مشكلتي ساعدوني

[مشكلتي]

لقيت وحدة نعرفها وقريبة ليا واختها صحبتي مع واحد في سيارة حذا الجامعة لي نقرا فيها هي صغيرة عمرها 13سنة وهو باين كبير تاع 32 هكاك عيطلها قتلها شكون اذا قاتلي خو صاحبتي مهم بينتها تكذب وقتليها روحي لداركم وتعاوديها نقول لاختك بقت تحلل وتبكي بعد جا هو باه يحكي معايا قتلو ماتحكيش معايا انا عاقدة ونخاف يشوفني خطيبي يفهم بلغالط توليلي مشكلة مهم سكت زدت اليوم هكاك هبطت لطبيب ومع جيت مروحة حكمتها مكروشيا فيه وماشيين شافتني ماتت جتني رحت زربت ماخليتهاش تحكي معايا
قولولي واش ندير قولولي نعرف دارهم كامل وعندها ربعة خاوة رجال طحنتهم خفت نقول لاختها تولي مشكلة وزيد هاذا صاحبها باين كلوشار يزيد كاش مايديرلي واش رايكم واش ندير ؟؟؟؟؟ طفلة صغيرة ضاعت وانا ضميري انبني وفي نفس الوقت خايفة نخبر اهلها كاشما يصرالها ولايصرالي دبرو عني

 

[همس الوُرود]

السلام عليكم ورحمة الله وبركاته
عبالك بانتلي فالبداية لو تقولي لصاحبتك هادي الي هي أختها مبعد قلت كون اختها ترد عليك رد مشي مليح تقولك متحكيش هكا فختي ولا تتهمك نتي نتي الي تروحي فيها
أنا نقولك متقولي لحتى واحد وش شفتيه أستريه وأدعي ربي برك يهديها ويسترها هدا وش تقدري تديري
الطفلة مزالها صغيرة ومتفهمش بلي هدا الشي يخسرلها كلش فحياتها وخاصة شرفها ومش غير شرفها شرف عايلتها وقيمتهم ومستواهم يروح كامل
الله يهديها ويسترها ويهدي داك الذكر الي راهو يلعب بيها
أدعيلها أختي ​

 

[طموحة]

السلام عليكم و رحمة الله و بركاته
يعني أنا احترت اذا نعتبر الطفلة صغيرة و نقولك لازم تنبهي لأنو هوما المسؤولين عليها
ولا نعتبرها كبيرة وهنا تدخل فيها ستر معصية انسان آخر صدقا لا أعلم
لكن أنت أول الأشياء نبهي صديقتك أن أختها في مقتبل العمر و نحن في زمن كثرت فيه فتن المصاحبة و غيرها
لذا عليها أن تنتبه لتصرفات أختها و تراقبها وتنصحها من باب الحيطة و الحذر
ربما عندما تنفذ ذلك تنتبه بعد مراقبة تصرفاتها لوحدها فتنصح وهي أعلم بطريقة ابعاد أختها عن الأمر
ثاني شيء ادعيلها بالهداية و السداد و أيقني و ألحي في الدعاءو الله يستجيب لك ان شاء الله
ثالث شيء أدعيها لبيتكم هاته الطفلة صاحبة 13سنة ثم حديثها ووعيها و لا تملي من ذلك و تقولي انها لا تستجيب فالواحد لا يعرف متى يفتح الله قلب الانسان لاتباع المعروف و الانتهاء عن المنكر
ان لم تنتبه يا أختي فأنا واحدة من الناس لو كانت لي أخت أصغر مني و لم أعلم بحالها وعلمت احدى صديقاتي لرأيت أنه لازم عليها أن تخبرني
مادام الأمر يستطاع التحكم فيه أحسن وهنا نيتك هي اصلاح الفتاة و ليس فضحها و أنا أرى أن مادامت أختها حريصة على عرض أختها فلن تفضحها بل تحاول أن تحل الأمر على نطاق
لا يسمح للآخرين بمعرفة ذلك يعني هو أمر لا يستهان به
أعانك الله و هدى الطفلة و أرشدها الطريق المستقيم
وعلى خوفك من ذلك الشاب فالله أكبر منه لذا لا تخافي ما دمت تريدين رضا الله سيرضيك و لن يضيعك ​

