السلام عليكم
اخوتي في الله ادعولي ربي يبعثلي وليد لحلال لي يهنيني من الذل لي راني عايشاتو حنا 4 بنات وولد انا اكبر وحدة فيهم عندي 22 عام وخويا هذا عندو 16 عام كيما درت معاه حصلت يعاملني معاملة ..... اكرمكم الله يعيط عليا يعايرني يا..... يا ..... عذرا على المصطلحات بصح برك باه نوضحلكم وصلت بيه وين رجع يضربني ونورمال واحد مايهدر بابا نهدر معاه يقولي راه راجل ولا قتله راه يضربني يعيط عليه وصاايي هنا ينتهي الأمر والله لا راني حاسة روحي سومتي بسومة ( الحيوان )اتصورو ذرك على جال سبة تافهة ماخلاليش بالعياط والسبان وماما تسمع ونورمال هي حقيقة انا مين يقعد يعيط انا ثاني نرجعله الهدرة بويسك خلاااص كرهت وعيييت ننذل المشكل راني طفلة ماعنديش حتى وين نروح والله راني نكتب ونبكي وش ندير لعمري وين نروح شكون رح يهزني اذا دارنا راني نتهان فيها شكون لي رح يكرمني يا خاوتي والله وربي شاهد عييت خلاص كرهت الذل وش ندييييير أعطوني حل واحد ما سامع بيا نهرب نقتل روحي وش ندير رح نخرج على عقلي خممت ذرك نهز كامل قشي ونروح لبيت جدي بصح شحال يعياو يهزوني شهر شهرين عام
ادعيولي ربي يا يلمني من الدنيا هذه ونتهنى على الأقل نكون في قبري لا يذلني حد ولا نذل حد ولا يبعثلي وليد حلال يهنيني بويسك ماكانش حل اخر مانيش حتى خدامة باه نخرج نكري
وعليكم السلام ورحمة الله وبركاته
اختي....
قبل كلش هدرتي راها واقعية ومش قاصدة التجريح ولااي شي برك افهميني
الصراحة شايفة انو تفاصيل القصة ناقصة
اختي شايفة زوج اسباب للمعاملة لي تتعرضيلها :
- اما حاكمين عليك حاجة وقاعدين يعاقبوا فيك عليها { مش قصدي انك انسانة مش مليحة بالعكس يمكن سوء فهم }
- او عقليتهم هكذا { مقلتيلناش حتى اذا هوما سبق وعاملوك هكا من الضغر ولا من جديد ؟}
شوفي مش رح نبقا نفتي و ندير كوبي كولي رح نهدر ديراكت وناقشلك كل الفرضيات باسباب واقعية
فالحالتين النقاش والمواجهة هي الحل .... كيفاش؟ تابعي
ساو من السبب الاول اي اذا هوما شافو منك تصرفات مش مقبولة او شبهة او شك لمجرد فعل لاارادي منك رح يرجع الشك ينخر في قلوبهم { عارفة مجتمعنا يعني برك تهدري فتلفون مع صحبتك يجي داخل خوك تخبيه يتوسوس فاهمتني رغم انك ماعملتي شي او لمجرد يكون عندك حسابات فمواقع التواصل يروح فكرهم لبعييد } مالا لازم توضحيلهم كلش وتبعدي مواطن الشبهة على روحك عموما استقيمي في حياتك قوي صلتك بالله صلي ادعي ربي قيام الليل الصوم اسمعي محاضرات المشايخ اتثقفي جربي عادات جديدة وفعالة حرف اتعلمي شي جديد اقراي اتثقفي اوصلي اذا تقراي انجحي وضاعفي جهدك كي تعودي بدراهمك سيبون تستقلي واذا محبسة قراية ياك كاين تكوين مهني دورات جيبي ديبلوم فالحاجة لي حابتها وابداي مشروعك متبقايش ثابتة برك وتخممي بسلبية اخرجي من القوقعة هذيك
