر يكون الدهون و لا عضلات ولا سواائل
في حالة أنو ريجيم تاعها غير متوازن و لا غير صحي
قادرة تكون تنقص في الماكلة لدرجة انها خلات الجسم تاعها ياخذ من المخزون لي فالعضلات
فينقص حجم العضلات ، و هاد الحاجة مضرة بالصحة ، أقل حاجة تديرها تولي تحس بالضعف ، يعني ماكانش طاقة
كاين لي تدير ريجيم مليح
بصح تنسى تشرب الماء و لا المأكولات لي تخير فيها تخرج الماء من الجسم تاعها
و هاد الحاجة تدير جفاف قادر يخلاص بوفات
و لا راحت عند عمي العشاشبي ، مدلها الخلطة السحرية الناسفة للدهون
المشكلة أنو 90 بالمئة من هاد الخلطات مش ناسفة للدهون
و الا نسفت حاجة رح تنسف الكبد و الكلية
انعم ايه
نديرو موضوع ان شاء الله على الخلطات والخزعبلات و وش مفيد و وش ضار
و كيما قلنا
لي دير ريجيم تاعها قدقد
الدهون لي رح تهبط
مش العضلات
مش السوائل
كاين حالة ينقص فيها وزن العظم و هي حالاتت مرضية معقدة مندخلش فيها نخربطكم
المهم لبنات
لازم تعرفوا وش ديرو ، راكم تتعاملو مع مرض لي هو السمنة و كل خطوة بحسابها

سلااااااام

 

[cosette]

الحمد الله
وزني خفيف
كونتغاغ اني حابة نسمان
شكرا لكاختي

 

[nina2tessy]

الحمد الله
وزني خفيف
كونتغاغ اني حابة نسمان
شكرا لكاختي

ايه أختي راني نمد في المبادئ باه لي تتحكم في الوزن باه لي حابة تسمن تسمن و لي حابة تشيان تشيان