مشكلتي فضفضة ?لعلي أجد في ردودكم بلسما شافيا

[مشكلتي]

ضاقت ضاقت والله صدقوني كنقول ضاقت يعني أنو حابة نخرج من الجلدة تاعي خلاص
شنو هو ذنبي أنا
بون لحكاية و نتمنا منطولش عليكم
قبل عشر سنوات كان عندي 17 سنة زوجني بابا
و ككان عندي 15 سنة تخطبت بون انا من عائلة و مجتمع محافظ يعني 15 سنة الطفلة بريئة متعرفش والو على الحب و العلاقات غير واش نشوفو من الشكل فقط مي اللي كاين فالداخل منعرفوش
جا واحد يخطبني و عايلتي طايرين من الفرحة بيه تقول حابين يتخلصو مني بأقرب وقت قلت لبابا مزال قالي حمدي ربي لقيتي شكون يديك وووووو
المهم سكت و قبلت
و مبعد صراو مشاكل لبنات كانو يقولولي خطيك يحكي و يلحق لبنات ووووو المهم فهاذيك الفترة من خلال امور بسيطة و بالرغم من أنو منحكيش معاه ولا نتلاقا بيه لقيت هاذ الشخص في واد و نا في واد يعني أخلاقيا مش سواسوا
أيا قلت لبابا نحب نفسخ أيا زعف عليا قالي يالحمارة حابين يدوه منك ووووو
مع العلم أنو عايلتي يقدسو في خطيبي و كأنو ملاك ولا منعرفش اشنو
باسكو عندو الدراهم و بوقوص
المهم كزعف بابا هكذاك حسيت أنو بابا حاب يتخلص مني أيا قبلت و تزوجت ....
المهم في اليوم الثالث من الزواج كان يقولي مزال راح نزيد نتزوج عليك و نهار تسماني راح نبدلك بوحدة و ياريت لوكان تزوجت فلانة
و جازوا عليا يامات الزواج كما كابوس و هو كبير عليا بزاف و راشد يعني مش ذرية
المهم خترة قتلو نتا ديما تقول ياريت تزوجت فلانة و فلانة اذا راك راجل طلقني و تزوج اللي حبيت أيا حكم يدو و هو شخص قوي البنية مش ضعيف ضربني في وجهي و طاحت الضربة في فمي و من قوة الضربة حسيت اسناني طاحو و مبعد جا يقول سمحيلي وو غلطت وووو
قال لبابا نهار خطبني حبسليها لقراية أيا يجي يقولي شوفي فلانة تبارك الله قراية قتلو فلانة اللي تحكي عليها عندها 25 سنة و نتا علاه حتى تجيب وحدة عندها 17 كاين بنات كملو قرايتهم
كبار .....
ولا يقولي منقبلش تخدمي ويقولي شوفي فلانة تبارك الله خدامة المهم حسيتو كان حاب يحطمني و خلاص
أيا نتبعوا تلفزيون يقولي شوفي هاذيك شابة اكثر منك ووووووو
و يحكيلي على أفلام اباحية يتبعهم حاشا السامعين و نا في ذاك العمر منعرفش مامبا أنو كايت افلام من هاذ النوع
المهم
حرقت لفوتو تاع العرس كامل باسكو جاز عليا كما كابوس و مكنتش قادرة نحكي بابا مللي كنت صغيرة اي حاجة نشكيهالو يقولي اصبري مش يقولي دافعي على حقك
عاملني بكراهية و خلاص
المهم نهار رفدت بنتي قلت نسامحو لوجه هاذ الطفلة و زادت جات لخرى و زادو المشاكل ميرفدهمش للطبيب كي مرضوا و المصروف قليل و هو يخلص بزااف اكثر من الموظف العادي و زيد عليها مشاكل يماه
باسكو يماه دارت فيا منكر
المهم جازو عشر سنين
شحال من خترة نقول نخليه و بابا يرفض
المهم لحقت بيا وقت وين مكنتش قادرة نكمل معاه
يسهر للوحدة تاع الليل
مدة ستة سنوات ونا نسوفري معاه نجي نسهر معاه نلقاه حاكم بورتابلو ويقولي روحي ترقدي
و المرأة مش كما الراجل
الراجل يحوس على المرأة لأجل غرائزه فقط و المرأة تحب تحكي و تحب الحنانة خصوصا اذا كانت صغيرة بالسن
و حقي نهار كامل نجري مورا الكوزينة والدار و بكاء الصغيرات الليل كيرقدو نلقا راجلي حدايا يحكيلي نضحكو مصح هو كان يتهرب و كنجي نقولو علاه علما أنني لم أقصر بفراشه يزعف حتى خترة قلب طابلة الماكلة فالارض ايا قتلو سير فيها حاجة ربي مراهوش راضي عليها
و تبعتوا و نا مقريتش بزاف مي ذكية فتحتلو حساباتو كامل فايسبوك ايميل سكايب ولقيتو يحكي مع لبنات مش وحدة مش زوج ايا ذاك الوقت خليت الدار قتلو الا راك تخلي مارتك وحدها و تسهر تحكي مع بنات تزوج بوحدة منهم مراح ندخل النار بسبتك ولا قصرت في حقك خبرني و لا حاب تتزوج خبرني قالي لا و منلقاش كيفك و بحق عشرتنا ولي ووووو
هاذا واحد من المشاكل
بناتو نرفدهم للطبيب بروحي
خترة بنتي كان عندها مرض جلدي نادر و الناس يدوها للأطباء وهو ولا علابال
ايا خترة نضت الصباح قتلو حشومة مارتك تعيط للرجال يرفدو الطفلة لكاش طبيب و نتا راقد
ايا قالي ..اسكتي يا (......) ياللي فيك و فيك و الجيران يسمعو
المهم منزيدش نحكي على المشاكل اللي صراو
لحق بيا وقت مكنتش قادرة نزيد نعيش معاه رحت لدارنا بابا مقبلش بيا فذاك الوقت الدنيا قلبت فوق راسي ككون بابا و مداهش النيف على بنتو
وليت لداري قلت مكانش ربي منامنش بيه اذا ربي يحب يتعذبو لوليات هكذا انا منامنش بيه و حبست الصلاة خلاص
حتى خترة بعد 15 يوم سقسيت امام قالي هاذي غلطة باباك فالله لايكلف نفسا الا وسعها متقدريش تصبري مش مشكل كل واحد و طاقتو
وليت للصلاة و حاولت نتجاوز كلشي كنت نرقد مع بناتي منخليش راجلي يقربلي بدا يداوس معايا و يسبني و نا قبل منولي للدار شرطت عليه متقربليش راني مولية بسبة بناتك باسكو هو قالي رديتك بسبة لبنات
المهم
انا نخاف ربي و نخاف نتحاسب قلت على وجه ربي ندير واش نقدر عليه على الأقل منتحرقش في جهنم بسبة راجلي ونا من عند ربي حنينة زيادة على اللزوم و ننسى روحي خلاص مرات يولي من الخدمة فالصيف بلاما نفيق نروح نرفد واش رافد في يدو نمدلو الماء باسكو كان خدام نطيب و نلبس مصح العلاقة الحميمية كانت كما الخنجر الذي يطعن جسدي أنو شخص يسبني و يدير فيا واش يدير و مبعد يجي ليا و كأنني شخص لاقلب له ولا كرامة و مبعد لحق بيه وقت و ندم مالقري مصلحش غلطاتو مي ندم بزاف
و نا كونت روحي وبديت ننجح في حياتي و بدا يزيد يقيمني سرتو كبدات الناس تعرفني
بون أنا كامل واش شفت مع راجلي و حماتي بانلي حاجة قليلة قدام أنو بابا سمح فيا
المهم بديت نتقدم في حياتي نقرا و نطير مصح بقاتلي الحرقة في قلبي
باسكو الراجل هذا مآذيتوش و جايالو بالقوسطو باسكو بابا هو خيرو مش انا وزيد معندي وين نروح
و كيكونو والديك سمحو فيك والله العظيم كلشي سماط
بزاف ناس يقولولي تبدلتي وليت منحبش نتخالط بالناس منحبش اللي يتمسخر معايا ونا هذاك الضغط دار لي هكذا باسكو كما غدرني بابا نتوقع اي شخص يغدرني
مرضت خترة رحت ليما قلتلها ضيعتولي حياتي و طفولتي و نهار جيتلكم مقبلتونيش راني ضايعة كالبهيمة ماشية فالطريق معلابالهاش لوين يديها هاذ الحياة نتوما خيرتوها مش انا ولا كاش نهار سمعتو خرجت الطريق ولا هبلت متغيضكومش درتوها بيديكم
بابا ندم قالي الا راكي حابة تنفصلي من راجلك ارواحي دار باباك مفتوحة قتلهم فات الأوان
ونا صح بعدما رجعني لدار راجلي الف خترة مراح ندخلو دارو
نبات برا و نخرج الطريق و منوليلوش لدارو
و دوكا راني نزورهم و نريح معاهم يامات على وجه ربي و على وجه يما
و كنريح معاهم نحس روحي مخنوقة
واش معناتها يكونو عندي فاميليا و نا نرفد في ظهري هموم كالجبال واحد مسقساش واحد معلابالوش
المهم خفت على صحتي باسكو صحتي نفسيا و جسديا تدهورت
تخيلو مدة عامين نوض صباح نبكي حتى نحس راسي راح يطرطق
كشغل حطولي سلسلة برقبتي و قالولي عيشي بيها
و المشكل الكبير هنا أنو الحياة الزوجية هاذي بدات بغلطة بدات بالإرغام
مصح لوكان انا اللي خيرت هاذ الشخص كنت راخ نصبر باسكو نبغيه
لوكان بدات بغلطة و مصراوش مشاكل بعد نقول معليه
و نا نكتب دوكا ونا والله حاجة مفهمتها فحياتي واللي فهمها يفهملي
كنضرت صحتي قلت لازم نخلق استقرار من العدم
بيني و بين راجلي ساعة هاك و ساعة هاك سرتو كيريح مع يماه يجيلي للشومبرا كالسكران نتي ياللي فيك و فيك قـ*ــ*ــ*ي عليا وووو و يجيب حكايات حتى الشيطان ميقدرش يديرهم
والله ساعات يقولي الشيطان روحي للحرام و هني فيه روحك خصوصا انو راجلي يخدم بعيد ونريح لفترات طويلة وحدي ولكن علابالي انا مش نتاع هاذ الطريق
تقدمت فحياتي الحمد لله و لكن قلبي محروق بزاف
ساعات راني نورمال ساعات ندخل في في بكاء هستيري لمدة ايام
البارحة كنت عند الطبيبة و بمجرد قلبت صدري قاتلي تتعرضين لضغوط نفسية ؟
قلتلها نعم قاتلي لديك ارتفاع هرمون البرولاكتين وهو يسبب خلل في غدة الحليب فتنتج الحليب بالرغم من انو منيش نرضع
ايا كخليتو باسكو كرهت من الادوية دارلي اورام حميدة في الثدي
أنقذوني من الضياع لعلني اجد في جوابكم بلسما
و ديرو فبالكم بزاف صوالح محكيتش عليهم الله غالب عييت من الكتابة
انصحوني لوجه الله وادعوا الله لي في الغيب ان يفتح علي بابا من ابواب رحمته
سلام

