السلام عليكم و رحمة الله و بركاته
جماعة اللمة صحيتو وش راكم ؟ ان شاء الله اموركم بخير ؟ الحمد لله على كل حال
المهم ... راكم عارفين مين ذاك نحب نجيبلكم حكاية نزهاو بيها شوي رغم المورال و الامور اليي صادة لهيه
بصح حنا نحمدو ربي ع الكثيرة ...و الحمد لله على كل حال مرة اخرى
.......
و ياسيدي نبداو الحكاية بسم الله
....
قالك واحد النهار كاين واحد السيد ساكن في فيلاج لا داعي لذكر الاسم تاع الفيلاج ... المهم مع الموفما تاع لونساج و كذا و القاشي يخرج في الصوارد و الكماين و الماتريال ... كاين هذا صاحبنا ... عايش كي يا ايها لاناس ...انسان زوالي لا شان عليه ...
المهم جاوه صحابو قالولو نتا يا سي راك ق هاك لاخدمة باينة لا راي باين لا تاويل لا صرف دراهم ... ها اقفز كيما القاشي لاخر و دير راي على عمرك ..
قالهم كفاه ؟ وشمن راي ؟
قالولو ها راه كاين لونساج ... اضرب فيها كريريسة و لا خرج فيها سلعة عاودها البيع كذا منا ...المهم تخرج من القرڤة
و دخلوهالو في راسو و خدمتلو صاحبنااا
قالك هذي فرصتي ... نضرب فيها كاش حاجة من لونساج و نعيش لابال في ...
المهم سقسا صحابو وش الحية الماشية ياسر ؟
قالولو روح اضرب فيها زوج سيميات تاع قهوة و سكر ... راهم ق هذو الزوج الي ماشيين
نح منهم 5 كيلو سكر ديرهم معروف ... و الباقي بيع ... و راك في الفايدة باه بعت .....حـڤا السلعة تيو و باطل و ق العافية
المهم صاحبنا هذا .. راح باه يوجد الدوسي تاع لونساج ... راك عارف راح جبد النكوة تاعو لـڤـاها خضرة جديدة تشعل
راك عارف عمرو ما احتاج نكوتو ههه ما اسحقهاش قاع ههه
المهم راح للبلدية اضرب ..منا ...20 بطاقة اقامة ...40 تعريف ..13 بطاقة فردية.. و ال S12 حـڤا لازم و واجب و يخرج مرة وحدة في العمر
ههه
ها راكم عارفين ههه و الS12 لازم ادير عليه ياسر فوتوكوبي و لوريجينال ڤارديها عندك
صاحبنا هذا بيه حابس الله يبارك هههه دار الS12 لوريجينال في الدوسي و راح باه يدفعو...اي والله
المهم ركب في الطرولي تاع دزاير و مباشرة الى العاصمة ...
دخل للمكتب تاع لونساج ... سلام عليكم .... و عليكم السلام
ڤرب االمعلم ؟ ... وش تسحق ؟
قالو جيت ندي كيما راهم الجماعة يدو ...ههه جاتك صعيبة هذي ؟ ههه
قالو هيه هات الدوسي قبل ...المهم السيد عطالو الدوسي و قعد يستنى
مااارة هاك ... و جا مولى البيرو ... قالو وش تحوس تدي ؟ قصدي نوع سلعة ؟
قالو ها باينة هذي ... اطلق روحك جيبلي زوج سيميات واحد قهوة و لاخر سكر و اطلقني نروح راه العيال يستنى فيا
قالو والو ما فيهاش ...ماكاين لا قهوة لا سكر ...
هامالا وش كاين ؟ ههه
قالو كاين الزبدة و المارغارين ...ههه
ياتل و الزبدة وش ندير بيها انا ؟ ههه تحوسني نسمق بيها أدرار اا ؟؟؟؟؟ .... هههه ياتل سيمي زبدة راني تمنراست نبسسها هههه
قالو يا خويا هذي الكاينة ... ادي الزبدة و لا روح كيما جيت
المهم السيد ما لقى ما يدير ... باصا ...اي قالو ماعليش ... هات الزبدة و اطلقنا نروحو على رواحنا راه طاح المقرب ...
و هو لحق للديبو ... و لقى 5 كماين تاع زبدة يستناو فيه .. والكاميو ق الhino هذاك حـڤا ق شواطم و سخانة و اطلقني مش نتيجك
هههه
المهم .. خلاص تفاهمو و كذا ... و عول يجيب السيميات لدارهم ... و راك عارف خارج من دزاير على ال 12 تاع الـڤايلة ... و كان الصيف...
أوت راني نقولك ... الزاوش يطير بجناح و يظلل بجناح ههه السخانة مريحة في الظل هههه
و جا يمشي يمشي ... هو لحق للخرجة و عاد في جيهة " شفة " ( شفة تعرفوها ههه )
راكم عارفين السيركيلاسيون ... و الجبل يطلق فالسخانة و الكاميون سخون و الـڤايلة و في أوت هههه
و بدات الزبدة هذيك تـڤطر ههه و بدات تذوب ههه
المهم راك عارف الكاميو يمشي ميترة و يوخر 10 ميترات ههه كارش في الجبل ومش لاحق ههه
القرد تاع شفة هذاك هبط كاشما ياكل و بدا يزلق ههه قالهم ياتل ها سيقوا ههه
راك عارفة شفة زلقت دخلت في بوڤزول ههه
الكراريس هذيك رايحة جاية ڤوش دروات ههه
راك عارف العزايج عادو يفتلو في الطعام في الڤدورون ههه
المهم الزبدة هذيك دارت كارثة في الطريق ههه
و صاحبنا هذاك ما جا يلحق للبرواڤية بقالو سيمي واحد تاع زبدة ههه الاخرين قاع ذابو
ههه
المهم ما جا يلحق لوسارة ... الكاميو ذاك ذاب النص تاعو ههه بقى النص برك
و هو في الدخلة لقى واحد مولى R4 طايح اونبان ههه
حبس مساميه و عيطلو : االمعلم ؟ ... ما تبدليش الR4 بالزبدة ؟ هههه
و السيد هذاك كاره من ال R4 ههه المهم ثم ثم قبل بالعرض و بدلو ههه
صاحبنا ديمارا بالr4 هذيك ههه ( جرتها ماهيش اوبان ههه السيد كان يديماري فيها و الفراما طالع يحسبها اونبان هههه )
المهم صاحبنا ما مشاش ياسر تقلب بال R4 هذيك
و رجع فارق لدارهم ههه
و عجباتو الفكرة تاع لونساج ههه
...
راح يعاودها ههه
المهم راح للبلدية ههه خرج دوسيات كي قبيل ههه و الS12 قالولو ما فيهاش ههه عندك مرة وحدة ههه
وش دار ... سرق S12 تاع واحد اخر ههه و فحّت بيها ههه
ايا كي لحق للبيرو تاع لونساج وش عطاولو هههه
عطاولو سيمي تاع كوش بيمبيز ههه
لقاو الs12 الي جابو ... تاع طفل صغير في عمرو 6 شهر
قالولو ق الكوش الي يصلح في ذي الحالة
هههههه
و صاحبنا فتح حانوت تاع كوش و ق العافية
ههه
و هذي هي ... ان شاء الله تكون عجبتكم الحكاية
آخر تعديل:
