دبراسكم❌لازم تبعوها✅✅✔✔

[sanaya]

سلام عليكم
توحشتكم بزااااااااااااااااف وشراكم ??
عالسريع حبيت نمد معلومة ولا تجربة جربتها و عجبتني
ياخي شكيتلكم ايامات قبل بالتعب و الارهاق و نتفكر كفاه كنت نوض الصباح نخدم لليل و منعياش
المهم واحد اخوتي نصحني بتجنب السكريات جاتلي صعيبة صح و راجلي تاني يقولي علاه تشربي لتاي بنين كما هاك
المهم خترة فالصلاة طاحتلي في مخي خطيك من السكريات إطلاقا
و حبست السكر ماكاش لاخبز لا شكولاطة لا حلويات
نطيب خبز الشعير و فبلاصة السكر ندير عسل طبيعي و لا روب التمر
بعد ثلاثة أيام راحلي التعب خلااااااص و ليت ندير سبور كل يوم بعدما كنت نديرو زوج خترات فالسمانة و منقدرش مامبا نكمل الفشل راحلي خلاص و الحمد لله يارب
و نتمنى كامل تجربوها باش تحافظو على صحتكم و شكرا??سلام

 

[لؤلؤة قسنطينة]

السلام عليكم ورحمة الله وبركاته
أهلا مريومة توحشناك وتوحشنا مواضيعك الشيقة
وبارك الله فيك على النصائح القيّمة، ماشاء الله هاد الأيام اللمة راهي غير
بمواضيع الأكل الصحي وهاذا شيء جميل لأنو مجتمعنا يفتقد بشكل كبير
للاهتمام بالصحة تاعو خاصة من جانب الأكل، لأنو أغلب أكلنا غير صحي ومضرّ
وكيما قلتي لما الإنسان ينقص من العجائن ولا السكريات يولي يحس بالخفة
والنشاط ويقدر يمارس الأعمال تاعو بسهولة لأنو جسمو فيه غير الشيء المفيد
ان شاء الله نتبعو جميعا هاد النصائح التوعوية ونغيرو من نمط غذائنا
شكرا مريومة على النصائح المهمة وربي يوفقك لمزيد من النجاحات
تحياتي​

 

[وۣۗهۣۗہۣۗم]

اهلا بعودتك اختى
مشكورة على مشاركتنا اللنصيحة والمعلومة القيمة
وفقك الله لما فيه خير لكى

 

[أبو عاتكة]

اولا مرحبا بيك والحمد لله على سلامتك هاذي غيبة انا قلت راكي تشاركي في كاش اولومبياد في افريقيا ولا القطب المتجمد.
لا شك في أن طريقة ومحتوى تغذيتنا فيها مخاطر وعواقب وخيمة اجسامنا اصبحت لا تحتمل لكننا نستمر في إدمان هذا النمط ويصعب علينا تغييره الا بعد الوقوع في الخطر وممكن بعد ذلك نعيد ونكرر نفس النمط.الامر يحتاج الى انتباه أكبر وخاصة الاطفال لازم الانتباه لهم احنا ممكن اتفرت فينا الجهاز الهضمي نتاعنا ممكن نستعملوه في تكرير البترول عادي جدا لكن الاطفال ربما لازم تعويدهم على نمط غذائي جديد. الامر يحتاج الى اسقاط نظام.
عن نفسي السكر والملح أقلل منهم قدر الجهد لايوجد عندي مشكل في البنة لما نكون متيقن انو الصحة أولى من البنة كذلك تبقى حكاية العجائن والزيوت طبيعتنا كجزائريين نستهلكوها كثيرا هي والقهوة. أحسن اوقات راحتي جسديا لما ناكل حاجة خفيفة تبقى خفيف ومتحسش بالوهن والثقل.نهار اللي نعول عالماكلة نحس روحي جيت آبيي من قندهار لبوسعادة
يعطيك الصحة.

