عرضتني صحبتي لعرسها.. عجاائب

[Jorh]

السلامو عليكو
ازيكو ولا واش راكم اليوم..ان شاء الله بخير
المهم اليوم اختكم عرضوها لعرس احم احم... وحدة كانت تقرا معايا في السيام عرسها السمانة الجاية... وانا بالتأكيد بالتأكيد منيش راح نروح ميحبش الشيخ وكذلك لعجوز وكذلك الاسود لي عايشة معاهم .... المهم هذي الحمد لله واحد مكان في الدار ووصيت خويا ميقولش لامي خصووصا خخ والله كي تبدا تهدر نحس روحي عمري خمسين سنة... يو خليونا من هذي
العام لي.فات تانيك كانت تقرا معايا وحدة كي دخلو امي وابي كانو في مشوار...عالدخلة قاتلي امي صحبتك راح تتزوجي ا ونتي قعدت..له له هذي كون تعرف لي جا خوها يعرضني للعرس واش تقول... ولي داها كذا وشرطها كذا... ها لقراية واش راح ديرلك تدي راجل تخدمي عليه تسلكيلو لكرا تشريلو طونوبيل وهو قاعد في الدار /امي من ولات تسمع لحكايات هذو وولات تقولي ولاختي لقراية مديرلك والوا /يو المشكل امي علابيلي بلي تهدر برك كي تلحق للصح تخبيني ههه المهم
البنات في زوج عمرهم 16يعني قدي في العمر...
واش رايكم في الزواج المبكر لهاتان البنتان وكثير من البنات واش رايكم في هدرة امي على القراية نتع الطفلة واش رايكم في راجل المخلوقة لي ذكرتها لفوق...
...
...
ومع العلم هاني نستنا وكتاه يحن علينا تبون ويقلبنا نقراو..والله والفت القعاد في الدار مشكل ههه ارائكم تهمني ❤❤

 

[إلياس]

ربي يهدي والديهم لزوجهم في هذا السن المبكر خاصة إذا زوجتا باكبر منهم بكثير من السنوات
الى متى ذلك هذا يتاجر ببناته
واش نقولك اختي ريحي في دار خير
سلمت يداك على الطرح

 

[أم أُنٌَيسة]

وعليكم السلام ورحمة الله وبركاته
موضوعك تطرق لامور مهمة كثيرة، بارك الله فيك وجزاك خيرا وجعله في ميزان اعمالك الحسنة
ساقول رايي ناحية الزواج المبكر اولا، ثم لي عودة باذن الله ناحية باقي الامور
الزواج المبكر ليس هو الاشكال، ففي الشرع الزواج المدني يتم في اي سن والدخول بالعروس يتم خين يكون فيه لا ضرر ولا ضرار لا نفسي ولا جسدي ولا اي شيء
الاشكال هو في جهل الناس بمعنى الزواج في الاسلام وماهو اساسه وما واجب وحق كل من الزوجين ولهذا مجتمعنا في انحطاط اسري الا من رحم ربي
لي عودة باذن الله
ارجو تقبل مروري
تحياتي القلبية غاليتي
​

 

[Andy_Delort]

/
السلام عليكم
بالنسبة ليا ... الزواج في سن مبكرة
ومع هذا الجيل غالبا لن يكون ناجح
ولكن ليكن في علمك ان زواج هذا يسمى
الزواج المظني بمعنى انه بالفاتحة برك
قانونيا هي ليست زوجته بعد ...
لانها لم تتخطى السن ال 18
بمعنى انو لوكان تصرا مشاكل لا قدر الله

الزوجة ميكون عندها حتى حق من ناحية القانونية

بالنسبة لي لا انصح به .. يعني احسن شيء زواج من18 سنة وطلع ... الا في حالات نادرة
وين تصيب الراجل تراس والمراة بنت اصل يعني طفلة 16 سنة بصح عندها عقل إمراة ناضجة هنا ايه معليش ...
ولكن في هذا الجيل لا انصح بالتقمار ...

