علاش نحقرو بعضانا بالعين

[sami44]

السلام عليكم ورحمة الله

زوار ورواد منتدى واش راك تهدى ان شاء الله كامل راكم بخير
عندي مدة ما كتبت هنا واليوم سفت ضاهرة تفكرتكم وتفكرت الركن


وهي ااننا نحقرو بعضانا بالعين اي نضحكو على بعضانا
توجور تلقى بعض الناس يستهزاو لما يشوفو واحد فقير ولا ضعيف ماديا. يضحكو عليه
ما تقولوليش مكاش منها كامل دزيريين ونعرفو بعضانا
مرات رانا نشوفو العجب
مثلا في هذ الصوره شخص لابس سيرفات مع صباط نديروه سيجي ديسكيسيون نورمال ونجيبو بيه هدرة تاع شهر ولا اكثر

الصورة لقيتها في النت ما نقولكم تاع @الامين محمد. ولا خويا @حلم كبير


بصح لو كان الواحد يعرف بلي هذ الشخص شهريتو ما تتعداش مليون ونص
صار يضحك عليه
ويزيد يعرف بلي متزوج ويخلص الكرا والترسيتي والما والغاز
صار يضحك عليه؟
ولو كان يعرف بلي يخدم على باباه ويماه وزوج خاوتو مع مرتو
صار يضحك عليه؟
ولو كان يعرف بلي يبكى قبل الفجر يخدم حمال وعلى الثمنيه تع السبوح يروح لخدمتو والعشية يخدم فالمارشي
باش يكفي العايله تاعو
صار يضحك عليه ؟
ولو كان يعرف بلي هذ المسافه الي يقطعها فالنهار كامل على رجليه مش فالطوموبيل
صار يضحك عليه؟
لوكان يعرف بلي لبس السيرفات مع الصباط على خاطر تقطعلو السروال وهو عندو واحد برك خلاه يتخيط
صار يضحك عليه؟
لو كان يعرف بلي عندو صباط واحد منين يتقطع يخيطو ولهذا لبسو مع سيرفات
صار يضحك عليه؟
لوكان يعرف بلي هذ الشخص ما يديرش قصه للمضهر تاعو اصلا لانو داير قصه العائلة الي راهي تستنى في مدخولو
صار يضحك عليه؟

علاش نحقرو بعضنا بعض بالعين
وهذا فالنسا وفالرجال
للبيوت اسرار كلش مخبي واحنا نحكمو على الناس من المضهر تاعهم
وفي بعض الاحيان نحاكمتم دون رحمه
شخص مثل هذا يقولك مشحاح
وهو مرات يبات بلا عشا من الفقر
علاش ما نخلوش كل واحد في حالو


اليكم الخط
#sami44





كان اللّٰه في عون الفقراء ❤​

 

[علي 111]

قد قالها لقمان الحكيم ناصحا ابنة
وَلَا تُصَعِّرْ خَدَّكَ لِلنَّاسِ وَلَا تَمْشِ فِي الْأَرْضِ مَرَحًا ۖ إِنَّ اللَّهَ لَا يُحِبُّ كُلَّ مُخْتَالٍ فَخُورٍ (18)
من يستنقص الناس في أي امر فهذا نقص فيه يريد ان يعوضه
اشكرك على الطرح

 

[الامين محمد]

قبل ما نخدم في الثانوية كنت نخدم في متوسطة
كان معانا مدير زعمة من الاخوان المسلمين
المهم كنت نخدم و كل واحد في حدو ما نحوس عليه ما نروح نجمع عندو
و اذا طلب مني خدمة في خدمتي نخدمها و اذا ماهيش من خدمتي نتركها ما نخدمهاش

المهم واحد نهار كنت داخل القسم و النافذة مفتوحة هو لم ينتبه لي
كان مع احد الاداريين و قال بالحرف الواحد نهار يجيني المفتش
وصي عمال العقود يجو بلباس لائق راهم يحشمو

انا سمعته و الاداري هذاك الشيالت قال بصيغة الجمع
راه جاي المفتش لازم يكون استقبال لائق بيه
انا خليت الامر في قلبي و لم اخبر احدا
و نهار جا المفتش قال لازم وحدة من العقود تجي تفرغ ليه القهوة
المهم انا تدخلت و قلت اي وحدة تروح تخدم هاذ الخدمة راح تشوف مني حاجة عمرها ما شافتها

سمع المدير بالامر
و عرفته انه راه يخطط لحاجة
حتى نهار في حفلة
عملوها التلاميذ و عرضونا كامل
كنت جالس كيما الضياف جا استاذ متأخر ما لقاش كرسي باش يجلس