 

[لؤلؤة قسنطينة]

السلام عليكم
ربي يستر عليها ان شاء الله ويحفظها
الطفلة مازالت صغيرة خلاااص 13 سنة راهي تاع لعب ماش حتى تاع هاد الامور مازالت ماتعرفش صلاحها
بالاك لقات ضغط وسط عايلتها وقابلها هاد الإنسان بكلام حلو ولات لصقت ليه خاطر 32 سنة راهو شارف
يعني مقارنة بطفلة في عمرها 13 راهي بنتو وعلى هادي قدر يجبدها ليه ويسيطر على عقلها كليا
شوفي اختي اذا كانو خاوتها من النوع لي كي يحكمو على ختهم حاجة يتهورو وممكن ياذيوها ولا كاشما يديرولها
من رايي ما تخبريهمش خبري ختها ولا يماها طبعا اذا كانو واعيين، انا من رايي تحكمها يماها تضربها ولا معرف واش ديرلها
احسن من باباها وخاوتها خاطر يماها تولي تحن وتعطيها فرصة عكس الاب ولا الاخ والطفلة صغيرة خلاص
كن جات 30 ولا 35 ولا حتى 20 نقولو كبيرة وواعية بصح هادي راهي تاع لعب مازالت ماتعرفش صلاحها
وبالنسبة ليك نتي ماتزيديش تهدري مع هاد الإنسان لا تخربي دارك ويشوفك خطيبك وتولي في سين وجيم
ونتي ناوية ديري الخير ماش يوليلك شر لا سمح الله، مالا شوفي اختي عندك 3 حلول قدامك
اما تتكلمي مع البنت وتحاولي توعيها بالتي هي احسن وتقنعيها انها تبعد على هاد الإنسان وبلي مارايحش يجي منو الخير
خاطر مستحيل راجل بعمر 32 يحب بنت 13 وينوي معاها لحلال والخيالات هاديك راهو ناوي يلعب بيها
يعني خوفيها من العواقب لي ممكن تلحقلها، والا تتكلمي مع يماها ولا ختها هوما يشوفو كيفاه يخوفوها ويمنعوها
واما الحل الثالث وهو اذا كان خاوتها الرجال وباباها واعيين يعني يعاقبو بنتهم ويوعيوها بلا ما يقتلوها مثلا
هنا وصي يماها تتكلم مع والدها لكن خلي هذا آخر حل وان شاء الله ربي يجيب الخير
درك راني جاوبت بالتيليفون يمكن نسيت نقاط اساسية من بعد نشعل الميكرو ونحاول نضيف ما يلزم ان شاء الله
تحياتي​

 

[لؤلؤة قسنطينة]

