مشاركة في مسابقة أفضل عادات الزواج في ولايتي ولاية قالمة

[السلطانة]

السلام عليكم ورحمة الله وبركاته

أردت المشاركة في المسابقة
أعرفكم على عادات الزواج في ولاية قالمة


نهار الشوفة:
بعد مايتفاهم الاهل بين بعضهم بالهاتف ويسقسوا مليح على عائلة العريس وهوما بدورهم يسقسو عليهم مليح
يجي نهار الشوفة لي يجي فيه عادة اب العريس والعريس واخوته او رجال كبار فقط من العايلة مثلا خال او عم
والنساء الوالدة والاخت والعمة والخالة يعني ميكونش عدد كبير غير شوي
يجيبو طارط والخاتم وكاين لي يحبو يجيبو بوكي نوار وكورباي لعروسة كل واحد ومقدورو

قلبت مواضيعي القديمة لقيتلكم بعض الصور كنت حطيتها في اللمة ههه باسمي لقديم



يدخلو اهل العريس نمرحبو بيهم اهلا وسهلا يقعدو
الرجال في الصالون والنساء في صالون
نحطولهم حليب وقهوة وقاطو
انا هاذا واش حطيت


بعدما شربو القهوة وكلاو القاطو حطينالهم ديسار وعصير كاين لي يدير تحليات ومكسرات وتاي
مباعد تدخل لالة لعروسة هعهعهع تبا تفكرت كي كنت لاعبتها حشمانة منهم
تسلم عليهم وتقعد يصورو شوي
مباعد يدخل لعريس يصور ويقص لاطارت ويلبسلها الخاتم
يكونو الرجال تفاهمو مع بعض
ويحكيو على الشرط والامور هاذيك المهم تفض يروحو يروحو

نهار الفاتحة :
يقراو الفاتحة في الجامع او في الدار كل واحد واش يحب
المهم الفاتحة نعرضو فيها الرجال بزاف لأنو نعتبروه هي الاساس

امام ومعاه رجال من لافامي وخاصة الكبار يحضرو ويشهدوا على الشرط والمفاهمة
النسا تاني يعرضو حوالي 20 مع عائلة العريس 10 او 15 مرا

انا مهري كان :9 ملايين+براسلي ذهب +خاتم الشوفة +خاتم العقد+شاة لحلال

المهم يجيو يصونيو طيطيططي

يجيبو حوايج الفاتحة لبسة وكوسميتيك وطارط وفخض لحم مزين بالخضرا والديسار
يزغرتو يدخلو النساء للصالون يلقاو سني واجد عليه القاطو :

ضروري البقلاوة والمقروط ومعاه انواع اخرى من الحلويات
يشربو قهوة وحليب وياكلو مالذ وطاب
يحطلوهم الرفيس لي هو ضروري في الفاتحة ويكون مزين بحلوى الدراجي
يتقدم مع اللبن



مباعد تدخل لعروس في ابهى حلتها
كل وحدة واش تلبس غوب ولاقفطان ووو



المهم في عادات القوالمة يديرو ديدجي
انا مدرتش الغنا

دخل العريس قصينا لاطارت صورنا وراحو روحو لانهم بعاد باه يوصلو بكري





انا فاتحتي كانت مع العقد في نفس الوقت
بحكم انو العريس بعيد جبنا نوتار عقدلنا في الدار في نفس اليوم وانتهي

ومن عادات سكان ولاية قالمة العقد يعملوه في البلدية ويجيبو العروس
ويديوها تتغدا هي واهلها

والفاتحة يكبروها تاني انا عدلت حسب واش يوالمني ويوالم ظروف راجلي واهلو

نهار الفراش:

تعدل لعروسة فراشها في دارهم وتزينو ويجيو يصونيو طيطيطيط باه يديوه
ويديرو كورتاج فيه الزهو
من عادات القوالمة انهم يكريو فرقة تاع عساوة
يطبلو على الدف يخرجو بيهم الفراش
والرجال لي يجيو ياكلو القاطو ويشربو قازوز

هاو فراشي هعهعهع







العرس:

يالميمة بقي بنتك بالسلامة

جا نهار العرس من عادات القوالمة العريس يدخل يخرج لعروس من دارهم بالعيساوة انا تاني هادي نحيتها هعهعهع
شفتها معندها حتى فايدة
جاو اهل لعريس للاصال دخلو النسا مع النسا والرجال مع الرجال
يشربو القهوة وياكلو القاطو
ويشطحو ويزهاو

هاذو بعض من الصور تاع امورات القاطو تاع عرسي





يتبع...................

