راحولو فرانات..

[الرومانسي الجاد]

سلام ليكيب..
جامي درت سوجي هنا بصح معليش نجربو ياك باطوليس
ليووم ديبلاصيت ف ترونسبور شرق-غرب عندي مدة طويلة مطلعتش ف ترونسبور.. ايا و من زهري الشباب طلعت ف لبلايص لولين.. جينا بيا مالغري حس البكا تاع بزوز بصح معليهش الكيت و موسيقى مسمعتش حسهم.. ms لبروبلام جوست لحقنا الشلف طلع واحدالأخ الله يبارك يوزن.. كشغل فان دايك تع ليفربول راك تيماجيني.. وأنا شوي منبانش قدامو الله غالب ملي نشفا لروحي نوزن 59_60kg منفوتهاش.. طبعني لصقني فلكارو.. هو ف الحق يحكي أنتيك و دخلها بلاسياست (خليك من الغنا...الخ) مالغري نسمع كلاسيك ومام كيتماني سافا مش من نوعية رديئة مكاش حس.. شوية هكا بدا يداصر فاص آفاص وانا منحملش سورتو لي يسقسو فليديطاي بارسونال.. علاش مداير هكا لشعرك..!! نتا منين..!! وين تخدم..!! وين بيها..!! واللبسة مالها مقطعة..!! كشغل وبعد كل سؤال يرمي ضحكة هكا تع شغل يعرفني هدا شحال ولا منعرف عليه..
الفايدة لعبلي ع المورال مليح مليح.. وانا مقادرو.. كلمة زوج منزيدلوش.. حتى طاح فسوجي تاع نتوما راسيزم..!! افتجأت.. مالغري شاوية جامي وعمرهم لاكانو راسيست.. بلعكس مام حنا نسوفرو منها هاذ لعفسة..... سوجي طويل وتعمقنا فيه حتى وين توشيتو بلهدرة بدل بلاصتو.. شغل مرG مني..

حبيت نقول زوج امورات هكا برك..

-لحاجة لولة كاش عفسة طبيعية نسمان شوي.. كنت من نوع لي ياكل وميبان عليه والو.. ودوكا مام لماكلة متجيش في بالي مامبا..

- لحاجة الزاوجه.. علاه لالجيريان ديفوا يحكي بثقة كبيرة ومام يتجاوز ع لوخرين تبالو عادي.. صحانية لوجه ماشي مليحة سورتو مع وحد غريب نورمالمو.. مفهمتش علاه شي ناس يحكو بلا فرانات من سوجي لسوجي ونورمال..

ايا تهلو.. نوصل ل سطيف نزيدلكم وحدة تاع طاكسيور..
ملاحظة: الطاكسيور كائن أكثر خطورة من الأخ هذا ههه

 

[الامين محمد]

هههههه
كاين في كل بلاص هته الكائنات
اعتقد احسن حل انك من الاول ما تفتحش معاه الكلام
يعني ضربها بتشنيفة و لا لعبها اصم و ابكم هههههه

 

[أبو عاتكة]

السلام عليكم.
كاين زوج بلايص تكثر فيها الدصارة والناس تحكي في كل شي وتسقط فيها الحدود بين الناس حتى وهم غرباء على بعض في وسائل النقل + قاعة الانتظار عند الطبيب لانها اماكن مغلوقة ولوكان الناس متهدرش وتنفس على روحها بالاك ينتحرو انتحار جماعي.
وكل واحد وطريقة التفاعل والتعامل انتاعو يا اما يبقى يسمع وهو ساكت ميدخلش في الحوارات يا اما يشارك ولكن عليه ان يتحمل ما يحصل لانو متعرفش معامن راك تحكي وعقليتو والاسلم انك تحفظ نفسك وتسمع وخلاص وهذا ماأفعله انا.
حكاية عقلية الشاوية هاذي شايعة مثل كل الشائعات التي عاشت سنوات ولا يكذبها الا التعامل مباشرة باه تتيقن باللي كلمة الشاوي اعطوها بعد آخر ومعنى لايليق بها والشاوية خيار الناس وكل الجزائريين فيهم المليح والقبيح مهما كان صحراوي ولا شرقي ولا غربي.
استفسارك على السمنة وحاب تسمن مكان حتى وصفة اصبر حتى تتزوج يا اما تصحاح يا اما تندثر من كوكب الارض انت وزهرك.
وصحانية الوجه هاذي فيها اختلاف كاين اللي يهدر بنية بصح الله غالب معندوش اللسان ميعرفش يهدر بصح نيتو سليمة وكاين العبد الصامط اللي صح معندوش فرانات وحاسب روحو هو المخير وحاط روحو فيلسوف ودكتور وعالم في الفيزيا والكيميا والطياب والبالون كلش كلش ماعدا انو موش عارف انو يأذي في غيرو ويصمط المجامع.
وكاين اللي صريح ويقولها في الوجه ولايبالي متعجبوش حاجة يهدرها ميخبيهاش ميقدرش اصلا يسكت وفي وقتنا هذا الصراحة هي اللي تنجي المهم يكون الصريح صحيح ويحاسب نفسوا كيما غيروا ويبدا بنفسوا قبل غيرو.

يعكيك الصحة وتوصل بالصحة والعافية.

 

[السلطانة]

اهلا وسهلا بيك اخي

كاين ناس من اول كلمة تنطقها معاهم ينطلقو
ولايديرولك تحقيق تولي سؤال جواب
سورتو حنا النسا كارثة

هاذاك الانتظار عند الطبيب يرجع حكايات كبيرة

وبالنسبة ل السيد لي قعد حذاك
يتسمى انسان حشري
كون متحبسوش يسكنلك فراسك وتجيه نورمال


قراونا بكري قالولنا الواحد قبل ميهدر مع واحد ولاينصحو لازم يطبق مقولة:مراعاة الحال لمقتضى صاحب الحال.
ماش يبدا يلعبها ينصح وهو في ذاتو خاصاتو نصيحة باه يتعلم وقتاه ووعلاه يهدر.



تقبل مروري اخي

 

[جليلوس]

والله ياخويا رانا نعانيو معاهم هاد الطفيليين
تسكت ياكلوك بالهدرة تهدر ماتسلكش
سلاكها كيما قالك الامين تضربها بتشنيفة الرعد يضرب في نيفك وتشوف كي يشد قدرو
اسمع يلا كنت كيفي ماتقدش تشد الهدرة يضرك قلبك مكالاه تروح فالبيس طاكسي ونتا جبتها حدا شوفور وكيتمان في ودنك هدا حلها