 

[لؤلؤة قسنطينة]

راني نبكي بالدموع أقسم بالله
حسبنا الله ونعم الوكيل
لي عودة بحول الله​

 

[sanaya]

لي عودة.....

 

[حفياد آدم]

السلام عليكم
فمشكلتك سيدتي محزنة ومؤلمة لدرجة لم استطيع اكمال القراءة
في بعض الاحيان لا احب التدخل في حياة الناس، ولكن بعد ما قرات مشكلتك العويصة انتابني شعور الرد بقوة
المهم اختصر ردي بالتالي

سيدتى
أنتي إنسان كامل الأهلية، يمكنك أن تحيي حياتك بأكثر من طريقة ، لن تموتي أن تركك زوجك لكن لا تعيشي حياة بائسة و تواجهين عنف زوجك الذى لا فائدة من علاجه ، يمكنكم أنتم الاثنين الانفصال بهدوء و البدء من جديد، أن لا أشجع ثقافة الانفصال ولكن عندما تستحيل الحياة بينك وبينه فإنه لا مفر منها لأن الحياة الزوجية التعيسة هى جريمة فى حق ثلاث أطراف انتى و زوجك و اطفالك ، و بما أن الله قد اعطانا حق الحياة فلنحييها بكرامة .

وفي الاخير همسة لك
كيف تستطيع التغلّب على مشاعر الحب من طرف واحد ؟!. هي تقدير الذات فعليك إعادة التفكير بنفسك ومعرفة لماذا قد تمتلك مشاعر حب لشخص لا يبادلك مثل هذه المشاعر ومعرفة الخطوط الحمراء التي لا يجب أن تتعداها مع هذا الشخص حفاظاً على كرامتك واحتراماً لذاتك ..