السلام عليكم
راني عاودت رجعت خاطر فكرت مليح وكاين بعض النقاط لازم نقولها ونضيفها
شوفي أختي الكريمة الفكرة لي مازلت مركزة عليها أنك ماتزيديش تتكلمي مع هاد الشاب لأنو قادر تسببلك مشاكل
يعني فكرة أنك تزيدي تتكلمي معاه نحيها من الطريق، ومن رايي تركزي على الطفلة تتحدثي معاها وتوعيها
خاطر مازالت صغيرة وفي بالها الانسان هادا بلي راهو يشوف فيها أجمل نساء العالم ودرك يخطبها ويتزوج بيها
ويعيشو هانيين وهي لو تفكر تلقى بلي واش يجبر راجل كبير يروح لوحدة قد بنتو غير باه يتمسخر بيها
خاطر صغيرة وماهيش واعية وماتقدرش تكتشف ألاعيبو، قوليلها لو جا الانسان هادا يحبك فعلًا كن ما يخرجكش
في الطرق معاه قوليلها ويني غيرتو عليك؟ وقوليلها كن يكتاشفو أمرك خاوتك نتي لي تتأذاي هو يهرب ويتزوج
لي قدو ونتي تطفر فيك، حاولي تقنعيها أكثر من أنك تخوفيها خاطر كن تخوفيها قادر تبعد على الانظار وتزيد
تتلاقا بيه في اماكن خالية كتر، حاولي تفهميها بلي مازال وقتها على الزواج ولي يحبها يجي لدارها ما يتمسخرش بيها في الطرق
المهم فكرة الاقناع تعتمد عليك، وانا علاه حابة نحتوي هاد البنت ونوصلوها لبر الأمان خاطر معظم مشاكل البنات هاد الايام
تجي من والديهم، عندي وحدة من العائلة عمرها 14 سنة تقول عمرها 20 سنة الشعر كيفاه والماكياج
واللبسة غير محتشمة، يعني اذا فعلا كان لباس الطفلة هادي هكا مالا والديها لازم هوما يتحملو النتيجة ماش يبعتو
بنتهم للشارع وسط الذئاب بملابس مغرية ويكبروها ويمدولها أكثر من عمرها وإذا غلطت يقتلوها ولا معرف واش يديرو
مالا حاولي تقنعيها وشوفي كيفاه تقعدي معاها وتتفاهمو انثى لأنثى ماش بصفتك طرف قوي عليها خليها تحس بالأمان
وحاولي تقنعيها واذا مافادش الأمر وصلي الأمر لأختها ويماها، خلي الأمر بين يديهم وعلى الاقل تكوني درتي خطوة
صحيحة وعلى الاقل تكوني غيرتي المنكر، بالإضافة للدعوة بالهداية لهذه البنت وأنو ربي يسترها ان شاء الله
خاطر لاكان كانت صح من البنات لي عاطيينها والديها الحرية التامة ومخلينها تدير رايها وسط غابة يعني تغيض والله
ربي يحفظها ويسترها ويرجعلها صوابها ان شاء الله
تحياتي
​

 

[dahman kz]

لقيت وحدة نعرفها وقريبة ليا واختها صحبتي مع واحد في سيارة حذا الجامعة لي نقرا فيها هي صغيرة عمرها 13سنة وهو باين كبير تاع 32 هكاك عيطلها قتلها شكون اذا قاتلي خو صاحبتي مهم بينتها تكذب وقتليها روحي لداركم وتعاوديها نقول لاختك بقت تحلل وتبكي بعد جا هو باه يحكي معايا قتلو ماتحكيش معايا انا عاقدة ونخاف يشوفني خطيبي يفهم بلغالط توليلي مشكلة مهم سكت زدت اليوم هكاك هبطت لطبيب ومع جيت مروحة حكمتها مكروشيا فيه وماشيين شافتني ماتت جتني رحت زربت ماخليتهاش تحكي معايا
قولولي واش ندير قولولي نعرف دارهم كامل وعندها ربعة خاوة رجال طحنتهم خفت نقول لاختها تولي مشكلة وزيد هاذا صاحبها باين كلوشار يزيد كاش مايديرلي واش رايكم واش ندير ؟؟؟؟؟ طفلة صغيرة ضاعت وانا ضميري انبني وفي نفس الوقت خايفة نخبر اهلها كاشما يصرالها ولايصرالي دبرو عني

اللي ختارت الطريق هدا و للي حبت الشي هذا ما تنفعش فيها النصيحة
وافضل حل انك تبلغي باباها وله خوها والامور هاذي من الامور للي لازم توقف الرجال والرجال هوما للي يوقفوها عند حدها

 

[ليليا مرام]

