مشكلتي اريد تحليلا خصوصا الرجال

[مشكلتي]

السلام عليكم
حابة نحكيلكم مشكلتي و قدمولي رايكم و تحليلكم
أنا انسانة تزوجت من سنوات راجلي الولد الاخير ليماه و مومو عينيها كان وعد يماه يدير لها دار و تسكن معاه هي عاشت الحرمان العاطفي و الفقر عاشت مطلقة و ربات 13 ولد بين بنات و تسعة رجال و تمرمدت بزاف
كامل تزوجو و عاشو مع نساهم فديورهم و نا سكنت معاها
المهم صراو مشاكل بزاف و صبرت بحكم يماه و ماعندها وين تروح و موراها صراو مشاكل مع راجلي لحقنا للمحال
المهم لمدة سنوات طيحة و تكركيبة ساعة رانا ملاح ساعات مشاكل و المشكل راجلي تحكمو و دور لو مخو و يجي عندي يتهمني بصوالح مهومش فيا
كل كناينها عايشين وحدهم يخرجو وقت يحبو واحد ما يسالهم و هما الأفضل و الأمثل و نا فوق ماهي دير لي مشاكل راني ديما مقصرة و درت ودرت و درت و حياتي كامل تعاودها برا حرضت اولادها عليا كامل ولاو يكرهوني من غير سبة قلنا معليش اللي مصبرني هو راجلي
المهم مرمدتني بزااااااااف و نا صعييييبة نتخلى عليها بيسك علابالي سوفرات في صغرها
خترة خرجها راجلي من الدار كلحقت و دارت مشاكل و رفدت روحي قتلو يماك متتعوضش و نا نتعوض راح خرجها و جا لدارنا قالي ولي وليت و مصح في قلبي غصة حتى نهار قتلو رجعها هاذي يماك و طول عمرها تتمنى دار و تخرج بسبتي أيا رجعت و ولات لطبايعها و دارت لي مشاكل كبار
المهم مؤخرا توترت العلاقة بيني و بين راجلي مصح من جهة باينة تكمل هاك و حنا عايشين ديما على اعصابنا
راجلي من قبل كان ميهموش ريحت معاه وحدي و لا نن دوكا ولا يشتهي نفوتو وقت مع بعض نلبسلو واش يحب ساعات نشري نشري نشري مصح نلقا مكاش وقتاه نلبسهم يماه ديما معانا الراجل فالغربة يجي نفوتو الكونجي في مشاكل
الخترة هاذي خرجلي بخرجة بلي أنا نفرق فالعايلة و نفرق فخاوتو فالوقت اللي كنت نجري نلمهم في داري عرفت بلي راهم يديرو لي مكائد مورايا حبست غاضتني كفاه قاع بعد هاذ الصبر يتهمني
مع هاذ المشاكل كنت رايحة نكري دار و أمنيتي منذ عشر سنوات نريح وحدي مع ولادي ونخمم مع تربيتهم نهار لقيت الدار اكتشفت بلي راني حامل أيا حرت واش ندير و راجلي كعرف تكالما كامل ولى شخص آخر
والحامل تعيا ترقد بزاف ساعات تتقلق ساعات راهي نورمال ساعات تعيا بدات يماه تتقلق و تقولو شنو هاذ الشي قالها ساعفيها راهي اونسانت اذا تحبي بدلي الجو و ساعات زوري اولادك
مع العلم اولادها و كناينها و بناتها ساعات يفوتو شهرين و ميشوفوهاش ومع هاذيك هما الأفضل ونا ديما معاها صابرة على لسانها مام كيسافر راجلي منباتش برا بسبتها و مع هاذيك راني سيئة راني مقصرة
هما كيسكنو وحدهم حقهم و نا محقليش نسكن مع راجلي يسافرو وحدهم معليش انا نهار جيت نسافر قالت ليهم طيشوني و بعد ثلث ايام قاتلو واحد مجاليش
المشكل قاع مش هنا خاطرش راهي ضر روحها قبل ما تضرني
اليوم قالت لراجلي راك قريب تسافر نروح نريح عند بنتي و نا علابالي متحبش تخرج من الدار قلت لراجلي علاش ولادها ميزوروهاش ينحيو ليها عالخاطر زيد الدار كبيرة ندير لهم شومبرا قالي متعييش روحك علابالك واحد ما يجي
راحت عند بنتها مصح أنا قلبي محروق علابالي راحت كقالها خرجي شويا
معلاباليش واش ندير معاها وهي تكرهني وتقولهالي في وجهي
و من جهة هي كبرت في ميزيريا و نهار فتح ربي عليها نكون السبة باش تخرج من الدار مؤقتا مع العلم
و من جهة وليدها كيفي مش حاب يخسر مارته مش حاب يخسر يماه
و من جهة ضرتني و آذتني بزااااااف و اذا بغيتو نحكي واش دارت معايا و احكموا برواحكم
ولكن ولو ضرتني تبقى أم ضعيفة صحتها عيات و عقليتها عيات ساعات نلوم روحي نقول لازم نصبر و ساعات نقول عندي حق نريح شويا وحدي و نراجع حساباتي مهوش ساهل المشاكل ديما و زيد راجلي متوحش نريحو كيفكيف نفوتو وقت رومانسي خارج الشومبرة تاعنا و حقو فالوقت الحميمي مهوش فالفراش وحدو
خاوتي رايو عليا مع العلم هي حابة تعيش وحدها في دار و راجلي راح يوجد لها دار مصح منا لعامين و عامين مدة كبيرة مشكلتي نحس بالذنب
تحليلكم اخواني و السلام عليكم