لقلبك الطيب اجمل باقات الورد وعبق الياسمين بحجم الكون اتمني لك سعادة لاتنتهي

اللهم أجعل بينهما من المودة والرحمة أفضلها .. وأرزقهما الصبر والحلم أكمله . وجعلهما على منابر من نور ..وأسعدهما مع بعضهما .. في الدنيا وفي جنة السرور .. وأهدهما يا الله لما فيه الخير والصلاح .. وارحمهما برحمتك يارحيم ياكريم ..

 

[أم أحمــــد يــسّ]

لا إله إلا الله محمدًا رسول الله..
ربي يهدي سرّك ويسعدك يااارب
نقلك حاجة الحجر ويبكي ياخيتي بصح ديري حاجة وحدة في بالك ربي موجود قولي حسبنا الله ونعم الوكيل فهو حسبكِ..كلمة قالتهالي صديقة ضرك( سبحان الله اللي يشوف من برا مش كيما اللي يشوف من داخل) يعني تشوفي زوج تقولي منهم الحب والعشرة خلاص وتشوفي ضحكة تقولي نشريها بمال الكون بصح واش تدري واش كاين لداخل؟؟
نفس الشيء نقلك شكون ماعندوش مشاكل ؟؟ قالت أمي مصارينك في كرشك حاشاك يتعاركو انتي واختك في دار وحدة وتتعاركو وانتي وخوك و...و...
فمابالك بشخص تعاشرينه عشر سنوات ورايحة تكملي العمر كلو معاه يارب في هناء وسكينة ، باش نقلك ماكيش موجوعة نولي يهودية حاشاك بصح نقلك الغصة اللي في قلبك مزال نارها ماطفاتش لأنك انتي ماخليتيش غيرك يصب عليها الماء ، لانك ماسامحتيش ومش قادرة تسامحي وهذا اكبر عذاب ليك ولمن حولك..باباك عمرو لا يكرهك ونتفهم انو نهار تخطبتي قلتي في مجتمع محافظ وهذي العقلية تشوف الزواج سترة وخلاص والطفلة عبئ لازم يتهناو عليها( مش منها)
وثاني كي يقول زوجتها وترجعلو مطلقة عيبة عندو وديري في بالك هذا المجتمع عمرو لا رحم مطلقة ولا عانس حتى،
انتي في دوامة وممكن غابتلك أمور إيجابية ولا في مصلحتك لكن يأسك من الغير ونظرتك انك وحدك زادت الأمر سوءا
تلومي أهلك ولكن لكبيرة مش راح يحبوهالك ..جربي تسامحي من قلبك مش من شفاهك.
نرجعو لزوجك باش تتوقعي الزواج حب وتحواس وتفحشيش و...و... كيما كنا ولحد الآن اغلب البنات تتصورو مستحيل لأن المسؤولية صعبة ، راح تلقاي زوج نسخة عن أب ولا أخ؟؟ حماة مثل أم او أخت؟؟ واذا صلحت مع الزوج تخرجلك لعجوز واذا صلحت العايلة تقولي الزوج واذا صلحو في زوج تقولي المجتمع، الجيران، فلان ،فلتان....
لأن القناعة في كل شيء راحت حتى في المشاعر ،
الزواج حياة اخرى لازمك تحاربي فيها ( ها انتي فطورك اذا ماتعبتيش عليه مش راح يجيك بنين ولا غالطة؟ دارك اذا ماتعبتيش ونقيتيها مش راح ترتاحي..هكا الزواج وهكا الراجل
انا نشوف باللي زوجك مزالو شاريك وكلمة علجال بناتي مانصدقهاش لأنو يحبك وتتخيلي اذا هو دار كيما اديري وجفا عليك لا قدر الله شحال راح يطول؟ يا والله يبيعك في شهر بصح واش شدو؟ انتي مولات دارو وانتي مرتو قبل ام بناتو ، وكي سامحتي كملي سامحي ملييييح ايه مليح وعلى صحيح اللي ادسيه في قلبك قوليه وجددي حياتك وابنيها وانسي ديري آستيك وامحي ذاكرتك جربي تشوفي اشياء ايجابية فيه( هذا ماعندو والو ايجابي ؟؟ غمضي عينيك وتفكري..ايه زيدي ..ثلاث مواقف ياسر
أمالا قادر يتصلح ( رمّمي بناءه واصلحي مشاعره تجاهك)..لأجل نفسك أولا ولأجل بناتك ثانيا لكي لا يتيتما ووالدهما موجود لكي لا يتعبا نفسيا فلاحظي انك بجفاء والدك متعبة فكيف حالهما هما ليس بجفاء والدهما بل بفراقه؟؟
ازرعي ابتسامتك لأجل نفسك وانثريها لنفسك فقط وانظري كيف ستغير من حولك،

 

[ملكة زوجي]

حسبيا الله ونعم الوكيل
صدقيني اختي والله بكيت بحرقة
لا شك -أيتها الكريمة- أن ما يمارسه الزوج من قبائح على هذه الأجهزة الحديثة قد تجره إلى ما هو أعظم مما هو فيه، مع أن ما هو فيه محرم لا يجوز له أن يفعله، ولكن ينبغي مع هذا إحسان الظن بزوجك بقدر الاستطاعة، وأن تحاولي الأخذ بالأسباب التي تعينه على الخروج من هذه الحالة التي هو فيها، فهو في أمسِّ الحاجة الآن إلى من يأخذ بيده, ويعينه على نفسه، ولا يتركه فريسة سهلة للهوى والشيطان.

