يوميات صائم """ احكي على نهارك """

[Hakan]

السلام عليكم اعضاء لمتنا الطيبة
ان شااء الله يكون اول يوم للشهر الفضيل مليح وجاز بخير مالغري رانا في نص النهار
المهم باش نحقو اكبر متعة في هذا الشهر الفضيل قررنا نفتحو موضوع لاعضائنا الكرام
محتوى الموضوع انو خلال يوم الصيام تصرى بزاف اشياء مهمة للعضو ويحب يحكيها هاذ الاشياء يحكيهالنا للاستمتاع فقط والترفيه عن النفس
الموضوع غير مخصص للدردشة بالنسبة لعشاق مثل هذه المواضيع وان شااء الله اعضائنا الكرام يلتزمو بقوانين المنتدى والخيمة كذالك
يعني ملخص الموضوع احكي يومياتك في رمضان وكيفاه قضيت نهارك نتاع الصياام وبالتوفيق للجميع والمجال مفتوح ​

 

[لؤلؤة قسنطينة]

السلام عليكم
فكرة هايلة ماشاء الله
والله يعطيكم الصحة وبارك الله فيكم راكم قايمين بالواجب عمري شفت اللمة زاهية بالمواضيع كيما هاد العام
ربي يوفقكم للخير ان شاء الله ومزيد من التالق يارب
المهم باه الرد هادا مايروحش خسارة ويعتبر دردشة وباعتبار نهار اليوم أول ايام الشهر الفضيل
رايحة نحكي واش درت فيه، من عادتي ككل رمضان نبقى ساهرة للفجر نقرا قرآن ونخلي آخر ساعة قبل الفجر للصلاة
ومن بعد نكملها قرآن حتى للفجر، هاد العام معرف راهو التعب رشالي عظامي هههه اضطريت نرقد على 12
ونوض على 2 باه ندي قسط من الراحة احسن من انو نبقى ساهرة ونخربط الحالة في بعضاها هههه
وقسمت وقتي نص ساعة قرآن والباقي صلاة وقرآن حتى اذن الفجر، كنت معتادة نقرا قرآن ورا الفجر
لكن هاد المرة رقدت طول، بصح نضت بكري 7 كانو عينيا مفتوحين ههههن كالعادة العمل في البيت وكلشي
9 دخلت نخربش في اللمة لقيتها سبات الدنيا راقدة واحد ماكاين كن حبيت نفجر بومبا راني فجرتها نورمال ههههه
قعدت شوي في اللمة ومن بعد قسمت وقتي وجدت الشي لي نحتاجو للمطبخ نحيت عليا الشي لكبير
وكي خلصت شعلت الميكرو هاني شوي مع اللمة وشوي مع قرايتي حتى يلحق الظهر الانسان يصلي ويقرا تاني قرآن
ودرك راني معاكم حتى لعشية لا كتب ربي نكمل مابقالي خدمة في المطبخ وصح فطوركم مسبقا
هادا اختصار لنهار اليوم، الايام الجاية يمكن تدخل فيها لومبيونس و الاكشن ههههه
نتمنى يكون ردي مناسب للموضوع
وبالتوفيق للجميع وصح فطوركم مسبقا​

 

[Hakan]

خخخخ انا اول نهار ليا كان مع الضياف جا وليد عمي مع الزوجة نتاعو كانو في الطبيب
عيطلي قلي رانا قدام الدار وتالمون الدار مخربطة رحت نجري ههه وديخان
ام بعد استقبلت وليد عمي والزوجة نتاعو مع الاب نتاعي قعدو عندنا مامبا نصف ساعة من بعد تبدا المحاولات والمناظرات
اقعد تفطر ما نقعدش اقعد تفطر ما نقعدش انا نحلل والام تحلل والاب يحلل خخ علاه جاي اذا ما راكش رايح تقعد تفطر خخخ
الحاجة الثانية جات العين وزعما دخلت للدوش ثم تكسرت العين نتاع الدوش ارواح انت واخدمها الماء فايض منا
وانا نحاول نسكر منا وصايم خخخ لعبت بالماء مع الصباح هيا راني نكونيكتي حاليا ​

