برامج رمدان..!!

[الرومانسي الجاد]

سلامو ليكيب..
بون.. سوجي باين و يعيي ع بالي حبيت نختاصرو..
نشفا لوحد الوقت gهمونا ب جماعة لملاهي وكاميرا كاشي لمخدومة.. وصرا لي صرا.. مالا هاد لعام رانا نشوفو اطورو شوي مدو شونص ليتيك توكر ولينستا غراموز زادت غمالة الحالة كثر وكثر.. قريب رعفت من عينيا مين شت هديك تع تاكلو كاو كاو مدوها شونص بش تمثل..!! هكا ديييييراكت من شطيح والعرا والطياح ف تيك توك ل القنوات الخاصة..!!
بلا ما ننسا شي عيباد جايين دوريجين صامطين حتى في حومتو مكاش لي اعرفو بلاك وطايح ستار كيما القهوي رغيس وهدوك تاع بلاطو المزيرية كامل..
مام كاين أكبر سيري غاملة شتها ايا وزادو عماوها ب وحد دراما لي متركبش+العهر+التحرش+...
مليح لي جيت منشوفهمش مامبا.. يقلقني زواوش عند شجرة برا شومبرتي كثر منهم.. حقا وش اقولوووو..؟؟
زيدونا كش عفسة ماتستاهلش تجوز ف الtv..
اشهارات سوجي وحدوو ههه
ايا تهلوو..

 

[إلياس]

لي عودة إن شاء الله للموضوع

 

["viola"]

خخخخ ذيك الحية تلعب عالمورال منعرف علاه جابوها الناس لي قرات صحافة و تمثيل و سمعي بصري قع عظم الله أجركم من قلبي خخ

 

[أبو عاتكة]

لما تشوف الناس واش اتبع في الانترنت ومواقع التواصل بكثرة عدد المشاهدات والتتبع وتشوف واش كاينة في التلفاز تلقاها كيفكيف هوما مغلطوش يجيبولك الاكثر مشاهدة واهتمام وهاذاك هو اللي شايع في مجتمعنا. الاعلام خبزيست مراحش يشوفو مع الملتزمين والمتخلقين لانو شعبنا اصلا ميستغلش بيهم في وقت الصح لكن تحطلو مغنية ولا ممثل بهلول يجيب النهار وهو يتبع فيهم يا اما يدافع عليهم يا اما يشتم فيهم المهم هو عامل جذب الانتباه وطريقة العرض .والاعلام علابالو كاين فئة واسعة متحبش الخروج عن المألوف لكنها تتعمد الخروج حتى تخلق جو وتجلب الانتباه حتى ولو كان بالعيب والفضايح .
شعبنا فيه مايكفيه ايضا آبا با للاسف.

 

[جليلوس]

هادي هي بلادنا خويا العزيز اجياح تولي مشهور
واش نديرو نتمنى من هاد القنوات تحبس هاد الغمالة صرعونا بيها كاين ناس فاقت بيهم عدد المشاهدات نقصت لكن اليوتيب يسجل اكثر من ذلك هنا تعرف بلي الشان كي طلعو لواحد ماعندو حتى هدف يوصل وين ماوصلتش نتا القلب تعمر ولمن تقرا زابورك يا داوود
نقولوا ربي يهدي ما خلق وخلاص

 

[خديجة ph]

السلام عليكم اخي
يعني صراحة من عامين فسد الديمو تاع التلفاز و بما انو التلفاز مربوط بالنت صرنا نتفرجو من النت مباشرة
واحد ما يفجعنا ببرنامج حنا اللي نقررو واش نتفرجو من عامين ما تلوثوش عينينا ولا عقولنا بتفاهات الكاميرا المخفية تلك لا الجزائرية ولا العربية و الحمد لله العام الماضي تفرجنا برنامج سين تاع الشقيري و العام اللي قبلو برنامج احسان روعة تاني العام هذا رانا مع عمر عبد الكافي الكافي الاولاد يتابعو اليوتيوبرز اللي يلعبو العاب ماينكرافت و روبلوكس كيما بندريتا جد جد متربي و خلوق كذلك برامج تعليم الرسم للرسامة شدا و مجدي برو تاني يحبوهم من النت فليكس نتفرجو افلام للاطفال النوع تاعها كيما سالي اذا تتفكروا افلام جديدة لكن بطابع قديم من ستوديو gibli و اروع شيء لما تتفرج من النت يمكنك عمل pause و تروح تصلي تفطر تقرا ثم تكمل او تعاود البرنامج ندعوكم كلكم خاصة الاخوة اللي راحو عمرة ولا حابين يروحو الى مشاهدة برنامج احسان من الحرم رووووعة

To view this content we will need your consent to set third party cookies.
For more detailed information, see our cookies page.