أختي الغالية!..
لعل هناك سببا يدفع الرجل إلى اتخاذ طرق محرمة، أو غير محرمة.. وأنا بمشاركتي لا أبرر تصرف زوجك.. نسأل الله له الهداية، ولكن هل سألت نفسك -أختي- لماذا يعمل هذا العمل؟.. المشكلة أصبحت، ولكن لابد أن نجد المسببات لحل المشكلة.
1- أن تبدأ أختي بالجلوس مع الزوج، مع اختيار الوقت المناسب، والمكان المناسب.
2- أن لا تباشري في طرح المشكلة لزوجك بشكل مباشر، حاولي أن تبدئي له بالتلميح.
3- بعد التدرج في طرح المشكلة، حاولي أن تهدئي من غيظ زوجك؛ لأن ذلك سيبدر منه لا محال، وذاك بالكلام الجميل.
4- قومي بتذكيره بكلام الله عز وجل، ورسوله -صلى الله عليه وآله وسلم، وأهل البيت -عليهم السلام- من هذا الأمر.
5- اسألي زوجك بلطف: لماذا يشاهد هذه الأشياء؟.. لعله يرد عليك بكلتا الاجابتين:
أ: إما نقص منك.
ب: أو لا أعلم.
أختي!..
إذا كان جوابه (أ) فلا تفقدي أعصابك، وقولي له بشكل هادئ: إن شاء الله لن ترى مني من هذا اليوم إلا كل ما يعجبك.. وليس بكلام فقط، بل بالفعل.
وإذا قال لك: لا أعلم.. هناك دورك الروحاني يبدأ، حاولي أن تذكريه بالله، وأنه يطلع عليه، فلا يجعل الله أهون الناظرين إليه.. وذكريه أنه محاسب، وذكريه بالموت، وغير ذلك من الأمور.
أما إذا قال: لا أستطيع ترك هذا الشيء، فلا تبدي اليأس منه، وحاولي المرة والمليون.
حاولي أن تضعي القرآن قريبا من التلفاز، أو على سطح بارز أمام الجهاز الذي يشاهد منه.
حاولي أن يكون صوت القرآن يرتل أثناء خلوته، لا تدعيه طويلا ولا تجلسي أمامه كثيرا.
أختي الغالية!.. لا تفكري في الطلاق؛ لأن ذلك لن يحل المشكلة.. وحاولي أن تساعديه، لاجلك ولاجل اغلى حاجة عندك لي هوما بناتك وبإذن الله سوف تستطيعين ذلك وعندك اجر كبير عند ربي سبحانو وربي يقدرك.

واله الاسبوع لي فات حكالي زوجي عن شخص حكى عنه الامام في المسجد كان دائم السهر والسكر
ويظرب زوجتو ووو لكن زوجة واش قالت انا لي راح نتوبو انا لي راح نتوبوا
عنات معاه بزاف لكن هذا الشخص تاب صدقا مع معاناة كبيرة وصبر الزوجة والله مات وهو ساجد
سبحان الله والله قصة واقعية حكاها امام مسجد
والله هذا الشئ لي قدرت نقلهولك بالاخص لما طلبتي الطلاق كثير من المرات وهو رفض للبقاء معك
بلاك راه يعزك برك ميصارحكش حاولى معاه اختي بكل الوسائل بلاك ربي يهديه ويفيق ويرجع ليك ولبناتو في احسن حالاتو
صح لي حكيتيه صعيب بزاف على اي وحدة تتقبلو بصح ديري مجهودك ولباقي على ربي سبحانو

ربي يوفقك و يسر امرك و يسهل عليك و يرزقك و يفتحها عليك وين ما كنت و يحقق اللي ببالك و اللي تتمناهه و يسعدكك دنيا و اخره و يعطيك و يقدم لك اللي فيه الخير

والله راح ندعيلك في ظهر الغيب ربي ييسر امورك يا رب
دمتي اختي وراح نقلك كلمة اخيرة انتي انسانة رائعة ربي يعطيك
قد ما صبرتي والله قوية ماشاء الله عليك
ربي يكملك بعقلك ويفرج عليك ان شاء الله
​

 

[أم أُنٌَيسة]

السلام عليكم ورحمة الله وبركاته
لا حول ولا قوة الا بالله العلي العظيم، استغفر الله العظيم
اسال الله ان يشفيك وان يشفي قلبك وروحك وان يلهمك صبرا جميلا طيبا مباركا فيه اختي الغالية
والله العظيم عينيا يوجعو من البكاء والشقيقة رايحة ندوخ من الخنقة والربو والحمد لله من وش قريت
لكن غاليتي سعادتك بيدك ان شاء الله، اولا يجب ان تتقربي من الله عز وجل وان تصلحي علاقتك بالله عز وجل ودلك ب:
الصلاة في وقتها وخاصة صلاة الفجر
قراءة اذكار الصباح والمساء
قراءة اذكار بعد الصلوات
جعل ورد يومي لك
ودعي القران يرتل في المنزل وخاصة سورة البقرة
وثقي غاليتي ان الله لا يكلف نفسا الا وسعها وان مع العسر يسرا وعسى ان تكرهوا شيئا وهو خير لكم وعسى ان تحبوا شيئا وهو شر لكم
ثقي بالله وثقي بان كل ماياتي من عند الله هو خير كثير حتى الاهل يمكن ان يكونوا ابتلاءا من الله للابناء
فالدنيا دار بلاء وابتلاء ولا احد سيعيش سعيدا الا مع الله عز وجل
وثقي غاليتي لو اجتمعت الامة على ان يضروك بشيء ما اضروك الا بشيء قد كتبه الله لك
وسترين صدقيني كيف سترتاحين نفسيا باذن الله وكلما ابتعدتي عن الله سيزداد بؤسك صدقيني ولن تجدي الراحة ابدا
ويا اختي الغالية اتكلم عن تجربة

وثانيا يجب عليك غاليتي ان تتصالحي مع نفسك، فانت على ما يبدو لا تعجبك نفسك اصلا ولا تثقين بها فحين تثقين انت بنفسك وتعرفين قيمتك فلا يمكن لاي احد ان يحط من قدرك ولا تدعي اي احد يحط من قدرك غاليتي

ثالثا حين تتصالحين مع نفسك ستتصالحين مع كل الناس غاليتي

سامحي، ليس لانهم يستحقون لكن لانك انت احسن منهم ولان الله يحب المحسنين
لا تنتظري مقابلا لما تفعلينه اختي الغالية ليس من البشر بل من رب البشر، افعلي واجباتك لتكوني مرتاحة امام الله عز وجل وهو ادعي له بالهداية والثبات ان شاء الله يارب وذكريه بالله غاليتي وبحكم الشرع بما يفعله وهل سيقدر على حر جهنم
لا تدعينهم يحولون الاشياء الجميلة فيك لاشياء قبيحة عاملي الناس باخلاثك انت وليس باخلاقهم غاليتي
لا اعرف مادا اقول لك غير ذلك، فانا بدات هكدا والحمد لله انا احسن والحمد لله على ما انعم علينا نعمه وفضله وعلى ما ابتلانا به

