السلام عليكم
انا عمري 26 سنة اكملت دراستي الحمد لله وعندي طموحات كثيرة ومشكلتي الوحيدة هي الزواج انا لا اريد ان اتزوج علابالي دوك جيبوهالي منا ومنا سنة الحياة ووو نعم الزواج سنة وليس فرض لذلك فانا لست مضطرة لدخول سجن مؤبد لان ذلك المدعو بالزواج اراه مجرد ورطة ونهاية حياة بالنسبة للمراة انا بصراحة لا اقدر على تحمل اي مسؤولية والزواج كلللله مسؤوليات وهناك اشياء كثيرة لا تعجبني فيه انا لا اتحمل العيش مع شخص غريب سيحول حياتي الى جهنم لا اريد انجاب اطفال اربيهم اسهر من اجلهم وعندما يكبرون يتخلون عني وما تقولوليش مكانش منها على خاطر عشنا وشفنا اولاد يرميو والديهم وووو وامي كرهتلي حياتي كل ما تسمع وحدة تزوجت جي تعايرني علاش ما تزوجتش ههه كان هذا الزواج هو بمثابة الاكسجين للمراة والله غير نضحك على هذوك لي يجرو على الزواج حسابلهم كي يتزوجو رايحين يحطو رجل على رجل ويغمضو عينيهم وتبدا الاحلام الوردية وهذا ما سبب صدمة كبيرة للكثيرات ثم يندمن ويتمنو يولو عازبات وهذا الخطا لا اريد الوقوع فيه ابدا انا ارفض الزواج تمااااما لا الان ولا بعد سنين ولا يهمني كلام الناس لان الرجال في نظري كلهم متسلطون ويحبون السلطة واحتقار المراة وكل قريباتي وصديقاتي نادمات على الزواج فلما ارتكب نفس خطئهم بالاك تقول راهم غير يبعدو فالعين لا مش هكا على خاطر كاين لي تطلقو وبكثرة وما شفت حتى وحدة متهنية في دارها بصح الوالدة كرهتلي حياتي بهذيك الهذرة الزايدة على بالي تقولو عليا مريضة ولا مهبولة لكني لست كذلك اتمنى ان يكون النقاش محترم وما تجرحونيش على خاطر انا انسانة حساااسة للغاية وهذا سبب لي الكثير من المتاب في حياتي شكرا
السلام عليكم ورحمة الله وبركاته أولا أختي الكريمة نشكروك أنّك فتحتيلنا قلبك وشاركتي بمشكلتك في هاد القسم خاطر من أجل الناس لي كيفك ومالقاوش حل لأمور في حياتهم لي تم وضع هاد القسم، وان شاء الله نفيدوك بآراءنا لي تقدر تساعدك ولو بالقليل أول شيء ختي لعزيزة وقبل ما نبدا نتحدث على المشكلة تاعك قلت في نفسي وينهي المشكلة من الأساس؟ يعني نتي تقولي بلي راكي رافضة الزواج والزواج سيء ووو وعندك قناعة تامة بذلك وحتى كلام والدتك ماشكيتش يأثر عليك بما أنك رافضة وعارفة مليح سبب رفضك، إذن المشكلة وينهي؟ ماش حابة تتزوجي ما تتزوجيش وينهو المشكل، لكن تعرفي المشكلة وينهي؟ هي أنو في قرارة نفسك عارفة مليح أنو الزواج أمر مهم في حياة الإنسان حتى ولو نفسك 99 بالمائة رافضة الزواج كاين 1 بالمائة راهي تؤيد الزواج وعلى هادي جيتي هنا تطرحي مشكلتك، كلي قاعدة تقوليلنا راني رافضة الزواج هل من حل يطلعلي من النسبة القليلة هاديك بداخلي؟ خاطر نتي امرأة وماكانش إمرأة ماتحبش شخص أقوى منها يكون سند لها وليس سلطة تخنقها ولا تصعب عليها حياتها، المهم خلينا مع هاد الأمر باه ماندخلوش في فكرة الزواج سنة الحياة ووو، نعطيك مثال بسيط وتبعي معايا بلعقل برك، مثلا السكين هو في يد المجرم وسيلة قتل وفي يد الطباخ وسيلة للتقطيع ووسيلة لطهي أشهى المأكولات، صحيح السكين منظرو مخيف لكن لو تسقسي طباخ يقولك السكين صديقي إذن المشكلة ماش في السكين بل في طريقة استخدامو، كذلك الزواج المشكلة ماش فيه المشكلة فينا حنا، ومستحيل أنا ولا نتي نعرفو خير من ربي سبحانو لي قال عليه مودة ورحمة، نجيو حنا نقولو الزواج وفيه وفيه؟ لا حنا لي فينا وفينا، هاد البنات لي تهدري عليهم وفشل زواجهم هل حاولتي تعرفي السبب الرئيسي للطلاق ولا للافتراق بما أنك سمعتي من طرف واحد ماتقدريش تحكمي، الرجل لما يتطلق يقول مرتي ماش مليحة وزوجتو تقول راجلي ماش مليح واعرفي نتي شكون الغالط والقاضي يحكم على الطرفين، وبصراحة وينهي السلطة هادي لي راهي كاينة والله راني نحوس عليها بالشمعة ومالقيتهاش، لما نخرج للشوارع ونلقى تبرج بكل الأشكالو الألوان لما ندخل قاعة حفلات ونلقى مرأة متزوجة بلباس كأنه لباس النوم تما نعرف صح بلي كاين سلطة، ربي يهديك ختي ماعادتش كاينة سلطة ورانا نحوسو على الرجل لي عندو سلطة ويغير على عرضو ويحط حدود للمرأة خاطر المرأة اليوم تحوس على الحرية الزائدة، يحبو يخرجو في كل وقت يلبسو واش يحبو ويخرجو في ابهى حلة وكي يحطلهم الرجل حد يقولو الرجل مسيطر أما عن سبب الطلاق أرواحي نتناقشو مليح على السبب ونفهمك، خاطر بنات اليوم يهمها تتزوج وفقط، يابن عمي الزواج مسؤولية ومشروع عظيم وربما هادي النقطة لي عجبتني فيك خاطر عارفة كيفاه تمشي تحتاجي لتخطيط فقط ولعبد يفطنك، اصبري الرد هادا طويل درك نضيف رد خلاف ان شاء الله
السلام عليكم
بالمختصر المفيد لكِ ان تتخيلي أختي حياتك في سن 50 و 60. عجوز وحيدة لا عائل لها بعد ان استقل الكل مع أحباءه ستُنسين بحجة الكبر و ستُهملين بحجة الانشغالات..فلا ولد يؤنسك ولا بنت تحن اليك..
لماذا تبنين تصوراتك المستقبيلية على تجارب الأخرين.
لن أجزم انك ستعيشين الأحلام الوردية لو تزوجتِ لكن أؤكد لكِ أن ستتجرعين مرارة الوحدة و قساوة الخياة كتلك الورقة التي سقطت من غصن مملوء بالاوراق في الخريف لتجد نفسها وحدها تصارع البرد و ويلات ذلك الفصل متيبسة و مفتتة كأنها لم تكن..و حينها لا يوجد قطار للعودة ،فالقطار الذي ركبتية يسير في جهة واحدة...نعم الزواج مسؤوليات ،حقوق و واجبات، و اللذة كل اللذة في تحمل مسؤولياتك و عندما ترزقين بأولاد و بنات ستفهمين هذه اللذة و ستقولين أهلا بالمسؤوليات.
الله يسهلك أختي، ننتظر رد نساء اللمة علَّنا نجد الرد الشافي الذي يغير رأيك ، و هذا ما أتمناه.
