- إنضم
- 13 أفريل 2013
- المشاركات
- 14,618
- نقاط التفاعل
- 54,537
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السلام عليكم أهل اللمة الكرام والغاليين واسعد الله أوقاتكم
رمضان كريم تصوموه بالصحة والهنا ان شاء الله
ربي يقدرنا ويقدركم على الصيام والقيام وصالح الأعمال
اخوتي الكرام وأخواتي الكريمات اليوم حبيت ندير واحد المبادرة ونتمنى تتفاعلو معاها
صراحة الجميع يعرف أنو الانسان في شهر رمضان يغتنم الفرصة للعبادة والصلاة والدعوات
خاصة في الثلث الاخير من الليل تكون الدعوات بإذن المولى مستجابة وهادا أحب الاوقات لقلبي
صراحة لي نحب ندعي فيه، ولأني مانحبش الدعوات تكون ليا برك نحب نشارك الجميع دعواتي حتى ناس مانعرفهمش
نحب ندعي جماعيا، المهم هاد الامور تبقى بيني وبين مولايا، وصراحة ناس اللمة لدرجة مكانتهم كبيرة في قلبي
مانقدرش نفوت سجدة ولا ادعية بلا مانذكرهم كاين لي نذكرهم بالاسم خاطر علابالي واش يحتاجو من دعاء
والبقية ندعي بالجملة، ولكن حبيت أنو نخصص لكل شخص دعوة حابها ومتمنيها حابة ندعيلكم بالاسم واحد واحد
اقسم بالله، وندعي لكل شخص بالدعوة لي حابها
هادا شهر الخير والبركات والرحمة والمغفرة مليح انك تدعي ربي، ومليح تاني انو تجيك دعوة من شخص يدعيلك في الغيب
يمكن دعوتو تجيك في لحظة نتا مهموم وتفرج عليك
المهم الفكرة لي حبيت نوصلها، مادابيا كل عضو يمر من هنا يخليلي دعوة حاب يدعيها ،كل شخص في بالو حاجة حابها تتحقق يخلي في رد الدعوة لي حابني ندعيلو بيها، كاين لي حاب ينجح وكاين لي حاب يتزوج وكاين لي عندو هم وكاين لي عندو مشكل وكاين لي حاب خدمة وواحد حاب يسهلو ربي في امر معين، ماكانش قد لي يدعي ربي مباشرة وبنفسو
بصح حتى دعوة بظهر الغيب عندها ميزة الله يبارك لحديث الرسول عليه الصلاة والسلام
عن أبي الدرداء رضي الله عنه قال: قال رسول اللهِ صلى الله عليه وسلم: (مَا مِنْ عَبْدٍ مُسْلِمٍ يَدْعُو لأَخِيهِ بِظَهْرِ الْغَيْبِ، إِلاَّ قَالَ الْمَلَكُ: وَلَكَ بِمِثْلٍ) رواه مسلم، وفي رواية له عن أبي الدرداء مرفوعاً: (مَنْ دَعَا لأَخِيهِ بِظَهْرِ الْغَيْبِ، قَالَ الْمَلَكُ الْمُوَكَّلُ بِهِ: آمِينَ، وَلَكَ بِمِثْلٍ)
صراحة حابة أنو الملائكة تقولي ولكِ بالمثل وحابة في نفس الوقت ندعي لشخص ضاقت بيه وتفرج عليه وندي الاجر
الهدف تاعي من هاد الموضوع هو شخصي يعني ماش الهدف منو كموضوع وفقط، حابة نجمع دعواتكم خاوتي
وكل يوم نخصص مجموعة بالدعاء، فرج همكم والله يفرحني وتحقيق امنياتكم يسعدني
لي عجبتو الفكرة يوضعلي اي امنية واي دعوة يتمناها ولي عندو امنية سرية يقدر يرسلي امنيتو عبر رسالة خاصة
ولي حاب انو يدير نفس فكرتي يقدر يفتح موضوع آخر يكتب "دعوة مني لكم" ويوضع اسم عضويتو قدامها
وحنا نزيدو نشاركو، ماتتخيالوش انك تكون قاعد وكل شخص يدعيلك من كل بلاصة واحد في سجودو
وواحد في الثلث الاخير من الليل وواحد في المسجد، مافيهاش عيب انو نتشاركو الدعوات
نتمنى من قلبي نسمع دعواتكم وربي يحقق للجميع مبتغاه ان شاء الله
وربي يحفظكم وين ماكنتو ويسهلكم كل ماهو صعب
تحياتي
آخر تعديل:
راح نتفكرك بهاد الدعوات ان شاء الله