كن مع الله يسهل كل صعب ويهون كل عسير، واتق الله في نفسك اولا ثم في الاخرين
ثق باختيار الله عز وجل لك فمهما كان الوضع مؤلما او سيئا فهو خير كبير لنا فالله عز وجل احن علينا من انفسنا ونحن فقط من نؤذي انفسنا
وعسى ان تكرهوا شيئا وهو خير لكم وعسى ان تحبوا شيءا وهو شر لكم
ادا رايى احدكم منكرا فليغيره واضعف الايمان يحاول تغييره بالنصيحة فواجب كل مسلم النصيحة بالحسنى والهداية بيد الله عز وجل، ولا دخل لنا بالاخرين ولا يحق لاحد محاسبة احد فالله عز وجل من يحاسب عباده
اشغل نفسك بالبحث عن عيوبك ومحاولة اصلاحها بدل مراقبة الاخرين والتعليق والحكم عن اخطائهم، فمهما ظننت انك تعرف كل شيء عن داك الشخص او الموقف فانت لا تعرف شيئين اساسيين نيته وظروفه، والله يحاسب على النيات ويرزق على النيات
باختصار عد الى الله تكن سعيدا، اعرف امور دينك واعلم حقوقك وواجباتك في الاسلام وحاول تطبيق واجباتك لارضاء الله عز وجل واعملوا خيرا لوجه الله عز وجل ولا تنتظر مقابلا له في الدنيا بل ما يقابله في الاخرة تكن سعيدا
اسال الله عز وجل الهداية والثبات لي ولكم ولكل المسلمين

​

 

[لؤلؤة قسنطينة]

السلام عليكم ورحمة الله وبركاته
أول شي ربي يفرج إن شاء الله حبيبتي وربي يفتحلك أبواب الخير، بصراحة لعشية لما قريت المشكلة بكيت، بكيت صح لأنو القصة قاستني وبكيت لأنو تفكرت
بعض الأمور، بصح لي خلاني نبكي كتر هو أني عارفة صاحبة المشكلة شكون وعارفة أنها ماش أول مرة تشكي وعارفة أنها إنسانة مليحة بزاف وماتستاهلش كل هاد الشي،
لكن ربي رايح يفرجها عليك ومتأكدة من ذلك خاطر ربي مايغفلش، درك حبيبتي خلينا من زوجك ووالديك ساع خاطر كي نهدر فيهم مانضيف والو وخلينا نبداو بيك،
لأنو الدنيا هادي حروب نحاربو على اللقمة ونحاربو على ولادنا وعلى والدينا كلشي فيها حرب وباه نقدرو نواجهو هاد الحرب ونربحو فيها لازم نتسلحو وسلاحنا
هو قوّة الإيمان والثقة بالله، ونتي لي خلاك تضعفي أكثر أنك في نص الطريق فقدتي إيمانك وثقتك بالله، مارانيش نقولك علاه وكيفاه علابالي الظروف أكبر منك والشيطان
واعر ويستقوى على العبد الضعيف المغلوب على أمره، إذن ماش لأنو الدنيا كاملة غلبتك تخلي الشيطان كذلك يغلبك بالعكس كوني قوية عليه ونحي من بالك هاد
الكلام تاع إله ماينصرش الوليات مانعبدوش، استغفري الله عز وجل والدنيا هادي معمرة مشاكل ومصائب، وأعظم وأكبر مثال هو رسولنا الكريم صلى الله عليه وسلم
جا للدنيا بلا ماشاف باباه ويماه ماتت وهو صغير وتحرم من حنانها وزاد هز على ظهرو أعظم مسؤولية في الكون ماراهيش مسؤولية أولاد ولا أهل بل كانت مسؤولية
أمة كاملة وباه تخرجي أمة من الدين المزعوم تاعهم وتدخليهم في دين خلاف ماشي أمر سهل بالأخص لما تكون وحيد لا أخ ولا أب ولا أم، ولكنو قاوم بالشي القليل
لي عندو ورغم أنو ماياكلش ايام ويرقد على ابسط الاشياء وتلقى الضرب والشتم عمرو لا قال ياربي نتا مانصرتنيش نتا لي ارسلتني لهاد المهمة إذن انصرني على اعدائي
ولا نحبس نعبدك، بالعكس لأنو علابالو أنو المشكلة ليست في النصر بل في الوقت الذي يأتي فيه النصر، وكذلك أنتِ الفرج ربي مابعتهولك ماش لأنو غافل على الظلم
وإنما يعرف الوقت المناسب لي يرزقك فيه بالفرج، ماتقوليش خلاص ومشاكل ووو الكرة الارضية واحد ماهاني فيها، يمكن وحدة تكون مقنوطة تقرا مشكلتي تبكي
وتحمد الله ويمكن أنا نكون مقنوطة نقرا مشكلتك نبكي ونحمد الله ويمكن نتي تقراي مشكلة شخص آخر تبكي وتحمدي الله، كل واحد ربي يمدلو حاجة وينحيلو حاجة
هادي هي الدنيا، إذن أوقفي على رجليك والأهم من كل هذا ثقتك بالله مالازمش تطفى خلاص مهما حصل خاطر ربي راهو يختبر فيك يمدلك حاجة مليحة ويمدلك
حاجة ماشي ماش مليحة وإنما هي خير ونحن لا نعلم، يمكن لو تزوجتي برجل آخر يكون عقيم وماتجيبيش الأولاد وماتلحقيش لأحد طموحاتك، يمكن تلحقي لطموحاتك
وزوجك يموت لا سمح الله، ويمكن ويمكن البيوت أسرار، يمكن نتي فاقدة طعم العائلة ولكن ربي رزقك باللقمة كل واحد وكيفاه، قبل يومين رحت مع الوالدة تاعي لطبيب
القلب بما أنها مريضة بيه منذ أعوام كثيرة، تعرفي تشوفي تما عجوزة كبيرة تقولي مسكينة واش من جسم رايح يتحمل المرض، من بعد مرأة جات رايحة دير فحص وعندها
سرطان، وليت قلت على الاقل لعجوزة عاشت حياتها هادي امرأة مازالت صغيرة شوي وعندها أطفال في رقبتها، من بعد نشوف في مرأة هازة في يدها طفلة صغيرة
عمرها شهرين هادا وين جات للدنيا جابته ايماها لطبيب القلب، قلت في نفسي واش عاشت هادي باه يبداها المرض من درك؟ مازالت حتى مافتحتش عينيها، لكن
هادي حكمة الله عز وجل، ربي مايظلمش ويستحيل أنو يظلم عبدو، ونتي قلتي حياتي مافهمتهاش فهموهالي هادي تسمى اختبار رانا في اختبار واي اختبار يجي صعيب
ونتعبو فيه باه نديو أحسن النقاط كذلك في الدنيا، لازم نتعبو ولازم نصبرو باه النتيجة تكون مرضية سواء في الدنيا أو الآخرة، وختاما نحكيلك قصة إمرأة شفتها على التلفاز
والله للآن لما نتفكرها مازالني نبكي، كان راجلها يضربها وماش بيديو بقارورات الزجاج في راسها خرجها تخدم يضربها شوفي المنكرات كامل دارهم فيها وهي مسكينة
والديها رفضو رجوعها بطفل، مسكينة صبرت صبرت حتى الصبر ملّ منها، من بعد نظن تطلقت ماشفيتش مليح، المهم باه تكبّر ولدها شربت المرار هي المرأة وهي الرجل
بلا مضايقات زوجها لي ماحبش يخليها في حالها، وفي الأخير بعد سنوات الشقاء الكثيرة وبعدما كبر ولدها ولا راجل ولحق يتزوج وتفرح بيه، حكمها سرطان في راسها
درك هادي واش تدير؟ تنتحر؟ لكنها كانت تقول الحمد لله على واش عطاني ربي، ويمكن يكو نربي اختبرها وشفاها الله أعلم واش صرالها بصح الدنيا اختبار، المهم
اذا حبيت نكمل الهدرة نزيده افي رد خلاف خاطر طولت بزاف في الرد
لي عودة بحول الله ^^​