عدنا من جديد، نوليو لأسباب الطلاق لي تحدثتي عليها أختي الكريمة، أول شي نتي قلتي الزواج مسؤولية وأنا غير قادرة على تحملها المشكلة ليست في المسؤولية فكل مانمارسه في الحياة عبارة عن مسؤولية، الدين تاعنا مسؤولية والعمل تاعنا في المجتمع مسؤولية وواجباتنا اتجاه والدينا مسؤولية، فهل هربنا من كامل هاد المسؤوليات؟ أنا عندي مسؤولية أني نوض في الفجر ونغسل بالماء البارد ونصلي هل نقول الله غالب مارانيش قادرة على المسؤولية مانصليش، مارانيش قادرة على مسؤولية العمل تاعي في شركة معينة إذن مانخدمش، مارانيش قادرة نغسل لماعن نخلي كوزينتي موسخة، حياتنا كلها مسؤولية والمشكلة ماش في المسؤولية بل مواجهتنا لها للوصول لمبتغانا، صار المرأة لحقت للطائرة تسوقها ماخافتش جاتها في الزواج؟ أما النساء هادو لي فشلو ماش لأنهم غير قادرين على المسؤولية وإنما ماكانوش حاطين من الاساس بلي الزواج مسؤولية في بالهم رفاهية وحياة مسلسلات، يعني مشكلتنا أنا نعيشو في الأوهام ولي يعيش في الأوهام يجي يوم ويفطن، هكاك بناتنا اليوم تشوف الزواج رجل يحبها يعمرها رومانسية وشعر وتجيب حياتها كاملة وهي في جزر المالديف وكي تزعف يجي راجلها يجيبلها باقة ورد وعلبة شوكولا ويبكي عليها، ومن بعد كي تلقى رجل واقعي يعني حقيقي وماش وهمي تتفاجأ لأنو الرجل كائن حي وبشر كيفو وكيف المرأة يزعف ويخشن راسو ويغلط في حقك كيما نتي كامرأة تغلطي وتزعفي وتخشني راسك مشكلتنا اليوم والسبب الأكبر للطلاق والافتراق هو نحوسو على المثالية ونشوفو الزواج كسفرة لعالم الأحلام، لكن لا الزواج كمشروع حاب تفتحو وقبل ماتفتحو أول شي تتزود براس مال كافي من تحمل المسؤولية إضافة لاختيار شريك مناسب تحط فيه الثقة، وهنا نحكيو على نقطة أخرى بنات اليوم تحوس على رجل حطة وعندو دار وخدمة وبس، قليل لي تحوس على واحد يصلي وقليل لي تحوس على واحد يخاف ربي، مافهمتش نخير شريك معايا في الشركة سراق ومن بعد نبكي كي يسرقني، هادي نتيجة اختياري، إذن من هنا ابداي خممي ختي لعزيزة، المرأة ضعيفة وتبقى ضعيفة ولو قالت عنها كل منظمات العالم بلي راهي قوية تبقى ضعيفة وماش ضعيفة بالمعنى هاداك لي يوصفو الغرب ويحب يدافع عليه وإنما مثلها مثل القارورة حساسة ورقيقة وتحتاج للاهتمام والاحتواء، وانتِ امرأة وتحتاجي لرجل لجنبك، مارانيش نقولك الزواج مسألة حياة أو موت بالعكس كل واحد وواش كتبلو ربي سبحانو في الدنيا وكي تجيك الفرصة المناسبة علاه ترفضي بسبب فكرة سيئة ديتيها على الناس بلا ماتجربيها، إذا الزواج ربي قاله عليه مودة ورحمة والأبناء قال عليهم زينة الحياة الدنيا، يعني ربي عطانا الشكل العام تاع المشروع كيفاه يكون وعطاك طريقة تشغيل هاد المشروع أما لباقي عليه سبحانو، كيما تشري فريجيدار يقولك مولاه الفريجيدار هادا راهو يبرد ويكونجلي ونتي ماعليك غير تحطي لابريز أي حاجة خلاف راهو يتحرق، يقولك مشيه كيما طلبت منك بصح باه يحبس بعد عام ولا يمشي على 10 سنين هادي ماتقدرش تعرفها، هكاك حنا علاه مانثيقوش في ربي؟ انا نصلي استخارة ونسقسي على الخطيب ونختار دينو واخلاقو قبل أمور أخرى ونشوف طريقة تفكيرو في فترة الخطوبة ونتوكل على ربي علاه نخاف؟ راني تبعت واش لازم ومستحيل فريجيدار يتحرق كي تحط لابريز برك، أما الأبناء هاديك تاع يطيشوك علاه ماطيشتيش والديك مالا بما انو تطياش الوالدين قاعدة رسمية وبديهية في نظرك، يخي نتي تاني ابنة وأنا ابنة وماطيشتش والديا، إذن المشكلة في الوالدين ماش في الأبناء ربي ولادك مليح واختاريلهم أولا أب مليح ومن بعد احكمي عليهم، المشكلة تاعك ختي لعزيزة كي يقولولو البحر حلو وهو جامي زارو فيبقى طول حياتو حاط الفكرة هاديك، حطي ربي في قلبك ومانقولكش طيشي روحك برك بالعكس الزواج مسؤولية ماش لعبة ولكنو ماش حاجة تتكره، شوفيه من الجانب الايجابي أنك تصلي ورا راجلك وولادك الصغار وراك، تفكري بلي كن تطيعي زوجك برك تروحي للجنة طول كاش قدك؟ لو ماجا الزواج أمر مهم مايمدلك ربي الجنة على طبق من ذهب، خمي نهار تموتي صدقة من ولادك برك تخلي الحسنات تلحقك للقبر، درك راكي صغيرة بصح غدوة تكباري لا سمح الله يروحو والديك وتبقاي وحدك وماتلقاي غير راجلك وولادك بجنبك نتي جزء منو وهو جزء منك نتي سند ليه وهو سند ليك، ماش نتي العبدة وهو الجلاد، مالا خمي مليح والزواج عندو قواعد حطها ربي سبحانو وإذا حابة تتزوجي بشخص يطبقها وتعيشي أميرة خيري لي يخاف من ربي سبحانو نتمنى نكون فدتك شوي وراني جاهزة للنقاش معاك ان شاء الله
السلام عليكم ورحمه الله وبركاته أهلا بالأخت الكريمة وشكرا على صراحتك من وجهة نظري إذا كنت شايفة بلي تخدمي وتقدري تعيشي مليح كي تكبري تديري سيارة وتصرفي على روحك وتديري دار وتسلكي الكهرباء والفواتير،وتخلصي خدامة كي تكبري تخدم عليك وشايفة بلي رايحة تظلمي راجل معاك وماكيش قادرة تتحملي مسؤولية أولاد ومتأكدة من نفسك نڤولك ما تتزوجيش أنعم ما تتزوجيش وإن يكن ما تتزوجيش إياك تفكري فالزواج ،خليك كيما راك هانئة ومرتاحة واكبري في الهدوء والطمأنينة
هذا رأيي الخاص ما تتزوجيش ودعي الأيام تمر واعملي ورتبي حياتك وساعدي نفسك على النضج أكثر
وعليكم السلام ورحمة الله وبركاته
شكرا لانكي فتحتي قلبك لنا اختي
انتي رسمتي صورة سيئة جدا للزواج دون أن تجربيه
من خلال بناء أحكام سابقة لمن هم حولك
الحياة فيها الحلو وفيها المر
الزواج اكيد ماش راح يكون كلو مفروش بالورد
وماش راح الانسان يشوف فيه غير المليح
هو كيما اي حاجة في الدنيا فيه فرح وفيه الم ...فهو حياة جديدة
الزواج يرتكز على الاساس : الوحدة كي تجي تتزوج يهمها الزوج : تربيتو دينو اخلاقو قدرتو على تحمل المسؤولية ..سمعتو عايلتو ...ظروفو لي تدرسيهم قبل ماتقبلي الزواج بيه
مثلا انتي متحبيش ومتقدريش تسكني مع عايلتو تقولي من اللول داري وحدي
ونقاط اخرى تتفاهمو فيها يعني الاخوات لي فهموك في نقاط وخلاوك تحكمي على الزواج بلي راه دمار كحل نقولهم ربي يهديكم
السلام عليكم .... شوفي ياختى كيفاه كيما قلتى انتى الزواج سنة الحياة ومكانش اللى ميحبش يشارك حياتوو مع شخص يكون نصفو تانى ونزيدلك شئ انك باه تعيشي وحيد حياتك اكل نوو انوو عندك اولويات اخرى وى قولى انوو مشروع هداا راه مؤجلك وى معاك لانوو عندك اموور اولى باه تحققيهم عندك عمل عندك قراية تقدرى تطورى فيها ونجاحات اخرى عندك حياتك اللى يمكن مزال مستغليتيهاش كيما يحب الخاطر لانوو نصها كانت فالقراية نقولك وى رانى معاك انوو تدخل الوالدة وتسيف عليك هادى ثانى لالاومعاك انوو تتمسكى برايك وباه تقولى رجال اكل كيف كيف نوو كل واحد وزهروو العلم عند الله ومسالة الاولاد انتى تتحكمى فيها على حساب رغبتك انتى وحتى انتى اللى تتحكمى في تربيتهم ماهو الا راى وعسي ان يوفقك الله لما هو خير لك
يا أختي
جيت نرد حسيت أنو تعليقي ميزيد موالو لأنو الظاهر راكي متمسكة بفكرة عدم الزواج و إن دكنت نكره فكرة أنو الشباب يشوفو الزواج هو كلشي و مع ذلك مش لدرجة تقولي هو جهنم نربي ولاد يكبرو يديرو فيا كذا كذا
ولكن باختصار ادعي ربي ينور لك بصيرتك و اللي فيها خير يفتحها ربي ليك
و تكبري عقلك مع ميمتك
السلام عليكم.