قالي المدير جيب للأستاذ كرسي
قلت ليه روح انت جيب ليه كرسي
قالي واش راك تقول قلت ليه كيما سمعت
المهم تخلطت الحالة و افترقنا بعدها وقفلي العمل في المتوسطة
و حولوني الى الثانوية

المدير هاذاك زعما متدين لكن عمره ماشاف الناس سواسية كان يشوف فينا
طبقات حسب ألبستنا و اموالنا او خلصتنا
وصل وين يقول لشابة او عاملة سربي القهوة لضيافي
اي عنصرية اكبر من هته

و المتكبر مثواه النار حتى لوكان في قلبه مثقال ذرة من كبر

شكرا حبيبي ناصر على الموضوع المميز

 

[Hakan]

موضوع قاسني بزااف لانو عندي معاه قصة صح رانا في مجتمع حقار مجتمع يشوف للمظاهر اكثر من الجوهر..
ونزيدك كون يعرفو بلي هذا السيد يدخل قبلهم وقبل اجدادهم للجنه ما يهدروش ولوكان يعرفو بلي هذا الانسان قادر يرفع يدو لربي سبحانه ويهلكهم في سبيله ما يهدروش بصح واش دير الانسان يلهى بالمحان لي راهو فيها لانو كلام ناس ما ينفع ما يضر صحيت خويا الزين

 

[الطيب الجزائري84]

قال السفاريني: (إن كل من افتخر على إخوانه واحتقر أحدًا من أقرانه وأخدانه أو سخر أو استهزأ بأحد من المؤمنين، فقد باء بالإثم والوزر المبين) .

الله'المستعان'أحسن'الله'إليكم

 

[Malika Tlm]

السلام عليكم أخي
صح ناس عندها تفكير فاسد
ونساو يشوفوا القلب كيفاش يكون
الله يهديهم

 

[السلطانة]

وعليكم السلام ورحمة الله وبركاته
صدقت حنا مجتمع تاع مظاهر
مجتمع يتخلع في فلان وولد فلان
مام عند النسا كاينة
هاذيك عندها دراهم تشنف على لي معندهاش
ربي يهدينا

 

[محب Google]

وعليكم السلام ورحمه الله وبركاته
أبدأ من مقولت الشافعي رحمه الله المشهورة «آن للشافعى أن يمد قدميه».
وكامل نعرفوا الحكاية
كان في زمنهم الوقار للعلم والعلماء وكان لهم لباسهم فخدع الشافعي رحمه الله المظهر وإن المظاهر لخداعة ولكن لا يحتقروا أحد في ذاك زمن
اليوم في زمنا التقدير والوقار لمال وأصحاب المال
وللأسف اليوم الفقير تحقروا العين وحتى ان كان عدوا علم
ودليل الخرجة جديدة دير الخير وصور معاه
والمصيبة الأكبر أن حال شعب اليوم في نفس الحالة أغلب شعب ياعني من الفقر فقط هي دراجات هذا خير من هذا في بعض الأشياء
والمظهر لا يعبر عن الحالة لأن أغلبنا يخدم من أجل الباس وربما نح من المصروف باش يلبس
وناس بكري أقول أخرج لناس جيعان ومتخرجش عريان المهم أصبحت قيمت الإنسان على حسب مايلبس
وش هو العيب في حذاء مع سيرفيت
العيب في عقولنا لصارت تقيم الإنسان على لباسوا يعني لما البس بدلة فاخرة صرت عالم مثلا
وهل عندما البس لباس الأجداد صرت راعي أم صرت متخلف
لو كانت في شبابنا ذرت غيرة للبسنا كلنا لباس الأجداد لأن الغرب يصورها لباس المتخلفين
ننظر للخليج مثلا هل لباسهم جعلهم متخلفين
للأسف لازم يتغير تفكيرنا ولازم نرجعوا لتوقير العلم وحاملي العلم
موضوع مميز تحياتي لك أخي محبكم محب قوقل

 

[سلوى بن فرج]

إرضاء الناس غاية لا تدرك.

 

[sami44]

الله يعطيكم الصحة نورتم الصفحة
لي عودة للرد عليكم اعاني الاما حادة
تقديىي لكم

 

[rafid2]

أما انا فعندي نظرية امتعتني وجعلتني اشتري راحة البال
النظرية هي:
لا اجعل ابدا من المجتمع معيارا للنقد
بعبارة اخرى عمري ولا اخذ بكلام الناس لأن ببساطة مجتمعنا وناسنا ليسوا بالمستوى المتحضر لأاخد منهم توجيههم
مجتمعنا للاسف الشديد لايرى ابعد من صباطه ولايعرف من التحليل سوى من خلال المظهر
مجتمعنا ايها السادة لايعرف من التشخيص سوى يعرف يلبس اي اذا اردت ان تسوق بعضهم كما تشاء اضرب كوستيم وصباط وكرافات وستقضى حوائجك
للاسف الشديد قبل بناء الدولة علينا ببناء الانسان
ان لم يبنى الانسان على حضارة راقية فلن تبنى الحضارات
مازلنا في طور بعيد جدا

 

[Andy_Delort]

/

نعم اخي مجتمعنا اكبر مجتمع ينافق ويجامل
ويخدم بالوجوه ويخدم بالعينين والشوفات والزوخ والفوخ ....

