السلام عليكم ورحمة الله وبركاته
و عليكم السلام و رحمة الله
شكرا عزيزتي على الموضوع الطيّب جزاكِ الله خيرا، جاتني إشارة في هاد الموضوع صراحة ونسيت للأسف باه ندخل ليه، لذلك اعذري تأخري.
لاشكر على واجب شفت النساء الخدامات واش راهم يعانو قلت ندير موضوع و نناقشه معا
ماعليش حبيبتي خدي راحتك
أما بالعودة للموضوع، شوفي مارايحة نقولك لا فلانة ولا فلانة ولا المرأة ولا غيرها، خاطر مادخلتش ديار الناس ومانعرفش أسباب وظروف الناس وإذا وحدة خرجت تخدم على اليتامى ولا على نفسها ولا على والديها ولا باه تدور وتحوّس، كل واحد وظروفو وشخصيتو ومشاكلو، على هادي رايحة نقول أنا ونتكلم على نفسي وفقط.
و انا درت ملاحظة اسفل الموضوع و ما عممتش كل النساء العاملات لان كل واحدة و ظروفها
أولا الدنيا هادي مكاتيب وكل واحد وزهرو وكل واحد واش كتبلو ربي، يعني تلقاي خدامة وعايشة مليح ووحدة ماكثة في البيت وماش عايشة مليح، والعكس صحيح، الدنيا هادي هازة حكايات وحكايات، يعني حتى المرأة العاملة لي تبانلك راهي تتمرمد قادرة في نظرها راهي عايشة حرية وأرحم ليها من البقاء في البيت، كيما قتلك كل واحد وشخصيتو وثقافتو والمحيط لي عاش فيه.
صح كلشي بالمكتوب
و انا تبانلي المرأة لي تخدم و راجلها مكفيها من كل الجوانب تحب تزيد عليها و تبين روحها بالزيادة تهمل ولادها
أما عن نفسي فأنا قريت وكملت دراستي سواء الليسانس أو الماستر، ليس لغاية العمل وفقط يمكن نسبة صغيرة من أجل العمل، ولكن بنسبة أكبر لإرضاء نفسي ومعرفتي، يعني مادام عندي قدرات على الدراسة واكتساب معرفة أكبر علاش لا، أصلا الدوكتوراه وكنت حابة نكمل ماجاتنيش ظروف ملائمة فقط ويقبلو من خارج الولاية وأنا مانقدرش نروح نقرا في ولاية غير ولايتي، لهذا أنا أدرس لإرضاء نفسي وفقط وتقريبا دائما تفكيري وأهدافي معنوية أكثر من مادية.
بسم الله ماشاء الله ربي يحفظك
درك خلصت القراية تقريبا عامين في الدار بدون عمل، حابة نعمل وبشدّة كذلك ولكن ليس العمل من أجل العمل، بل لأني عدت نحشم نشوف روحي مرأة ومازال بابا يخرج ويتعب باه يصرف عليا، مادابيا نعمل باه نصرف على نفسي وعلى والديا بشكل أكبر، خلاص درك الوالد تعب مابقاتلوش يزيد يخدم كتر، حابة أنا نهز المسؤولية بما أني كبيرة البيت ونمد لكل شخص واش يحتاج، لكن معليش الحمد لله.
الله يبارك راكي مثال الفتاة البارة
بالنسبة للزواج، شوفي فترة الخطوبة أنا نحب نخدم كما قلت سابقا لإعانة نفسي، وجهاز الطفلة ليس بالأمر السهل، مانقدرش نزيد نحمّل الوالد هاد المسؤولية،
الجهاز مصروفو كبير و الاب ما يقدرش وحدو لازملو معاونة
من بعد اذا تزوجت ان شاء الله، شوفي نقولهالك بصراحة، راجلي أنا مسؤوليتو يسما هو يصرف عليا،
اكييييييييييييييييييييييييييييييد لاكن كاين بعض الرجال سامحهم الله و الله ما علابالهم كامل
أنا باه نصبّح على صباح ربي هازة ولدي ولا بنتي في البرد والشتاء مشنشفتو ونحطو في حضانة ماعلاباليش حتى واش يديرولو ولا يوكلوه، نشرب حليبي في الطريق نخرج في الثلج والمطر وماش شابعة راحتي حتى، وبلا هاد الشي خلاص، أنا نفسي ماش شابعة من ولدي، ماولدتوش باه نضيع ثانية من حياتي بلا بيه، لازم نعيش معاه لحظة بلحظة حتى يكبر ويتعلم ويهز الخصال الحميدة والاخلاق الطيبة، لازم نهتم بكل تفاصيلو الصغيرة، راهو أمانة في رقبتي ولازم نكون قد هاد الأمانة
كلام صواب تبارك الله
إذا كنت مضطرة أني نخرج نخدم لظروف خاصة فالله أعلم واحد مايدري واش مكتبلو ربي، بصح باه راجلي قادر ماديا وعندي من الاساس راجل في كتافي ونخرج نخدم لالا، حتى ولو كانت عندي أعلى الشهادات، الخدمة ماتجيبليش قيمة ولا تخليني إنسانة محترمة ولا تعطيني قيمة معينة داخل المجتمع، هي تجيبلي الدراهم وفقط، والدراهم مقابل عايلتي مايسواو والو، إذا حتاجني زوجي نعاونو نخيط ولا ندير حاجة تاع بيت نعاونو بيها أحسن ما نخرج على الاقل نكون في داري ومهتمة ببيتي.