شكرا لموضوعك ⚘

 

[Jorh]

اهلا بك اخ الياس...شوف منكذبش عليك البنات هذو اصلا اصلا كانو حابين يقعدو في الدار وابائهم واش يستناو هاني مريحة ..اصلا تبون قال لنوغمبر ونوفمبر يقول لديسمبر وهي رايحة..المهم
كثر الطلاق علاه بسبب كثرة الزواج المبكر لمة يكون الراجل صغير والطفلة صغيرة..ومش جامليين عقولهم يتهدم البيت بالذراع
الاشكال ذرك وين راه والديهم مش مزيريهم على لقراية.... اصلا هوما في المنطقة لي عايشا فيه يقولك نتهناو من الطفلة وبرك
يقريوها شوي ويزوجوها وكي تطلق يديروها بونيشة خاوتها بونيشة على نساهم زاذا كان عندها ولاد تروح تخدم برا اي خدمة
باه تجيب ااصوارد لولادها باه تقريهم....المهم شكرا لمرورك الكريم

 

[sanaya]

قبل كلشي عجبتني طريقة الطرح
شوفي اختي عندي درك 29 سنة و ثلاث اولاد بنتي الكبيرة داخلة لعشر سنين الناس يحسبوها ختي كزادت مزال ملحقتش 20 سنة من جهة مكتوب ربي من جهة نربي ولادي و نا صغيرة و نهبل معاهم و بالي واسع
ولكن صدقيني و ديما نقول لراجلي مكاش حاجة ندمت عليها فحياتي اكثر من أنو خليت بابا يحبسلي لقراية فسن 15 سنة غير باش نتزوج
ونا مخ نعترف أنو انسانة عندها قدرات راجلي يقولي عندك ذاكرة حديدية حاجة متراطيها نهار سجلني فالأوتو ايكول قالو اللي نقرا عندو ياودي راها روتار حنا عندنا بزاف مللي بدينا قالو راجلي مارتي طايرة تجي روتار و تفوتهم كامل
كاين أخ ناقد من ولاية تبسة راهو يصحح فالرواية الثانية تاعي مين ذاك يقرا مواضيع نكتبهم ماعلاقاش بالرواية خترة قالي فكومنت و الله خسارة كي ماقريتيش كفاه كل هاذ الكم من المعلومات و هاذ الشغف بالعلم و ماتقرايش
احم احم وقيلا شكرت روحي بزاف خخخخخخ
بالاكي تفرطي فقرايتك اذا عندك قدرات
الحق أنا حلم الباك و الجامعة اضمحل ولكن نقرا بريفي لغات و حبست علاجال وليدي و نشالله نولي مزال
اعطي ليماك تقرا تعليقي باش تقتنع و تقدري تتزوجي و تكملي قرايتك
نولو للزواج المبكر ساديپون الطفلة و ساديپون عقلية الراجل
كاين اللي يدي وحدة صغيرة و متفهم بلي مزالها صغيرة
و كاين اللي يديها صغيرة و يحب يكون تخمامها تاع وحدة عندها ربعين سنة

 

[Jorh]

اهلا بك اخ الياس...شوف منكذبش عليك البنات هذو اصلا اصلا كانو حابين يقعدو في الدار وابائهم واش يستناو هاني مريحة ..اصلا تبون قال لنوفمبر ونوفمبر يقول لديسمبر وهي رايحة..المهم
كثر الطلاق علاه بسبب كثرة الزواج المبكر لما يكون الراجل صغير والطفلة صغيرة..ومش جامليين عقولهم يتهدم البيت بالذراع
الاشكال ذرك وين راه والديهم مش مزيريهم على لقراية.... اصلا هوما في المنطقة لي عايشا فيه يقولك نتهناو من الطفلة وبرك
يقريوها شوي ويزوجوها وكي تطلق يديروها ب خاوتها بونيشة على نساهم واذاا كان عندها ولاد تروح تخدم برا اي خدمة
باه تجيب ااصوارد لولادها باه تقريهم وتبدا الهدرة عليها نعرف وحدة والله مخلاوها حتاه رحلت من المنطقة لي عايشا فيها لمنطقة اخرى بعيدة ....المهم شكرا لمرورك الكريم