قبول ملفات تعريف الإرتباط للطرف الثالث

 

[خديجة ph]

الاستوديو تاع الرسوم المتحركة للاطفال اسمه ستوديو ghibli وليس gibli كما كتبت لمن يريد مشاهدته

 

[وۣۗهۣۗہۣۗم]

الله غالب هادى هى بلادنا
الجايح هو اللى يعيش والسلعة الرخيصة هى
اللى تتباع​

 

[السلطانة]

سييييلام تاكلو الكاوكاو
اخر وحدة كنت نتوقعها يطلعوها تمثل!!

كيما تشوكينا حنا كمشاهديين فيها وفي لي علمتنا الصلاة العام لي فات! شفت مقاطع في اليوتيوب.
تاني الممثلين هاجموها وقالك يجيبو في تاع التيك توك بلاقراية للمسرح والتمثيل
وبلا تعب يعطوهم فادوار رئيسية... ودخلوهم ديار الجزايرين بكل سهولة
واين راحت الجهات المسؤولة مخصناش عفن...

يارريتهم يحبسو هنا برك
وحد الوقت رهجونا بانوش مافيا ووووو.. الخ
وذرك هاذ الكائنات الوقحة..

ربي يهديهم ويطلعوا المستوى شوي زيد رانا في افضل الشهور حرام عليهم هاذ الشي.

 

[همس الوُرود]

السلام عليكم
المشكل فالمجتمع تعنا تاني يتبع غير التفاهات يشوفو طفلة تتمهبل يبقو يحكو عليها ويضحكو كي تشوف فالفيسبوك منشور ماعندو حتى معنى ليكومونتار بالألف كون منشور تع دين ولا تع ثقافة تلق اعجاب واحد من طرف صاحب المنشور اذا كثر وكثر يكومونتيو 2 ولا 3 هادي أكثر شي اذا صارت شغل معجزة..
الناس ولات الهم تاعها تضحك وتضحك وتضحك ونسات بلي كاين وقت ضحك ووقت ثقافة ووقت دين ووقت عمل مش غير ڨصرة ولعب
نديرو مثال انسان يحب يتاجر .. كون يتاجر بالكتابات تع العلماء الثقات مثلا الاصول الثلاثة ولا كتاب القواعد الاربعة حتى لو صغار برك تع مبتدئين تلق ناس مزال مش عارفينهم ومش قاريينهم حتى شروط التوحيد ومعنى لا إله إلا الله مش معروفة او حتى كتب النحو والصرف
.. يبق هذاك التاجر مسكين حاط يد على يد وفالشهر يبيع كتاب هذا إذا صح باعو .. بصح كون يبيع وسمهم هادوك الروايات والتمسخير والخيال والقصص هادوك يلق المجتمع كلو يشريهم بيسك يحب يضيع وقت فالقراية يلي متفيدش .. أيا بلاما نحكو على ليكوسميتيك يلي ماعندهم حتى معنى غير منتجات يلي تأذي البشرة ماتحسنها ماوالو والطفلة فيها تكون زليخة نورمال ترجع فرينة اونباغسون هذاك المحل مايفرغش ..وخلي وخلي ربي يهدينا على كل حال و يثبتنا على الحق
​

 

[barca.moha]

11 شهر و هوما يوجدو هدي مسلسلات هدي خيمات هدي كاميرا كاشي منبعد يجيبولنا التفاهات و الفسق و الملاهي في التيلي المجتمع تاعنا يفسد كيما هاك تغيضك علاه دايمن نفس التفاهات و كل عام تزيد... وينتا نتسڨموا ؟؟؟؟