 

[Ma$Ter]

السلام عليكم ورحمة الله
اختي بعض الناسكي يكبرو بزاف يتصرفو تصرفات غريبة ويؤذوك عادي حتى كون تكوني تعامليهم معاملة طيبة
مرات يمرضو قلوبهم بالحسد ومهما ديري معاهم يوجعوك واني جربت هاذ الامر من اقرب الناس ليا
كل ما عليك الصبر والدعاء صباح وعشيا
ربي يفرج عليك وربي يعطيك الصبر اختي

 

[dahman kz]

والله لمشكل هذا يعاني منه غالبية للمتزوجين الساكنين مع والدهيم .. والمشاكل هذي في الأغلبية تجي من لعجايز على خاطر كل مايكبرو يزيد شرهم.
لمشكل باش تخرجي عمتك من دارك ماتقدريش و يبقالك عيب طول حياتك وتندمي عليها طول حياتك على خاطر يجي نهار تموت وتروح عمتك وتندمي ويبقى غير الخير للي عاملتيه بيها حتى لو كانت ظالمة معاك لاقصى حد ..
الحل في الحالات هاذي هو الصبر... اقتليهم بالبارد وبلقدر وماترديش عليهم باسلوبهم وكل واش يقولولك قولي ايه حاضر ..وكل مايزيدو زيدي انتي عامليهم بالاحسان أكثر.. وأحسن طريقة تغلبي بيها من يكرهك من الأقارب هي هاذي.. عامليهم بإحسان وفنفس لوقت ماتعمريش راسك بيهم .. وتفكري أخرها موت..
و هذا رايي والله اعلم

 

[Abodi84]

الله يعينك الأخت
تذكري شي انه الانسان الكبير مثل الطفل يحب الاهتمام و يكون عنده انانية عامليها مثل اولادك لكن مع احترام عمرها و احتسبي هذا عند ربك ان شاء الله يعوضك خير
الله يقويكي

 

[عبدالرؤوف]