لو كانت جات مهمتنا تحفيزك على الطلاق لكانت سهلة ههه ( العرب هاذي خدمتهم ههه)
لكن تحفيز خلاياك العصبية المعطلة على تقبل فكرة الزواج فهذا يحتاج الى الاعتراف أولا بحقيقة ان الزواج حاليا ليس جنة الفردوس لكن اختي الكريمة الحياة كلها ليست الفردوس الذي كنا نتصوره قبل البدء في مشوارنا وتحقيق طموحاتنا الفردية الخالصة.
تقولين أن لديك طموحات مستقبلية من الناحية المهنية تحلمين بها؟
الحياة المهنية سجن الانسان وفيه المحاسبة و العقوبة فيه مشاكل وشجارات وأعصاب فيها معاكسات وأطماع فيه التعب والارهاق والملل فيه نواض الصباح وأرق الليل يصبح الانسان كالحيوان او الآلة تعمل من الصباح للمساء لأجل حفنة نقود لا نعرف كيف نصرفها مع غلاء المعيشة مع العمل نضيع مناسبات مع العائلة والاغلب نكون متعبين من السهر والسمر معهم في الحياة المهنية لا نحس بالاشهر والسنوات ونشيب قبل الاوان بسبب استنزاف طاقتنا الحياة المهنية فيها خسارات وانكسارات كما النجاحات ممكن يتحقق الحلم وممكن لا يتحقق.
هل يعني هذا بأنك لن تعملي؟ لأن فيها مشاكل ونسبة النجاح قليلة والكل يشتكي من العمل!
ربما يكون جوابك : لا يجب ان أحقق طموحي وأحارب وسأنجح.
ولماذا لا تكون لديك نفس العزيمة والفكرة مع الزواج؟
يا سيدي كل كلمة تقولينا مانتزوجش
ها ماتتزوجيش وهني راسك راكي انتيييك ماعندك ماخصك .... بسكو نتي راكي مخشنة راسك ورافضة كلمة الزواج ومش حابة من الأول تسمعي نقاش يماك باغية تسمعيلنا حنا مع كل احتراماتي تقبلي رايي ياااك
وميمتك باش ماتكرهلكش حياتك كيما راكي تقولي اخدمي جيبيلها القفة وعمريلها جيبها ويلا هدرتلك على الزواج رضاها عليا
ونخلوك تقراي رد @لؤلؤة قسنطينة راهي كفات ووفات تبارك الله عليها ماخلاتنا مانقولوا
بعد كل ماذكره الاخوة الكرام لا استطيع ان ازيد عليهم شيئا
الا انني اعتقد انك متشائمة بهده الحياة وتعتقدين ان كل تجارب الناس السيئة ستحدث لك
طبعا ستحدث لك ادا فكرت بهده الطريقة
انصحك اختي ان تنظري للحياة بايجابية يعني ان تفكري تفكير ايجابي و تتخلصي على كل ماهو سلبي
نعم انا اعرف انه صعب وصعب للغاية لانني مررت بمرحلة تغيير الافكار و القضاء على الافكار السلبية تمما رغم الواقع الصعب والسلبي
لكن نتائج التغيير ايجابية جدا تجعلك ترين الحياة بمنظور اخر بمنظور ايجابي
لي كلام كثير لكن لن ازيد على اختي اكثر من ذلك تمنياتي لك بدوام الصحة والعافية