​

 

[السلطانة]

 

[السلطانة]

 

[السلطانة]

المهم تتصدر لعروسة :

العروسة القالمية تتصدر بالقندورة تاع الفتلة
ويحطولها فوال على وجها باه ميبان والو يقولك العادة تقول هك
حتان تحني باه ينحيوهولها
يجيو اهل العريس يحنولها
ويرفعولها لوفوال من وجها
يشطحو شوي
ومباعد تكمل تتصدر في اللبسة لي خيطتها كل وحدة واش تحب

في هذه الاثناء العريس والرجال راهم يقصرو ويحكيو وزاهيين مع بعض

عادة القوالمة يطيبو شربة فريك باللحم وسلاطة متنوعة ودوزيام بلا مرقة حلوة وكفتة او دجاج او شخشوخة الظفر او تريدة او رولي كل واحد ومقدورو

وديسار

هاذي الصينية لي جابولي تعشيت فيها ههه

المهم وصلنا

هاذي شاة لحلال هههه كي كانت معلقة



المهم يتعشاو ويسهرو شويا

ان شاءالله يعجبكم الموضوع البسيط لعقوبة لجميع اللماويين واللماويات

سبق لي وحطيت العرس القالمي بالتفصيل في مجلة سابقة في اللمة كانت مرفوعة في واجهة المنتدى

تقبلوا تحياتي

 

[طيب الكلام]

السلام عليكم و رحمة الله و بركاته
تقريبا نفس العادات عندنا حتى من ناحية الاطباق و الحلويات .
ماشاء الله موضوع في القمة اختي . ربي يهنيك ان شاء الله و العاقبة لي مازالو
سخفني الرفيس باللبن نموت عليه . كلشي جاك روعة . يعطيكم الصحة
بارك الله فيك اختي

 

[زهور الأمل]

ماشاء الله تبارك الله تقريبا في تشابه ما بين كل الولايات فقط اختلافات بسبطة
تتهني حبيبتي

 

[آمِيْرَتُه]

السلام عليك
عرسك كان بسيط بزاف ماشاء الله مكلفت روحك مكلفتي ولد الناس لأن الهنا قبل كل شي
ربي يفرحك و يهنيك

 

[secret de coeur]

شوشو اني حضرت عرسك من جديد
كي شغل بصح
عجبني بزاف مانحبش تكاليف و التكلف والتبدع
عرسك هايل ماشاء الله
عقبال ماتفرحي بنورسين

 

[ليليا مرام]

السلام عليكم
رائع رائع كنت هايلة ولو ما بنتيش راك درت كل شي قيس ما يساعد راجلك واهلو يعطيك الصحة ودرت جهاز ماشاء الله وما بالغتيش وكل شي درتيه بالطبع ربي يهنيك وعادتكم هايلة اول مرة نسمع بيها
يعطيك الصحة وربي يهنيك يا رب العاقبة لما تزوجي نينا بنتك
مشكورة

 

[جميلة أنا]

بوركتي على العرس نقصد على حضورنا لعرسك ههههه
الله يبارك منين كانوا ناس قالمة ناس طبع و شأن

 

[*amani*]

السلام عليكم
ماشاء الله .باين فيه كان عرس راقي يبارك الله ..كلشي زين وباهي
شكراا على الموضوع المميز

 

[omarwa]

يبان جاز هايل العرس مكاش كيما البساطة عداتكم هايلين يعطيك الصحةً شوشيتا