 

[Jorh]

اهلا بك اختي الكريمة... اختي هذاك بكري في عهد الرسول تزوج بامنا عائشة وهي بنت الست سنوات وسكن بها وهي بنت التسع سنوات... بحيثانو البيئة نتع بكري والبيئة نتع ذرك مش كيفكيف
حتى في العقلية تلقايها عمرها عشرين سنة ومازالها تتصرف تصرف نتع صغار........ مزالها مش جاملة عقلها همها غير تلبس وتخرج وتعيشحياتها مهمها لا في دارها ولا في راجلها واذا جابت طفل هيهييييي تمدو لامها تربيه لانو متعرفش...تربي
متعرف تقمط متعرف ترضع تجي تبدلو لكوش تعافو... وكي ميرقدش تكتلوا بالدق باه يرقد وهو عمرو مانبا عام...ايو طفل عام يتضرب... صح لاولاد الصغار حركيين بصح كامل كنا هكا.....وهي دارت هكا....بصح امها مضربتهاش.......مش بعيد تجي تغسلو كشما تقرطو...
ولا تحرقوا...
..
...
بالمعنى انو بكري كانو جاهزين جسديا ونفسيا و عقليا ايضا
بصح ذرك ربنا ولك الحمد.....
شكرا لمرور حبيبتي في انتظارك

 

[Jorh]

وعليكم السلام ورحمة الله تعالى وبركاته
اهلا بك اخي الكريم

نعرف واحد يعني قريبي... عمرو36 يحوس على وحدة عمرها
18الى 22
وهاو قعد لذرك متزوجش
بالمعنى انو البنت لما تكون صغيرة متقبلش تدي واحد كبير في العمر.... كي تخلى تدي واحد اكثر منها باربع او خمس سنين
ويكون عندو الصوارد.... كنت تكلمت عن البنت السعودية الفوق للاخت تشان زوجها امام مسجد في نفس اليوم جاوها زوج واحد صغير وعندو كومارس وواحد عمرو 33 وامام مسجد خيرت لكبير وعن اقتناع علاه لانو قاتلي الصغير مش جامل عقلوا..
قالتلي انا مش جاملة عقلي وهو كذلك بيتي يتهد ولكن اخترت لي جامل عقلو باه.. انا ثاني يتجمل عقلي بمعنى ينضج وعندها الحق مية بالمية
..
كون هنا تخير صغير ولي شعروا طالع وسروالو هابط ومقطع ومنعرف واش لانو اغرتها الدنيا...لانو مازالها متعرفش واش هو الصح لانو مازالها صغيرة لتعرف واش هو لي راح يخرج عليها

يعني اول مرة نسمع بهذي المعلومات انو بالفاتحة برك ومعندها حتى حق! شكرا للمعلومات الاضافية ولمرورك الكريم في حفظ ورعاية الرحمن

 

[Jorh]

اهلا بك اختي سنا ههه هكا باه نجذب القراء واصلا هذي طريقتي في الهدرة مهبلهم والله في الدار ههههه
اولا امي تهدر بك وهي علابالها وانا علابالي ثانيا امي عمرها56سنة مدخلتش للمدرسة اكل وكيفك ثاني تحب تقرا وتحب والله حلمها انها تقرا في المصحف..ابي ميحبهاش تخرج باه ندخلوها في محو الامية باه تقرا هاني معاها بشوي
وثالثا ربي يصلح الوالد علاه بطلتي قرايتك حبيبتي قالك حبسي بالذراع ولا كيفاه....المهم شكرا لمرورك حبيبتي في حفظ ورعاية الرحمن