نروحو للسبب الثاني انهم هوما دايرين هكذا من النوع لي ميقدرش المراة ويشوفها نحس ولاكائن جابوه برك للقضيان وشغل الدار مبعد الزواج ... لهنا رح نقولك انو طاعة الوالدين واجب شوفي رح نجيبلك ادلة وحاجات شرعية و كاين قصص للانبياء والصحابة خذي مثال سيدنا ابراهيم بوه كان يصنع الاصنام وياما كان حاب يرجع ولده كيفه اما سيدنا ابراهيم عليه السلام شوفي للاية
{وَاذْكُرْ فِي الْكِتَابِ إِبْراهِيمَ إِنَّهُ كَانَ صِدّيقاً نَّبِيّاً . إِذْ قَالَ لأبِيهِ يا أَبَتِ لِمَ تَعْبُدُ مَا لاَ يَسْمَعُ وَلاَ يَبْصِرُ وَلاَ يُغْنِى عَنكَ شَيْئاً . يا أَبَتِ إِنّي قَدْ جَاءنِي مِنَ الْعِلْمِ مَا لَمْ يَأْتِكَ فَاتَّبِعْنِي أَهْدِكَ صِرَاطاً سَوِيّاً . يا أَبَتِ لاَ تَعْبُدِ الشَّيْطَانَ إِنَّ الشَّيْطَانَ كَانَ لِلرَّحْمَنِ عَصِيّاً . يا أَبَتِ إِنّي أَخَافُ أَن يَمَسَّكَ عَذَابٌ مّنَ الرَّحْمَانِ فَتَكُونَ لِلشَّيْطَانِ وَلِيّاً . قَالَ أَرَاغِبٌ أَنتَ عَنْ ألِهَتِي يا إِبْراهِيمُ لَئِن لَّمْ تَنتَهِ لأرْجُمَنَّكَ وَاهْجُرْنِي مَلِيّاً . قَالَ سَلَامٌ عَلَيْكَ سَأَسْتَغْفِرُ لَكَ رَبِي إِنَّهُ كَانَ بِي حَفِيّاً . وَأَعْتَزِلُكُمْ وَمَا تَدْعُونَ مِن دُونِ اللَّهِ وَأَدْعُو رَبّى عَسَى أَلاَّ أَكُونَ بِدُعَاء رَبّى شَقِيّا} [مريم: 41- 48].
لاحظي اللهجة - يا
أَبت - رغم انو قاله لارجمنك مي هو مش رد عليه ولا رفع صوته بالعكس وش قال ؟ سلام عليك ساستغفر لك ربي مليا !! شايفة درجة الحلم والبر بوالده
رح نزيدلك صبر سيدنا محمد عليه الصلاة والسلام على اذى قومه واقرب الناس له .... صبره صلى الله عليه وسلم على المشركين حينما آذوه، ورموه بالكذب، والكهانة، والسحر
صبره صلى الله عليه وسلم على فقد الأولاد والأحباب: فمات عمه أبو طالب، وتوفيت زوجته خديجة، وتوفي أولاده كلهم في حياته إلا فاطمة، وقتل عمه حمزة
وعن عروة بن الزبير قال: قلت لعبد الله بن عمرو بن العاص: أخبرني بأشد شيءٍ صنعه المشركون برسول الله صلى الله عليه وسلم؟ قال: ((بينا رسول الله صلى الله عليه وسلم يصلي بفناء الكعبة؛ إذ أقبل عقبة بن أبي معيط وهو من الكفار، فأخذ بمنكب رسول الله صلى الله عليه وسلم، ولوى ثوبه في عنقه، فخنقه خنقًا شديدًا)) رواه البخاري
شايفة وهو رسول الامة واعظم خلق الله وش صرالو ؟
نورمالمو عارفة قصة سيدنا ايوب عليه السلام والصبر على البلاء فقدان الولد والمال والجاه والصحة حتى اضطرت زوجته لبيع ظفيرتها حتى تطعمهم بعد ان كان اغنى الاغنياء
هذوا مجرد امثلة وغيرهم كثير ... ياما ناس تعذبوا وناس مروا بابتلاءات يمكن بمعاملتهم هذي ليك برك ابتلاء من عند الله حتى يثبتك على الطاعات يمكن بعد اشهر يبعتلك الزوج الصالح لي يقدرك ويتقي الله فيك مبعد ترجعي تشوفي فكامل وش جوزتي ... علابالكي تقولي الحمد لله لي فات علي هذا كامل ايه انعم ترجعي تحمدي فربي انهم عاملوك هكذا
خوك هذا لي فعمروا 16 سنة ووالديك لي قاعدين يشجعوا فيه هذا مش صح عموما لانك اكبر منه والاحترام واجب ومهما كانو الاسباب لازم يلموه يناقش بطريقة حضارية ليوم ضربك انتي بعد سنوات يمكن يتبلى عليهم هوما