 

[لؤلؤة قسنطينة]

الكلام السابق ربما كان خارج شوي لب الموضوع، ولكن قبل مانمدلك نصائح قلت نمدلك الطاقة الإيجابية ساع ليك لي تخليك تتقبلي النصائح
إذن عزيزتي، ربما ربي بعتك لهاد الزوج بالذات لأنو حابك نتي تغيريه، فيك شي مميز لازم توصليه لزوجك ولازم تبدليه مع أنو هو (..) باه
مانقولش كلام نتحاسب عليه خاطر قلبي راهو يغلي، ولا نقولك خلي نهدر مانحكمهاش عندي، أنا مانقولكش والديك أكرهيهم ولا عاقبيهم
يبقاو والدين مهما عملو، وطاعتهم واجبة إلا في معصية الله لالا، وكذلك الزوج أبو بناتك ودرك عندك واجبات اتجاهو وقدام ربي وعبادو لازم تديريهم
مهما كانت صيفاتو ولازم تطيعيه لأنو طاعتو تدخلك للجنة حتى وإن كان فيه العيوب السبعة إلا إذا كانت كذلك في معصية الله، يعني هذا أمر مفروغ منو
لكن لوين رانا رايحين بهاد التفكير في مجتمعنا؟ لوكتاه يبقاو الوالدين يشوفو الطفلة عورة وفضيحة المهم تتزوج يا لوكان بكافر المهم تنحي عليهم هدرة المجتمع
لوكتاه مازال كاين رجال يهينو زوجاتهم وهوما جزء منهم وأمهات أبناءهم؟ هوما قطعة رقيقة قابلة للكسر، كي يعود الراجل ماش قادر على مسؤولية مرتو
ويعذبها نفسيا علاه يتزوجها من الاساس؟ باه هو تاني يربح المجتمع لصفو ويقولو تزوج وحدة صغيرة وشابة ويبدا ينفخ روحو قدام الناس؟ والله قلبي تعمر
ولوكان نكمل نخلطها خاطر يتقطع قلبي لما نشوف امرأة بشر من لحم ودم ماطالبة والو طالبة كلمة حلوة وراجلها يكون معاها راجل، راه تطلب منو يتحلى
بالصفة لي خلقو بيها ربي "كرجل" تطلب منو في شي بديهي لكنو يفضل يتنكر بزيّ خلاف، لا حول ولا قوة إلا بالله الهدوء لي كنت فيه في الرد السابق طار
لأنو عدنا نخافو من كلمة زواج، تخاف يا تطيح في ذكر ماعندوش رجولة خلاص وإلا يلعبها عندو الرجولة ويستقوى على من هم أضعف منه حاشا لي مايستاهلش
إذا حبيبتي نقولك حاجة ماعندك من واش تخافي بالعكس ارفعي راسك راكي تقومي بواجبتك على أكمل وجه والشي لي تديريه لوجه الله وربي رايح يجازيك عليه
راكي بنت ناس ومربية وقادرة على الوصول لأعلى المراتب، الدليل صنعتي نفسك بنفسك حتى هو نفسو ولا يقيمك ويديرلك حساب، إذن كوني قوية
واتمسّكي بدارك وراجلك وولادك بسنيك، رايحة تتعذبي وتتعبي وتحتاجي صبر كبير لكن رايحة تفرج بإذن الله، اعتذر هاد المرأة راني متأكدة مارانيش نجاوب بعقلي
راني نجاوب بقلبي على هادي راني نخلط في الهدرة وراني ماش حابة نحكي على قداه من حاجة، بصح راني حاسة بيك والله، وربي يفرجها عليك ان شاء الله
تحياتي
​

 

[خديجة ph]

