#العرضة_في_المناسبات_والأعراس

[جليلوس]

خاوتي كيراكم ان شاء الله تكونوا قاع بخير
ارواحوا اليوم نقصروا شوي نبدلوا الروتين
كيما تعرفوا قاع كي يجي الصيف تكثر فيه المناسبات والأفراح والاعراس بين العائلات
هايوا وهاد المناسبات يكثر فيها اللوم عند هادوك الناس لي ماتعرضهمش من أقارب أو جيران أو أصدقاء
ويضربولك تشنيفة طويلة وعريضة ويشدهالك الى يوم يبعثون

بصح كاينة حاجة كاينة لي من كثرة الضغط ينسى حتى اقرب الناس ليه مي علاش يزعفوا والله مافهمت
ياااناااس علاه نلوموا الناس في المناسبات يلا ماعرضوكش عندهم ووبلاك يكونوا " #عرضوك " من قبل ونتا مالبيتش ديك العرضة مارحتلهمش ؟
شفتها بزاااف عندنا سواء عند الرجال ولا عند النسا راهم كيف كيف قاع يلوموا
آسكو تحس بالشفقة من هاداك اللي عنده مناسبة وتحسن عونه إذاماعرضكش ؟
شكون هوما الناس الأولى بالعرضة ؟
وما رأيك في هاداك اللي #تعرضه ويتهرب منك ومايجيش ؟ هاد العرب كيما دير معاهم ماتسلك
وواش رايكم في هاداك اللي ينتقد طريقة عرضتك قدام الناس ؟ ​

 

[إلياس]

لي رجعة للموضوع ان شاء الله

 

[أبو عاتكة]

اولا مرحبا خونا العاقل منيش معروض بصح جيتك للموضوع بلا عرضة ازعف ولا دير واش تحب ههه.
ثانيا الدعوة ولا نقولو العرضة مقابلتها القيمة هذا واقع معاش يعني اذا عرضت انسان معناها راك عطيتو شان وقيمة ورفعت بيه ومتهمهمش الماكلة بقدر ماقيّمتو واتصلت بيه وغالبية الناس تشوف فيها من هاذ الناحية مهما كانت الحجة قوية خاصة الرجال لانو النساء عندهم ملحق ثاني هههه
بل اصبحت العرضة احيانا طريقة للانتقام وليس للم الشمل وكسر جليد الرتابة والكآبة في العلاقات.
وبما انو هاذا هو الواقع والمفهوم من العرضات للاسف فنظن لازم نعطي اهمية لحكاية العرضة شكون تعرض وشكون متعرضش او انك ياتعرض ياتبطل وديرها مقتصرة على العائلة القريبة جدا او تعرض ناس القرية كامل بيها بصبيانها بقطوطها بكلابها...الخ
وتبدا بالجيران قبل الاقارب حتى لا يحدث انشقاق وقطيعة بسبب مناسبة سعيدة مافيها لا تقسيم غنيمة او تركة لا حرب لا بترول ويحاول الانسان مينساش وماهوش كل واحد يعرض من روحو لانو مهما بررتها فلن يتقبلها منك احد.
يعني يدير نهار خاص يعرف واش عرض واش راه نسى ماهوش العرس راكب ولا الخدامة في الدار والحالة داخلة بعضاها وهو يعرض في الناس واحد يعرضو زوج خطرات وواحد ميتفكروش ياراجل كاين اللي ينسى عمو ولا خالو ولا صاحبو المقرب...

أباءنا وجدودنا ميلعبوش بالعرضة اذا قرر يدير عرضة ويفتح دارو ويعري وجهو قدام الناس تلقاه حاير في المعاريض وهمو لكبير انو مينساش واحد وتلقاه واقف عند الباب شكون جا وشكون مجاش وتلقاه نهار وطول خايف وحاير وميضحكش لانو عارف واش معنى العرضة.
الان للاسف تخلطت شوية تلقى الزوجة تخير المعاريض والبنت والابن ينتقموا... والاب مغلوب يتبع فيهم وخلاص ماهوش عارف واش راه صاير.