اذا حنا القينا نظرة سطحية على واقعك واعتبرنا هدرتك هي السند الوحيد دون تفاصيل واراء بقية الافراد ... رح تكون ناقصة بزاف وكل واحد يمدلك وجهة نظر من زاوية مختلفة اما يمكن كلها متنفعكش والاسباب بزاف ومش محصورة { واحد رح يقولي اهربي مش مجبورة تتحملي وهو هنا غفل على حاجة اسمها الصبر على الابتلاء واخر يقولك رجعيلهم الهدرة وتمردي مي غفل على حاجة اسمها بر الوالدين اخر رح يقولك انتحري ايه يمكن وكاين ناس رح تنصحك بالقرب من ربي } في ظل كامل هذا الفرضيات والاسباب يبقى واقعك قضية ناقصة الاركان
واقعك وحالتك انتي وحدك لي عشتيها انتي الوحيدة لي سوفريتي وتعذبتي لكن ... حنا مرات نشوفوا الامر بطريقة غالطة صدقيني حكمنا على الامر مرات يكون غلط واحنا النساء كمخلوقات عاطفية نضخموا الامور والسناريوهات { مش معنتها اني مستصغرة مشكلتك } مثلا غلطتي وضربك باباك وخوك خاطرك الشرف تاعهم وانتي تبداي تبكي وتقولي ميحبونيش وتدخلي فاكتئاب وتكرهي روحك وتعاملي الكل ببرود وتبداي تخممي تهربي ولاتنتحري ووو مالا اقعدي مع روحك وخممي اسكوا فعلا هوما تبلاو عليك وانتي ماعملتي شي لانوا في هذه الحالة هذا اسموا ظلم !
ماكانش احن عليك بعد ربي من العباد سوى والديك كامل الناس في كفة وهوما في كفة مهما دارولك حتى لو قتلوك متنسايش شكون هوما متغلقيش باب من ابواب الجنة بعقوقك بدعوة منم قادرة تتحول حياتك لجحيم ولهنا تفكرت قصة كنت قريتها لانسان اسموا
جريج وهذا عابد هو من اولياء الله الصالحين وقد قص علينا خبره - نبينا صلى الله عليه وسلم – في الحديث الذي رواه البخاري و مسلم عن أبي هريرة عن النبي - صلى الله عليه وسلم- قال : ( لم يتكلم في المهد إلا ثلاثة ، عيسى ابن مريم ، وصاحب جريج ، وكان جريج رجلا عابدا ، فاتخذ صومعة فكان فيها، فأتته أمُّه وهو يصلي ، فقالت : يا جريج ، فقال : يا رب أمي وصلاتي ، فأقبل على صلاته ، فانصرفت ، فلما كان من الغد أتته وهو يصلي ، فقالت : يا جريج ، فقال : يا رب أمي وصلاتي ، فأقبل على صلاته ، فانصرفت ، فلما كان من الغد أتته وهو يصلي ، فقالت : يا جريج ، فقال : أي رب أمي وصلاتي ، فأقبل على صلاته ، فقالت : اللهم لا تمته حتى ينظر إلى وجوه المومسات ، فتذاكر بنو إسرائيل جريجا وعبادته ، وكانت امرأة بغي يُتَمثَّلُ بحسنها ، فقالت : إن شئتم لأفْتِنَنَّه لكم ، قال : فتعرضت له فلم يلتفت إليها، فأتت راعيا كان يأوي إلى صومعته ، فأمكنته من نفسها ، فوقع عليها ، فحملت ، فلما ولدت قالت : هو من جريج ، فأتوه فاستنزلوه ، وهدموا صومعته ، وجعلوا يضربونه ، فقال : ما شأنكم ، قالوا : زنيت بهذه البغي فولدت منك ، فقال : أين الصبي ، فجاءوا به ، فقال : دعوني حتى أصلي ، فصلى ، فلما انصرف أتى الصبي فطَعَنَ في بطنه ، وقال : يا غلام ، من أبوك ؟ قال : فلان الراعي ، قال : فأقبلوا على جريج يقَبِّلونه ويتمسحون به، وقالوا : نبني لك صومعتك من ذهب ، قال : لا ، أعيدوها من طين كما كانت ، ففعلوا ) . نورمالمو راكي فهمتي العبرة وانو سنين عبادة مشفعتش امام دعوة ام