السلام عليكم اختي الغالية
الله يعينك على مقاساتك بكري و درك . اعتقد واحد ما طلب منك من قبل السماح الناس الكل اللي ظلمتك واحد منهم ما طلب منك السماح و اذا طلبو واحد منهم ما عاونك باه تتخلصي من حياة هما رغموك عليها.
لذلك اختي من قلبي و من الشي الي راني حاستو من كلامك نقولك :
سامحينا ختي الغالية لانهم خطفوك من دار باباك لدار ما تليقش بيك
سامحينا لانهم حرموك تقرري القرار الوحيد اللي ربي سبحانو عطاهولك ليك و قررو في بلاستك
سامحينا لانهم كي شكيتي في هاذ الراجل اعتبروك صغيرة ما تفهميش و تفكرو باللي عمرك 15 بصح ما اعتبروكش صغيرة و ما تفهميش وقت اللي زوجوك هذاك النهار شافوك كبيرة ورايحة تبوري
سامحينا حبيبتي مناه في الوقت اللي جيتي فيه تشكي لوالديك لقيتي بيبان مقفولين
سامحينا يتموك و والديك حيين
سامحينا مناه نهار جيتي تقرري ثاني قرار عطاهولك ربي ما خلاك حتى واحد تطلقي و اعتبروك صغيرة تاني و جاهلة
سامحي بنياتك اللي جاو لهاذ الدنيا بلاما يخيرو هاذ الاب ولا هاذ الام ولا هاذوك الجدود
ربي يسامحك لانك جهلتي و في وقت يأستي من رحمتو
سامحينا لانهم خلاوك تمرضي و فوق هذا يسقسوك وشبيك و علاه مرضتي و هما سبابك
سامحي جسمك و عقلك اللي ما قدروش يتحملو هذي الحياة
سامحي الراجل هذا الجاهل اللي ما عندو لا دين ولا ملة ما كانش يعرف وش هو الزواج كان يحسب يلعب بيك شوي و كي يكره منك يحطك في فريجيدار و يخبيك و يزيد يجبدك كي يتفكرك سامحيه ماش مربي كيفاه حبيتيه يربي بناتو يخرجهم بنات حرام . سامحيه علابالو ما يساهلكش بصح والديك باعوك ليه ما يعرفش باللي بنات الناس لازمهم ولاد الناس .
سامحي باباك كي فاق باللي كبرتي و كان لازم يسمع رايك فاق متوخر بزاف لقى روحو ما يقدرش يعاونك غير يبكي معاك سامحي ميمتك اللي ازوجت بنفس طريقتك ما تعرفش باللي كان لازم تشاورك
ركزي ختي مع كل جملة تاع سماح و حسيها و ما تعديهاش حتى تحسي روحك سامحتي اذا لقيتي روحك سامحتي
اقعدي مع روحك و فكري وش هو الحل :
تبقاي مع هاذ الراجل و تبقى هذي هي سيرتو معاك حتى ربي يهديه و اذا هداه ربي هل تقبلي ترجعيلو بنية صافية و تحبيه و تعاشريه بما يرضي الله؟ و اذا ما هداهش ربي هل تقدري تصبري على هذي الحياة حتى واحد منكم يتفكرو ربي . واذا عشتي معاه بالطريقة هاذي رايحة تشوفي للحرام ولا قادرة تصوني روحك
تطلقي و ترجعي عند والديك مع بناتك باباك يقبلك يوم و زوج و من بعد يكره لازمك تخدمي هل قادرة تخدمي و تظمني خبزة وليداتك كي تخدمي المجتمع رح يشوفك على اساس صغيرة مطلقة عندها زوج بنات يعني محال واحد يخطبك ولا يفكر فيك في الحلال ورايحة تبقاي بلا زوج طول حياتك هل تتحملي البوار و العنوسة وانت في 25 ام هل رايحة تروحي للحرام
اذا لا هاذي ولا هاذيك ادعي ربي العالي يشوفلك حل من عندو في العافية .

صدقيني رانا كامل في المنتدى عمرنا العقلي قل من عمرك بعشر سنين لانو واحد فينا ما شاف في حياتو نص اللي شفتيه يعني حنا اللي نحكولك مشاكلنا و انت اللي تنصحينا .

ربي يعينك و متى احتجتي تفضفضي ولا نصيحة رانا كامل خاوتك و مستعدين نوقفو معاك

 

[يوسےفے]

ما لقيت واش نردك عليك أختي
صراحة معاناة تدمي القلب و تدمع لها العين ما لقيت ما نكتب لانو صراحة قد ماه نكتبو ما جيكش كيما لي عافس على الجمر هو وحدو لي يحس بروحو..
انتي امرأه فحله.

ليس لنا الا الدعاء من أعماق القلب ..ربي يفرجها عليك و ربي يعوضك ان شاء الله عن كل ثانية معاناة..
ربي يعطيك قدرك و يعززك بين أهلك و يرفع مقامك وين ما حليتي..
ريي يوصنك و يحفظلك بناتك..
ربي يقدرك و يقويك في حياتك
ربي ينورلك طريقك و يجعل كل صاعب ساهل و يسرلك امورك..
و الله يهدي أهلك و ربي يصلح زوجك.
و ان شاء الله جيك أيامك حلوة تنسيك فلي فات يا رب آمين ..آمين.

 

[بشرى ملاك]

ربي يفرج عليك اختي ?
التفتي لحالك وعيشي مع بناتك ونسيه ماشي معنى كلامي تطلقي لا قعدي في دارك وانتقمي كيفاش انك تعامليه ببرود تام حسيه بلي هو مكانش وكل ما تشوفيه ضحكي وسمعي ضحكك ولعبي مع بناتك وقلعيه من مخك والله غير هو لي يولي يبكي عليك بصح مدامك تبكي وبينتيله بلي هو نقطة ضعفك وتبكي دايما هو يحس بالفخر ويحس روحه راجل ويزيد يضرك اكثر كاين رجال هاك يتلذذون باذبية المراة امالا قلبي السحر على الساحر وانت حسيه بلي هو مكان والو لبسي وتهلي في عمرك خليه يشوفك في ابهى صورة وتشوفي الفرق..
ممكن كلامي مايعجبش البعض لكن هدا الواقع نتاعنا
suis le il te fuit. Fuit le il te suis....
اما والديك مارانيش معاك مهما دارو كسبي رضاهم بر الوالدين فوق كل اعتبار وماشي انت لي تعاقبي الوالد ادا غلط معاك كاين رب يحاسب الجميع انت ديري المطلوب منك فقط وهو برهم اما الحساب لصاحب الحساب..
وربي معاك والله يهدي الجميع

 

[programmeur]

لاحول ولا قوة الا بالله
بكل صراحة فشلت كي قريت موضوعك

 

[sami44]

ناس بكري يقولو مزية الهم جا مقسم لو كان جا في بلاصة كون خلاها
مي اتي اسمحيلي الهم كامل طاح عندك
واش نقولك الصبر يكسر الحجر
وكلي ربي ولي يوكل ربي ما ينغبنش
ان شاء الله ربي يكون معاك

 

[4algeria.com]

جا واحد يخطبني و عايلتي طايرين من الفرحة بيه تقول حابين يتخلصو مني بأقرب وقت

الوالدين يبحثون عن راحة بنتهم و لكن الكثير من الاحيان يخطؤون في اختيار الطريق.
و في الاخير يبقو اهلك.
انت الان 27 سنة تعرفين و تدركين ما ينفعك و ما يضرك فقرري مصيرك

ضربني في وجهي و طاحت الضربة في فمي و من قوة الضربة حسيت اسناني طاحو

لااااا لضرب الزوجة
لااااا لإهانة الزوجة
لاااا و ألف لا
و كل من تتعرض للتعنيف يوجد قضاء في الدولة و اذا احترمك الزوج فيا مرحب لكن اذا تكررت الفعلة فخذي حقك بالقانون.
هذا الشيء يجب ان يحدث ليعرف السي الراجل أن الرجولة ليست بضرب أنثى و لا بسبها و تعنيفها لفضيا.
انت انسان و هي انسان.
هي تحترمك و انت تحترمها ليس مزية فيهاو انما واجب عليك احترامها.

