اشهار القهوة

[الوهم]

السلام عليكم اهل اللمة اليوم راني حابة نهدر على اشهارات القهوة لي راهم دايرين حالة في التلفاز وين ما روح نلقاهم النهار الشروق البلاد راهم يفوتو كثر من الاخبار نتاع الحراك والمشكل في تفاهتهم الاشهار يكون لغرض التسويق والتعريف بالمنتوج مش باه تخبرو بلي الغاشي قاع في الحومة يشرب قهوة اروما بصح ما قلوش وش من حومة احنا صحيح في حومتنا نشرو الحب اخضر ونحمصوه نطحنوه ونشربو ولا قهوة بونال لي اذا خلاصت في زحمت السير يتقلق مولاها ياو القلقة نتاع السيركيلاصيو ولا القلقة نتاع الاشهار نتاعكم ولي يقتلني قاع لي قولك جربنا1000قهوة ومش مليحة المخيرة هي1001 دوك اللجنة تذوق الف قهوة ماتتمسخروش كفا استخفافا بعقولنا قلقوني بزاف تقول مكان حتى منتوج يسوقولو ولا القهوة رايحة تنقرض

 

[sami44]

والله غير عندك الحق شبعونا قهوة
واكره ما اكره نهار نكون نتبع في مسلسل ولا كاش حصة اجتماعية ويقطعوها باشهار تاع قهوة يتلفولك حتى الموضوع تاع الحصة
ونزيدك حاجة نهار دارو اول مرة اشهار تاع قهوة مولينو انا حسبت بروشانمون تاع مسلسل.
ووحد النهار خدمتلي قلت والله غير نبحث على هذ القهاوي الي صدعونا روسنا بيهم اكتشفت بلي كامل القهاوي مصدرهم قهوة وحدة تجي فالبابور في الشكاير تاع الخيشة وهنا في البور يقسموها بيناتهم ويحمصوها
مادامها قهوة وحدة وتحماص واحد علاش كل واحد يقول قهوتي هي المخيرة
المهم مشكورة على الموضوع الطيب في انتضار المدمنين على القهوة
@الامين محمد. واخي @حلم كبير. يعطونا رايهم

 

[الامين محمد]

ههههههههههههههه جبتوها على قلبي
كأننا لا نستهلك شيئا آخرا إلا القهوة و كيداير هاذاك الاشهار يخليك تكره السلعة بدل ما تحبها او تشريها

ــــــــــــــــــــــــــــــــــــــــــ
راح نعطيكم معلومة
انا مصاب بالسكري نهار نشرب القهوة تاع الدار يعني الخضرة اللي نحمصوها و نطحنوها يدويا
اذا شربتها بدون سكر او حتى موز ما يطلعش السكر

لكن هته الانواع من القهوة حتى و نشربها بدون سكر تضرني و يطلع لي السكر
كأني نحس انها غير طبيعية او ربما زايدين معاها حوايج

مانيش متأكد لكن اعتقد فيها سكر محروق و مطحون معاها باش تزيد في الميزان
و اعتقد جازما انها مضرة بالصحة هته تجربة شخصية و الله اعلم

 

[عبدالرؤوف]

اتدرون ان تلك الانواع يضاف لها اما شعيرا محمصا او حمصا او عدسا
والاسلم ان تشتريها حبا اخضرا وبعدها تعدها في البيت ضاربا تلك الانواع بعرض الحائط.

وكدليل لماذا تفترق الاذواق والمصدر واحد.

 

[Malika Tlm]

السلام عليكم
ههههههه عطيك الخير والله صح
كامل انواع القهوة شفناها وكل وقت
وزيد كل واحد يشكر فالمنتوج ديالو هههه
اياااا والله صماطة
تحياتي

 

[وۣۗهۣۗہۣۗم]

السلام عليكم ....
والله ياختى جبتبها نيشان شبعناا قهاوى نهار طول وحناا من قهوة لقهوة
والمشكل وبدون ذكر اسماء بعض القهوات ههههههه لاتصلح ريحة ومكانش والبنة متهدرش
غير هكدااا خلى معليش يغنولناا شوياا يتبدل الموود

 

[السلطانة]

تالمون لي راهم انواع بزاف ويعاودوهم بزاف عدت نتفكر غير اللون الاحمر تاعهم ههه
دوزيا بونال نزيار عمار اروما
نندب حناكوس
يعطيك الصحة اختي

 

[dahman kz]

كل ماهو تجاري وربحي عادة مايكون فيه تلاعب أو احتيال او مبالغة .ويبدو مما نرى ما في اشهارات القنوات الجزائرية أنه لا يوجد قوانبن وظوابط تفرض الانظبط على الاشهار في قنواتنا.

 

[ام أمينة]

السلام عليكم
عشر آلاف ماركة من القهوة و 2 و لا 3 ماركات برك لي يصلحو
اما الاشهارات ولينا نشوفوهم بزاف اشهار مور اشهار و واحد الجياحة و السماطة و ما عندهم حتى معنى
كل واحد يقول قهوتي خير و هما عندهم ذوق واحد تقريبا
انا ذوقهم ولا ما يعجبنيش وليت نشري عند لي يحمص القهوة كمية و نخلطها مع القهوة تع الاشهار باش تمد ذوق شباب

مشكورة على الموضوع
في انتظار جديد مواضيعك
تحياتي و احترامي​

 

[zagane]

السلام عليكم
يعجبني الشيخ لي يرقص على قهوة اروما