اهيه نوصلو لقصة نخمم نهرب ... وان كانت حاليا مجرد وساوس صدقيني نزغات الشيطان على الانسان كيف تاثير المخدرات وبخبثه لي خلاه يدخل امم لجهنم اكيد مش رح يصعب عليه يضللك وتلقاي روحك فالهاوية لوين رح تهربي؟ للششارع لي ميرحمش ولا عند وحدين من فاميلتك لي قادر يعاملوك اسوء وياذوك اكثر وشعال رح يتحملوك الناس
انتي معندك غير داركم حاولي تتاقلمي { تتمسطري 
نمسخر برك ههه زعم قلم تتاقلمي ومسطرة تتمسطري } حلك انك تواجهيهم اذا عارفتهم ظالمينك ومش عاملة شي قوليلهم وش درتلكم انا ؟
وشوفي اجاباتهم يمكن سوء ظن او عندهم اسباب وحابين يحموك { صح الحماية مش هاك اما يمكن هكا طريقتهم } حاولي تقنعيهم بافعالك ان اهل للثقة { افعال مش برك اقوال } ومتخليش الشيطان يضخملك الامر ويخليك تعصيهم
خوك بالسياسة وباللين حني عليه انتي الاكير يمكن هو فمرحلة المراهقة يمر بضغط ومش لاقي لمن يحكي يمكن عندو مشاكل عاطفية او واقعوا فرض عليه هكا يتصرف { يعني تنفيس الغضب } يمكن متاثر باصحابو يمكن برك حاب يثبت روحو كرجل { هي صح مش هكا يثبتوا } انما مش راهوا واعي والرجل اهم شي عندوا كبرياؤو كي تردي عليه معنتها تجرحيلهم فكرامته وكبرياءه ويقول كيفاه طفلة ترد وتتحداني مالا تجيب نتائج عكسية وضرب واذى جسدي مالا وريلو المعاملة للمراة كيفاش في ديننا لازمك تفنعيه ديري قران فالدار كوني سعاد البيت وسيي تنشري الفرح ... حاسبة عاجبهم جو النكد والحزن لي فيه ... نظمي جلسات عائلية دخليلهم ثقافة الحوار صدقيني الحب والحنان يشفي ويلين كل الجروح كلش يعدي ااما قبل كلش لازمك تصبري وتحتسبي اجر الصبر عند الله وسيبدلك الله احسن منه ورح يرزقك لدرجة انك تبكي من الفرحة صدقيني
و وليد الحلال لي تحكي عليه .... يااختاه متبقايش تخممي فالزواج تع المسلسلات متشوفيش انو لما تتزوجي رح تتهناي بالعكس راكي تهربي من واقعك ويمكن السي وليد الحلال يكون اسوء منهم هي الزواج مش غلطة اما هو تاني مش هروب من الواقع والظروف واياكي تشوفي الزواج كطوق نجاة وتشوفي اول خطيب تقدملك كفارس الاحلام تزوجي يوم تحسي روحك مراة تع دار قادرة على مسؤوليتك وتلقاي لي يصونك
حسبالك هو رح يتحملك ؟ ياو حتى واحد مايقدر يتحمل كلهم جدران مائلة كامل يملوا يعني هو يرجع للدار يستنى مراة مجهزتله عشاء الله الله وتستقبله بابتسامة وتحتوية وتخفف ضغوط العمل ولا وحدة ملي يدخل وهي تنكد عليه وها جيب كرهت اشري اديني ووو { هنا مش عليك برك نفهم فيك طبيعة الزواج }
عزيزتي ...
الحياة أكبر من يوم لم يكن على مايرام ..
أكبر من مشكلة عارضة ..
أكبر من شخص أزعجك أو آلمك..
أكبر من أي تعثر مررت به..
ولأن الحياة أكبر فإن أبواب السعادة فيها أكثر من أن تُغلق جميعها..
قد يظن إنسان أن كل أبواب السعادة قد أُغلقت في وجهه ، لأنه حصر رؤيته في الباب الذي به مشكلته فقط.