قليل لي يفهمها هادي و الله كاين شحال من حاجة تقدر المرأة تعاون راجلها بيها بلا ما تخرج من بيتها مثلا مشروع صنع الحلويات او اشغال لتزيين المنزل .......
وأنا هاد الكلام لي نقول فيه ماش هكاك، أنا والدتي كانت عاملة، وأرغمتها الظروف على ذلك، ورغم عملها عمرها لا قصرت معانا من ناحية الحنان أو الحب أو الاعتناء ببيتها، ورغم أني ماكنتش نروح عند ناس برانية يعني نروح لدار جدي، وهكاك مازال عندي نقص هكا بداخلي، للآن نحب نعوض الايام لي خلاتنا مانقعدوش بزاف مع والدينا، وانا نفسي ماش حابة نعاود الامر مع ولادي بحول الله.
ربي يخليهالك و يطول في عمرها
حتى انا امي كانت تخدم فالدار الكروشي و المطلوع و الرشتة ....... باش تعيشنا لان بابا قعد 5 سنين دون عمل و وين يروح مغلوقة و الحمد لله
أما حكاية العلاقة الزوجية، فهي مبنية على التفاهم،
التفاهم و الحوار خاصة
لما تكون المرأة تخدم وتولّف راجلها أنو مايتحملش مسؤوليتو، أكيد يولي يجبد منها برك الدراهم، يولي يشوفها في حد ذاتها دراهم ماش زوجة
صح انا نعرف وحدة هكذا زوجها والف هي تصرف من شهريتها و هو يخبي شهريتو فاتو العوام شرا دار بهادوك الدراهم و زيد كان مخبي شوية و عاود الزواج و جاب وحدة صغيرة معيشها فالعز و الدلال و هي راهي مع ولادها و فرنك مايعطيهولهاش
ساعات كي نشوف راجل يشرط على مرتو يقولها ماتخدميش وانا وانا تقول هادا خلاص قد المسؤولية،من بعد شهر ولا شهرين تلقايه هو لي يهدد مرتو يقولها لازم تخرجي تخدمي مانقدرش نصرف عليك،
إضافة إلى أنو كاين فئة من النساء تحب تعيش فوق مقدورها، التحواس واللبسة والذهب ووو
فتولي تقبل تخدم وتتعب أو تستجيب لزوجها بالخروج للعمل فقط لتحقيق تلك الأهداف،
هاذو لييحبو يزيدو عليها
أنا نقولهالك من اللخر راجلي محتاج مسكبن ظروفو صعبة وفوق طاقتو، مستعدة نتعب ونخدم باه نساعدو، خاطر مسؤوليتنا فيزوج، أما أنو حاب يشري سيارة ولا يعيش هو تاني الرفاهية على ظهري فهادي لالا، نعيش بواش مكتبلي ربي والحمد لله ومانشردش ولادي، كاين ناس نعرفهم والله يخرج مرتو تخدم وماش أي عمل يعني عمل مهين ليها، ودراهمها يشري بيهم الدخان ويفليكسي بيهم، وشوف واش يدير تاني، العمل تندار لكسب قوت حلال، ماش باه نخرج نحوّس ولا نثبت مكانتي ولا نبروفيتي على الطرف الآخر، عرفنا قيمتو وفائدتو مرحبا، ماعرفناهاش فلا داعي له من الأساس.
صح و الله انا قريت قصة تع مرأة عندها طفلة مولات عامين و راجلها عاطل عن العمل هو يصبح راقد لل 11 باش ينوض و هي تبكر الصباح و تدي بنتها عند امها و تروح تخدم و لعشية تقضيو تجوز تجيب بنتها و تدخل لدارها و راجلها يا الدار يا القهوة يا البلايستايشن و زيد التشناف على الماكلة و يمررلها حياتها بهاتي مصروفي ........
المهم علابالي راني دخلت وخرجت ههه كاشما نسيت فكريني ونولي ان شاء الله ههه
تحياتي