 

[السلطانة]

وعليكم السلام ورحمة الله وبركاته
البارح كنت مسافرة وكيما تعرفو السفر ينحي النص تاع العبد
8 سوايع مع الشمس الحارة
اليوم الاول راه ال 15 تاع لعشية درك
الصباح نضت مع التسعة مع بنتي
دوشتها ولبستها درت شوي في الكوزينة وصل وقت القايلة جبتها ترقد واتكيت معاها ومع اللمة
شوي ونوض للكوزينة هههه
صحا فطوركم مسبقا​

 

[ضآحكة مستبشرة]

السلام عليكم و رحمة الله
يعطيك الصحة خويا حكيم على هذا الموضوع الرائع
من خلالو رح نشاركو بعض واش يصرالنا في نهارانا و نستفادو من بعض

احمممم أول نهار ليا في رمضان جاز كالاتي :
نضت تسحرت و مبعد صلينا و قريت ما تيسر من القران و عاودت رقدت كنت عيانة لانو سهرت نقرا في الفلسفة نضت الصباح معلباليش شحال كانت الساعة تفرجت شووي و خملت الدار شوي و درت في الدار مع شوية اشغال
و راجعت شوية شريعة و في كل الاحوال التيليفون في يدي نطل عاللمة
دوكا نروح نقرا شوية قرآن و نراجع للباك و نعاون ماما شوية في الكوزينة

و سلام​

 

[همس الوُرود]

السلام عليكم ورحمة الله وبركاته
بالنسبة ليا أنا البارح مرقدتش كامل بقيت ساهرة مع اللمة ومع دارنا
جا ليا خويا قالي ديكونيكتي بقيت قاعدة نتفرج مع الحيوط وراسي قتلني
مبعد جبدت التلفون زدت كونيكتيت فاللمة خخخخ وصل وقت السحور
نضت وجدت السحور بعدها وجدت لخويا القهوة كي أذن ,,, "بالنسبة للواجبات الدينية نفضل مانذكرهاش" ومبعد كونيكتيت شوي وصلت 5 تع الصباح
راسي ولا قد البرمة رقدت إلى 11 ونص الله غالب أختكم لازم تدي حصتها من النوم
نضت غسلت لماعن فرزت شوي الدنيا وجيت نكونيكتي
ومبعد شوي نروح نبدا فالفطور مع ماما وهكا فات نهاري حتى لدوك
​

 

[بشرى ملاك]

السلام عليكم
انا البارح فليل خدمت ميناج قاع كملت مع 2 تكسلت شويا مبعد كليت تمر وحليب وقعدت حتى صليت ورقدت درت بروgرامي باش ندي الصبحة انا وبنتي راقدين باسكو راني فالشهر الثامن من الحمل ومارانيش باغية نفطر باغية نصوم كيما قاع الناس مبعد فطرت بنتي و صليت الظهر ورقدت ساعة ودرك راني نكونيكتي وعلى 4:30 نوض للكوزينة باش نبدا معركة الفطور ولوحم تاع راجلي... الله يقدرنا والحق مازال مادختش شوية عطش برك...

 

[باتنية و نص]

سلام عليكم
وصحا رمضانكم جميعا
بالنسبة ليا ..قعدت سهرانة للسحور
وجدت السحور وهكاك نوضتهم روطار..من أنتم -_-
نضت الصباح على 11 دوشت..رمضان يلحق والسخانة تهجم علينا
المهم عولت نخمل الدار علا لخفيف مع الفشلة و الغلبة ..مي لقيت مالا يصدق
باتمان تحت السرير..سبايدرمان فوق لفريجيدار بانتان مفلعس فالدروج..تيليتابيز تحت الكرسي يعيط لربي
البوبية اللي كنا بكري نمشطولها ونخيطولها قش ونماكييولها...لقيتها نص النص تعها منعرف وينو ..عينها طايرة وشعرها طالع فالسما...هذو طبعا مخلفات الارهابيين اولاد اختي

الشخصيات الكارتونية رح يديميسيونيو في جرتهم
المزية الواحد في رمضان يقعد ترونكيل وحدو في دارو
المهم عشيت في ميناج وقبيل شوي برك باه كملت ..
انا عندي وسواس النظافة كيما يقولي بابا
كاابابل نخليهم بلا فطور ..ليسونسيال نشوف الدار تشعل
انا مفهمتش الرجال نهار كامل متكسلين ويريكلاميو...علا واش راه غالبكم رمضان؟!

