راديو طروطوار

[قرصان الساحل]

راديو طروطوار
تحياتي لكم انتم اخوتي في القارة السمراء ولكن صدقوني تمنيت لو ان اخوتنا كانت في القارة العجوز .. حتى في استراليا معليش -__- جبتلكن اليوم اذاعة كونطوار اطلقلي تعيش ... ظرافة

في طريق نسمع للاذاعة ايا وطلقو فيها راديو طروطوار على حاجة ما لازمش تتنسى وانت نسيتها وتهاطلت المكالمات .. جمعت شوية حالات في هاذ الموضوع ..

طروطوار لول ... وحدة تخدم في البنكة ايا نسات مليار في صاشي وخرجت حتى عيطتلها ديراكتريس تاعها يا بنتي المليار خليتيه لذيابة رجعت لخدمتها مزية ليزاجو ولاد حلال -_- ماشي غير ولاد حلال هادو يا مدام هوما الحلال اونباغسون اخخخ

طروطوار دوزيام .. هادي وحدة متحجبة خرجت مع راجلها في الطومبيل للخدمة بلا خمار مشاو نورمال في نص طريق قلها يا مدام هدا واش قاتلو شعري وش بيك .. قالها هو ايه نسيت لي شعرك ... ومبعدا فاقت اه شعري الخمار نسيتو وها حي عليا.. وهدا يسموه البخس اونباغسون .. وعندو حق الشاعر لي قال ولي لدارك وين راكي رايحة -_-

طروطوار طروازيام .. هدا واحد رجع العشية عيط لمرتو وهو مقلق وينك مراكيش في الدار قاتلو ماشي حطيتني نقري لي كور طاحت الظلمة وانا نستنى فيك وليزينيتي مكاش .. والدوزيام راح يجيب بنتو من لكراش ما لقاهاش كي سقسى قالولو نسي ماا جبتهاش اليوم ... حبيبنا هذا نقولولو لي موالف بالحفى ينسى سباطو

طروطوار الفوريام .. ولي صح فور السيد ڨارى طومبيلتو قدام الجامع وصلى المغرب كي كمل رجع على رجليه كي ناص صباح وجهو رجع صفر في بالو سرقولو طوموبيل ايا دار تصاور في الفايس بوك ديكلارا لابوليس ندب حناكو ومبعدا صابوها قدام الجامع ... صديقي مهما خذلتك الحياة ما تخليهاش تخذلك

السانكيام هادي وحدة نعرفها خلات البورت موني تاعها عند صاحبتها كي جات تركب في البيس مالقاتش دراهم دونك دارت انسحاب بهدوء واكملت طريقا مشيا على ال pied في ذلك البرد القارص ... وانا مع قول الشاعر افقد ذراعك ولا تخلي بورت موني عند صاحبك موت بالدراهم ولا تموت بردان -____-

الاخير صراتلي انا المتحدث شخصيا خطرة تفاهمت مع وحدة نعقدو في البلدية .. كي جا نهار نسيت الميعاد .. من هذاك النهار وتلفونها مقفول .. ملاحظة لي يقولي تكذب نحشلو كلتا رجليه -______- نسيت نقلكم بضربة واحدة

ايا علابالي كل واحد صراتلو حكاية وين حوايج ملازمش يتنساو وهو نساهم ومبعدا عرف حجم بن الشيخ الذي يسكن مشاعره وكيانه .. دونك احكولنا حكاياتكم المثيرة هنا .. ونصيحتي ليكم مهما خذلتك الحياة انسى كلش الا مفاتح شومبرا لي تبات فيها قالك سقسي بايت برا ومتسقسيش ڨوڨل..

ودمتم سالمين

​

 

[لؤلؤة قسنطينة]

السلام عليكم
نعتذر على التأخير في الاعتماد أخي هشام
موضوع طوب كي العادة والمواقف المضحكة هادي تصرا دايما
وين يكون الانسان متعب ومخو ماش في راسو يولي ينسى أمور مهمة
لي عودة ان شاء الله نجمع المواقف لي كيما هكا لي صراتلي ونولي بإذن الله
​

 

[dahman kz]

قداش من مره تصرالي مواقف كيما هاذي ياحصراه هههههه
الموطو ننساها قدام الجامع ونروح ونخليها بلا حساب ونروح للخدمة وننسى الماتريال في الدار بلا حساب ثاني ونروح للحانوت ثاني ومانلقاش دراهم في جيبي نورمال ههه
ومن اغرب لمواقف للي صراتلي كاين مرة كنت رايح نخدم في بلاصة بعيدة وطلعت في كار تاع بلاصة اخرى و ديمارا الكار وكنت نشوف في الطريق بالصح ما جبت حتى خبر حتى وين وصلنا وكي جات الكار باش تقلب و ترجع قالي الريسوفار رانا وصلنا خويا وباش نقلبو ونرجعو ثما فقت وعرفت روحي كنت في غيبوبة هههه وقلتلو كمل خويا راني باش نرجع معاك وفاقلي باللي غالط بالصح طفى الظو هههه


والنسيان هذا والشرود هذا حاجه عادية والظغوطات والمشاغل تاع الحياة تخلي لواحد ساعات يكون في شرود ذهني وينسى كل شي
ومستحيل تلقى شخص ما فاتتش عليه لمواقف هاذي والكامل ربي سبحانه .

