قالوا بكري : دراهميك يرحموك , قولهم : اليوم بدراهميك و يكرهوك..

[الصحافية الساخرة]

جيش , شعب المهم نسيت كيفاه يقولوها كل مرة يبدلوها ههههه (المهم أنا لقيت مقدمة للموضوع وخلاص )

كي الباطل كي اللي بالدراهم , كي تاع الدولة كي تاع البريفي ,, تروح لسبيطار تاكل الابرة واحد 10 حتى تحمر و من بعد تخضر و من بعد

تزرق وتبعث مصفار للدار وما تبراش يزيدوا يبعثوك لطبيب مختص (تاع الاعصاب حذاري تقربو ليهم يوصفولك دوا تاع مهابل )

المهم بدراهميك يرحموك يقولولك البريفي خير من تمرميد السبيطار وتصدق وتروح وبدراهميك يزيدوا يمرضوك ويجروك , واونبليس تقعد

حياتك كاملة تداوي على "الحمى" ههه والعبارة المشهورة عند الطبيب "بربي ان شاء الله لوكان تداوم عندي تبرى " وهو على جال

120 الف يديرلك كل شهر رانديفو مالغري بريت ( والدوى يبقى هو هو , وأنت تولي ماشي أنت ) قولهم : بدراهميك و يكرهوك


وطبيب الأسنان تاع الدولة تظل عام و أنت جاري على جال ضرسة ثقبتلك (من الحلوى و اللحم تاع العراس هههه) وديما يقولولك

الشهر الجاي ولي مكانش لاناستيزي و الشهر الجاي تولي ماكانش الماتريال ههه وتصبر والشهر الجاي تزيد تولي تلقى الطبيب في

عطلة حتى يوصل بيك العام الجديد و ضرستك تزيد تتثقب هههه ومن بعد "بدراهميك يرحموك" يقولولك شوف دونتيست

بالدراهم خير , هيا معليش نروحوا نقضوا على السوسة بالدراهم ديك الهردة ياه هههه , يزيد يوسعلك فالثقبة ويسوديهالك

زعما تحسب خدمته صحيحة 3 سمانات تبلع الثقبة ماكلتك بلاصت المعدة هههه يا محاينك 140 الف ولا كتر تستمع بضرستك

غير شهر ؟ (واعرة هذي وصرات لبزاف ناس ههه) قولهم "بدراهميك و يكرهوك"


مام القراية "يا طلاب" من ال A الى Z " قصدي من الابتدائي للجامعة ههه ليكور ولاكلاص كيف كيف , ماكلاه تديرو دروس

خصوصية الاستاذ المجاني اه قصدي "التعليم المجاني" خير , وحلو (التشويش و الغش و الاجوبة والشرح باطل حلو كتر على

العسل ههه) , مالغري الاستاذ ما يفهمش و تقدر تقوله عاودلي ويديرلك استدراك (سيرتو للبيام و االباك عطلة 15 تمارين ومراجعة

بااااطل ) هههه ولكن كي يكرهوا الوالدين من ولادهم يقولوا "دراهميك يرحموك" عفوا (دراهميهم) و تبدا مع الدروس الخصوصية

كل ما يزيد عدد الطلاب فالقسم يزيد يطلع لبري ب 20 الف هههه وكي تسقسي يديرلك استدراك ليك ولاكلاص و يحسبهالك مع الشهر

تاعك (يزيدلك 50 الف حق ساعتين استدراك ما طلبتهش يديرهولك هههههه) , وزيد تقرى مع 50 عبد فبواطة زالاميت ههههه

والظلمة تدير نواظر وعينيك صحاح تالموا السبورة مخربشة (تقول قط كتب عليها ههههه) , و التمارين اللي حليتوهم يعادهملك

وبلاصت ما يحلهم هو يعطي للست "شطورة" ويختبر ذكائها و تولي حصة "اكتشاف انشتاين جديد"

قولهم "بدراهميك و يكرهوك"


منحكيش على الخياطات اللي تقعدلك عامين وانتي تستنى فقماشك يتخيّط , والعام الثالث تبعثهولك بار تيليفون "سمحيلي مرضت وووو

روحي حني بيه واقيلا نبات نحلم بيك و بيه , ولا تخيطلك لبسة على لاطاي تاع بختة ولاطاي تاعك تعوم فيها ههههه

ولا تحولك مودال حبيته الى "ربي يخلف عليك" و على هذي الصنعة مليحة هههه و على هذي الدولة فتحت دار الطلاّب اقصد

الشباب و التكوين المِحَني اه عفوا المهني للشباب , وهجمنا تسجيلات سهلة تخلص 20 الف حقوق التسجيل (مي قالو باطل ههه مي

معليش ماشي بزاف ) و البنات يحبوا الخياطة و الطرز (الطبخ والقاطو يعييو المعدة خلونا هههو) , مالا اذخل لخياطة للتكوين تتعلم

شوية "التشريع و الرياضيات x +x = 2x " ههههه ومن الصباح للعشية وطول العام وانت تجبد على جال ديبلوم بلا ما تتعلم

الشهر الاخر تتعلم تدير لبسة للبوبية هههه , وبدراهميك يرحموك يقولولك شوفي خياطة تعلمك خير , ذيك الفكرة يااه ,

دراهمي اجروا خياطة تعلمني ثوثسويت هههه , تقرى يوم واحد فالسمانة وساعتين برك تخرج تعدي على قماش بالمشينة برك ,

والفصالة لازم تشوف خياطة توقف عليك هههه

(معلابليش هذي اسك عندنا هنا برك ولا ؟) قولهم "بدراهميك و يكرهوك"

وأنتوما مع "دراهمك يرحموك

أو

بدراهمك يكرهوك

؟؟؟

لكم الخط

"فطيطمة"​

 

[الصحافية الساخرة]

اروااح لهنا @mohamedfathi وليتلنا بائع عملات او انشط شويا فيها دراهم
@sanaya اووو راكي مدوخة وينك هذا ارواحي تشوفي ههههه

 

[الورد الأحمر]

السلام عليكم ورحمة الله وبركاته

والله ما تدري وين يكتبلك ربي الرحمة مرات بدراهمك ومرات باطل.

بكري كي بداو يظهر لبريفي كانت مقولة بدراهمك خير سارية المفعول مبعد الشعب الكل تحول فجأة للاباس بيه وعاد الكل يجري للبريفي مالا رجع كي لبريفي كي الحكومي كلش زريبة في زريبة ونحكي هنا ع القطاعات الكل.

بصح لي يتعب في القطاعات هو قطاع الصحة كي دراهمك كي باطل ترخص يعني ترخص بالاك هذا هو شعارهم "نحن هنا من أجل الشعب ولنرخص الشعب" تحيرلك تروح لكلينيك تلقى الغاشي والبيسطون وانت مخلص قريب مليون تم ع جال ليزاناليز والراديو ولا مدري واش راح تدير ولازم لازم لازم تكمل عليك تم تتقابض ومبعد تلقى الرجال يتخلاوان بين بعض والله عندها الحق وين راح لسانك يا عمي شبه الراجل كي عاد عندي الحق لاماه ما كسرتش انت الدنيا ع تاحق هذا راهم يخافو من الرجال مي بفففف.

أنا على جال ضرسة بقيت قريب عامين وأنا مخليتها هكاك وأنا ندير في عملية بحث ع الدونتيسث تاعي لي بدلت المقر تاعها وراحلي النيميغو تاعها وبقيت مش عارفة وين راحت وآخرتها لقيتها وأخيرا خدمت لي خدمت وقلعت لي قلعت والله يجازيها خير مازالت تخدم من قلبها ومن 2006 وأنا نخدم عندها ولي خدمتهم للدرك ما تزعزعو ما تحركو ما صرات تاع تكسرو

ومرات تلقى الرحمة في تاع باطل ويسهلك ربي حتى بيك بين روحك تحير تقزل سبحان الله كون رحت للبريفي راني مازلت نتمرمد.

معرف حكاية زهر ولا مي المهم كل مرة وين يسهلك ربي ومرات تكتب تعسر ومعرف واش الحكمة منها مي آخرتها تفرج بصح مع أنو فرجت نكونو مازلنا ما فهمنا الحكمة من أنها عسرت.

الخياطات :Love: لي نموت ع حكاياتهم فكرتيني في عرس ولد عمي أنا وخواتي خيطنا وخيطنا وخيطنا ووجدنا وخوات لعريس ع أساس حطو باه يخيطو وآخرتها وصل عرس خوهم وما وجدوش حوايجهم مالا احنا ضربنا الحطة وهوما بقاو بقندورة يدورو ومغزلين وشحال عجبني الحال وقتها كانو مطابيينلي ع السيستام مالا عجبوني شح .

مع الخياطات لازم ديما لكذب اذا تحتاجي حاجتك في جويلية قوليلها في جوان ولا قدمي حتى تكرهي وعلى ربي لا وجدتلك ديك الحاجة. الحمد لله عمري تمرمدت مع خياطة صافا راني جايبة روحي وكي نحصل عندي خواتي يفكوني. واقيلا ندير برك معاك كونفوصيون نخيطلك مي نضرب فيك ضربتي .

هيا مغسي ع الموضوع