ماريو في دوارنا .....جا يلعب فدواركم

[ليليا مرام]

السلام عليكم يا جماعة الخير
نصكم مبحرين واجلخرين مGيلين واحنا هنا نعسو بصحتكم السخانة تقتل

المهم يا جماعة الخير راكم تقولو شكون هذا ماريو

اللي جا لدوار ليليا استناو بلاك تحسابوه الميGري @حلم كبير جا عندي نعرفكم ارواحكم الشغيغة ديركت وين تديكم البراءة تقتل فيكم

نونو انا نحكي على ماريو من نوع آخر اللي هو هذا

الماصو والمصروف خاصو مي الكارثة وين؟ مش الماصو اللي يبني للناس هذاك رزقو ولازم يسعى ليه
انا اليوم نحكي على الماصو في دارو ومريب دار جارو
ايه ما تستغربوش هاني جاية نفهمكم

عندكم فالدوار ذاك ماريو اللي حياتو كاملة وهو يبني بسبة بلا سبة

ويا ريتو بنا وكمل وريح روحو وريحنا
ماريو اللي كل عام يبني ويعاود تقولو واشبيك حسدتيه لالا مش حسد وانا واش دخلني نقولكم ذاك الجار اللي يصبح من 6 نتاع صباح ما يدير قيمة للجار راقد ممكن جار مريض ممكن طفل صغير راقد ممكن انسان كبير ما يحملش الحس ويجي ماريو هذا من 6 يا يدق يا يكسر يا قطع بالمشينة المهم خص الموتى وما نوضهمش

نقولكم عندنا جار هنا وي عندنا ماريو الحومة

هو ميGري انسان مريض بالبنيان لازم يبني الناس تجي تصيف وهو يجي يبني طريق ترجع كلها سيمان مرة يغلقها بالرمل والGرافي خدامين

و تقولولي دارو مكسرة ياو فيلا كل شي فيها مكمول كل عام كالبلدية يقلع فايونس يركب فايونس يدير باب جديد يقلعو يعاودو مرض لازم يبني
من صباح ربي وهو يدق ويكسر ولو ريح يختار وقت القيلولة ويجي ويبدا يبني سميناه ماريو الحومة واناىبمل فخر اطلقت عليه الاسم ههه وانتشر بسرعة البرق مارية لعبة البناء الشهيرة رجعت فحومتنا كرهنا من جدو كل صيف اليوم نفطن على الحس قلقني لا احترام لا يديك ولا يجيبك

ناس هذو نقصد ماريو وجماعتو من نوع ما يحمدوش ربي موسوسين كانو الدار ذيك دار الخلد قد ما يخدموها يتوسوسو فاضو عليك دراهم وحاب تبني عاون جار باغي يتزوج علاه تبذير فامور تافهة وزيد وين احترام الجار احترام المريض والكبير والقدر الناس تحشم منك مرة مش مليار مرة جارتي مقابلاتو فالسكن قاتلي راجلي حشم منو كل يوم سيمان عند الباب تدخلني للدار نظل نسيق يعني كارثة
المخلوق انا قلقني وحابة نهجرو من دوار زهرو راني مكسرة وقاعدة فبلاصتي
واش رايكم فالماربوات هذو مرض والا عادة والا زوخ وتفاخر
انت لو كان هئا الجار قدامك صراحة كيفاه تتصرف
اعطوني مثال لو عندكم ماريو فدواركم
مشكوريييييين

 

[همس الوُرود]

السلام عليكم ورحمة الله وبركاته
أهلا ختي ليليا وشراكي إن شاء الله راكي تريحي
موضوعك شباب وعندو مغزى صح الناس فهذا الوقت ولاو ميحسوش ببعضهم كل واحد مهتم بنفسو ومايفكر بغيرو
أنتي أعطيتي مثال بالبناء و تكسار الراس وكاين أمثلة أخرى تاني لا تعد ولا تحصى
المهم نجو لماريو هذا الي يضل يبني هههه فريمو موسوس كيما قلتي أو شكيتهم بالعاني يديرو هكا غير بش مايرقدوش الناس ممكن عندو مرض الأرق وميقدرش هو يرقد يصمطها على الناس تاني
ولا يتباهى بدراهمو لازم كل عام الحطة تتبدل
كاينة فكرة تطرقتي ليها شابة والله الناس محتاجة دوك الدراهم وهو يضيع فيهم فالبنيان و الترياب علاش ميعاونش ناس تحتاج ويدي الأجر والدعاء و المحبة
دوك راهو مدي دعاوي الشر والكره ههه
الله يهديهم يا رب ويعافينا صح الدراهم بزاف فالجيب ماتدي ماتجيب لازم الإنسان يكون متوسط وقنوع خير من هاد الشقلالة كامل
بارك الله فيك الزينة وتهلاي فروحك مليح
في رعاية الله​

 

[sosobibicha]

السلام عليكم
واش راكي ليليا ؟
اييييه على حكايات الجيران كي نلقى وقت ان شاء الله نكتب موضوع طويل عريض على الهم نتاع الجيران ربي يهديهم ان شاء الله
حنا عندنا جارنا يبني في اي وقت يحب صباح ظهر ليل ميهموش المهم يدير الفوضى اذا مابناش يجب ذراري صغار و يخليهم يبكو و يزgو حكاو معاه الجيران مي لا حياة لمن تنادي حاسب روحو حاكم الحي كامل هو الله غالب موسوس كي يلقا مسمار معوج يعاود كل شيئ من جديد و المشكل مش في البنيان برك هذا بنادم يحب الفوضى مش عارفة علاه كي ميلقى ما يدير يلعب بالبالون و يدير الحس بيها -.-
اما هاذوك لي يجو غير يبنو و يبدلو كل شيئ و يروحو الحمد لله مكانش عندنا في الحي عندنا كي قسمو السكنات بدلت الناس و مازادوش قليل و اذا حبو يبنو يخيرو وقت مناسب
لكن عندنا مكتب الجزائرية للمياه ويااااا التبهدايل لي يخدمو فيه من 5 نتاع الصباح و هوما يهدرو و يسمعو تحسبيهم طرش ميسمعوش و متقاتلين نهار كامل ياو لوكان على ورقة هاذو غير وحدهم حتى في رمضان بقاو هكاك يحيرو ميعياو ما يعطشو والو حنا عندنا هاذو هوما ماريو هههههه
ربي يهدينا و يهديهم ان شاء الله
ربي يحفظك ليليا على الموضوع الجميل شكرا لك
ربي يشفيك اختي ​

 

[البحر الهادي]

يارك الله فيك
هذا ماريوا بصح المشكل في لي مس ماريو كل رمضان يبني
الخدمة عنده غير في رمضان

مرات على الزوج نتاع الليل واش هبال ولاتبهليل
واش نحكوا الله يهديهم