المهم الآن ديراكسيون الكوزينة
ربي يقدرنا
صحا فطوركم
تحياتي

 

[Hakan]

السلام عليكم
انا البارح فليل خدمت ميناج قاع كملت مع 2 تكسلت شويا مبعد كليت تمر وحليب وقعدت حتى صليت ورقدت درت بروgرامي باش ندي الصبحة انا وبنتي راقدين باسكو راني فالشهر الثامن من الحمل ومارانيش باغية نفطر باغية نصوم كيما قاع الناس مبعد فطرت بنتي و صليت الظهر ورقدت ساعة ودرك راني نكونيكتي وعلى 4:30 نوض للكوزينة باش نبدا معركة الفطور ولوحم تاع راجلي... الله يقدرنا والحق مازال مادختش شوية عطش برك...

عجبتني نتاع الوحم نتاع راجلي هههه
ياي الصباح برك قاتهالي ميمتي ههه باباك اليوم مانعرف كياه تفرى مع الوحم نتاعو ههه​

 

[AmiR@RoRo]

السلآم عليكم
بون بالنسبة ليا نقدر نقول هدا اسمط رمضان راح يكون
مش خاطر رمضان خاطر القرايه
لبارح وعلى غير العاده ما سهرتش بزاف مالفه نجيبها للسحور المهم رقدت
نضت صباح 8 وانا نراجع نراجع نراجع ..... الخ هه
وصلتها للظهر صليت وزدت رجعت كملت مراجعه وصلتها للعصر صليت وقريت ما تيسر من القران وجيت نضرب طله على اللمه وشوي ونديرو دوره للكوزينه
وعلى الاجواء الرمضانية السائدة فيها هه الله يبارك كي يجي رمضان غاشي كامل ينشط فالقسم الرمضاني نكهه خاصه
ونفس هاد الحكايه راح تتعاود كل يوم باش مكلاه كل يوم نقول وش درت ههه مكان لا جديد لا اكشن كما لي عند مريومه @لؤلؤة قسنطينة خخخ
وهداهو وصحا فطوركم وربي يتقبل

 

[Salah eddin]

السلام عليكم
جماعة الخير
كاين واحد اللقطة شفتها برك
ههه
في صبحة رمضان
تلقى جماعة لانتريت يدورو في المارشي
يشرو الحليب و اللبن و الشاربات و الخبز
و من بعد يخبطوها برقدة مع العشية
و الشبيبة يخبطوها برقدة من الصباح للعشية
و من بعد ينوضو يشربو الشاربات و اللبن تاع جماعة لانتريت
ههههه
هذي هي العدالة الاجتماعية
خهههه​

 

[Salah eddin]

تعجبك واحد اللقطة في رمضان
كاين قاشي يحب الوقت الاضافي
شقل عقلية راموس
بماكري ق في الوقت الضائع
كي تبقة 10 دقايق على المغرب
تروح للكوشة تلقى ياجوج و ماجوج
ههه
الحرب على الخبزة
اسيدي اشرو الخبز من الصباح و لا مع العشية و ريحو رواحكم
ههه
شعب يمشي بعقلية سيرجيو راموس
ههه​

 

[ميمي مرام]

نها الاول من رمضان فات هايل
برد الحال و خدمت الميناج تاعي كيما كل يوم و كي ولات 12 قريت شوية من القرآن الكريم
و من عد صليت الظهر و من بعد دخلت للكوزينة حتى للعصر صليت و قريت قرآن و من بعد تفرجت شوية
و كي و لات 6 ستيكيت الطابلة و من بعد كملت شاكان باقيلي في الكوزينة
و من بعد صليت المغرب فطرت تفرجت صليت العشاء
و قعدت مع الوالدة في الحوش
و كي جات اختي من التراويح جيت انا للمة و نكونيكتي لذرك
نقلكم صح سحوركم و تصبحو بخير
​