يعرفو يضحكو ويستشفاو برك ... واحد ميحسن العون لواحد واحد ميحاول يرفد واحد ....

اذا كان عندك يقيموك واذا كان معندكش ميشوفوش فيك والاكثر والامر يضحكو عليك ..

مجتمع منافق يعشق المظاهر بإمتياز ...

علما اني نعمل في صفوف الامن الوطني واحد مرة قابلتني مرأة سقساتني عدة اسئلة بخصوص قضية ما وجابوتها وبإحترام وبكل لباقة ايا مبعد سقساتني سؤال انا مكنتش متوقعو قاتلي بواش نيفو تدخلولها ... قتلها حسب الرتب مي اقل رتبة تدخلها بنيفو باك .. جاوبتني وقالتي اااه حسبتهم يدخلولها بانيفو بيام ... تماك انا تنشعت قتلها علما اني خريج الجامعة و عندي عدة ديبلومات على مستوى معاهد منهم تقني سامي في الاعلام الآلي وهكذا .. " قتلها وكآضافة انو اغلب صحابي خريجي جامعة زوج هادو لي يخدمو معايا واحد هذا العام الاخير ليه2 ماستر بيولوجيا والثاني2 جامعي اقتصاد ... تماك حسيت بردتلها الحمة ومبعد باه نكمل القصف قتلها حايب نسقسيك ولدك واش من نيفو قاتلي حبس في الثانية ثانوي " قتلها الله يبارك الله يبارك ..

المهم حبيت نوصلها ميساج بلي مهما كان الانسان ومهما كانت وظيفتو الا انه يمكن عنده رصيد معرفي او شهادة .. ولكن محظاش بعمل في داك الميدان او مقبلش يرشي باه يدخل خدمة ويكون رزقو حرام ... ايا باشر في ميدان اوخر مهم مقعدش حابس ...

 

[sanaya]

قاسني موضوعك
نولي للرد غدوة

 

[sami44]

كل التقدير لكل من مر من هنا
يا ريت لو كلنا نفكر ما تفكرون لكنا احسن شعب
بورك فيكم

 

[عبدالرؤوف]

السلام عليكم ورحمة الله وبركاته.
حياكم الله جميعا وبياكم.

.
ان اولئك القوم اقصد من يحتكم للمظاهر انما باطنهم قد تجاوز مرحلة الموت بمسافات
ما اجمل ان يحصن المرء نفسه من هكذا امور فلا يعبه بها ولا يجعل نفسه يسقط في فخها بمعنى ان يترفع عن احكام اولئك الميتون فإنهم ماتوا ومن مات لا اعتبار بقوله ولا يعتد بنظراته الخادشة
منذ دخول الالفية الثانية زادت البهرجة
والتمظهر ونسيان اللب شيمة اهل هذا الزمان الا القليل
قيل تكلم حتى اراك فأولئك ان تكلموا
فلن تستخرج من كلامهم جملة تفيدك في حياتك الا ما ندر.
ماذا لو جالسوا الصحابة الكرام الذين باعوا الدنيا واشتروا الاخرة مكانها
اولئك الصحب كانوا افقر الناس وتجد الواحد فيهم لا يملك الا قميصا واحدا اترى ماهم بفاعلين؟
مات التهذيب وبقيت النفس في سفول وتعذيب
.
قال الاجداد خير اللباس ما ستر
ومن ينتقد ويتمظهر تجد ان عورته غير مستورة لا لفقر وحاجة وانما تقليدا لعبدة الشيطان.
للاسف الكلام في هذا لا ينفذ.


والاخرة خير وابقى.