اختي اذا كانت حياتك قد تحسنت فلله الحمد و الشكر و اذا بقيتي تتعرضي للضرب فلا انصحك بمواصلة الحياة مع هذا الشخص و القانون يكفل لك الحق في طلب الطلاق للضرر و تاخني نفقتك غصب عن انفه ليتربى هو و امثاله.

الاولياء احيانا ينظرون للمستقبل البعيد للبنت لكن حبهم المفرط لتوفير الحياة الكريمة لبنتهم يعمي عيونهم من تدارك بعض الامور
انصح الاولياء
لا ترتكبو جريمة توقيف طفلة صغيرة من دراستها
لا ترتكبو جريمة تزويج طفلة
لا ترتكبو جريمة تزويج بناتكم من شخص لا تردنه
ابنائكم امانتم في ارقابكم فخططو قبل ان تصادقو

 

[وۣۗهۣۗہۣۗم]

السلام عليكم ....
اختى الكريمة لقد قراة موضوعك هذا منذ ايام خلت للاسف لم استطع الرد في حينها
عسي ان تكرهو شيئاا وهو خير لكم يمكن ان يكون زواجك به وان تكون ربة بيته وام اولاده ليس هباا لو راى الله في دراستك او عدم زواجك خير لختاره لكى فالاولى ان تحمدى الله لا اقول انى مع الوالدين الكريمين لا والله والف لا فانا ضد تماماا زواج البنت في سن صغيرة وهذا نظراا للنتائج
من البديهى انك تكونى حبيتبه ودخل لقلبك لانوو كجزائريات مسلمات منذ الصغر يكون عندنا مفهوم واحد وانوو الزوج هو كلشي ولكن لاتدعى حبك يكون حاجزاا لهدم مستقبلك الماضي قد مضي من بيتك تقدرى تنمى ذاتك متخليهش يشوف نقص فيك شاف نقص الدراسة يمكن هو سبب فيه اغلقي النقص هذا عودى للدراسة ماهو عيب ما هوحراام
مستقبل ليك ولبناتك واياكى والطلاق لا اقول انه محرم انما ابغض الحلال فكرى اولا في بناتك اللى لازمهم يكبرو في دار بباهم كيفاه في هاذ الوضع ازرعى الاسلام في بيتك
كونى انتى اميهم فقوديهم لما فيه خير. وصلاح
لهم ولكى انتى نظمى حياتك وحياة بناتك وجعلي له مجال فيها فالاول ضيقي المجال ومبعد مع الوقت راح يتحسن الوضع بالطبع
نسال الله لكى الخير
اكسبي فيه ثواب
وانقذي بناتك​

 

[ليليا مرام]

السلام عليكم أختي أولا ندعي ربي يسلكك من اللي راكي فيها لأنو ربي اللي فيدو كلش هذا راجلك نقولو أنا فبلاصتك وكيلك ربي فبنت الناس غدوة تتحاسب عليها شي رجال تقولي نحرقهم بكيروزان نتاع طيارات لو يتباع
واش نقول لأختي أول شي والأهم فالدنيا كاملة بناتك لما إنت تمرضي وروحك وكاش ما يصرالك خممت إنو بناتك يصرا فيهم أكثر من اللي راهو صاريلك هذي ما خممتيش فيها ثانيا باباك وعقليتو نتاع بكري ما تقدريش تبدليه والدينا ما عندنا ما نديرو هوما يشوفو إنو هذي مصلحتنا وبعد وقت يندمو لكنو باباك إنساي الي فات وبما إنو قالك دار باباك مفتوحة أنا لو فبلاصتك هذا بابا مهما صار نرفد ذلو ولا نرفد ذل راجل راح يدخلني لزنقة الهبال صبرت وصبرت مع هذا الراجل لكنو ما يستاهلش أنت امامك زوج طرق يا تطلقي وتولي لدار باباك وتخدمي على بناتك ماهو عيب ماهوحرام ربي عالم واش راكي تعاني إما تسكتي وكرامتك وتقولي بابا حاوزني وما قبلنيش نقولك انا يمى دارتها لما اختي دابزت مع راجلها وجات زعفانة مع المغرب وبلا راجلها حاوزتها وزادت زعفت منها واختي من بعد عرفت قيمة اللي دارتها يمى لانو تعلمها ما تخرجش بلا امر رجلها والمرا ما تخليش دارها إلا لو خلاص إنغلقو البيبان هنا قتلك هكذا لأنو ماشي غير باباك اللي دار هكذا كامل الأهل يخمو يحافظو على ديار أولادهم راجل أو مرا
انت ضرك يا أختي تختاري لو انا فبلاصتك ومش نحرض فيك نقولك لو انا فبلاصتك والله لا رقاد الكرطون فالزنقة ولا هذا البنادم وإسمحيلي هذا ما عندوش علاقة بالرجال يا أختي ما نقولك إصبري ما نقولك دارك وراجلك لالا هذا صبرت وصبرت معاه وغلطت النسا لما يجو ليكم بزوج كلمات حنان تولو تجرو عارفة انو ظروفك وباباك رجعك وما لقيتي ين تروحي نقولك ضرك عندك حق النفقة وحق الكراء يعني بالذراع عليه
انا نقولك روحي لدار باباك وطلقي منو إربحي صحتك على جال بناتك هذا تكملي معاه تهبلي
ربي معاك يا أختي والله قسمتيلي قلبي حرام عليه ربي يتولاه
الله يهديه

 

[kacimo samy]

السلام عليكم
ربي معاك و شدة في ربي

 

[أبو إبراهيم .]

السلام عليكم أختي الكريمة

نسأل الله أن يفرج همك

في الحقيقة رغم أن قصتك مؤلمة إلا أن الجزء الذي آلمني أكثر هو حينما قلت أنك كفرت بالله سبحانه والعياذ بالله ، والحمد لله اطمأننت عندما قلت أنك رجعت

يا أختي لا تفكري في هذا مجددا ، إن عذاب الدنيا لا يساوي شيء لا يساوي شيء لا يساوي شيء أمام عذاب الآخرة

أما بخصوص الزواج المبكر، فيا أختي الكريمة 17 سنة هو السن المناسب للزواج وهذا ليس زواج باكر

المشكلة في أنك تزوجت غصبا عنك وكان يجب عليك أن ترفض منذ البداية ولا تتساهل في هذا الأمر

نسأل الله أن يفتح عليك وأكثر من قول : لا إله إلا أنت سبحانك إني كنت من الظالمين