- إنضم
- 13 أفريل 2013
- المشاركات
- 14,618
- نقاط التفاعل
- 54,537
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السلام عليكم
يومكم طيب ان شاء الله
ربي يقدركم على الصيام وربي يدومها جمعتنا ان شاء الله والله لا يحرمني منكم ولا يحرمكم مني هههههه
المهم بدون مقدمات قالك احكي على الثورة، يسمى ناس هاد المسابقة راهم يلعبولنا بالمشاعر -__- حاطينا عجايز واقيلا؟ ياو مازلنا على ديدانا (عندكم تقراوها ديدان ههه خاطينا الحشرات) المهم كيما قتلكم مازالني صغيرة
وماحضرتش للثورة هيا رحت بحثت عليها عند كتاب التاريخ
لي هو جدي ههههه علابالي المعلومات لي عندو ماكانش في كتب التاريخ القديمة عندو مخ في مخو الله يبارك بصح بنكهة الاكشن الهوليودي هههه، هيا قعدت قدامو قتلو جدي لعزيز معليش تحكيلي شوي على الثورة كيفاه جازت؟
جدي كان يتفرج في اليتيمة بخشوع فجأة تحركت مشاعره ونزع نظارته وامتلأت عيناه بالدموع وبدأ يبكي
(هادا واش تحوسو غير البكا هههه علاه تبكيولنا في الراجل حرام عليكم .. هيا بدلو علينا السيناريو) المهم ماناضش يبكي شاف فيا مليح وقالي ايييه يا بنتي فكرتيني في وقت بعيييييد وين كان الرصاص يضرب وحنا نضربو، قتلو واش تضربو جدي؟ قالي نضربوها بتزغريتة هههه، قتلو جدي بدل لاشان راك غالط قتلك احكيلي على الثورة ماش على الاعراس تاع زمان، قالي اه وييي دخت تاع الصح (معا لإشهار حمود بوعلام هههه
) المهم بقا يخمم شوي وقالي فكرتيني يا بنتي في واحد الحادثة الأليمة صرات قبل 100 سنة، قتلو جدي صرات قبل ما تزيد؟، قالي قادري روحك انا الثورة حضرتلها كاملة من نهار دخلت فرنسا وانا عقابهم بالضرب حتى خرجتهم يبكيو، قتلو بصح جدي عمرك 80 سنة برك كيفاه نهار كامل ونتا مع فرنسا؟ قالي رايحة تكدبيني؟ يسما انا نكدب؟ قتلو حاشا جدي كمل برك واش صرا في هاد اليوم المشؤوم، قالي كنت يا بنتي قاعد انا وجداك في الحوش نشربو في القهوة الله الله
تعرفينا مانحبوش الكليماتيزور يدير السطر في الراس نحبو الهوا الطبيعي (يسما هاداك الوقت كان كاين كليماتيزور ؟
معليش روح برك -_-) المهم حنا قاعدين نحكيو ونشايخو حتى نسمعو الباب يطبطب الضرب قاوي على الباب هيا نضت باه نفتح الباب وانا مستعد للقتال
وفتحت الباب ونلقاهم العساكر قدام الباب كانو واحد الالفين هكاك ولا 1500 واحد ماشفيتش مليح تعرفيني ننسى، قتلو يسما جدي 2000 واحد جاو كامل باه يهزو عبد واحد؟ راهم زوج يفريوها، قالي اسكتي عليا جدك كان عنصر خطير الغاشي كامل يخاف منو ديجا جابو 2000 وندمو ماداروش حسابهم
قتلو المهم روح كمل برك، قالي امالا يا بنتي خزرت فيهم وخزرو فيا
ولمع ضوء وسط المدينة رسم نداء لمنادينا تلك إشارة باتمان ههههه، ونزدم في نصهم دزيتهم كامل ورحت نجري انا نجري وهوما يجريو انا نجري وهوما يجريو والشكارة تاع الدراهم في يدي مليار يا محاينك لداخل، جدي حبس هادي حكاية المليار راهم بداو يتخلطولك الحكايات دير ميزآجور وكمل (من هنا نستنتج بلي مؤلف قصة المليار هو جدي ههههه)، قالي هيه صح تخلطت في ليزيسطواغ المهم يا بنتي خزرو فيا وخزرت فيهم بنظرات ثاقبة ونجبدلهم الرشاش من تحت التريكو ونعطيهم
طيحتهم كامل كيما المبيد كي يقتل الحشرات ماخليت فيهم واحد انا نضرب وجداك تزغرت انا نضرب وجداك تزغرت خصها غير شطحة في النص احتفالا بالنصر
بصح جدي منين جبت الرشاش؟، يا بنتي انا كنت سبيسياليست في صنع الرشاريش .. ديجا واش هو الرشاش زوج تويوات لصقهم في بعض ودخل الرصاص وابعت لهيه، (تبا لزوج تويوات
) المهم كمل جدي واش صرا؟، قالي انا فرحان وفخور بنفسي هكاك
ويخرجلي واحد من حيث لا ادري شفتي الكلاب ضهرو جابو معاهم 2001 عبد وانا كنت حاطهم 2000 الله غالب هادي حالة لي ضعيف في الرياضيات، المهم انا فرحان هكاك ماعلاباليش واش صاري ويعطيني برصاصة للقلب حسيت الدنيا تدور بيا هيا وطحت في الأرض
وسط الدماء وجداك كملت تزغرت خاطر راجلها راح شهيد .. وواش تحبي هادي هي الدنيا، قتلو جدي تحكي منك بالصح؟ يسما قتلوك؟، قالي ومالا يلعبو معايا غدروني الكلاب، قتلو جدي بصح راك تحكي معايا كيفاه مت؟، قالي شوف الدخاسة تاع الاواد تكدبي جدك ماتحشميش هيا طيري من قدامي نتوما خاطيكم التاريخ وخاطيكم الثورة ديجا كن ماش انا لي مت كن ماراكم عايشين في الخير هادا، المهم انا نضت من قدامو ورحت بعيد، شفتو ديرولي غير التبهديل حتى وليت ندي في البخص -___-
المهم كانت هادي حكايتي مع الثورة، اكيد راهي مجرد ضحكة وفرحة ماراناش هنا باه نتمسخرو بالثورة الجزائرية لي راحو فيها شهداء احرار تبقى احداث تاريخية عزيزة علينا، وجدي صح كان مجاهد بصح ماش بالاكشن هههه
وربي يحفظ بلادنا ان شاء الله من كل سوء ويحميها من الفتن
هيا صح فطوركم / سحوركم واتهلاو في رواحكم
سلام
جدي كان يتفرج في اليتيمة بخشوع فجأة تحركت مشاعره ونزع نظارته وامتلأت عيناه بالدموع وبدأ يبكي
المهم كانت هادي حكايتي مع الثورة، اكيد راهي مجرد ضحكة وفرحة ماراناش هنا باه نتمسخرو بالثورة الجزائرية لي راحو فيها شهداء احرار تبقى احداث تاريخية عزيزة علينا، وجدي صح كان مجاهد بصح ماش بالاكشن هههه
وربي يحفظ بلادنا ان شاء الله من كل سوء ويحميها من الفتن
هيا صح فطوركم / سحوركم واتهلاو في رواحكم
سلام
آخر تعديل:
ان شاء الله نشاركو بقصص اخرى في المستقبل تكون مسلية