 

[Oussama.GF]

سلامو جيت نعبر على يومي خخخ
على ساعة واحدة تاع ليل نبداها
كنت جالس امام الكمبيوتر في لمة كي عادة
وصل وقت السحور روحت نوضت يما ودار قلبت دار هاتو نسحر هاتو نسحر
مهم ودتلي يما كاس حليب وتمرى وجدق كسرة خخخ
كليتهم ورحت شربت لتر ماء قلت راح نعطش
مهم فريتها وعبيت كرشي ذهبت الى مسجد جلست اول شخص اتى الى مسجد انا واخي الصغير
قعدت نقرا في سورة البقرة حتان وصل وقت صلاة فجر نضت صليت وبعدها رجعت نقرى قران
حتان 6:40 بش حبست وصلت سورة النساء خخخ فتكم في قراة القران
خويا هناك كان شبعها رقاد في مسجد مدروش عليه صغير
مهم نوضته وغدارنا المسجد اخر وحدين
وفي طريقي انا مروح لدار نلقى حومة فارغة طبطب
عبد مايسعى وكان جو مليح وماشي سخون
ياك تعرفو ورقلة مشهورة بالساخنة
جلست قليلا في رمل ومستلقيا انظر الى سماء وتقريب ما نغفل نوضني اخي قالي اني تعبان هيا نروحو
وصلت لدار قلت منرقدش خير ليا نروح نقظي ليهم
لكن خخخ لقيت روحي في سابع نوم
ايا جاو عند راسي على ساعة 10 تاع نهار نضت وانا دايخ
خخ خرجت وتضربني ديك الشمس الحارة
خخ رجعت لدار هزيت كاسكيطا وخرجت نقطيلهم
روحت[ لكتشميا ]ماكن تجمع ناس التجاري
قضيت وجيت مروح وقعت نستنى في ترونسبور لكن واحد ماكين ساعة على ساعة باش يفوت واحد ايا قلت نهز فرود منطيقش نمشي في ساخنة ربي
وصلت لدار ويزيدو يندبو عليا هاك نسيت تجب هادي
ايا قلت لمازوزي تاع دار يروح يشري اختي الصغيرة
شارتلهم وانا وقتها كنت استحم كي اذهب الى انعم بلاصة خخخ فراشي الغالي
روحت شغلت المكيف ونمت حنتان 3 تاع لعشية
ذهبت للمسجد باش نصلو الظهر حنا عدنا نصلوه على 3:30
صلينا كملنا وريحت كملت نقرا القران وكملت السورة المائدة
خخخ تلحوق الشعر خخخ
مهم وصل وقت صلاة العصر صليت روحت نجري باش نلحق على مسابقة 5 فرنك ايا ملقتهاش قعدت ندور في لمة وزدت شوية سكرت
خرجت نقعد نستنى في اذان مغرب ونسمع برك الله اكبر
تلقاني في ظرف ثانية جاس امام الطاولة خخخ
ايا فطرت وصليت اذان وتعشيت وش نحكيلكم ليوم مروبلة طابلة
مهم تفرجنا سكتشات الواعرة على الشروق
وصل وقت العشاء روحت صليت التراويح انا واختي الكبيرة
ومبعد وليت وراني هنا في لمة
خخخخ يوم تمهبيل
مجرد خربشات من @مشاغب

 

[شاعرة الأمل]

السلام عليكم ان شاء الله كامل راكم بخير
بون البارح فالليل بعدما صليت التراويح وجيت وجدتلهم شوية اتاي وتفتيف السهرة وبعدها درت ميناج للدار اكل بيسك يعيي فالنهار وبعدها صليت وقريت االقران حتى للفجر صليت ورقدت ونضت على 7 ونص هكداك ودرت شوية شغل فالدار وخرجت كات عندي صوالح ووحد لورق الوغ مشيت وقضيتهم ورجعت للدار عيانة وشديت التلفون وراني مع اللمة وضرك نوض نصلي الظهر ونرقد شوية باش نوض ندير الفطور
وهدا هوا نهاري
صحا فطوركم الافونس وربي يتقبل منا ومنكم
ومشكور خيو حكيم على الموضوع
سلام