يقولك : «اذهب للمستشفى لتعرف: نعمة العافية، واذهب إلي السجن لتعرف: نعمة الحرية، واذهب إلي القبور لتعرف: نعمة الحياة، فقدر ما لديك وقل الحمدلله!» تامليها
وتخيلي شعال من طفلة يتيمة تحوس على حنان الوالدين وشعال من طفلة ارهقها السرطان وشعال من وحدة تتمنى يكون ليها اخ وتحس بدفء العائلة وغييرهم مالا احمدي ربي وركزي مع لي في يدك قبل ماتندمي ✌
ايه نزيدلك حاجة لي هي الاهم : تقديرك لذاتك !
اسمعيني نفهمك حاجة العقل حاجة تعتمد على الادراك والقناعة اذا انتي اقتنعتي بشي عقلك يصدقه نفهمك اكثر عنا العقل { مش نحكي على الدماغ كعضو مش نحكي على ذاك المخ الغوز لي نحوه للخروف فالعيد
}
- لدماغ: هو الجزء الكامل الموجود في الجمجمة والذي نعرفه جميعاً وهو أهم أجزاء الجهاز العصبي في جسم الإنسان ،
- المخ: أحد أجزاء الدماغ .
- العقل: هو ليس جزء في الدماغ وإنما عملية وصف للأنشطة والوظائف العليا في الدماغ خاصة تلك الوظائف التي يكون فيها الإنسان واعيا بشكل شخصي مثل : الشخصية، التفكير، الجدل، الذاكرة، الذكاء، وحتى الانفعال العاطفي يعدها البعض ضمن وظائف العقل. { علابيها نقولو العقل هو ما يميز الإنسان عن الحيوان وليس الدماغ }
{ قلبتها دروس عن العقل والمخ سوري
... اما لازم حتى تفهميني }
الفكر أو الإدراك أو العقل هو نقل الواقع بواسطة الحواس إلى الدماغ ... يعني انتي لما تنقلي احساسك بانك ولا شي ومش واثقة من نفسك رح تصير هذي المفاهيم واقع في ذهنك رح يصدقها وترجع حاجة مسلم بيها ومع الوقت تنتقل من الواعي للاواعي وهنا المصيبة انك انتي خلاص صرتي مقتنعة
مالا بويسك فهمتي الدينامكية تع الادراك هذي عمرك ماتزرعي افكار هكا فعقلك خاصة بينك وبين نفسك وكلام الناس لو انتي مقتنعة بعكسه رح تلاحظي انو مياثرش فيك ببساطة
قولي انا قوية جميلة متفاءلة انا صبورة
{ اخطينا من ذيك تع حوحو يشكر في روحو ههه
}
واخطيك من المقارنة وفلانة عايشة كي الاميرة وذيك شابة عليا المقارنة تولد الحسد وامراض العقول مهما كنتي طيبة وزيد لكل واحد واقع وظروف
جددي محيطك وكوني علاقات اجتماعية بناس اجابيين لانو السلبية كالعدوى
كاين اية دايم نتفكرها وتبعث داخلي طاقة اجابية - لايكلف الله نفسا الا وسعها - حاب يقولك انتي اقوى وقدرة تحملك اكبر
يقول ادهم الشرقاوي عبارة بزاف نحبها : "إنَّ اللهَ يُعْطِي أصعبَ المعَارِكِ لأقوى جُنُودِهِ أَبْدِعْ في معركَتِكَ !" تامليها
علابالي طولت وبزاف مي كان لازم اقراي وش كتبت واذا ملقتيش حل ارجعي واكتبيلنا كامل التفاصيل
عزيزتي علابالي لي تمري بيه صعب اصبري برك نتمنى تكوني احسن وترجعي تحكيلنا كيفاه تحسنت حياتك
اسمحيلي ربما كلماتي بينها عبارات قاسية مي كان لازم حتى تشوفي الواقع
ماتسمحي لاي كان يحطمك استعيني بالله وثقتك بنفسك وابداي تغيري في واقعك
اذا حابة اي شي او تتواصلي ممعايا او معي اي احدا هاوليك المنتدى سواءا تسجلي او من عضوية مشكلتي وحتى وحابة تتواصلي معي مش مشكل نمدلك حساباتي فيس انستغرام اميل لي تحبي
نستحقاك تعرفي بلي كامل رانا معاك ونحبوك اوكااي ياجميلة ❤