عن الوالد اخذتها عادة لحد الان الله يرحمو يجمعنا كلنا نحن الابناء ومعانا خاوتو وواحد من الاخوال المهم يديرلنا اجتماع باه نعرفو واش رانا راح نعرضو والعرضة بالعوايل يعني دار فلان ودار فلان ماهيش ارواح ومتجيبش فلان وفلان وكل واحد يكلفو بمجموعة وقتها مكانش البورطابل وانت تتخيل كيفاش الشونطي يكون ههه.

المهم قضية العرضة ليس أمر بسيط في رأيي واكيد فيها انعكسات كثيرة حتى الناس ولات تخاف وتقول مانعرض ماندير مشاكل لروحو.

 

[السلطانة]

العرضة للمناسبات تكون حسب الناس لي نمشيلهم
يعني متجيش وحدة متعرضنيش نعرضها! هههه
يعني انتم الرجال اكثر براءة منا حنا النسا.
لانو حنا السيدات نعاملو بالمثل.
غير اني في حالة المرض فقط
نروح نوصل المريضة او احد افراد عايلتها
لانو بالنسبة ليا المرض ميتقارنش بالافراح.
نعطيك مثال:
وحدة مجاتنيش في مناسبة مقيمتنيش ونكون انا مقيمتها نروحلها ونسقسي عليها
هنا تسمئ هي غلقت معايا الباب كي تجيني مناسبة منعرضهاش.
اما الاعراس في عادتنا كي يعود عرس كبير نعرضو الراجل يعرضوه الرجال كي تعود بلاكارط يعني يقدر يجيب مرتو واذا غير عرس صغير يعرضوه غير وحدو. والنسا يتعرضو وحدهم.

لازم مول العرس وامو واخواتو يديرو قائمة ويكتبو باه مينسوش وتولي مشاكل.


هيا تقبل مروري

 

[إلياس]

تعتبر العرضة عادة جزائرية منذ قديم الزمان، خاصة في رمضان و في الاعراس ، فمائدة الإفطار و الاعراس لا تخلو من الضيوف لكونها فضاء حميميا يجتمع فيها شمل الأسر والقرابة وحتى العائلات المتصاهرة للسهر واللقاءات حتى تعزز صلة الرحم ورابطة التآخي والتكافل من جهة فيهم بينهم خاصة في موسم الاعراس و رمضان حيث يجتمع فيها جميع افراد العائلة الكبييرة لكن يوجد شيء وحيد يشوه هذه العرضات هو التبذير الذي يجري فيها هذه السلبية الوحيدة فيها

 

[sana barhoumi]

وما رأيك في هاداك اللي #تعرضه ويتهرب منك ومايجيش ؟ هاد العرب كيما دير معاهم ماتسلك
وواش رايكم في هاداك اللي ينتقد طريقة عرضتك قدام الناس ؟

قد يكون هذا الشخص إبنة أو إبن لأم أو أب يأمره وينهاه مثال الأب في قطيعة مع أخيه فيوصي ابناءهم كان ترو خالكم الفلاني أو عمكم العلني لا تحدثونهم أو سوف أعاقبكم عقاباً شديداً وقد أطردكم من البيت هو صحيح الرزق على الله ولا طاعة لمخلوق في معصية الخالق لكن الأبناء لا حول لهم ولا قوة إلا طاعة الوالدين ويمكن تكون أنت هو الشخص يحدث عليك نفس السيناريو.

 

[kojak]

نقلك حاجه من الاخير ارضاء الناس غايه لاتدرك كون توكلهم كروفات وتشربهم البيبسي والكوكا والريد بول. يخرج فم الباب مايخلي مايقول ولذا اعرض ودير لي عليك والباقي ربي يسهل