 

[yyoucef]

قالَ [ ابْنُ] مَسْعُودٍ رَضِيَ اللَّهُ عَنْهُ: البَلاءُ مُوَكَّلٌ بِالقَوْلِ و[لَوْ] سَخِرْتُ مِن كَلْبٍ خَشِيتُ [أنْ] أُحَوَّلَ كَلْبًا؛ وقالَ القُشَيْرِيُّ: ما اسْتَضْعَفَ أحَدٌ أحَدًا إلّا سُلِّطَ عَلَيْهِ، ولا يَنْبَغِي أنْ تَعْتَبِرَ بِظاهِرِ أحْوالِ النّاسِ؛ فَإنَّ [فِي] الزَّوايا خَبايا، والحَقُّ سُبْحانَهُ يَسْتُرُ أوْلِياءَهُ في حِجابِ الظِّنَّةِ،

 

[أم أُنٌَيسة]

وعليكم السلام ورحمة الله وبركاته
اولا بارك الله فيك وجزاك كل خير وجعل كل حرف في ميزان حسناتك
ثانيا الحمد لله الذي عافانا مما ابتلاهم وفضلنا على كثير ممن خلق تفضيلا كثيرا ونسال الله الهداية والثبات لنا ولكل امة محمد صلى الله عليه وسلم
واخيرا، لا يجوز احتقار الناس لاي سبب كان
ولا يجوز الحكم على الناس لاي سبب كان
انما نحكم على تصرفاهم معنا وليس شخصهم
ومن يحكم على المظهر المشكل فيه وليس في الشخص الذي حكم عليه
وان الله يمهل ولا يهمل وليتاكد ذلك الذي يضحك على الناس لاي سبب كان سياتي يوم ويكون هو من يتم الضحك عليه
والله امر غريب عجيب، لا فرق بين عربي ولا عجمي الا بالتقوى
لكن للاسف ..
لم اجد ما اقوله صدقا
ارجو تقبل مروري
تحياتي احترامي وتقديري لشخصكم الكريم ​

 

[ليليا مرام]

السلام عليكم خويا سامي
انا لو كنت مشرفة عالقسم الموضوع ييتحق ختم تميز
الناسفيهم تشراك الفم يحكمو على كلشمن مظهر مخلين حياتهم وعايسين حياة الناس فكلش لو جات مشكلة صباط وسورفات معليش علاه الاوروبيين خير منا تقدمو وطورو ومالغري ماراهمش مسلمين خاطر كل واحد عايش لنفسو اخنا يخلو حياتهم ويعيشولك حياتهم حياتهم حرام فالحرام ويجو يفتو علينا احنا وما نعرف شكون وكلهم يفتو راهي جنة ونار نتاع ربي ويحاف ويقسم بربي فلان رايح لجهنم اللي يتشوطو فيها ان شاء الاه
عن نفسي مما للقرن جاي يهدرو على لبسة اخرهمي يهدرو على افعالي يضربو عشرة ويقرصو يهدرو على كلش جمونفو كيما قالها القاوري زمان كانت هدرة ناس تهم لما كان عندهم ضمير ضرك يحلف عالستين وهو كاذب هذا زعمى يهمني واش يهدر
امالا انسان يعيش لنفسو وبس وباقي يعيا فمهم يهدر يعيا ويسكت
ميرسي سامي عالموضوع تووب وربي مع كل زوالي ومريض ومحتاج الله يقوي كل مومن ويقدرو يا حليل الناس

 

[Ma$Ter]

وعليكم السلام ورحمة الله وبركاته
انا ما نحقرش اى انسان
وما نتحملش الانسان المتكبر ونكره جدو اللول

 

[sami44]

السلام عليكم خويا سامي
انا لو كنت مشرفة عالقسم الموضوع ييتحق ختم تميز
الناسفيهم تشراك الفم يحكمو على كلشمن مظهر مخلين حياتهم وعايسين حياة الناس فكلش لو جات مشكلة صباط وسورفات معليش علاه الاوروبيين خير منا تقدمو وطورو ومالغري ماراهمش مسلمين خاطر كل واحد عايش لنفسو اخنا يخلو حياتهم ويعيشولك حياتهم حياتهم حرام فالحرام ويجو يفتو علينا احنا وما نعرف شكون وكلهم يفتو راهي جنة ونار نتاع ربي ويحاف ويقسم بربي فلان رايح لجهنم اللي يتشوطو فيها ان شاء الاه
عن نفسي مما للقرن جاي يهدرو على لبسة اخرهمي يهدرو على افعالي يضربو عشرة ويقرصو يهدرو على كلش جمونفو كيما قالها القاوري زمان كانت هدرة ناس تهم لما كان عندهم ضمير ضرك يحلف عالستين وهو كاذب هذا زعمى يهمني واش يهدر
امالا انسان يعيش لنفسو وبس وباقي يعيا فمهم يهدر يعيا ويسكت
ميرسي سامي عالموضوع تووب وربي مع كل زوالي ومريض ومحتاج الله يقوي كل مومن ويقدرو يا حليل الناس

والله عندك الحق ليليا وقت رانا فيه ينساو ارواحهم ويعسو بعضاهم
كيما يقولو الجمل ما يشوفش حدبتو ويشوف غير حدبه صاحبو
الله يهدينا
مرسي ليليا على المرور
هذ الموضوع نسيتو واحسنتم باحياىه