 

[sanaya]

اولا مرحبا بيك والحمد لله على سلامتك هاذي غيبة
الله يسلمك خو لهلا يغيبك
انا قلت راكي تشاركي في كاش اولومبياد في افريقيا ولا القطب المتجمد.
ههههههه كنت أتفقد أحوال الدببة نطيب لهم و نغسل ليهم ???
لا شك في أن طريقة ومحتوى تغذيتنا فيها مخاطر وعواقب وخيمة اجسامنا اصبحت لا تحتمل لكننا نستمر في إدمان هذا النمط ويصعب علينا تغييره الا بعد الوقوع في الخطر
نعم و هذا أكبر خطأ نقع فيه لازم حتى تتطفر فينا باش نغيرو و هي غلطة كبيرة
وممكن بعد ذلك نعيد ونكرر نفس النمط
متقوليش هكذا بالاك نولي للسكر ياو ماشي ساهلة تلقا روحك مع عباد ياكلو أنواع الحلوى و انت تصبر في روحك حتى أنو وليت نقول لازم نطبق غض البصر حتى مع الحلويات ?
.الامر يحتاج الى انتباه أكبر وخاصة الاطفال لازم الانتباه لهم احنا ممكن اتفرت فينا الجهاز الهضمي نتاعنا ممكن نستعملوه في تكرير البترول عادي جدا
هههههههه تكرير البترول لالا حتى لدركا لازم الواحد يعس روحو مدامو عايش ديجا كيولي الواحد للأكل الطبيعي جسمو يتخلص من كل السموم السابقة
لكن الاطفال ربما لازم تعويدهم على نمط غذائي جديد. الامر يحتاج الى اسقاط نظام.
جستومون حنا أوموان تربينا فهواء نظيف مكاش ديريزو و لا الويفي مي دوكا للأسف لالا
حتى الهواء مش نظيف
و تالمون والفنا المأكولات السريعة و الحلويات ولاو دراري صغار مينجموش ياكلو بقوليات عأساس دير نفخة و وجعة و كل ما في الأمر موالفوهاش لرواحهم
والأم الحنون شكولاطة حلويات و ياوورت و الطفل توجور فالطبيب مناعة ضعيفة
حقيقة لازم اسقاط نظام و هو دور ربات البيوت أكثر بما أنو حنا من نتكفل بإعداد الطعام
عن نفسي السكر والملح أقلل منهم قدر الجهد لايوجد عندي مشكل في البنة لما نكون متيقن انو الصحة أولى من البنة كذلك تبقى حكاية العجائن والزيوت طبيعتنا كجزائريين نستهلكوها كثيرا هي والقهوة
القهوة خاطيني هه ولكن العجائن هي المشكل الكبير حاليا ولكن أنو نقصو شويا أفضل من لا شيء
. أحسن اوقات راحتي جسديا لما ناكل حاجة خفيفة تبقى خفيف ومتحسش بالوهن والثقل.نهار اللي نعول عالماكلة نحس روحي جيت آبيي من قندهار ??لبوسعادة
شكرا لمشاركتك رأيك و ربي يتمم عليك نعمة الصحة
يعطيك الصحة.[

 

[sanaya]

اهلا بعودتك اختى
مشكورة على مشاركتنا اللنصيحة والمعلومة القيمة
وفقك الله لما فيه خير لكى

اهلا حبيبتي العفو تسلمي لحضورك

 

[sanaya]

السلام عليكم ورحمة الله وبركاته
وعليكم السلام مام انا توحشتكم بزااااااف
أهلا مريومة توحشناك وتوحشنا مواضيعك الشيقة
وبارك الله فيك على النصائح القيّمة، ماشاء الله هاد الأيام اللمة راهي غير
بمواضيع الأكل الصحي وهاذا شيء جميل لأنو مجتمعنا يفتقد بشكل كبير
للاهتمام بالصحة تاعو خاصة من جانب الأكل، لأنو أغلب أكلنا غير صحي ومضرّ
وكيما قلتي لما الإنسان ينقص من العجائن ولا السكريات يولي يحس بالخفة
والنشاط ويقدر يمارس الأعمال تاعو بسهولة لأنو جسمو فيه غير الشيء المفيد
نعم وتولي معياييش مام لوكان متقيلتيش نورمال كشغل عند 14 سنة هههههه الحمد لله كلشي يولي لطبيعة الأكل بالدرجة الأولى
ان شاء الله نتبعو جميعا هاد النصائح التوعوية ونغيرو من نمط غذائنا
شكرا مريومة على النصائح المهمة وربي يوفقك لمزيد من النجاحات
وشكرا لمرورك ألف تحية حبيبتي
تحياتي​

 

[zagane]

السلام عليكم
زيدي نقصي الملح ومن بعد الفطور ومن بعد العشاء وتشوفي

 

[sanaya]

السلام عليكم
زيدي نقصي الملح ومن بعد الفطور ومن بعد العشاء وتشوفي

ههههههه الملح علاه واش فيه هو ثاني