السلام عليكم أختي
هي ما دخليش روحك مش مليح راكي شفتيها والطفلة صغيرة ولو دخلي روحك تخافي توصل للراجل هذاك ويصراولك مشاكل
انا نقولك حاجة تعرفي انت صحبتك لو نوع اللي تتقبل نصيحة احكيها وقوليلها وترجيها انو ما توصلش للمشاكل وانت مش حابة تكسار الراس
وإذا شايفتهم نتاع مشاكل ادعي ربي يبعدها عليه وما دخليش روحك فالمشاكل صرالي نفس مشكلتك مي انا ما نخافش برغم الوقت مش مليح هذي حكاتلي انو راح تهرب قبل عرسها مع واحد أنا نصجتها ما حبتش تسمع ولانو عندها خاوتها رجال برغم يماها مش مرا نتاع خير مي قلت انا على جال ربي
هبطت وحكمت ياماها وجبتها قدامي وقابلتها المهم الطفلة ما حكاتلوش ويماها ضربتها قدامي ونبهتها وبقات تعس فيها حتى تزوجت واليوم الحمد لله كل ما تجي ضيفة لدارهم تجيني تقولي لوما انت بلاك راني ضعت لانو كانت صغيرة 16 سنة ما قدرتش نخليها تبع عواطفها
انت شوفي صحبتك لو نتاع نصح احكميها لو يجوك المشاكل ادعي ربي يهديها

 

[فيتامين سي]

مشكلة معقدة
نصيحة متوقفيش معاهم و روحي زيارة و كي تقعد بدي تخرطي من عندك على واش صراو في البنات لي يدو داك الطريق و حكي و كي تكوني بينك و بينها قوليلهامعندي فايدة اذا نحكي ولا نسكت بصح مزالكي صغيرة مزالكي مشفتي والوفي الدنيا
و سيي مع اختها في مواضيع هكدا
و قوليلها كون عندي ختي صغيرة نديرها بنتي لوين نجبدها عندي و منخليهاش تضيع مني
ربي يحفضها و الله لا تربح هذو #الحيوانات
له من الله ما يستحق
شافها صغيرة نية و بهلولة
المهم وين ما تلقيه خطيك منه لي ميخافش ربي يدير كلشي
​

 

[بشرى ملاك]

الله يستر جميع لوليات ولبنات صغار ولا كبار الله يستر الله يستر...
الوقت راه واعر بعدي ودعي ربي يهديها ولوكان طيحلك اوكازيو لي تحكي معاها وحدكم وبلاما تخوفيها باهلها فقط نصحيها وادا تحسيها ماشي تاع نصيحة خلاص لانه ممكن تقولها لهاد الشاب وغدوة يقطع عليك ماتنفعك لا هي لا اهلها ولا يحرش ناس يقطعو عليك الطريق ممكن توصل يهدوك ولا يديرولك كاش حاجة لا قدر الله رانا في وقت صعيب الواحد يقول الله يستر وخلاص....

 

[GI Joe]

sa depant nti w la relation ta3ek m3a had sahba, la kanet tet9abel ahkilha wech chefti w khaliha tchouf kifeh dir prc responsabilité ta3 les parents 13snaa wech daha kamel mnin djami3a !!
( w ahki l fiancé ta3ek wech chefti w que djek radjel yahder m3ek pr evité les problemes nhar akhor)
allah yahdina

 

[Hakan]

انا نقلك روحي بلغي الشرطة على هذا الانسان اللي مرندف طفلة في عمرها 13 سنة ما زالت ما تعرفش
صلاحها لانو مع هي قااصر وهو الله يباارك بعمر الاب نتاعها يعني ختي ما تخليهاش تفوت
الشرطة انا واحد من الناس نبلغ الشرطة نورمال اذا كنت نعرفها لانو شيء اجرامي هذا مخالف للدين ومخالف للقانون ​

 

[بين الحقيقة و السراب]

أمتأكدة أنّ "صديقتك" ضد الفكرة !
الظاهرة - حسب ما أرى- قد صارت عادية / إلاّ في نظر القلّة​

 

[السلطانة]