 

[أم أُنٌَيسة]

اهلا بك اختي الكريمة... اختي هذاك بكري في عهد الرسول تزوج بامنا عائشة وهي بنت الست سنوات وسكن بها وهي بنت التسع سنوات... بحيثانو البيئة نتع بكري والبيئة نتع ذرك مش كيفكيف
حتى في العقلية تلقايها عمرها عشرين سنة ومازالها تتصرف تصرف نتع صغار........ مزالها مش جاملة عقلها همها غير تلبس وتخرج وتعيشحياتها مهمها لا في دارها ولا في راجلها واذا جابت طفل هيهييييي تمدو لامها تربيه لانو متعرفش...تربي
متعرف تقمط متعرف ترضع تجي تبدلو لكوش تعافو... وكي ميرقدش تكتلوا بالدق باه يرقد وهو عمرو مانبا عام...ايو طفل عام يتضرب... صح لاولاد الصغار حركيين بصح كامل كنا هكا.....وهي دارت هكا....بصح امها مضربتهاش.......مش بعيد تجي تغسلو كشما تقرطو...
ولا تحرقوا...
..
...
بالمعنى انو بكري كانو جاهزين جسديا ونفسيا و عقليا ايضا
بصح ذرك ربنا ولك الحمد.....
شكرا لمرور حبيبتي في انتظارك

وذلك ما قلته في ردي اختي الغالية
ان كانت تعرف واجباتها وووو الشرعية فالعمر الورقي ليس باشكال
واعرف بنات ورجال اصغر مني لكن ما شاء الله لا قوة الا بالله تبارك الرحمن عقولهم كبيرة واعرف كبارا في العمر عقولهم صغيره كما سبق وذكرتي
وهذا المبدا صالح لكل زمان ومكان لكن يختلف باختلاف العرف الذي هو القانون وهذا ما تقوله الشريعة
وان لم تكن تلك الفتاة عالمة بدينها وواجباتها وحقوقها ومعنى الزواج واساسه وشروطه بالنسبة لي حتى لو كانت صاحبة 30 او 40 هي غير صالحة للزواج مني انا وروح
الزواج مسؤولية عظيمة لا يحددها العمر بل تحددها المعرفة والقدرة العقلية والجسدية في اتباع قوانينه الشرعية
والاشكال في التربية غير السليمة اصلا التي لا توافق المنهج النبوي الا من رحم ربي
ولي عودة باذن الله لاكمال باقي الامور كما وعدت​

 

[ظل سيريالية]

ايه مام نا صحباتي كامل تزوجوا
لكن بقيت غي حنا نخبة تع خباشين لي زواج عدنا اخر شيىء
تاني انا ضد هاذا لانوا حتى وان تعلمت فتاة امورها تبقى ثقافتها في حياة زوجية قليلة

لانوا الان لازم الزواج تتعلمي مفهوموا من درك وكيفاه تتعاملي مع زوج و اسرة مستقلة وتعرفي تطبخي وترتبي امورك وتنوضي بكري ولازم نار تشعل

اما لي رايحة على شيعة زواج وهو لالا
فيقولك مثل

ڨعااااد الدار ولا زواج لفضايح


لذا من احسن منسبقوش امور تعلم اموراتها تثقف كي تلحق لسن 22 بعدها تزوج هكا متندم تقول وش داني او تعشي مطلقةومعها ولاد في رقبتها

 

[Jorh]

احم اهلا بك...خخخ انضمي انضمي صحاباتي نتع الابتداىي اكل في ديارهم ههه خوييا كل يوم يجيبلي عرس جديد ويقولي راكي معروضة خخخخ ههه انا مانوض بكري منعرف نطيب هههه
والله صح شكرا لمرورك حبيبتي في خفظ الرحمن