 

[أمين 27]

النهوض على 7 صباحا رغم مكان ما ندير ندوش نلبس و نقعد فالدار .. ما عندي لا أخ لا والو .. 10 نخرج نروح للبحايرة نقابل شوية خدامة نرجع للدار 12 نروح للجامعة نغم روحي بالنقاط الفاشلة .. 1ز30 رحت شريت كتاب إسمه رجال و نساء حول الرسول .. 3 تاع العشية رحت نقابل شوية بحر (و لقيت الناس تعوم عادي) .. 4 روحت ندور كاش ما نشري شامية .. بريوش و سقايط زعما التقلاش تاع الليام اللوالا رمضان .. 5:30 رجعت للدار و قريب درت أكسيدون بسكو كنت لاهي فالفايسبوك .. 6 درت ماتش إكس بوكس وان (فيفا2017) لصاحبي ربحني 3-0 -_-
7:15 خرج ولاد ختي برا 8:45 دخلنا للدار حطيت و وجدت شوية الطابلة معى الوالدة 8:11 أذن .. كليت 8 بوراك و غرفية حريرة باش صليت المغرب بعدها عاشور 10 ثم العشاء (التراويح غيبت البارح) و بعدها سهرا حتى 1:30 (اللهم إغفرلي) من بعد كونيكسيون حتى للسحور و صلاة الفجر ثم النوم حتى 7 صباحا و مانيش عارف كيفاه كتبت هادي كامل و زعما هدا هو النهار الزاوج تاع رمضان

 

[GI Joe]

b3ida 3 dar w wahdi la bena la hom yahzanoun, lyoum lewel makanch reseau w l appel lel fixe djani ghali ghadetni rohii,
aaalmohim nhar kamel w ana netkarker m3a les project w les tp, le3chia djwayeh l 5 nekhrodj nechri kechma nefker ftor, neftor mba3da internet film 9raya sa depant hatan nergod a00h, slat nodh bessif w shor samha fih nechrob maa bark
haada houa l programme w sur yeb9a le mm had l 20 youm

 

[*مواطن بسيط*]

اسلالالام عليكم

همم نهار الاول من سيدي رمضان بدات بتوصية الوالدة نوضنا للسحور يعني بديت اشتغل رفاي ههه
اي قعدت للسحور كونكتي كونكتي اي تسحرت وقريت شوي قرآن لل5 وضربتها بنووومة واش نقلك روعة وقصيرا ياسر ههه نظت على 9 ونا الي زعما معول لل3 محاولة سبات فاشلة -_- ..
اي من 9 ونا في محاولات لل 10 ثم اقتنعت بلي نوم دارها بيا الخاين .. نضت وريحت ورجعت كونكتي كونكتي ويوتوب لل 1 رحت صليت الظهر اي ثم جاني النعاس رحت نجري للفراش ونعطييها بنوومة لل 5 ياه ياه نظت ثم مشبع بالنوم صليت وفضيت اموري وحان وقت لعبة pes هيهيهاي درت فيها شامبيوزغ ليغ بتشيلسي واديت كاش شنيا هدا يا سادة شيء كبير يا عمري شيء كبير اي لحقت 7 دورتها كاميرا كاشي في يوتوب كالعادا ههه ضحكت مليح حتان قال المغرب الله اكبر وسوطيت للطابلة اي فطرت وبصحتي هههه ورحت صليت المغرب ورجعت وكملت عبيت الكرش وجاتني ديك اللقطة تع هات الملصوقه* البوراك * جيب الشربه *جاري* جيت مرقه الحلوة اليوم متفراش. ههه مي كشربت كاس ماء وزوج مغارف تع شربه شبعت ههههه اي ريحت شوي وتفرجت شوي تيلي اذن العشاء اي رحت صليت ومن بعد خرجت من جماعة قسرنا شوي وعدنا لنفس الروتين وشكرااااااا على هد موضوع فكره مليح ربي يحفظك وصحا رمضانك ☺
سلالالالام ...☺