هاذا الشارف ميحشمش على روحو لاحول ولا قوة الا بالله
مع طفلة قد بنتو

يااختي واش نقولك بلغي اهل الطفلة راهي قاصر ومازالت مافاهمة والو في الدنيا
انتي شفتي منكر بلغي صحبتك وقولهم يتبعو بنتهم
مادام راهي تسركل معاه كون يتبعوها يكتشفوها ويحكموها بيدهم
ربي يجازيك خير على حسن نيتك

 

[Skor m@k]

السلام عليكم
قريت كل ردود الأعضاء ولقيت نتيجة وحدة
كاين طريقان تقدري تسيري فيهم انت خيري واحد برك ممبعد كملي المسير
قول الحق والأمر بالمعروف والنهي عن المنكر لازملو صبر وعلى هذا
الطريق الأولى الى ماعندكش الصبر وماتقدريش تتحملي المشاكل اللي ورائها
نقولك حاجة ديري روحك ماشفتيهاش وأدعيلها بالهداية وكملي حياتك
الطريق الثانية الى عندك صبر على الأذى أدخليها
خاطرش على حساب واش قالو الاخوة قبلي تقدري تولي أنت المذنبة والمشاكل كامل يجو فوق راسك
انا مانشي نقولك هكذا باش نبعدك على فعل الخير
وتقدري تبعديها على لحرام بدون أدنى مشاكل ولا صعوبة
قال الله تعالى '' لا يكلف الله نفسا إلا وسعها ''
اذا كانو والديها من الناس لي ماشي معقدين
تقدري تخبريهم يولي اللوم عليك وتولي انت لي راكي تخرجي فالدعايات باش توسخي سمعت بنتهم
اذا كونو من الناس لمعقدين ولموسوسين راح يديرو مشاكل كبار مع بنتهم وراح يحرموها بزاف من حقوقها
تخبري الشرطة يستدعيوه للمركز ممبعد توقفي أنت في المحكمة وجيبي شهود ووو
وهذي سور مايديرولو والو يولي هو يحوس ينتقم منك تولي انت في مشاكل كبار

وعلى هذا اذا حبيتي تدخلي للطريق الثانية لازم تدرسي وضعية عائلتها أولا
سقسي ختها الى متفاهما معاها والا تقوللها أسرارها
وقبل هذا أهدري وأحكي مليح مع الطفلة هذيك وسيي قنعيها تحبس وحدها بلا ماتدخلي انت فالوسط
الى بغى كل يوم أنصحيها بلا مايشوفك هذاك السيد خاطرش شافك تنصحي فيها وتحبس هي معاه تخافي ينتقم منك

ونصيحتي ليك أهدري اولا مع الطفلة وماتنصحيهاش بالتهديد من أول
أحكيلها قصص على واش راح يصراها اذا كملت فهذا الطريق
أحكيلها على ناس جازو من هذا الطير ووين وصل بيهم الحال
أحكيلها وانصحيها بلي مزالها صغيرة وواحد مراح يحن عليها
هناك اذا مزالها مكملة في هذا الطريق ابداي تهددي فيها تقولي لختها والى ماحبتش هدديها بيماها
والى ماحبتش هدديها بخوها وباباها ممبعد الى بقى يابس راسها قولي لختها ولا ليماها

وهنا الى ماحبتش تحشم وكملت فالطريق أعرفي بلي الشيء هذا جاي من الوالدين
وغير ربي لي يقدر يهديها

​

 

[rycerz]

توضيح جوانب القضية:

1 - هذا الشخص عمرو 32 سنة ... و الحقيقة أنّو الذكر لما يتجاوز 25 سنة ، في الغالب لما تكونلو علاقة مع وحدة و كان هو منحرف و مستهتر و بلا شرف أو أخلاق فإن الهدف المسطّر في رأسه هو الإختلاء بها و ممارسة الفاحشة معها ، حتى و إن كان شريف فإنه عرضة للوقوع مع الوقت في الفاحشة معها حتى و إن لم يخطط لذلك.