 

[zohor kfz]

وحد المرة كان عندي رونديفو مع البروف نتاعي عند 13:30 و نسيتو و انا لي كنت محتاجاتو المهم عند 12 كملنا القراية و مشيت فطرت على خطري و شخت غاية مع صحاباتي و نسيتو مزية صحبتي كان عندها رونديفو مع بروف تاعا في نفس البيرو تاع البروف تاعي و انا داخلة معاها و السيد قالي تفضلي راني نستنا فيك و انا نشوف فيه هديك الشوفة نتاع اشبيك ؟؟؟؟اسم محتاج من عندي ؟؟؟؟ و هو المخلوق يقلي تفضلي و انا نقول لصحبتي اشبيه هاد بنادم ؟؟ حتى ضربني الشاهد للراس باش تفكرت بلي انا لي طلبت نقابلو ...
هدي اقل حاجة و مكان لاش نفضحو بقية الاسرار هههههه

 

[لؤلؤة قسنطينة]

السلام عليكم
عدنا من جديد، بصراحة أنا قاعدة وحدي تفكرت واحد الحادثة وقلت نجي نحكيها هههه
هادي قبل عامين في عام الليسانس تاعي بالضبط هاداك العام تاع الصح قريب هبلت يعني مخي ماكانش معايا صح
وكانت خدمة تقرير التربص تقريبا كامل على ظهري يعني تعبت بزاف ونشفى عليها آخر نهار لتقديم تقرير التربص
جيت بكري للجامعة وخرجت سيديات باه نقدمهم للاستاذ يعني تعبت جسديا وكذلك ماديا وكلشي وحدي ساع كي ديت السيديات للاستاذ
لقيت سيدي نورمال وسيدي تمسخرت بيا مولات السيبار دات الدراهم زوج مرات وزوج مرات تخدعني وأنا هبلت المهم الاستاذ كان
ناس ملاح وقالنا معليش والسيدي المليح مدو للادارة وهو هز خدمتنا في فلاش ديسك، من بعد كان عندنا كور وزوج بنات لي معايا في التقرير
قالولي رانا خارجين عندنا حاجة نديروها وماش رايحين ندخلو للكور ووحدة منهم عندها بيسي وهو لي خدمنا بيه التقرير تاعنا كامل
وانا صراحة مانحبش نبروفيتي على الناس قلتلها اذا تجي بكري يعني ماتروحيش من تم هاتيلي البيسي نهزو معايا وندخل بيه للقراية
قاتلي هيه تعملي فيا مزية وقاتلي راني نورمالمو نولي بكري، المهم هزيت البيسي وواقفة قدام المدرج نستنى لي يقراو قبلنا يخرجو ومن
بعد جاوني بنات قالولي باه تسلفيلنا الدروس، وليت حطيت البيسي على حرف قدامي هكا وجبدت الكراريس ومن بعد وحدة فيهم قاتلي
اي كاينة وحدة تحتاجك المهم رحت حكيت معاها ومن تم خرجو لي في المدرج ودخلت نقرا نورمال وكي خلصت جايا خارجة مروحة بسلام هههه
نلقى زوج بنات لي معايا جاو سقساتني مولات البيسي قاتلي مروحة؟ قلتلها هيه قاتلي مالا اعطيني البيسي قلتلها واينة بيسي؟ قاتلي بركاي
ماتتمسخري يخي خليت عندك البيسي تما طلع وجهي خضر وزرق وموف هههه قلتلها والله ماعلابالي ساع الطفلة ولا وجها كارط سورتو
البيسي جديد شراهولها باباها العام هاداك بعد، وليت نجري لبلاصتي وين كنت قاعدة في المدرج لقيتو ماكانش زدت خرجت برا منين كنت واقفة ساع
لقيتو في بلاصتو كيما راه لحسن الحظ واحد ماقاسو صراحة قريب قلبي حبس خاصة أمانة تاع الناس والله عمري لا تمسخرت بيها بصح
هاداك النهار عقلي ماكانش معايا، وهادي هي حكايتي كاشما نتفكر نزيد نولي
تحياتي
​