و عليكم السلام ورحمة الله وبركاته
احييك على صبرك فيما فات واتمنى
ان تواصلي الصبر لأنه مفتاح الفرج
والايام دول والجزاء من جنس العمل
لن اقول لك هي لن تظلم
وبما انها اختارت زوجك دون اخوته فذلك لشأنه عندها فليكن زوجك هو شأنك ايضا
وهنا سر بديع اجتمعتما على حب شخص واحد فليكن الاحسان اليه سببا لتآلف قلبيكما
اجلسي معها وحاوريها بهدوء وافهميها انك تحبين ابنها وكل مناك اسعاده
والدنيا لن تدوم
وعلمي زوجك ان لكل طرف حق وواجب
واذكري واجباتك اتجاهه اولا كتلطيف في الحوار وعلميه بعدها واجباته اتجاه امه ثم اذكري حقوقك هكذا تكونين قد اصبت المطلوب ان شاء الله.
زد على ذلك من كلامك يظهر انك طيبة فحافظي عليه وهو من ينتصر رغم ان هناك معاناة واتفهمها لأنه مشاهدة بكثرة.
وهذه اكبر غلطة يقع فيها الرجال وهي سوء تسيير العلاقات الاجتماعية اذا كان طرفيها الزوجة والام والحل هو الحكمة والصبر. نسال الله ان يفرج همك عاجلا غير اجل وان يسعدكم كلكم
والسلام عليكم.

 

[sanaya]

يا أختي مشكلتك حسب ما قرأت هو تغير زوجك عليك أحيانا
يعني عايشة بين نارين
من جهة حابة تتهناي مع راجلك
و من جهة حابة تطهلاي بعجوزتك اللي متبغيكش
اذا عاشت معاك راكي فمشاكل
و اذا باعدت ضميرك يأنبك
و الله قبل كلشي نحيي طيبتك
بيسك بنات اليوم ساعات راهم يرفضو الحماة من غير سبب
ونتي راهي ضراتك و مع هاذيك مقدرتيش تخرجيها و الله أم قلب طيب
شوفي رايي تبقى معاكم
و هي ربي يهديها
نتي بينك و بين راجلك قوليلو مادخلش روحك
كتقولك مارتك دارت و دارت فهملها بالعقلية بلي هاذي مارتي. و أم ولادي و بيناتكم
و نتي ثاني كان جيتي تشكي يقولك نفس الشي
هكذا ميتبدلش لا من جيهتك لا من جيهتها
و ربي معاك و خيرك مزال تلقايه

 

[Hakan]

تعاملي مع والدة زوجك بمنطق الطفل الصغير هي راهي دير هاك خاطر خايفة وليدها يرميها كما رماوها اولادها الاخرين وصدقيني راني حاس بلي متعلقة بيك بطريقة او اخرى كاين حاجة ننصحك بيها حملي كاش آذان في الهاتف تاعك.. ومنين ذاك شغليه في داركم لانو يطرد الشياطين لي دير المشاكل وزيد حاجة أخرى عيشي حياة مظلومة افضل من حياة الظلم وزوجك راهي الوالدة تاعوا ما يقدرش يغضب ربي من جهتها لذالك حاولي تتفهميه مام يعيط عليك ولا يغلط في حقك وربي يجيب الخير ليك نشالله

 

[lssamir]

السلام عليكم ورحمه الله وبركاته
يااختي جميع المشاكل حلها الصبر صح تغيدك عمرك كي تحسني للناس وهما يسيؤولك بصح واش ديري هادي راهي يماه بغض النظر على كيفاه عاشت حياتها ماشي من حقها تسيئلك بصح ماعليه اسمحي من حقك باه تحافظي على الاسرة ديالك وديريها في عوض يماك ليجابتك وبلعقل بلعقل بلكلام لحلو والظرافة الزينة تربحيها ان شاء الله وتزيدي تكبري في عين راجلك ويشوفك نتي هي لالات النسا خاطارش مريتي بمرحلة صعيبة وصبرتي وضحيتي على جالو وعلى جال العايلة تعكم وبربي ان شاء الله المولود لي راه يزيد عندكم راح يكون فال خير ويزيد يلم شملكم ويقوي المحبة بيناتكم ويتربى في عزكم ان شاء الله. ماديري والو في راسك راهي سحابة وتفوت كاين الاف من الناس مروا بمشاكل اصعب من هادي بصح بالصبر ياتي الفرج وربي لا يضيع اجر الصابرين كوني مرا برك وخمي بعقلانية قبل ما ديري اي حاجة ربي يهنيكم ويقوي المحبة بيناتكم وربي يحفظك ويحفظ العايلة ديالك