2 - هاته الفتاة في 13 من عمرها .. أي أنها تقريبا بلا عقل بل تكاد تكون 100 % إنجراف عاطفي .. و بالتالي سهلة المنال و مع وقوعها في الغرام يسهل جرّها للمذبح (...)
هاته السن خطيرة جدا .. (أغلب اللواتي فقدن عذريتهن كان عمرهن تحت 16 سنة .. و كأنهن كن في غيبوبة و حالة لاوعي من فرط الإنجراف العاطفي بسبب التورّط في العلاقة الغرامية)

وجهــة نظـــري:

نعم أنا أعلم أن الأمر جد صعب على الأنثى التدخل في موضوع كهذا لإعتبارات نفسية أنثوية (لا داعي للتوسع)
لكن إذا كان الأمر لا يسبب لك مشاكل ، فبالنظر إلى خطورة وقوع كارثة للفتاة الصغيرة ممكن تقضي على حياتها كإنسانة ، فإنه يمكنك فعل ما يلي:

إذا كانت لك ثقة في أختها و كنت تعلمين و متأكدة من أنها رزينة و حكيمة و غير متهوّرة و أن علاقتها جيّدة بأختها .. فأظن أنه ممكن مناقشة المشكلة معها دون التدخل بينهما و أن تنصحيها بالتوصل لكيفية ترشيد و تعريف أختها الفتاة الصغيرة بخطورة القضية بالحوار و التحسيس، ثم إنسحبي، (و النتيجة غير مضمونة كون أن الفتاة قد تكون دخلت مرحلة الهيام بذلك الضبع) .. و في حال فشل هذه الخطوة ستنتقل المهمة لأختها و الخطوة الثانية هي أن أختها ستتكفّل بإخبار أمها دون الآخرين من أفراد الأسرة .. و هنا عندما تواجهها أمها فحتما الفتاة سوف تخاف و الإحتمال أكبر في أن ترتدع عن التواصل بذلك الشاب .. (تدّي الكفوف و الضرب خير من تفقد حياتها) .. أما إن لم تأتي هذه الخطوة بنتيجة فأعلمي أنو ما عندك ما ديريلها أكثر من الدعاء بالحفظ و الستر.

 

[Salah eddin]

السلام عليكم و رحمة الله و بركاته

لا حول و لا قوة الا بالله ... يا عجابة !! في عمرو32 و يتبع في بنت عمرها 13

ياااااو راها خلات ياااااو ..

شني هذا ياااا ربي شني هذا ؟؟؟

ما عرفتش وش نقولك ... راني حاير فيك يا مخلوقة كفاه قدرتي تضربي النح و ما تقوليش لدراهم

من المفروض تقوليها لدارهم مهما كانت العواقب و هلي الي يصرا يصرا

لازم خاوتها يديرو راي لهذا الفاسد الي يتبع في طفلة اصغر منو بعشرين سنة

لا اله الا الله ... و الله ق الراس يشيب من هذي الظواهر

و بيناتنا ... راها كاين طفلة مولات 13 تقول عندها 20 و لا 22 سنة

و اضلا ضرك طفلة بنت 13 سنة راها تعرف يا حسراااااه الامور هذي

و بالاك تقريك قاع... لذلك ما تقولوش بلي الطفلة صقيرة و ما تعرفش ... كن جات ما تعرفش ق يجيها واحد خاطي و كبير تهربو منو مباشرة

و ما تخليهش قاع يقربها

الطفلة عارفة صوالحها ... و السيد ق جاهل الله لا تربحو ...و دارهم قامي عليهم و نتي لازم تفوقيهم

و السلام​

 

[نضال ابن فوزي]

بئس الصديقة أنت، إن تركت أخت صديقتك تسقط في الهاوية ولا تفعلي شيئا، قولي لأختها وأختها تنصحها ولا تخبر إخوتها، وإخوتها يتخذوا الإجراءات،

سبحان الله! قلت في عمرها ١٣ سنة، كيف يسمح لك قلبك وضميرك أن تبقي ساكتة وتكتمي عن صديقتك؟