السلام عليكم
لديّ الكثيير والكثييير من الأحلام التي لو ذكرتها لكتبت جريدة
نتمنى أولا أن يكون الله والوالدين راضيين علينا ويرزقنا ربي بحسن الخاتمة ويغفرلنا ذنوبنا ويستر عيوبنا
ويرزقنا الجنة حنا وكل المسلمين ونتشرفو برؤية الرسول عليه الصلاة والسلام في الجنات
أول حلم عندي نشوف والديا هانيين وبصحة جيدة وحاجة ماتعبهم ولا تقلقهم
ونشوف ختي ناجحة ومتفوقة وبصحة جيدة وبنفسية جيدة وواصلة لأعلى المراتب
أما الاحلام لي تخصني انا
حلمي الأول هو عمرة مع عائلتي وزيارة الكعبة وتطهير قلبي من كل هم ومن كل مشاكل العالم
حلمي الثاني بيت يكون بسيط لكن يقدر يلمنا أنا وعايلتي ونعيشو فيه بواش مكتبلنا ربي
حلمي الثالث نلقى عمل مناسب ومحترم ونشري بالنقود لي نجمعها لوالديا وأختي كل واش متمنيين في هاد الحياة
حلمي الرابع نكوّن عائلة ويرزقني ربي بالشخص المناسب لي يقدرني ويحترمني ويعرف قيمتي
ويرزقني الله بأطفال صالحين يكون فيهم خير للأمة (وكذلك يرزقني ربي بأحفاد صالحين وكنات صالحين هههه)
حلمي الخامس ندير حاجة في حياتي تفيد هاد المجتمع
مثلا نتبع هوايتي ونكتب كتب فيها منفعة للمجتمع وإلا ندير مشروع يكون فيه فايدة ويبقى يخدم عليا حتى بعد الموت
والحلم الرئيسي هو نزور مكتبة ضخمة
ولو زوج دقايق ههه
كذلك أهم حلمين وهما حفظ القرآن كاملا وارتداء الجلباب (مع أنو هادو يعتامدو على إرادة الانسان)
يعني هادي أحلام رئيسية نتمنى من كل قلبي انها تتحقق ولو نتكلم على الاحلام الدقيقة ماش رايحة نسكت
حلمي يوما ما تقولي ماما سخفت على هاديك الحاجة غدوة تكون بين يديها وكذلك بابا وأختي
حلمِي يوما ما ندخل لمحل الألعاب مع أطفالي نشريلهم واش يحبو ونشاركهم اللعب بيهم
حلمي ندير مكتبة صغيرة في البيت تاعي سواء في بيت أهلي ولا في بيت زوجي ونوضع فيها كتب لأطفالي وكتب للكبار
حلمي ندير مصلى صغير فيه قرآن وسجادات وكل ماهو متعلق بالصلاة من كتب تعلم الوضوء وغيرها
حلمي تكون عندي حديقة صغيرة نربي فيها حيوانات أليفة ونزرع فيها الورود والاشجار المثمرة وندير فيها أرجوحة صغيرة للأطفال
وحلمي وحلمي وحلمي، انا كثيرة الاحلام صراحة حتى في الامور الدقيقة جدا نعطيها أهمية ونحلم بيها
على هادي نسكت أحسن هههه لكن كاين أحلام يمكن للإنسان أنو يتخلى عنها لأنها ماش ضرورية
كالحديقة وغيرها من الامور الثانوية لي زايدة في الحياة يعني الرئيسية راني ذكرتها
شكرا اختي على الموضوع بارك الله فيك
تحياتي
