السلام عليكم و رحمة الله تعالى و بركاته
ناس اللمة صحيتو وش راكم ؟ اموركم ؟ اخباركم ؟
الحمد لله ؟ ..ايا الحمد لله على كل حال
و اليوم راه عاشورا و الصايم الله يقبل منو و الفاطر بصحتو و السلام
ههه
بسم الله ... هذا راه عدد و وقيلا راح يكون آخر عدد من "سلسلة دز معاهم" الي نوعا ما حركنا بيها الحالة شوي بعد الركود الطويل في المنتدى
المهم ... جماعة الخير راه اخر عدد ما تحشموناش الرحمة على والديكم
ههه
ها شاركو شوي باه نطلعو البلاد و نقوو الاقتصاد و ما الى ذلك ههه
ايا بسم الله ... و موضوع اليوم هو
" الجيران "
كيما راكم عارفين يا جماعة الخير ... الجار وصى عليه النبي عليه الصلاة و السلام
بصح كاين قاشي ما يعرف لا جار لا جد ماليهم
داير المنكر في جارو ... يرمي الصلاحة عند باب جارو ( الصلاحة هي النفايات بالدارجة )
في الgوايل الحامية ذيط يطلق ولادو البرا و يبداو يديرو فالنش عند الباب و يعيطو ويلاوحو و ما يخليش جارو يgيّل
كي يعود عندو فينيسيو في دارو يبدا الخبط على ال7 تاع الصباح بالمارطو و الماسيطا و يديرونجي جارو
و يعجبك هذاك الهيلتي يبدا يقلع في الارض مع القوايل و في الصبحايات ههه
يااااودي مكر كبير راه صاري ق الله يستر برك
و هذاك الي يدير السوبريسو باه يجبد الما على جارو من الجعبة تاع الما تاع الدولة ههه قالهم اسكتو قاع
ههه
و هذاك الي يبعث وليدو يخبش الكروسة تاع جارو ويقول مش بلعاني و هذاك ..و هذاك... و هذاك
...
الفايدة ... حق الجار ق شوي شوي
و الله يصلح البلاد
ههه
ايا جماعة اللمة ... و نتوما وش تقولو بهذا الخصوص ؟؟
****************************************************************
المهم جماعة الخير ... راني عارف كاين الخير في البلاد و كاي ناس الله يبارك و كاين جيران ما شاء الله
و رانا هنا نضحكو برك على الاختلالات الحاصلة
ههه
و ان شاء الله بهذا الموضوع نختمو السلسلة
و
الحمد لله على كل حال
*********
آخر تعديل بواسطة المشرف:
ملآئكة مي هي 