 

[ابو سلسبيل]

ستكبرين وتصبحين عجوزا وترين اولادك يسرقون من امام عينيك ويفضلون زوجاتهم عليك وربما تبقين وجيدة لااحد يطيق البقاء معك بسبب تصرفاتك عندها ستفهمين تصرفات والدة زوجكي

 

[بنت الـ25]

السلام عليكم
بون رايحة نحكي من وجهة نظري كامرأة ربما عاشت بعض مما راكي عايشاتو
واعتبرت نفسي في مكانك وش ممكن ندير
اختي أول حاجة نقولك " الكنة تقعد كنة ولو خرجت يدها خضرة من الجنة"
الله غالب هذا واقع منقدروش نبدلوه
بصح فحكايتك راه مكانش مشكل ونتي لي راكي تخلقي فيه
دوكا تروح تقعد عند بنتها ولا عند اولادها خليها مفهمتش علاه راكي حاصرتها في جنبك وزيد تجيبي عندك فالغاشي
صح غايضاتك كي سوفرات والرحمة حاجة مليحة وربي يجازيك عليها
بصح كي تنفلت الامور وتولي حياتك الزوجية وعائلتك مهددة بالخطر اهنا نقولك لازم تولي تخممي بأنانية
خخمي مليح اذا شفتي انك بقعادها معاك رايحة تخسري حريتك وخصوصيتك مع زوجك وعلاقتك مع اهلو وفالمقابل رايحة تربحي أجر عند ربي معليش
أما إذا شفتي انو قعادها معاكم رايحة يخسرك حياتك الزوجية ودفء أسرتك نقولك Stop
وربي يكون الخير " منا حامية منا تحرق"
​

 

[rafid2]

مشكلة بالصح
واش رايك لوكان تربحي رضا الله فيها راح تربحي الدنيا والاخرة
نقولك في مجتمعنا مثل هته الظاهرة كوجودة بزاف وهذا راجع لعدة اعتبارات منها النفسية والمادية
المهم والاهم في هذا الامر هو ان ترضي راجلك
بقات في الام نتاعه احمليها ونالي منها ثواب الله وتأكدي ستفرج عليكي من حيث لاتحتسبين
وردي بالك من التفكير في الطلاق او غير ذالك ثم الاعمار بيد الله وحسب القصة اخر ابن عندها متزوج يعني راهي كبيرة في العمر من جهة كبر السن عنده سلبياته ومن جهة قومي حتى يفرج عليكي ربي

 

[زاد الرحيل]

ربي يكون معاك و الحماة دائما تتمرض و تتمسكن و تخلق الف مشكلة بصح تبقى والدته و اذا قدرت تصبري اصبري و الا ديري دارك و هذا حقك الشرعي و تبقاي تزوريها و ولدها بطل عليها و يشوف واش تحب
ربي يكون في عونك و عوني

 

[kingcool]

ربي معاك اختي اصبري مؤجورة ان شاء الله تعبك وشقاك ميروحش هباء منثور و ليصبر انال علبالي ميحس بالجمرا غير لي كواتو نوصيك اختي حافضي على دارك وراجلك احليلو يماه مهما كانت مهما دات تبقا يماه وانتي تان احليلك حافضي على دارك لمي الشمل قومي بالواجب اتهلاي في وليداتك وراجلك